مراجعة HUAWEI Watch GT 3 – أحدث ساعة سمارت من هواوي !

سلسلة الـWatch GT تعتبر سلسلة الساعات الـSmart الأكثر نجاحًا في السوق المصري .. بقالنا فترة بنجرب الجيل الجديد منها، وبشكل عام إحتياجك من الساعة بيتلخص في شكلها ومدى راحتها في إيدك وخاماتها وبطاريتها، النهارده هنقدملكم مراجعة HUAWEI Watch GT 3 الجديدة من هواوي.


التصميم :-

ساعة Watch GT 3 محافظة على التصميم الأنيق .. خاصًة النسخة اللي الـStrap بتاعها من الجلد الفاخر جدًا .. خامات الساعة بشكل عام محترمة جدًا .. وهي مقاومة للماء لعمق 50 متر.

لو ركزت هتحس ان الساعة واخده نفس شكل GT 2 القديمة .. بس الزراير بتاعت الساعة إختلفت، واحد بقى أكبر وبيعمل مهام كتير والتاني دخل جوه جسم الساعة أكثر.

في نسختين من الساعة واحدة مقاس 42 وواحدة 46 .. وزن الساعة معقول جدًا لإنه حوالي 42 جرام من غير الـStrap والساعة مش هتدايقك تمامًا وانت لابسها.


الشاشة :-

شاشة الساعة من نوع AMOLED بقياس 1.43 بوصة بكثافة بيكسلات 326 بيكسل لكل بوصة، الشاشة سطوعها ممتاز جدًا و Sharp جدًا ومفيش أي مشاكل هتواجهها، وطبعًا في ضبط تلقائي للسطوع.

دي واحدة من أفضل الشاشات اللي جربناها في ساعة من هواوي حتى الأن!


السوفت وير والإستخدام :-

الساعه بتشتغل على أي موبايل Android او IOS مش شرط موبايل من هواوي، كل اللي عليك انك تحمل تطبيق Huawei Health وتظبط الإعدادات بتاعت الساعه.

الـGT 3 بتشتغل بنظام Harmony OS زي كل منتجات هواوي الجديدة .. النظام سلس وسريع جدًا .. والـNavigation بتاعه او انك توصل لحاجة انت عايزها لطيف وسريع اوي .. وبتقدر تقرأ الرسائل على الساعه باللغة العربية عادي.

هواوي استغلت الزرار الكبير إستغلال مظبوط في انك بتفتح الـMenu وتلف الزرار وتتحكم في حجم أيقونات الواجهة بتاعتك وتتحرك باللمس بسرعة توصل للي انت بتدور عليه في الواجهة.

الزرار الي تحت اللي داخل شوية في جسم الساعة ده Short Cut تقدر تخصصه لأي حاجة .. الإفتراضي بتاعه بيفتح الـWorkout .. والأداء بتاع الساعة ممتاز جدًا.

هواوي كمان غير المستشعرات بتاعت الساعة واستخدمت جيل جديد أدق وأفضل بكتير في التتبع وقياس مؤشراتك الحيوية زي النبض ونسبة الأكسجين، وفعلًا انا لاحظت ده وأنا بستخدمها في التمرين، وكمان الـGPS بقى أدق في الساعة وكمان تقدر تقيس الضغط الجوي لو هتتسلق جبال وكده.

الأول كنت احيانًا بتحس بتأخر في التتبع وانها بتتأخر على ما تعرض الرقم الفعلي الحالي، الـWatch GT 3 التأخير بتاعها في حساب نضبك قليل جدًا، بقى Real Time .. وكمان عندك أكثر من 100 نظام رياضي تقدر تعملهم من خلال الساعة، وكمان في مساعد شخصي موجود معاك وانت بتتمرن وبيقدملك نصائح.

وتقدر من خلال تطبيق Huawei Health انك تخلي الساعة تقيس نبضك بإستمرار وتبعتلك تنبيه لو قل أو زاد عن أرقام مُعينة انت محددها مناسبة لطبيعة يومك، وبرده تقدر تخليها تقيس نسبة الأكسجين في الدم وتبعتلك بيها تنبيه لو قلت عن النسبة الطبيعية اللي انت محددها.

في ميزة جديدة اتضافت بفضل المستشعرات الجديدة وهي قياس درجة حرارة الجسم، هي أرقامها أقل من درجة الحرارة في التيرمومتر، لكنها مؤشر كويس برده .. وكمان لو هتلبس الساعة وانت نايم هتقيس جودة نومك والتنفس بتاعك وانت نايم علشان لو عندك أي مشاكل في نومك تعرفها.

من خلال الـApp Gallery هتقدر تحمل تطبيقات على الساعه، والساعة بتيجي بمساحة تخزين داخلية 4 جيجا ومتوفر ليك منهم حوالي جيجا و700 ميجا .. تقدر تستخدمهم في الأغاني مثلًا.

الساعة فيها ميكروفون وسماعة وأداءهم كويس جدًا .. تقدر ترد على مكالمة جايه لك على الموبايل من خلال الساعة وتتكلم من الميكروفون بتاعها وتسمع منها اللي بيكلمك .. وكمان لو مش حابب ترد او تقفل على اللي بيتصل عليك ممكن تبعتله رسالة سريعة من الساعه.

الـWatch Faces بتاعت الساعه مميزة وجديدة .. وتقدر تحمل كتير من خلال الـHuawei Health وتغير كل شوية علشان متزهقش، وأكيد الـStrap بتاع الساعه بيتغير عادي، هو مقاسة 22 مللي للنسخة الـ64 مللي.

ميزة الـMoon Face موجودة في الساعه .. ودي ميزة بتخليك تعرف شكل القمر من خلال الساعه، وكمان تتابع حركة المد والجزر، وتتابع مواعيد الشروق والغروب.


البطارية :-

بطارية الساعة لو مشغل كل حاجه فيها هتكمل معاك أكثر من اسبوع .. ولو موقف موضوع قياس النبض ونسبة الاكسجين التلقائي هتعدي الـ10 أيام إستخدام .. وده وقت ممتاز جدًا.

معاك شاحن في العلبة .. والساعة بتشحن Wireless فا انت كده مش شايل هم انك يكون معاك الشاحن بتاع الساعه.


سعر Huawei Watch GT 3 :-

  • نسخة الـ42 مللي بسعر 4500 جنية
  • نسخة الـ46 مللي بسعر 5000 جنية

الرأي النهائي :-

الـHUAWEI Watch GT 3 بتقدملك تصميم فاخر مع وزن خفيف، وشاشة ممتازة، أداء سلس جدًا ونظام رياضي قوي وتتبع دقيق جدًا للمؤشرات الحيوية .. مع بطارية جامدة ودعم للشحن اللاسلكي.

قد يعجبك أيضا...

Comments

جاري التحميل...