مراجعة Itel Vision 1 Pro – موبايل سعره 1500 جنية .. هيقدم ايه ؟!

النهارده هنراجع موبايل إقتصادي جدًا .. موبايل سعره أقل من 1500 جنية، هنقدملكم مراجعة Itel Vision 1 Pro .. توقع معايا كده لو موبايل سعرها أقل من 1500 جنية هتحتاج منه ايه ؟ تصميم شيك وبصمة ؟ شاشة كبيرة ؟ بطارية ضخمة ؟ هنشوف الموبايل اللي هنراجعه النهارده ده هيقدم لنا كل اللي قولتلك عليه ولا لأ !


التصميم :-

تصميم الموبايل ده أهم ما يميزه .. لو لمحته من بعيد صعب تقول انه موبايل اقتصادي بحت .. تصميمه شيك مواكب تصميمات موبايلات أغلى منه .. وانا عارف الفئة السعرية دي المُستخدم يهمه أوي يشيل موبايل شكله حلو .. ما هو مش هيبقى ولا شكل ولا اداء ؟

الخامات بالكامل من البلاستيك طبعًا .. بلاستيك مصنفر علشان الموبايل ميتخربش بسهولة .. اللون متدرج والتدريجة بتاعته حلوة .. فيه تغير بسيط في لون الظهر لما الضوء بيجي عليه .. الكاميرا الخلفية شيك واخد ستايل الموبايلات الاغلى منه .. بس طبعا نص العدسات دي مش شغالة هي شكل بس .. وطبعا البروز بتاع الكاميرا مش كبير.

الموبايل وزنه معقول جدا حوالي 185 جرام أو اقل وتخانته معقولة جدا 8.5 ملم وفي كرفات بسيطة في الظهر .. المُميز كمان علبة الموبايل بيجي فيها جراب شفاف بلاستيك ناشف علشان يحمي الموبايل .. والموبايل بيجي متركب عليه سكرينة.

معاه سماعة أذن .. هي مش ممتازة بس كويس إنها موجودة .. ومعاه الشاحن والوصلة بتاعته .. الحاجات ديه بتهم مستخدم الفئة الإقتصادية لانه لو من الأساس كان يقدر يزود ويشتري جراب وسماعة كان اشترى موبايل اغلى شوية.

بس اوحش حاجة في الموبايل ده بقى .. أنا قعدت شوية على ما اعرف أحط شريحة الإتصال .. مفيش درج خارجي .. وبعدين الظهر والفريم حته واحدة كده يعني معرفتش افتحه .. إكتشفت في الأخر إن الظهر بالفريم كلهم كده بيتفكوا علشان تركب شريحتين الإتصال وكارت الميموري .. في فتحه صغيرة أوي كده من على الجنب بتفتح منها الظهر .. مكانش فيها حاجة لو خلينا الشرائح في درج منفصل يعني .. كان هيبقى عملي اكتر.


الشاشة :-

شاشة كبيرة بحجم 6.5 بوصة من نوع IPS LCD بدقة HD+ مع نوتش Water Drop .. ومتطمعش في أكثر من كده .. شكل الشاشة النوتش وإستغلال الحواف هنا ميزة حلو جدًا على سعر الموبايل.

الشاشة مقبولة جدًا طبعًا مش أحسن تجربة رؤيا ولا أحسن تشبع للألوان لو هتقارنها بموبايلات اغلى .. ولكني شايف انها تقضي الغرض جدًا على سعره .. والمُميز كمان إن الشاشة دي مشتركة مع موبايلات تانيه كتير .. فلو لقدر الله اتكسرت تقدر تغيرها وهتلاقيها في المحلات بسعر 400 جنية أو اقل.

السطوع تحت الشمس مقبول جدًا على الفئة السعرية اللي الموبايل ده موجود فيها.

ولكن الشيء الرخم شوية إن مفيش حساس اضاءة يظبط درجة سطوع الشاشة .. هتضطر تعدلها مانيوال بايدك.


الأداء :-

الموبايل هنا جاي بمعالج رباعي النواة بتكنولوجيا 28 نانو من شركة يونيسوك .. وإسم المعالج SC9832E .. بتردد اقصى 1.4 جيجا هيرتز مع دعم لرام نوع LPDDR3 .. معالج إقتصادي بحت بس احسن شوية من المعالج الموجود في Itel P36 العادي اللي راجعناه من فتره كبيرة لو تفتكر.

أداء المعالج ده أقل شوية من الـHelio A20 الموجود في Infinix Smart 5 الاغلى 100 جنية من الموبايل ده .. والموبايل بيجي نسخة واحدة بمساحة تخزين 32 جيجا مع 2 جيجا رام مع Android GO نسخة مخففة من الاندرويد هتديلك اداء معقول على قد امكانيات الموبايل.

أول ما فتحت الموبايل جالي كمية Updates مش طبيعية .. كل تحديث مساحته تتراوح من 60 ~ 150 ميجا .. معرفش ليه كلها متجيش في تحديث واحد ونخلص .. ولكن أداء الموبايل بقى معقول بعد ما خلصت التحديثات .. لكن لو زودت المبلغ شوية هتاخد معالج A20 او P22 او G25 والمعالجات دي أدائها احسن شوية من المعالج الموجود هنا.

جربت افتح كول اوف ديوتي وشغلتها على اقل اعدادات جرافيك واللعبة اشتغلت بشكل طبيعي محستش بازمة وانا بلعب .. ببجي قللت الفريم ريت والجرافيك على الاخر وتجربة اللعب مكانتش أفضل حاجة .. في تقطيعات بتحصل لإن المعالج ده من الأخر مش بتاع ألعاب .. ومن ناحية السخونية فا متقلقش الموبايل ده مش بيسخن خالص.


عوامل الأمان وعناصر اخرى :-

بصمة في الظهر .. مش هقولها سريعة ولكن متوسطة السرعة وجودها في حد ذاته ميزة .. والـFace Unlock بطيء شوية .. خلي إعتمادك الأساسي على البصمة.

المستشعرات الرئيسية جيروسكوب وضوء مش موجودين .. هو مستشعر التقارب اللي موجود وشغال كويس.

صوت الموبايل بيجي من سماعة في الظهر مش من تحت .. المكان اللي بيتكتم لو محطوط على سطح مش مستوي .. لكن المميز ان الصوت عالي جدًا .. طبعا دوشة شوية والـBass مش اوي ولكنه عالي .. ولما فتحت الغطا اشوف السر في ايه لاقيت شبكة كبيرة للصوت فا الصوت هنا تمام.

شبكات الإتصال .. الـWiFi معقول مش قوي أوي ومش سيء .. وشبكة الإتصال نفس القصة .. قوتها معقولة ولكنها بتقدم اداء ثابت مستقر.


البطارية :-

بطارية بحجم 4000 مللي أمبير .. صغيرة شوية على اليومين دول، أدائها الفعلي حوالي 6 ساعات وشوية شاشة مفتوحة وده وقت معقول لإن المعالج بتكنولوجيا قديمة والبطارية مش كبيرة.

الشاحن المُرفق للأسف 5 وات مش 10 وات .. فا طبعًا زمن الشحن طويل شوية .. حوالي 4 ساعات وده احد عيوب الموبايل.


الكاميرات :-

متسألش كتير عنها .. كاميرا المفروض ثلاثية بس الحقيقة هي واحدة حقيقية 8 ميجا والعدستين التانين للذكاء الاصطناعي مفيش ليهم إستخدام .. والسيلفي 5 ميجا بيكسل.

سوفت وير الكاميرات فيه بورترية وده في حد ذاته كويس .. ولكن الأداء الفعلي مش قد كده خالص .. لو عاوز كاميرا تعتمد عليها لازم ترفع الميزانية بتاعتك لأكتر من 2000 جنية .. إنما بسعر الموبايل ده مش هتلاقي موبايل بيقدملك كاميرات تعتمد عليها .. الكاميرات هنا ادائها متواضع جدًا.

بالنسبة لتصوير الفيديوهات فالموبايل اخره جودة 720p لإن الموبايل إقتصادي .. وطبعًا مفيش أي نوع من أنواع الثبات .. الموبايل فيه ميكروفون واحد ومفيش ميكروفون اضافي لعزل الضوضاء.


سعر Itel Vision 1 Pro :-

  • نسخة واحدة 32 جيجا مع 2 جيجا رام بسعر 1450 جنية

والموبايل بيدعم تركيب كارت ميموري بحجم 32 جيجا في نفس الوقت مع شريحتين إتصال من الجيل الرابع.


الرأي النهائي :-

مميزات Itel Vision 1 Pro :-

  • تصميم شيك وخفيف
  • شاشة كبيرة شكلها حلو وسطوعها معقول
  • بصمة أداءها معقول
  • صوت عالي
  • علبة فيها كل الإكسسوارات

عيوب Itel Vision 1 Pro :-

  • معالج أداءه ضعيف شوية
  • سماعات في مكان سهل يتكتم
  • كاميرات أداءها متواضع كعادة الفئة السعرية دي

الموبايل ده مناسب أكتر لإنه يكون هدية لحد كبير في السن .. ينفع لحد إستخدامه خفيف .. وأحب أكد عليك انك لو زودت المبلغ 300 جنية او 400 جنية هتلاقي موبايلات أقوى بفرق واضح زي Nokia 2.4 او Redmi 9C.

قد يعجبك أيضا...

Comments

جاري التحميل...