شركة شاومي كانت عندها فئة سعرية فاضية .. وهي فئة حرفيًا مُهمة جدًا .. الفئة بتاعت 2000 جنية .. هتقولي في Redmi 9 هقولك ده أغلى من سعر 2000 جنية وقولنا كتير إن كل 100 جنية تفرق في الفئة الإقتصادية .. هتقولي في Redmi 9A هقولك ده فئة أقل ومن غير بصمة ودي حاجه مُهمة لمُستهلك الفئة الإقتصادية.
شاومي نزلت Redmi 9C علشان يكون في فئة الـ2000 جنية .. وأهم إضافة ضافها هو مستشعر البصمة الخلفي علشان ميبقاش في أي عيب جوهري في الموبايل .. وكمان في شوية إضافات بسيطة أوي في الـ9C هنعرفها مع بعض علشان نشوف هل الموبايل يعتبر واحد من أفضل الموبايلات الإقتصادية ولا لا.
التصميم :-
موبايل Redmi 9C تصميمه بيجي بخامات من البلاستيك بالكامل للظهر والفريم .. وفي تجزيعه كده في الظهر علشان يحميه من الخرابيش علشان معهوش جراب.
التصميم شكله كويس جدًا على الفئة الإقتصادية .. الكاميرا الخلفية في مُربع والمربع بارز حاجة بسيطة عن الظهر.
الموبايل بيجي بالألوان الإسود والأزرق والبرتقالي .. أنصحك تجيب أزرق او برتقالي شكلهم شيك جدًا.
ومن ناحية الوزن الـ196 جرام والتخانة الـ9 ملم فهو زيه زي ريدمي 9A بالظبط .. تحسهم نفس الشاسية.
الشاشة :-
شاشة الموبايل هنا بتيجي بحجم 6.5 بوصة من نوع IPS LCD بدقة HD+ والسيلفي موجود في نوتش في الشاشة.
وبإختصار دي نفس شاشة الـ9A بالظبط ميفهاش أي إختلاف .. وهي مازالت مقبولة لإن سعر الـ9C زاد حاجة بسيطة أوي عن الـ9A.
الشاشة سطوعها 400 شمعة وده رقم مقبول في الفئة الإقتصادية .. والشاشة ألوانها عادية .. والسوفت وير بيحاول يعزز الألوان بتاعت الشاشة شوية .. والشاشة مفيش عليها طبقة حماية ولا بيجي عليها سكرينة.
الأداء :-
شاومي إستخدمت هنا معالج ميدياتك Helio G35 تكنولوجيا 12 نانو .. ده نفس المعالج المستخدم في Realme C11.
بالمختصر المُفيد زي ما وضحت في مراجعة Realme C11 .. الـHelio G35 مفرقش حاجة عن الـG25 والإتنين مفرقوش كتير عن الـHelio P22 الإقتصادي اللي كلكم عارفينه.
الريدمي 9C في منه نسختين .. نسخة 2 جيجا رام وديه اللي جربناها .. فرق كبير في الأداء الفعلي عن الريدمي 9A من وجه نظري .. يمكن تكون الإستجابة بس أحسن حاجة بسيطة أحيانًا .. وفي نسخة تانية منه 3 جيجا رام أعتقد ديه هتكون أفضل بفرق محترم علشان الواجه تاخد نفسها شوية.
الأداء الرسومي .. لعبة PUBG بتشتغل على اعدادات جرافيك Medium وهتحتاج تنزلها لأقل إعدادات جرافيك علشان تاخد تجربة مقبولة شوية .. اما لعبة Call Of Duty برده على Low .. بس اللعبة بتشتغل بشكل مقبول شوية وتقدر تلعب بدون مشاكل على الإعدادات دي.
ومن الأخر المعالجات الإقتصادية مش بتاعت تشغيل العاب .. لو عايز تلعب Games براحتك إنت محتاج تزود شوية وتطلع لأرخص موبايل بيقدم معالج كويس في الألعاب وهو الـRedmi 9.
عوامل الأمان وعناصر اخرى :-
أهم ما يُميز الهاتف ده البصمة الخلفية .. وجودها لوحده ميزة .. لإنها غايبة عن المنافس المباشر من شركة ريلمي .. أداءها معقول ولا هي سريعة ولا هي بطيئة .. هي بس ساعات كده بحس إن الموبايل اتفاجيء لو سايبه شوية وعاوز أفتحه.
اداء الـFace Unlock برده مقبول .. الموبايل بيقعد ثانية كده يتعرف عليه ويفتح .. ولكن أداء الـFace unlock بتاع ريلمي أحسن.
الموبايل ده زيه زي Redmi 9A .. جاي بواجهة شاومي الجديدة MIUI 12 .. الواجهة تقيلة على 2 جيجا رام علشان كده نصحتك تجيب الـ3 جيجا رام .. إتكلمت شوية عن الإضافات الجديدة في واجهة شاومي الجديدة في مراجعة Redmi 9A ممكن ترجعلة.
الموبايل فيه مستشعر الضوء ومستشعر التقارب بس للأسف مفيهوش جيروسكوب.
وصوته متوسط مش عالي ومش واطي أوي .. وصوت سماعات المكالمات كويس ومقبول بس مفيش مايكروفون إضافي لعزل الضوضاء .. وكمان مفيش تسجيل مكالمات.
والـWiFi والشبكة مواجهتش معاهم مشكلة .. متوسطين .. عمومًا مشكلة الشبكات إتحلت نسبيٍا في سلسلة الموبايلات الجديدة اللي نزلت من شاومي.
البطارية :-
بطارية ضخمة بتيجي بحجم 5000 مللي أمبير .. تكمل التوليفة الإقتصادية .. هتكمل معاك 10 ساعات شاشة مفتوحة.
منفذ شحن قديم Micro USB 2.0 وشاحن بطيء 10 واط .. شحنت معايا من 20% لـ100% في حوالي 3 ساعات إلا ربع .. وقت طويل كعادة الموبايلات الاقتصادية.
وبالمناسبة دي نفس البطارية اللي موجودة في Redmi 9A بدون أي تطوير او إضافات.
الكاميرات :-
الكاميرا الخلفية ثلاثية .. 13 ميجا بيكسل بفتحة عدسة F/2.2 والعدسة التانية 2 ميجا بيكسل ماكرو فتحة عدسة F/2.4 والعدسة الأخيرة 2 ميجا بيكسل للعزل .. والسيلفي الموجود في نوتش الشاشة 5 ميجا بيكسل فتحة عدسة F/2.2.
سوفت وير الكاميرا فيه بورترية في الكاميرا الأمامية والخلفية وفيه HDR.
الكاميرات من وجه نظري هي نفس كاميرات الـ9A بالظبط مع إضافة العدسة الماكرو .. لسه أداء الكاميرات بعيد شوية عن الـRedmi 9.
الأداء مقبول على الفئة الإقتصادية ولكن شاومي معملتش نقله نوعيه في تجربة التصوير في فئة الـ2000 جنية بالموبايل ده .. ولازم تثبت إيدك شوية وانت بتصور علشان متلاقيش الصور مهزوزة .. والموبايل بيقعد شوية كده يعمل معالجة للصورة.
العدسة الماكرو اللي هنا أدائها مقبول ولكن مش بتقدر تقرب أوي من الحاجة اللي بتصورها .. ده اللي أخدت بالي منه.
ولما جربت اقارن مع Redmi 9A لاقيت نفس الصور تقريبًا .. نفس الألوان ونفس التفاصيل مفيش أي إختلافات جوهرية بينهم في مختلف أوضاع التصوير.
الكاميرا الخلفية بتقدم اداء مقبول جدًا في الإضاءات الداخلية العالية .. ولكن لما الإضاءة بتقل الأداء بيقل كتير وطبعًا مفيش Night Mode هنا.
اما السيلفي .. فهو أدائه مقبول في الإضاءات العالية .. ومُجملًا هو نفس سيلفي الريدمي 9A برده اللي قولت عليه تفاصيله حلوه في الإضاءات العاليه ولكن ألوان بشرة مش مظبوطة.
والاداء بتاع الكاميرا السيلفي بيقل جدًا في الإضاءات الداخلية على حسب درجة الإضاءة.
اما بقى بالنسبة لتصوير الفيديوهات فكالمعتاد من موبايل إقتصادي هو بيصور على 1080p@30fps ومفيش مُثبت إلكتروني .. وبرده مفيش مايكروفون اضافي لعزل الضوضاء يحسن شوية من جودة تسجيل الصوت.
شوف تجربة التصوير بالموبايل في فيديو المراجعة في أخر المقال.
سعر الموبايل :-
- نسخة الـ32 جيجا مع 2 جيجا رام بسعر 1777 جنية
- نسخة الـ64 جيجا مع 3 جيجا رام بسعر 1999 جنية
والموبايل بيدعم تركيب شريحتين إتصال مع بعض من الجيل الرابع مع كارت ميموري بحجم 256 جيجا.
الرأي النهائي :-
تطورات Redmi 9C عن الـRedmi 9A :-
- وجود بصمة خلفية
- كاميرا خلفية ماكرو إضافية
- معالج أحسن بفرق بسيط جدًا
- تصميم مُختلف وأفضل وأحدث
التطورات دي بالظبط بفرق 170 جنية مصري لو بتقارن النسخ الـ32 جيجا و2 جيجا رام مع بعض .. طب هل الفروقات ديه تستاهل فرق السعر ده ؟ .. اه بصراحة يستاهلوا كفاية البصمة لوحدها بعيدًا عن الحاجات التانية.
مميزات Redmi 9C :-
- اداء يومي مقبول
- بطارية كبيرة
- تصميم لطيف
- بصمة في الظهر
- شاشة مقبولة
- مساحة كبيرة ( في نسخة الـ64 جيجا )
حاجات ناقصة الـRedmi 9C :-
- مفيش منفذ الـType C
- مفيش دعم لشحن سريع
- مش مُوجه للألعاب
موقف Redmi 9C امام المُنافس المُباشر Realme C11 :-
- مساحة أكبر في حالة النسخة الـ64 جيجا
- بصمة خلفية
- عدسة ماكرو إضافية
- نسخة الـ64 جيجا في 9C أرخص من نسخة الـ32 جيجا في الـC11
Comments