شركة انفينكس أطلقت لاب توب جديد في السوق المصري وهو Infinix InBook X1 ضمن مجموعة المنتجات اللي أطلقتها النهارده .. وبيتوفر اللاب توب بـ3 نسخ مُختلفة في المواصفات، هنراجع منهم النهارده أعلى نسخة بتتوفر وهنوضحلكم الفروقات بينها وبين النسخ اللي نزلت عندنا كلها.
التصميم :-
تصميم اللاب ده خفيف ورفيع .. وزنه كيلو ونص يعتبر خفيف اوي وتخانه 16 مللي .. حجمه بالنسبة لـ لاب توب تاني كبير هتلاحظ انه صغير جدًا خاصًة ان شاشته 14 بوصة بس .. لاب توب عملي جدا تقدر تاخده معاك في اي شنطة مش شرط تكون كبيرة من غير ما تحس انك شايل حاجة تقيلة.
مع الوزن الخفيف ده الشركة مُهتمة بالـFinish بتاع اللاب توب .. من بره الخامات محترمه وحاجة تحسسك قد ايه الشركة عايزه تهتم بالمستخدم بتاعها .. لكن في مشكلة وهي انك صعب تفتح الشاشة شوية .. وكمان مُفصلة اللاب توب رُفيعه شوية، لكن بشكل عام وزن الشاشة مش تقيل فا مش محتاج مفصلة كبيرة، والمفصلة بتفتح لحد 180 درجة.
ومع ذلك انفينكس محافظة على كل المداخل في اللاب توب .. على اليمين موجود مدخل USB 3.0 ومدخل USB 2.0 ومدخل Headphone ومدخل كارت ميموري مايكرو .. على الشمال موجود لمبة الشحن ومدخل شحن قديم DC ومدخل الـHDMI ومدخل USB 3.0 ومدخلين USB.
المواصفات :-
أعلى نسخة بتيجي بمعالج Core i7 1065 G7 مع معالج رسومي من انتل وهو Iris Plus مع 16 جيجا رام وهارد SSD بمساحة 512 جيجا .. وفي نسخة بسعر أرخص بتيجي بمعالج Core i5 1035 G1 وفي نسخة أرخص كمان بتيجي بمعالج Core i3 1005 G1 .. النسخة اللي بنجربها هي أعلى نسخة منهم وهي الـCore i7.
أداء اللاب توب حلو جدًا وسلس وسريع للإستخدامات الخفيفة والمتوسطة .. مفيش حد بيجيب NoteBook علشان يعمل عليه شغل مونتاج وجرافيك .. اللابات دي معمولة لإستخدام تصفح وPower Point وExcel Word .. فوتوشوب يشتغل زي الفل كمان .. ولو عايز تشغل الـPremier هيقدر يتعامل معاك على بروجكت 1080p عادي ولكن 4K هيبقا صعب.
اللاب هنا مش بيسخن بسهولة وهادي جدًا من ناحية الصوت وانت مشغله .. لحد اما تشتغل عليه جامد هتلاقي صوت المروحة ظهر شوية لحد اما تشتت المراوح وبعد كده يرجع يهدا بسرعة تاني.
بالنسبة لصوت اللاب نفسه فا هو معجبنيش أوي .. كان محتاج يبقا أعلى من كده .. عندك سماعتين Bass تحت اللاب من الجناب عشان ميتكتمش .. وفوق الكيبورد في تويتر كبير .. صوت اللاب متوزع حلو والـBass كويس ولكن محتاج يعلى عن كده شوية او شويتين.
الشاشة :-
الشاشة بتاعت اللاب توب 14 بوصة بدقة FHD+ بتردد 60 هيرتز .. الحواف حوالين الشاشة معقولة جدًا ماعدا الحافة السُفلية الكبيرة .. زوايا الرؤية كويسة وألوان الشاشة كويسة على غير المتوقع.
سطوع الشاشة بيوصل لـ300 شمعة وده رقم كويس جدًا على شاشة لاب توب صغير.
البطارية :-
بطارية 55 وات ممتازة وهتستحمل وقت كتير .. هي بتستحمل متوسط وقت من 3 لـ 7 ساعات على حسب إستخدامك، وده وقت يعتبر ممتاز بالمقارنة مع باقي اللاب توبس .. وكمان الشاحن اللي بيجي مع اللاب توب Type C سريع 65 وات بيشحن البطارية بالكامل في حوالي ساعة ونصف او ساعتين.
عناصر أخرى :-
في مستشعر بصمة أداءه سريع وهتقدر تضيف فيه أكثر من بصمة، لكن مش متوفر غير في نسخة الـCore i7 اللي كنا بنجربها، مش متوفر في باقي النسخ من اللاب توب.
هتلاقي عندك كاميرا في الشاشة من فوق جودتها 720p بس مش أفضل حاجه .. وعلشان الأمان انفينكس ضايفة زرار جانبي تقدر تفتح وتقفل الكاميرا منه .. ميزة لطيفة أوي.
في Back Light للكيبورد تقدر تطفيها وتنورها وفي درجتين للإضاءة ودي حاجه لطيفة جدًا.
سعر Infinix InBook X1 :-
- نسخة Core i3 بمساحة تخزين 256 جيجا مع 8 جيجا رام بسعر 8000 جنية
- نسخة Core i5 بمساحة تخزين 512 جيجا مع 8 جيجا رام بسعر 10000 جنية
- نسخة Core i7 بمساحة تخزين 512 جيجا مع 16 جيجا رام بسعر 14000 جنية
في حالة الحجز المُسبق هيكون في خصم 500 جنية على نسخة Core i3 ونسخة Core i5 .. اما نسخة الـCore i7 فا هيكون عليها خصم 1000 جنية، والـ3 نسخ من اللابات عليهم Windows 10 Home الأصلي ومعاهم Office .. مستشعر البصمة موجود في Core i7 فقط مش موجود في باقي النسخ.
الراي النهائي :-
بكل إختصار النسخة الرابحة في الـ3 نسخ اللي نزلت هي نسخة الـCore i5 .. هتشتريها بـ9500 جنية بعد الخصم وهتاخد لاب توب خفيف أوي وصغير ينفع للإستخدامات المتوسطة وفوق المتوسطة، لكن لو المساحة أزمة معاك هات هارد خارجي وزنه خفيف علشان ميدايقكش في الإستخدام.
Comments