مراجعة Infinix Note 8 – موبايل بشاشة عملاقة وبطارية ضخمة ولكن !

لما شركة من شركات الهواتف تنزل جيل جديد من موبايل ناجح عندها .. بيبقى عندها طريقين .. الطريق الأول تعديلات وتطويرات بسيطة في الموبايل وينزل بنفس سعر القديم .. والطريق التاني إنها تغير تركيبة المواصفات بتاعت الموبايلات تمامًا وده بيتعمل كل سنة أو سنة ونص من عمر جيل الموبايل ده وساعات بيتسبب في إنه يرفع سعر الموبايل.

النهارده هنراجع موبايل جديد من شركة انفينكس وهو Infinix Note 8 .. واللي انفينكس إستخدمت فيه الطريق الأول .. طريق التعديلات البسيطة .. وهنعرف عنه كل حاجه النهارده !


التصميم :-

خامات الموبايل بالكامل من البلاستيك .. ده المُعتاد من شركة انفينكس والمُعتاد عمومًا من الموبايلات الموجودة في الفئة السعرية دي .. معجب بشكل الظهر وتداخل المثلثات اللي فيه بدرجات لون مختلفة.

التغيير الكبير في التصميم في شكل الكاميرات .. مرصوصة في مستطيل كبير بارز شوية عن جسم الموبايل .. المستطيل حجمه كبير شوية ولكن ممكن تتقبله لإن أصلًا الموبايل كبير جدًا .. إعتبره فابلت.

بس الفكرة في الدواير الكتير أوي دي .. تحس إنك ماشي بدسته كاميرات .. هما 4 كاميرات بس الفلاش محطوط في نفس الرصة .. وكمان في دايرة ملهاش لازمة مكتوب جواها 64 ميجا بيكسل .. بصراحة مش حاسس رصة الكاميرات .. حاسسها كانت محتاجة تبقى أهدى وأقل من كده شوية .. بس هي في الأول وفي الأخر أذواق.

الموبايل جاي بأبعاد اكبر حاجة بسيطة من Infinix Note 7 اللي اصلا كان كبير .. فتأكد إنك هتمسك موبايل ضخم في إيدك حجمه كبير تخانة 9 ملم وزن معدي 200 جرام.

والموبايل كعادة موبايلات انفينكس .. بيجي معاه جراب شفاف في العلبة وسكرينة بلاستيك كمان .. انفنكس بتهتم بالحاجات ديه في علب موبايلاتها.


الشاشة :-

شاشة عملاقة بتيجي بحجم 6.95 بوصة IPS LCD وللأسف بدقة HD+ وفي ثقبين للسيلفي على الشمال .. ولسه برده الحافة السفلية بتاعت الشاشة كبيرة شوية وكانت لازم تقل عن كده.

شاشة Note 8 كسطوع تحت الشمس فهي متوسطة مش وحشة بتوصل لـ480 نتس هتقدر تشوفها بشكل منطقي تحت الشمس .. والألوان بتاعت الشاشة معقولة مش وحشة ومش مُمتازة برده .. حاجة كده في النص.

ولكن الملحوظ أكيد الدقة المنخفضة اللي بالتبعية بتترجم لكثافة بيكسلات قليلة وأخرك في الفرجة على الفيديوهات على 720p .. أنا عارف في منكم كتير مش بيزود عن 480p اصلًا بس برده علشان لو واحد محمل فيديوهات على 1080p فا مش هيقدر يستمتع بالدقة بتاعتها هنا.

ولو دققت أوي في الشاشة وقربت عينك منها اوي هتحس ببكسلة خفيفة كده في الأيقونات .. ده لو أنت من الناس اللي بتفضل تدقق يعني.

مُجملًا دي نفس شاشة نوت 7 القديم ولكن الثقب بتاع السيلفي بقى مُزدوج بدون داعي لإن العدسة التانية ملهاش إستخدام فعلي .. فأنا بصراحة شايف الثقب الواحد كان هيبقى أشيك .. بس انفنكس كانت حابه تعمل أي لقطة تطوير وخلاص.


الأداء :-

انفينكس نوت 8 جاي بمعالج ميدياتيك Helio G80 تكنولوجيا 12 نانو .. معالج حلو في الفئة السعرية دي .. بيقدم أداء كويس جدًا .. مع واجهة انفنكس الخفيفة فتأكد إنك هتاخد أداء محترم من غير مشاكل ولا تهنجيات ولا تأخيرات.

الموبايل كمان جاي زي ما متعودين من انفنكس بـ6 جيجا رام علشان الواجهة تاخد حريتها أكتر وتفتح برامج كتير من غير ما الواجهة تقفلك البرامج ديه بسرعة.

وبقول بسرعه لإنك لو سبتهم فترة ورجعتلهم هتلاقي معظمهم إتقفل علشان الواجهة تحافظلك على البطارية بتاعتك .. وعموما الـG80 الموجود في نوت 8 تطوير بسيط جدًا عن الـG70 اللي كان في الجيل القديم.

بالنسبة بقى للأداء الرسومي فا المعتاد مفيش جديد .. ببجي على High HD وبتشتغل كويس جدًا .. كول اوف ديوتي بتشتغل على Medium .. مشوفتش أي حاجة مختلفة في الأداء الرسومي اللي هنا .. ده المعتاد من معالج الـG80.

والموبايل بيسخن سخونية متوسطة مش Over ومتوزعة كويس جدًا في كل اجزاء الموبايل .. متقلقش من النقطة دي.


عوامل الأمان وعناصر اخرى :-

البصمة مدمجة بزرار الباور وسريعة ومفيهاش مشاكل .. الـFace Unlock سريع برده مفيهوش مشاكل.

. الموبايل مفيهوش لمبة إشعارات ولا في بديل عنها.

انفنكس نوت 8 جاي بواجهة XOS 7.1 المبنية على Android 10.

وكالعادة أرخم حاجة موضوع الإعلانات اللي برده بعد ما بتوقفها من Setting الواجهة هتلاقي لسه بيجيلك إعلانات من برنامج Phoenix العقيم الي متصطب على الجهاز ومينفعش تمسحه!

وفوق جمب ثقبين الشاشة .. في مساحة كبيرة، ومع ذلك لو جالك أكتر من إشعار بيظهرلك نقطة ودي معناها لازم تنزل ستارة الاشعارات علشان تشوف ايه اللي جالك .. أو تعمل Rotate هتلاقي الإشعارات ظهرت عادي .. كل ديه حاجات قديمة لسه متعالجتش في الواجهة اللي هنا.

بس الواجهة هنا إتضاف فيها إنك تقدر تعمل نسختين من برامج التواصل الإجتماعي. الموضوع اللي كنت بشتكي من غيابه في انفينكس نوت 7 القديم .

المستشعرات كلها موجودة وشغالة .. ضوء، تقارب، والجيروسكوب كمان موجود.

صوت الموبايل برده جاي Stereo زي أخوه القديم .. الصوت عالي لو يهمك درجة الصوت .. ولكن درجة النقاء مش الأفضل والتجسيم أو الـBass قليل شوية .. هو مجرد صوت عالي بس.

صوت سماعة المكالمات عالي ومُمتاز .. والموبايل بيدعم تسجيل المكالمات .. بس للأسف مفهوش ميكروفون إضافي لعزل الضوضاء.

بالنسبة لقوة الشبكات والـWiFi . فهو زي أخوه السابق الـNote 7 كويس جدًا .. ومحدش إشتكى اصلا من انفينكس نوت 7 في موضوع الشبكة.


البطارية :-

بطارية ضخمة بتيجي بحجم 5200 مللي أمبير .. أزيد 200 مللي امبير من الـNote 7 .. تستحمل معاك 10 ساعات مستريح اوي شاشة مفتوحة .. يعني يوم ونص أو يومين .. حلو جدًا.

منفذ الشحن أخيرًا بقا USB Type C بعد ما كان Micro USB 2.0 في Note 7 وإشتكينا منه .. بس جايلك نفس الشاحن الـ18 وات بيشحن البطارية في ساعتين .. وقت معقول .. بس كان نفسي يجي بشاحن أسرع 22.5 واط مثلًا.


الكاميرات :-

الموبايل جاي بـ4 كاميرات في الظهر .. الأساسية بقت بدقة 64 ميجا بيكسل فتحة عدسة F/1.8 .. والتانية بدقة 2 ميجا بيكسل ماكرو .. التالتة بدقة 2 ميجا بيكسل مُخصصة للعزل .. الرابعة بدقة 2 ميجا بيكسل للمساعدة في تصوير الفيديوهات .. يعني من الأخر مفيش عدسة تصوير واسع.

والسيلفي مزدوج، الأساسية بدقة 16 ميجا بيكسل ودي اللي ليها إستخدام .. والتانية مجرد منظر بس 2 ميجا بيكسل للعزل.

اللي لاحظته إن في بطئ كده وأنت بتتنقل بين أوضاع التصوير، مش عارف ليه .. كان محتاج يبقى أسرع من كده شوية.

جربت أصور في الشمس جنب Redmi Note 9 .. لاقيت صور نوت 8 مصفره شوية عن الطبيعي .. الموضوع ده أنا لاحظته من معظم الصور اللي بتخرج من سوفت وير الكاميرات .. أعتقد الكاميرا هنا محتاجة تحديث يظبط موضوع الإصفرار ده شوية.

جربت أصور في الظلة ولاقيت صورة نوت 9 أفضل بفرق كبير من النوت 8 .. ألوان أفضل وSkin Tone مظبوط أكتر .. نفس الكلام لما جربت أصور Portrait.

لما جربت وضع الـ64 ميجا بيكسل في نوت 8 مع وضح الـ48 ميجا بيكسل في نوت 9 .. طلع فعلًا في فرق تفاصيل لصالح الـNote 8 لكن الألوان مايلة للأصفر زي ما هي.

لما جربت أصور في إضاءة داخلية عجبني أكتر شاومي نوت 9 .. ولما جربت الـNight Mode لاقيت تحسن في الـNote 8 عن الجيل اللي فات .. بس لسه برده موصلش لأفضل حاجه والنوت 9 يكسب في النقطة دي.

وبشكل عام انا شايف ان نوت 8 اتطور عن نوت 7 من ناحية الكاميرا شوية .. بس بلاش موضوع الـ64 ميجا بيكسل ده يغريك لإن معالجة الصورة ليها دور كبير.

بالنسبة بقى للسيلفي .. موضوع الإصفرار ده هتلاقيه ملحوظ جدًا في السيلفي خاصة في الشمس .. وعلى فكرة شاشة الموبايل الإصفرار فيها مكانش واضح بالدرجة دي .. هتضطر تعمل فلتر على الصور علشان تحس إنها كويسة وتقدر تستخدمها.

لكن في الظل فالموضع بيتحسن كتير بصراحة في نوت 8 وبيطلع صور سيلفي معقولة جدًا .. وعمومًا صور السيلفي في الـ نوت 8 إتحسنت عن النوت 7 القديم في الـHDR اللي بيشتغل فعلًا واللي مكنش بيشتغل وكنت بعاني معاه في نوت 7 القديم.

في الإضاءات الداخلية .. التفاصيل بتقل كتير في النوت 8 وبتحتاج تشغل الفلاش المزدوج القوي جدًا واللي بيخلي التصوير في إضاءات ضعيفة بيطلع تفاصيل أكتر بفرق واضح عن المنافسين.

بالنسبة لتصوير الفيديوهات بالموبايل فا هو بيدعم تصوير على جودة 2K .. وبيدعم مُثبت إلكتروني لكن على جودة 1080p مع 30 فريم في الثانية .. والموبايل مفيهوش ميكروفون اضافي للأسف.

شوف تجربة التصوير بالموبايل فيديوهات وصور في فيديو المراجعة !


سعر الموبايل :-

  • نسخة واحدة بمساحة تخزين 128 جيجا مع 6 جيجا رام بسعر متوقع 3200 جنية.

الموبايل لسه متسعرش بشكل رسمي .. وبينفع تركب شريحتين إتصال من الجيل الرابع مع كارت ميموري بحجم 512 جيجا في منفذ مخصص له.


الرأي النهائي :-

انفينكس Note 8 بالنسبة لـNote 7 :-

  • معالج أقوى بفرق بسيط اوي
  • بطارية زادت حاجه بسيطة
  • منفذ الشحن بقى Type C
  • كاميرات إتحسنت شوية ( لسه محتاجه تحديث )

انفينكس Note 8 بالنسبة للمنافسين :-

  • شاشة عملاق ( لكن للأسف بدقة قليلة )
  • مساحة 128 جيجا مع 6 جيجا رام
  • معالج قوية في الفئة دي
  • صوت Stereo مقبول
  • بطارية ضخمة مع شحن سريع وType C

حاجات ناقصة الـNote 8 :-

  • معالجة الكاميرات أفضل شوية
  • إضافة عدسة Ultra Wide
  • شاشة FHD+

فيديو المراجعة :-

قد يعجبك أيضا...

Comments

جاري التحميل...