بقالي فترة بجرب ساعة ذكية محترمة من هواوي بسعر منطقي شوية .. مش زي الساعات اللي راجعناها قبل كده .. هتعرف تشتريها عادي متقلقش .. المهم الساعة هي Huawei Watch Fit .. ومن إسمها هي Fit هتهتم وهتحافظ على صحتك .. لو انت بتلعب رياضة فالساعة ديه هتساعدك كتير.
التصميم :-
أكتر حاجة عجبتني في الساعة دي وزنها .. وزنها خفيف في الإيد 21 جرام .. مش هتضايقك خالص في لبسها طول اليوم حرفيًا عن تجربة مع ساعات تانية كتير .. هتحس إن وزنها رايح أكتر لإنها باند مش ساعة .. بس هي ساعة مش باند.
في 3 ألوان للـStrap بتاع الساعة اللي بالمناسبة من خامة السيلكون المُريحة في الإيد بس مش Premium أوي بصراحة .. المهم بتيجي بـ3 ألوان وهما الإسود والأخضر والبينك.
والأخضر الفاتح عاجبني جدًا ومطرقع كده ولايق أكتر على إنها ساعة رياضية .. وطبعًا الساعة مُقاومة للماية لحد عُمق 50 متر مفيش تنازل في الحته دي.
الشاشة :-
شاشة الساعة تبانلك صغيرة بس هي كبيرة بالنسبة لحجم شاشات الساعات .. حجمها 1.64 بوصة من نوع AMOLED .. وكثافة البيكسلات بتاعتها 326 بيكسل لكل بوصة والشاشة من فوق فيها إنحناء بسيط اوي من الأطراف علشان يدي إنسيابية.
تعليقي الوحيد على الشاشة إن مفيش أي حاجة تحميها .. هي اللي هتاخد الخبطة كلها لو إتخبطت منك .. بس حقيقي مكنش ليها صرفه او حل من ناحية التصميم .. علشان تفضل Simple وشيك وأهم من ده كله تفضل خفيفة .. فهي حاجة قصاد حاجة.
الشاشة مُستطيلة شوية .. وده الإختلاف الظاهر عن تصميم Apple Watch وOppo Watch اللي رجعناهم قريب .. وفي نفس الوقت الشاشة المُستطيلة شكلها مش غريب خالص ومنطقي ومخلي عرض الشاشة مش كبيرة أوي علشان متبقاش مشكلة في الإستخدام.
طبعا شاشة الساعة علشان AMOLED فا هي سطوعها مُمتاز تحت أشعة الشمس .. متقلقش خالص من الحته دي.
نظام التشغيل :-
بالنسبة للـSoftware بقى فا انت لو سحبت من فوق هيظهرلك الـMenu السريع .. لو سحبت من تحت هيظهرلك الإشعارات .. بتظهرلك أي إشعارات عادي ولو جالك إتصال او أي حاجة .. بس مش هتقدر ترد من الساعة لإن مفيهاش ميكروفون ولا فيها سماعة.
السحب يمين وشمال بيظهرلك الـWidgets المُفضلة اللي غالبا بتكون حاجات مُتعلقه بصحتك زي نبض القلب ومشيت قد ايه النهاردة كعدد خطوات وكوقت ومسافة والكلام ده كله.
الساعة فيها زرار واحد بس من على اليمين بيفتحلك القائمة الكاملة لكل حاجة فيها .. طبعًا الساعة نظامها مقفول .. مش هينفع تحمل برامج بقى والكلام ده.
تقدر تربط الساعة بالموبايل بكل سهولة من خلال تطبيق Huawei Health اللي بيتسطب على أي موبايل عادي من كل شركات الموبايلات مش هواوي بس.
والـConnection بتاعها سهل جدًا ولو فرضًا عايز توصلها على موبايل تاني غير موبايلك الرئيسي هتوصلها بسهولة من غير ما تعمل Reset .. الـConnection بتاعها سهل جدًا زي الـBand .. ومش صعب زي الساعات الذكية المعقدة.
نرجع تاني للساعة .. ونشوف الـWatch Face وبصراحة عاجبني أوي الـDefault بتاع الساعة اللي بيغير ألوانه كل شوية ده .. وفي أشكال تانية حلوة.
اما بالنسبة للـAlways On Display اللي بيخلي الساعة تفضل منوره فالأشكال المُتاحة أقل ومش لطيفه أوي .. وفي نفس الوقت منصحكش تشغلها لإنك هتخسر نص وقت البطارية اللي هو اصلًا جامد أوي وأكتر حاجة حلوة في الساعة دي.
تقدر من الساعة تخلي موبايلك يرن علشان لو ضايع .. تقدر تظبط الـAlarm .. تقدر تاخد صورة بكاميرا الموبايل من خلال ضغطة على الساعة .. تقدر تتحكم في درجة الـVibration تخليها شديدة أو خفيفة أو تمنعها خالص .. تقدر تتحكم في الأغاني اللي شغاله على الموبايل من خلال الساعة .. كل ديه حاجات لطيفة جدًا.
النظام الرياضي :-
تعالوا بقى نتكلم على الجانب الأهم في الساعة دي واللي مخلي إسمها Fit .. وهو النظام الرياضي اللي فيها.
الساعة هنا فيها قياس نبضات قلب وبيفضل مُستمر طول ما إنت لابسها علشان تطمن على نفسك وبيبقى في رسم بياني لليوم كله مرسوم فيه النبض بتاعك طول اليوم .. بتقيس نسبة أكسجين في الدم في ثواني .. فيها GPS .. فيها مستشعر تسارع وجيروسكوب.
المهم .. الساعة هنا فيها 44 تمرين حقيقي .. هتلاقي مُدرب بيظهرلك في الساعة ويوريلك الحركة ووقتها والمفروض تحرك بيها Calories قد ايه لو لعتبها صح .. وفي نفس الوقت بيقيسلك إنت حرقت قد ايه من خلال النبض بتاعك وبناءًا عليه تشوف انت ماشي صح ولا لأ.
طبعا تمارين كلها لطيفة جدًا وفي من أول المبتدئين لحد المحترفين تقدر تبتدي بيها من البيت مثلًا وتحافظ على صحتك شوية .. أكيد عندك نص ساعة فاضية في اليوم هتلعب رياضة من غير بقى متفتح يوتيوب وتفضل ملخوم بشاشة الموبايل ولا الكمبيوتر .. بصراحة Option جامد جدًا.
ولو انت راجل بتروح الجيم .. تقدر تشغل الساعة على مود Ors Workout .. بيقيسلك من خلال الوقت وعدد نبضات قلبك حسبة تقريبه لـ حرقت كام Calory .. كل 10 دقايق بيجيلك Notification على الساعة بـVibration خفيف جدًا .. علشان متسرحش في التمرين.
ده غير إن من خلال نبض قلبك يبقلك انت في أني مرحلة .. مرحلة التسخين ولا حرق دهون بسيط ولا Aerobics أنت كده بتحرق جامد .. وفي نفس الوقت لو نبضك زاد عن المنطقي في تدريب رياضي هيبعتلك تنبيه يقولك ريح شوية.
طبعا في أنظمة تدريب تانيه كتير تقدر تتعقبلك جري على مشاية أو جري حر وعجلة حرة أو عجلة جيم وسباحة وحاجات تانية كتير .. لو أنت بتلعب أي رياضة .. الساعة دي هتعجبك وهتضفلك كتير.
طبعًا الساعة بتقيس نومك وبتقيس درجة التوتر بتاعتك .. وأنا حقيقي معرفش بيتقاسوا بناءًا على أيه وبتستفاد منهم ايه .. فمش هعرف أفيدك من التجربة بتاعتي ليهم.
البطارية :-
التجربة ديه كلها بقى .. تخيل لو بطاريتك كويسة .. الـHuawei Watch Fit إستحملت معايا أسبوع كامل مش بقلعها تقريبًا .. وقت كويس جدًا جدًا .. وده إستخدامي أنا .. ممكن تقعد معاك أكتر.
والفكرة مش في كده كمان .. الساعة بتشحن في نص ساعة بس بالكامل .. يعني كمان بتشحن بسرعة.
بس لازم تشحنها بوصلة الشحن المغناطيسية اللي معاها .. هي بصراحة خفيفة وصغيرة أوي تقدر تخليها معاك في اي مكان حتى لو مسافر .. بس خلي بالك اوعى تضيع منك.
سعر الساعة :-
- الساعة سعرها الرسمي 2000 جنية.
الرأي النهائي :-
ومن الأخر فالساعة خفيفة شيك وبطاريتها قوية جدًا وشاشتها حلوة وبتقدملك المُميزات الرئيسية اللي ممكن تاخدها من أي ساعة ذكية بعيدًا عن التعقيدات والمميزات والحاجات اللي ممكن متستخدمهاش.
وفي نفس الوقت المساعد الرياضي الذكي الموجود فيها هيساعدك كتير إنك تبدأ رياضة بسهولة وتستمر عليها.
Comments