مراجعة Infinix Hot 10 – أرخص موبايل مناسب للألعاب مع بطارية قوية !

عالم الموبايلات في 2020 مُمل شوية .. بس أكتر حاجة بسطتني في 2020 هو التقدم الكبير اللي حصل لمُعالجات الفئة الإقتصادية .. يعني بقيت تقدر تشتري موبايل بالـ2500 جنية يشغلك كل الألعاب تقريبًا .. شوفنا ده في Realme و Xiaomi .. ودلوقتي الدور على Infinix اللي شغاله على نفسها كويس جدًا واستغنوا عن صفقة المعالجات القديمة وجددوا من نفسهم وداخلين السباق بموبايل إقتصادي جديد .. ميقلش أي حاجة عن المنافسين من ريلمي وشاومي.

الموبايل هو Infinix Hot 10 اللي أحب أطمنك وأقولك إنه بيجي بمعالج Gaming إقتصادي وهو الـG70 .. وسعر إقتصادي جدًا .. وخلي بالك .. إحنا معانا Realme C3 وRedmi 9 المُنافسين بتوع الموبايل ده .. فاحنا هنقدر نقارن بينهم ونطلع رأي مظبوط جدًا في النهاية.


التصميم :-

خلينا نتفق على حاجة .. انفينكس دايمًا بتحب تخلي الشاشة بتاعتها أكبر من المنافسين .. الزبون بتاعهم بيحب كده .. لذلك Hot 10 هو أكبر موبايل إقتصادي من ناحية الحجم في الإيد .. الموبايل كبير فعلًا لإن شاشته ضخمة.

موبايل Hot 10 خاماته من البلاستيك .. ده طبيعي بالسعر ده زي المنافسين .. ولكن هنا البلاستيك لامع .. هيلم خرابيش وتبصيم بسرعه جدًا .. معجبتنيش فيه الحته دي .. بس في لمعة بتحصل على ظهر الموبايل كده بتديلك شياكة بسيطة.

لو كان مطفي زي المنافسين Redmi 9 و Realme C3 وعليه طبقة خشنة كان هيبقى أفضل .. ولكن في الأول وفي الأخر كل شركة ليها الفكر بتاعها في التصميم .. وأكيد في جراب في علبة انفنكس كالعاده علشان يحميلك الموبايل.

أما بالنسبة لشكل الكاميرات فأنا مقدر المجهود اللي إتعمل ومحطوطين في مربع ومواكبين 2020 .. ولكن شكلهم عجيب مش عارف، حاسسهم مرصوصين ورا بعض .. وكمان الفلاش تحسه كاميرا فا تحس إنك ماشي بدسته كاميرات في الظهر .. هي مش عجباني ولكن برده ممكن تعجب الزبون الإقتصادي.

الموبايل وزنه 195 جرام .. نفس الوزن بتاع المنافسين .. وتخانه الـHot 10 حوالي 8.9 ملم وده برده يعتبر زي المنافسين .. الفكرة بس زي ما قولتلك في الحجم الـHot 10 هو الأكبر.


الشاشة :-

أكبر شاشة إقتصادية، بتيجي بحجم 6.78 بوصة من نوع IPS LCD بدقة HD+ .. ولكن في نقطة تفوق بوجود شكل الشاشة الـPunch Hole .. واللي غايبة على المنافسين.

شاشة Hot 10 بالنسبة للمنافسين :-

بالنسبة للسطوع فا أعلى سطوع كان Realme C3، وفي المركز التاني Hot 10، وفي المركز الأخير كان الـRedmi 9 .. بالنسبة لأحلى ألوان فالـC3 في المركز الأول ثم Hot 10 والمركز الأخير Redmi 9.

كثافة البيكسلات أحسن واحد فيهم Redmi 9 علشان هو الوحيد اللي دقته FHD+ .. والمركز التاني Realme C3 لإن شاشته HD+ وشاشة أصغر شوية .. والمركز الأخير Hot 10 بشاشة HD+ وهي أكبر واحده.

شكل الشاشة فا المركز الأول هيبقى الـHot 10 علشان تريند الـPunch Hole .. المركز التاني الـRedmi 9 علشان الحافة السفلية أقل شوية .. والمركز التالت الـC3، حجم الشاشة .. المركز الأول Hot 10 والتاني Redmi 9 والأخير C3.

شاشة Hot 10 مش وحشة خالص ومش نقطة ضعف في الموبايل ده .. ممكن متكنش المركز الأول .. بس هي ليها نقط تفوق برده .. في الحجم الكبير والتصميم مثلًا.

وفي نفس الوقت ألوانها وسطوعها متوسطين مش هيضايقوك .. تعليقي الوحيد الدقة الـHD+ ولكن دي نفس دقة كل الموبايلات المُنافسة ماعدا بس Redmi 9 هو اللي كان فلته.

هتلاقي سكرينه بلاستيك في علبة الموبايل ممكن تركبها لحد أما تشتريله سكرينه كويسة.


الأداء :-

زي ما قلتلك في بداية المراجعة .. شركة انفينكس بتتغير .. إستخدمت معالج ميدياتيك Helio G70 بتكنولوجيا 12 نانو في الموبايل ده .. معالج Gaming إقتصادي .. وفي مراجعة Infinix Zero 8 .. وضحتلك قد ايه واجهة انفينكس خفيفة جدًا .. على حساب إن مفيهاش Animation ولا في إضافات في الواجهة.

في نفس الوقت .. الـHot 10 بيجي بـ4 جيجا رام .. وبالتبعية .. أداء الموبايل حلو جدًا .. يكاد يكون أسرع من Redmi 9 في فتح البرامج بسبب الـAnimation التقيل بتاع شاومي مش أكتر .. وتقريبا في نفس سرعة Realme C3.

الأداء الرسومي .. لعبة ببجي بتشتغل على High HD .. واللعبة بتشتغل كويس جدًا مفيش تقطيعات او تهنيجات .. لعبة كول اوف ديوتي إشتغلت على اعدادات جرافيك Medium واللعبة بتشتغل كويس جدًا.

ايوة زي C3 وريدمي 9 .. فين الجديد ؟ .. الجديد في نقطة السخونية .. الـHot 10 بيسخن أقل بفرق ملحوظ عن Redmi 9 وC3 .. وده سيناريو مش أول مرة يحصل .. برده لما جربت Infinix Zero 8 اللي بنفس المعالج الموجود في Realme 6 لاقيت الزيرو 8 بيسخن أقل بفرق ملحوظ.

فا واضح جدًا إن انفينكس إبتدت تهتم وتطور من الخامات الداخلية في الموبايلات بتاعتها علشان تعيش أكتر .. وحقيقي أنا من أول Infinix Note 7 وبعدها Zero 8 وأخرهم Hot 10 .. وأنا مبسوط من أدائهم ومش بيوصلني شكاوي كتير من المُستخدمين الحقيقين لموبايلاتهم.


عوامل الأمان وعناصر اخرى :-

بصمة في الظهر .. سريعة مش بتقل حاجة عن المنافسين .. الـFace Unlock سريع برده وميقلش أي حاجة عن المنافسين.

موبايل Hot 10 جاي بسوفت وير XOS 7.0 المبني على Android 10 .. وده نفس سوفت وير Zero 8 وفيه نفس الملاحظات بالظبط .. هتلاقي كل حاجة عن السوفت وير في مراجعة Infinix Zero 8.

الفلاش الأمامي بتاع السيلفي لمبة واحدة فقط .. بتنور بنور هادي مع الشحن، إنما غير كده مش بتنور مع الإشعارات .. المستشعرات كلها موجودة .. ضوء، تقارب، جيروسكوب.

أما بالنسبة لصوت الموبايل فا هو جاي من سماعة واحدة وإتفاجئت إن صوتها عالي .. بس التجسيم مش قد كده .. بس مُجملًا الصوت أقل حاجة بسيطة من ريدمي 9 واعلى بكتير من C3.

صوت سماعة المكالمات في Hot 10 عالي ومُمتاز وبيدعم تسجيل المكالمات .. بس مفهوش ميكروفون اضافي لعزل الضوضاء للأسف.

أما بالنسبة لقوة شبكات الـWiFi والإتصال فهو أحسن من المتوسط بشوية .. مش هتواجه معاه مشاكل.


البطارية :-

بطارية كبيرة بتيجي بحجم 5200 مللي أمبير .. أدائها كويس زي المنافسين، حوالي 9 ساعات شاشة مفتوحة .. تقل أو تزيد حسب إستخدامك.

منفذ الشحن هنا قديم Micro USB 2.0 زي الـC3 .. والشاحن المرفق 10 واط .. ولكن زمن الشحن كويس جدًا .. الموبايل شحن في ساعتين ونص بس .. وده وقت كويس جدًا على شاحن 10 واط وبطارية بالحجم ده.


الكاميرات :-

الموبايل بيجي بـ4 كاميرات في الظهر .. الأساسية 16 ميجا بيكسل والتانية 2 ميجا بيكسل للماكرو والتالتة 2 ميجا بيكسل للعزل والأخيرة 2 ميجا QVGA للمُساعدة في التصوير الليلي .. يعني مفيش Ultra Wide.

والسيلفي بيجي بدقة 8 ميجا بيكسل ومعاه فلاش قوي مزدوج.

سوفت وير الكاميرات فيه الـSuper Night Mode ولكن في الكاميرا الخلفية بس.

مُجملًا وبعد صور كتير .. أنا شايف كاميرا Hot 10 مش وحشة خالص .. الألوان ممكن تكون باهته شوية أحيانا وأحيانًا لا .. بتلاقيها مظبوطة على حسب مُعالجة الصورة اللي إتصورت .. ولكن أداء الـHot 10 في الكاميرا الخلفية متوسط بين Redmi 9 و Realme C3.

أما بالنسبة للكاميرا السيلفي فالـHot 10 هو الأضعف والأقل وسط المنافسين من ناحية جودة الألوان والتفاصيل .. وشكل الصورة عمومًا.

بالنسبة بقى لتصوير الفيديوهات فالموبايل إقتصادي .. بيصور فيديوهات على 1080p وطبعًا مفيش ثبات إلكتروني ومفيش ميكروفون اضافي لعزل الضوضاء.

شوف تجربة التصوير فيديوهات وصور بالموبايل في فيديو المراجعة في أخر المقال !


سعر الموبايل :-

سعر الموبايل الرسمي لسه متحددش .. ولكن الموبايل هيجي بنسخة واحدة بمساحة تخزين 64 جيجا مع 4 جيجا رام واتوقع ان النسخة دي تيجي بسعر 2300 جنية .. وبينفع تركب شريحتين إتصال مع كارت ميموري في نفس الوقت.


الرأي النهائي :-

مميزات Infinix Hot 10 :-

  • أداء ممتاز مع سخونية قليلة
  • مساحة ورامات كُبار
  • عوامل أمان سريعة
  • بطارية قوية و وقت شحن معقول
  • شاشة كبيرة بتصميم حديث
  • صوت عالي ومقبول

عيوب Infinix Hot 10 :-

  • كاميرا سيلفي أقل من المنافسين
  • منفذ شحن قديم
  • مفيش ميكروفون اضافي لعزل الضوضاء
  • حافة سُفلية كبيرة
  • دقة شاشة منخفضة HD+ ولكن لا بأس بذلك فلا يوجد هاتف بشاشة بدقة أعلى الا ريدمي 9

فيديو المراجعة :-

قد يعجبك أيضا...

Comments

جاري التحميل...