مراجعة الساعة الذكية Honor Magic Watch 2 – هل فعلا تستحق سعرها ؟!

احنا عارفين ان معظمكم زهق من كتر الموبايلات اللي بقت شبه بعض .. وفي تركيز كبير اوي دلوقتي من شركات الموبايلات على السماعات البلوتوث والساعات الذكية ، والنهارده معانا ساعه ذكية جديدة من شركة Honor وإسمها Honor Magic Watch 2 .. هنعمل مراجعة كاملة للساعة دي وهنشوف فعلا هل هي تستاهل سعرها ولا لأ ؟

التصميم :-

بص يا سيدي .. الساعه دي الجسم بتاعها ستانلس ستيل ودي حاجه طبيعيه في الفئة دي .. وش الساعه كله معمول بطبقة زجاج 2.5D ودي حاجه مديالك شكل جمالي .. بس بصراحه الساعه دي لو خبطت في اي حاجه وانت بتتحرك بإيدك هتيجي في الزجاج علطول، مفيش فريم يغطي طبقة الازاز.

الساعه دي بقى في منها نوعين .. نوع اسمه Hebe ونوع اسمه Minos .. الفرق بينهم ان الـHebe دي هي الصغيره اللي قطر المينا فيها بيكون 42 مللي وهي دي اللي بنراجعها، وفي واحده تانيه Minos اكبر قطر المينا بتاعها بيكون 46 مللي.

بالنسبة للوزن فـوزن الـHebe صغير 29 جرام ووزن الـMinos الكبيره 41 جرام .. الاستيك او الاستراب اللي بيجي مع الساعه بيجي جلد او بلاستيك او معدن حسب الموديل بتاع الساعه .. وممكن تغيرهم بسهولة وتستخدم الاستراب بتاع اي ساعه تانيه.

بالنسبة للنسخة الي بتيجي بستراب معدن اللي معانا .. فممكن تضيقة وتوسعه على حسب مقاس ايدك .. وطبعًا الساعه ضد المياه لحد عمق 50 متر في الموديلين بتوعها فيعني متقلقش خالص من حتت المياه دي .. اغطس بالساعة زي ما انت عايز.

الشاشة :-

الشاشة هنا 1.2 بوصة في موديل الـHebe (قطر 42 مم) من نوع اوليد بجودة 390×390 بيكسل وبكثافة بيكسلات محترمه 326 بيكسل لكل بوصة .. اما الموديل الكبير الـMinos (قطر 46 مم) بيجي بشاشة بحجم 1.39 بوصة بجودة 454×454 بيكسل وبنفس كثافة البيكسلات الـ326 بيكسل لكل بوصة.

عمومًا الشاشة بتاعت الساةه سطوعها حلو جدًا تحت الشمس وكمان تقدر تتحكم في درجة السطوع بتاعت الشاشة .. تعليها لو انت عايز او ممكن تخليها Auto عشان توفر في إستهلاك البطارية.

عندك طبعًا Watch Faces او يعني اشكال للساعه كتير جدًا تقدر تختار ما بينهم عشان يبقى عندك شكل ساعه جامد جدًا وتغيره كل شوية .. كمان تقدر تخلي شاشه الساعه تفضل مفتوحه لمدة 20 دقيقة متواصل كحد اقصى على حساب استهلاك البطارية طبعا .. وكمان في Always On بيعرضلك ساعة بالوان اقل شوية تفضل شغالة على الشاشة باستهلاك بطارية أقل.

السوفت وير والأداء :-

الساعه بمعالج كيرين A1 وبصراحه اداء الساعه كويس جدًا مفيش اي تهنيجات او تقطيعات لما بتنقل في السوفت وير والقوائم.

خلينا نتكلم الاول عن ربط الساعه بالموبايل .. لو معاك اي موبايل مش شرط هونر او هواوي ممكن تحمل برنامج Huawei Health وتربط عليه الساعه .. وبتقدر تتحكم في كل اللي بتعمله الساعه من البرنامج.

اول حاجه ممكن تحمل Watch Faces جديده او يعني اشكال للساعه .. وممكن تخلي الساعه تبعتلك تنبيه لو انت قاعد مثلًا بقالك ساعه مبتتحركش .. عشان تحافظ على صحتك وتتحرك كل شوية .. والساعه كمان بتفضل علاطول تقيس النبض بتاعك طول ما انت لابس الساعه .. وممكن تظبط بيها منبه عشان تصحيك وانت لابس الساعه وانت نايم.

في كمان ميزة جامده جدًا في الساعه دي ان انت معاك 4 جيجا مساحة داخليه في الساعه نفسها .. ممكن نتقل عليهم اغاني وتوصل سماعات بلوتوث على الساعه نفسها وتسمع اغاني علطول من الساعه .. يعني لو انت في الجيم افكس بقى للموبايل خالص وحطه في الـLocker واسمع اغاني من الساعه علطول.

طبعًا اهم حاجه الاشعارات بقى .. تقدر تتحكم في البرامج اللي يظهر ليها اشعارات على الساعه .. والاشعارات بتظهر بالعربي بدون اي مشاكل.

طبعًا مش محتاج اتكلم يعني لازم تكون مفعل خاصية Raise To Wrist To Wake Screen عشان اول ما ترفع ايدك وتبص عليها تفتح.

كده خلصنا البرنامج .. بالنسبة للساعه فا انت ممكن تنزل المينيو من فوق وتدي بيظهر فيها الـShow Time اللي بيخلي الساعه متقفلش لحد مدة زمنيه اقصاها 20 دقيقة علشان اكنك لابس ساعه بجد زي ما وضحت من شوية .. بس طبعًا على حساب البطارية.

وفي إنك تمنع الساعه من اي اشعارات وفي انك تعمل Find Phone لو مش لاقي موبايلك وطبعًا تكون موصله على الساعه .. بتدوس عليها الموبايل بيعمل Vibration عشان تعرف مكانه وتوصله.

احب اشكر جدًا في مدى البلوتوث بتاع الساعه دي فعلًا مش بتفصل بسهولة خالص لو بعدت عن الموبايل.

لو سحبت من تحت بيظهرلك الاشعارات اللي مقرتهاش .. تسحب يمين وشمال هتلاقي خريطة النبض بتاعتك ودرجة الحرارة وعدد الخطوات اليوميه وواجهة تشغيل الاغاني لو موصل سماعه بلوتوث.

ندخل بقى على السيتينج هتلاقي اول حاجه ان انت توصل الـAirpods او سماعات البلوتوث زي ما قولتلك على الساعه عشان تشغل منها اغاني على طول .. كمان ممكن ترد على المكالمات من الساعه وطبعًا هتسمع على السماعات البلوتوث لإن الـVersion الـHebe (الصغيرة بقطر 42 مم) اللي احنا بنجربها مفيهاش مايك وسماعه داخليه في الساعه نفسها.

انما الـMinos النسخة الأكبر الي بقطر 46 مم من الساعه دي فيها مايك وسماعه تقدر ترد بيهم على المكالمات من غير ما تحتاج سماعه بلوتوث.

الساعه فيها زُرارين على الجنب .. احلى حاجه انك ممكن تخلي الزرار اللي تحت يعمل حاجه معينه زي مثلًا يظهر إشعارات او يفتح على حاجه مُعينه انت اللي بتحددها .. وده اوبشن لذيذ برده .. اما الزرار اللي فوق ده بقى ثابت وبيظهرلك كل حاجه موجوده في الساعه تقريبًا يعني.

وفي حاجات جديده زي الـStop Watch والـTimer والبوصله .. وفي بقى حاجات تانيه كتير ليها علاقه بالرياضه لو انت راجل رياضي .. عشان يعني تتـتبع خطواتك ونبضك ونومك وكل حاجه عنك.

البطارية :-

زي ما اتفقنا .. في موديلين .. الـHebe اللي معانا ده بطاريته 215 مللي امبير هتستحمل معاك حوالي اسبوع لو موصلها على الموبايل بتستخدمها يوميًا .. الموديل التاني الـMinos الكبير بطاريته 455 مللي امبير هيستحمل حوالي اسبوعين شغل وده وقت ممتاز جدًا في حتت الساعه الذكيه.

وطبعًا لازم تبقى عارف ان الساعه الذكيه دي او معظم الساعات الذكيه بيجي معاها شاحن مُختلف يعني مش هتقدر تشحن الساعه علطول من اي واحد صاحبك معاه شاحن ولا من شاحن الموبايل بتاعك .. ليه بقى ؟

لإن هنا بيبقى في دوك Dock معين كده بتحط عليه الساعه عشان تشحن .. والدوك اللي هنا جاي بمنفذ USB Type C .. وبيشحن في وقت من حوالي من ساعه ونص لساعتين على حسب موديل الساعه.

الأسعار :-

اسعار الساعه الرسميه للنسخة الـHebe اللي بميناء بقطر 42 مم بسعر 2700 جنيه مصري للاوستيك البلاستيك وبسعر 3700 جنيه للاوستيك المعدن .. وطبعًا الفرق في الخامه والإحساس الـPremium كبير جدا بينهم .. اما بالنسبة للنسخة الـMinos الي بقطر 46 مم بسعر 2900 جنيه مصري للاوستيك البلاستيك وبسعر 3300 جنيه للاوستيك الجلد.

ولو انت محتار ما بينهم فا انصحك طبعًا بالكبيرة الـMinos عشان مقاسها 46 مللي بتديك فخامه كده وكمان بطاريتها كبيرة وفيها كمان مايك وسماعة للمكالمات .

النسخة الـMinos الـ46 مم هتتوفر بشكل رسمي من يوم 20 فبراير 2020 اما النسخة الـHebe الـ42 مم هتتوفر يوم 27 فبراير 2020 بشكل رسمي في المحلات.

والساعة تعتبر نسخة طبق الأصل من ساعة هواوي الذكية الي نزلت من فترة وهي Huawei Watch GT2 ولكن الي بيميز ساعة الأونر انها أرخص بفرق ملحوظ.

الرأي النهائي :-

• بشكل عام .. الي عجبني في ساعة Honor Magic 2 هو التصميم بتاعها الـPremium الشيك جدًا ده .. و البطارية الكبيرة بتاعتها اللي بتقعد كتير واحسن من كل الساعات الذكية المنافسة .. والشاشة اللي سطوعها تحت الشمس حلو جدًا .. وكمان الساعه فعلًا سهلة جدًا في التعامل والإستخدام مش مُعقده في اي حاجه.

• اكتر حاجه معجبتنيش في الساعة دي هي انها محدوده شوية .. يعني مينفعش تسطب عليها ابكليشن مثلًا عشان تغير او تضيف حاجه في الساعه دي .. انا حاسس ان هي تقدر تعمل اكتر من كده بس السوفت وير قافل عليها اوي .. وطبعًا مفيش فريم يغطي طبقة الازاز بتاعت المينا للشاشة لو اتخبطت وده عيب كبير.

• وفي خبر مهم جدا من شركة Honor في مصر .. وهو ان اطلاق هاتف Honor 9x Pro بمعالج كيرن 810 هيبقا قريب جدا في مصر .. وهيبقا زي موبايل Huawei Y7p .. بدون خدمات جوجل بشكل رسمي ولكن تقدر تسطب الخدمات بتاعت جوجل بسهولة .. وهنعمل مراجعة شاملة لموبايل Honor 9x Pro قريب جدا على موبيزل.

فيديو المراجعة :-