سلسلة الـHot من انفينكس هي سلسلة مهمة موجودة في فئة سعرية إقتصادية وبتنافس على عدد مبيعات قوي جدًا وكبير جدًا لإن دي تعتبر أكتر فئة سعرية عليها قبول في مصر .. النهارده هنقدم مراجعة Infinix Hot 10S الإقتصادي الجديد بعد تجربة إستخدام .. وهنوضحلكم أهم 3 مميزات الشركة بتقدمهم في الموبايل ده.
التصميم :-
الـHot 10S موبايل مش صغيرة .. انفينكس دائمًا بتحب تعمل موبايلات كبيرة في الفئة الاقتصادية .. الموبايل حجمه كبير في الايد وسُمك 9.2 ملم .. مفيش إعلان رسمي عن الوزن بس اتوقع في حدود الـ200 جرام.
الخامات أكيد بالكامل من البلاستيك .. عليه نقشه مختلفة كده شوية وكمان عليه طبقة طلاء ناعمة بتلمع شوية .. وانا بفضل في الفئة الإقتصادية الخامة المطفية اللي مش بتلمع علشان ميظهرش عليها الخرابيش.
عمومًا الموبايل جاي معاه جراب شفاف ناشف شوية هيحميلك الموبايل وكمان ملوش اطراف من الجنب علشان ميتخنش الموبايل أوي .. حاجة لطيفة .. و كمان هيغطي البروز البسيط بتاع الكاميرات.
الشاشة :-
الشاشة هنا مختلفة شوية .. شاشة كبيرة 6.82 بوصة IPS LCD بدقة HD+ .. مع تردد بيوصل لـ90 هيرتز وكثافة البيكسلات في الشاشة 263 بيكسل لكل بوصة.
الشاشة هنا أرقامها غريبة شوية .. شاشة بحجم كبير مع دقة مش كبيره .. وبالتالي هتتوقع بكسلة هتحصل لما تشوف محتوى وبتعمل فيه زوم مثلًا على الشاشة مقارنتا بشاشة تانية FHD+ .. او حتى شاشة تانية HD+ بس بحجم شاشة أصغر.
جودة ألوان الشاشة معقول على الفئة الاقتصادية .. مفيش حد عمومًا بيقدملك ألوان جامدة بالسعر ده .. لازم تطلع فوق الـ3000 جنية علشان تاخد شاشة نقول عليها متوسطة .. انما الشاشات الإقتصادية كلها تحت المتوسطة في الجودة بعيدًا عن الدقة كام بالظبط.
ولكن الشاشة في انفنكس هوت 10 اس عشان كبيرة فا واضح اوي الحواف كبيرة شويتين خصوصًا الحافة السفلية .. وطبعًا الشاشة بنوتش وبرده الحافة السفلية كبيرة شويتين تلاته.
الحاجه الجميلة فعلًا في الشاشة دي هي انها بتدعم تردد 90 هيرتز علشان تبقى أسرع وأسلس في الإستخدام .. وهتساعد المعالج كتير في الأداء.
الأداء :-
بالنسبة للأداء فالموبايل ده جاي باحسن معالج في فئته السعرية .. ميدياتيك Helio G85 .. تكنولوجيا 12 نانو .. والمعالج ده حلو جدا في رنج سعر 2500 جنية.
أداءه معقول جدًا وجربناه كتير في موبايلات قبل كده اغلى من كده .. وزي ما قولنا الـG85 في موبايلات بـ3000 جنية وأقل يعتبر ممتاز جدًا .. وسوفت وير انفينكس نفسه خفيف اوي .. مع المعالج اللي هنا والـ90 هيرتز هتاخد منظومة أداء سريعة اوي.
المنظومة دي بس كان ناقصها ذاكرة تخزين UFS 2.1 .. كان الموبايل حقيقي هيبقى طفرة في الاداء في الفئة دي ولكن الذاكرة هنا من النوع القديم eMMC 5.1.
ولكن اللي هيرخم عليك التجربة الإعلانات اللي في كل حته في الواجهة .. انا عارف انك ممكن تلغي الاعلانات بطريقة او بأخرى .. بس ليه يا انفينكس كل الاعلانات دي من الاول .. اتمنى الإعلانات تقل في التحديثات اللي جايه.
أداء الموبايل في الألعاب معقول .. ببجي على High HD .. اللعبة بتشتغل بشكل معقول .. هيحصل تقسيط في الفريمات أوقات قليلة جدًا .. كول اوف ديوتي على Medium Graphic والتجربة لطيفة جدا برده.
اللي هيرخم عليك شوية في تجربة الألعاب حاجتين .. الأولى زي ما قولتلك الشاشة عشان كثافة البيكسلات قليلة فا لو ركزت اوي هتحس ببكسلة بسيطة .. الحاجة التانية .. معالجات ميدياتيك فئة G إستهلاكها للبطارية عالي شوية وبتخسن شوية عن الطبيعي .. فالموبايل بيسخن شوية مع الألعاب.
ولكن المعالج بعد فترة من السخونية مش بيحصله إختناق ولا بيقل اداءه ولا اي حاجة .. هو بس شوية سخونية واول ما تخلص لعب السخونية هيحصلها تشتيت بسهولة.
عوامل الأمان وعناصر اخرى :-
البصمة في الظهر .. كنت اتمنى تبقى على زرار الباور .. ولكن البصمة بصراحة سريعة جدًا .. والـFace Unlock سرعته متوسطة .. اعتمد على البصمة أسرع.
الموبايل جاي بـ اندرويد 11 وفيه عمل نسختين من برامج التواصل الإجتماعي .. الميزة اسمها xClone علشان هتقعد تدور عليها كتير.
نسخة مصر اللي نزلت من الموبايل مفيهاش NFC .. مفيهوش ميكروفون اضافي لعزل الضوضاء .. مفيش لمبة اشعارات .. العيوب المتكررة لـ انفينكس في الفئة الاقتصادية.
صوت الموبايل Mono ولكن الصوت عالي .. بس الـBass قليل جدًا .. كنت اتمنى الـBass يبقا اعلى من كده .. مستشعر التقارب حقيقي شغال كويس جدًا .. الجيروسكوب سوفت وير وبطيء شوية.
الشبكات WiFi وشبكة إتصال ياخد تقييم فوق المتوسط .. الأداء مستقر جدا على درجة واحدة اعلى من موبايلات سامسونج واقل من موبايلات اوبو.
البطارية :-
البطارية هنا ضخمة جدا 6000 مللي أمبير بتستحمل معاك 10 ساعات .. كنت متوقع أكتر ولكن زي ما قولتلك لو هتلعب Games هتلاقي الإستهلاك بيزيد شوية خصوصًا انك هتحتاج تعلي اضاءة الشاشة علطول لان سطوعها متوسط مش عالي اوي .. ولكن اداء البطارية في المجمل كويس جدا برده.
ولكن للأسف اكبر عيب في الموبايل ده مدخل الشحن الـmicroUSB 2.0 .. مع ان كل المنافسين خلاص بقوا USB Type C واحنا في 2021 .. معرفش ليه بخلوا علينا بالمدخل الـType C.
الشاحن 10 واط بس .. ضعيف على حجم البطارية دي .. وهياخد حوالي 3 ساعات إلا ربع عشان يشحن البطارية .. وقت كبير جدًا طبعًا.
الكاميرات :-
متتوقعش اداء حلو من موبايل اقتصادي في الكاميرات عمومًا .. الكاميرا الخلفية 48 ميجا بيكسل فتحة عدسة F/1.8 .. والتانية 2 ميجا بيكسل للعزل .. والتالتة ملهاش وظيفة فعليه .. وعاملين شكل عدسة رابعة كاتبين عليها 48 ميجا بيكسل .. والسيلفي 8 ميجا بيكسل مع فلاش LED مزودج.
معالجة انفنكس في الإضاءات العالية وفي الشمس وكده لسه مش الأفضل تمامًا .. الألوان بهتانة .. الـHDR مش بيقوم بدورة بشكل سليم ودايمًا هتلاقي خلفية الصورة لاسعة .. صعب ترضى بالصور من أول مره وهتحتاج تعدل دائمًا.
التصوير في إضاءة داخلية معقول على سعر الموبايل .. كمية تفاصيل مقبولة هي طبعًا مش WOW ولكن مقبولة .. بس تتقبل الألوان اللي برده مش أفضل حاجة .. الـNight Mode بيفتح الصور شوية وبيرفع الـShadows علشان يحسسك ان الصور كويسة .. وعلى فكرة هي كويسة ومعقولة بالنسبة لفئة سعر الموبايل.
قارنت هوت 10 اس بـPoco M3 لاقيت فرق واضح لصالح شاومي في الاضاءات العالية في معالجة الصور والألوان والـHDR .. اما التصوير في اضاءة داخلية لاقيت Hot 10S قدر يجيب تفاصيل اكتر حاجة بسيطة.
السيلفي في هوت 10 اس متواضع شوية .. ألوان البشرة والمعالجة برده مش ممتازين يعني .. بس برده الاداء معقول في الاضاءات الداخلية .. وعمومًا صعب تلاقي سيلفي حلو في الفئة الإقتصادية.
بالنسبة بقى لتصوير الفيديوهات فا الموبايل بيدعم تصوير على جودة 2K وعلى 1080p مع 30 فريم في الثانية .. وطبعًا مفيش ثبات إلكتروني .. والموبايل مفيهوش ميكروفون اضافي لعزل الضوضاء.
شوف تجربة التصوير صور وفيديوهات ومقارنة مع بوكو M3 في فيديو المراجعة
سعر Infinix Hot 10S :-
- نسخة 64 جيجا مع 4 جيجا رام بسعر رسمي 2444 جنية
- نسخة 128 جيجا مع 4 جيجا رام بسعر رسمي 2699 جنية
وينفع تركب كارت ميموري بحجم 512 جيجا وشريحتين اتصال مع بعض في نفس الوقت.
الرأي النهائي :-
مميزات Infinix Hot 10S :-
- معالج أداءه كويس وأفضل من منافسين كتير
- شاشة 90 هيرتز
- بطارية ضخمة
- مستشعر تقارب كويس
عيوب Infinix Hot 10S :-
- شاشة بكثافة بيكسلات قليلة
- مدخل الشحن القديم
- شاحن بطيء جدًا
- اعلانات في الواجهة
- كاميرات ضعيفة
Comments