بقالنا كتير مش بنعمل مقارنات .. النهارده هنعمل مقارنة بين 3 موبايلات في فئة الـ6000 جنية نزلوا مؤخرًا ورا بعض في السوق المصري، وهما الـSamsung Galaxy M51 والـOppo Reno 4 والـMi Note 10 Lite .. مقارنة كبيرة ومليانة تفاصيل كتير .. وتهم ناس كتير.
الكاميرات :-
مبدئيًا الـ3 موبايلات فيهم 4 كاميرات في الظهر .. احنا اللي يهمنا منهم الأساسية والـUltra Wide بس.
الـM51 بيجي بكاميرا أساسية 64 ميجا بيكسل فتحة عدسة F/1.8 مستشعر IMX682 .. الـReno 4 جاي بـ48 ميجا بيكسل فتحة عدسة F/1.7 مستشعر IMX586 .. الـMi Note 10 Lite جاي بـ64 ميجا بيكسل فتحة عدسة F/1.9 بمستشعر IMX686.
الـM51 فيه عدسة Ultra Wide Angle واسعة جدًا بدقة 12 ميجا بيكسل .. اما Reno 4 والـMi Note 10 Lite عدستهم بتيجي بدقة 8 ميجا بيكسل فقط.
السيلفي في الـM51 بيجي بدقة 32 ميجا بيكسل بفتحة عدسة F/2.0 .. الـReno 4 بدقة 32 ميجا بيكسل برده بس بفتحة عدسة F/2.4 .. الـMi Note 10 Lite بدقة 16 ميجا بيكسل بفتحة عدسة F/2.5.
ده كده بالنسبة للأرقام .. والأرقام مش هي اللي بنحكم بيها .. الصور وتجربة التصوير الفعلية هي اللي بنحكم بيها .. قبل ما اكلمك عن تجربة التصوير حابب اقولك أن أسرع تطبيق كاميرا فيهم في التصوير هو الـReno 4 ثم الـM51 ثم الـNote 10 Lite بيتأخر شوية في معالجة الصور.
جربت أصور صورة في الظلة .. عجبني جدًا صورة الـM51 لإنها مظبوطة في الألوان والتفاصيل .. بعديها النوت 10 لايت علشان فيها Over Sharpness .. ثم الرينو 4 بيجي في المركز الأخيرة لإنه أقل في التفاصيل ولون البشرة بشكل كبير.
جربت أصور صورة في الشمس .. أقل صورة فيهم هي رينو 4 لإنها أكتر واحدة لسعت من الشمس .. الـHDR معرفش يسيطر أوي على الشمس، بالنسبة للنوت 10 لايت والـM51 فا هم كويسين جدًا .. يمكن الـM51 زود شوية من الـSaturation او درجة التشبع بتاعت ألوان الصورة.
جربت أصور مبنى .. لاقيت الـOppo Reno 4 ظهر شوية وظبط شكل المبنى .. انما الـM51 ونوت 10 لايت جابوا تفاصيل كويسة وألوان كويسة للصورة كلها .. ولون السماء كان أفضل في الـM51 .. بالنسبة عدسة التصوير الواسع بقى فكالعادة الـM51 أوسع عدسة بينهم.
لما جربت أصور في إضاءه داخلية بقى .. عجبني صورة الـM51 أكتر وبعدها الـNote 10 Lite اللي كانت ألوانها محتاجة تتظبط أكتر .. وأخر حاجه الـReno 4 .. الـرينو 4 بيكون أقل واحد في التفاصيل.
جربت أصور برده في إضاءه داخلية أقل .. أكتر صورة منورة فيهم هي صورة الـReno 4 بس تفاصيلها مش واضحة والصورة سايحة .. بعديها الـM51 بتفاصيل مقبولة بس معالجة الوان مش حلوة .. وفي الأخر الـNote 10 Lite اللي جايب أوحش صورة للأسف.
لما تشغل الـNight Mode .. تلاقي الـMi Note 10 Lite مجاش .. الـReno 4 نور الصورة بزيادة أوي .. الـM51 بقى معملش أي حاجه في الصورة سابها زي ما هي مضلمة.
بالنسبة بقى للكاميرا السيلفي .. صورت في الشمس ومشغل الـHDR .. الـReno 4 الصورة لسعت منه خالص .. الـM51 مطلع صور مقبولة جدًا .. الـNote 10 Lite هو أفضلهم لإنه مطلع صور مظبوطة.
في الظل بقى الـReno 4 لأول مرة بيطلع صورة محترمة كويسة جدًا .. وفي الظل بس إضاءه أقل نفس الكلام برده الـReno 4 يتفوق عليهم .. بس الـM51 مطلع لون بشرة أفضل.
إضاءة داخلية لاقيت الـReno 4 مازال متفوق برده .. السيلفي فيه كويس جدًا .. لما نظلم الدنيا خالص عجبتني أكتر صور الـM51 وبعدها الـReno 4 والـNote 10 Lite مجاش للأسف.
بالنسبة بقى لتصوير الفيديوهات الـ 3 موبايلات بيصوروا 4K بـ 30 اطار في الثانية مع ثبات الكتروني .
شوف تجربة التصوير بالموبايلات في فيديو المقارنة في أخر المقالة !
التصميم :-
الأمر محسوم .. شياكة وفخامة خامات .. الـMi Note 10 Lite يكتسح بخامات زجاج مُحترمة وفريم معدني .. موبايل فعلًا نظيف جدًا جدًا من ناحية التقفيل والخامات.
أما الـM51 والـReno 4 خامتهم بالكامل من البلاستيك .. هيستحملوا وقعات أكتر من الـ نوت 10 لايت .. ولكن بالتأكيد أنت بتفقد فخامة زجاج الـNote 10 Lite .. بس هو كده كده الناس كلها ماشية بجراب .. فإحساس الـPremium ممكن ميبقاش مؤثر أوي لو إستخدامك محصور جوا الجراب الشفاف اللي بيجي مع كل موبايل في العلبة بتاعته.
الـNote 10 Lite والـM51 تخانتهم كبيرة وبالتالي مفيش بروز كاميرات .. أنما الـ رينو 4 علشان رفيع أوي في بروز كاميرات معمول على درجتين كده علشان ميحسسكش إنه موجود.
من ناحية الوزن .. الـOppo Reno 4 يكسب بإكتساح بوزن 165 جرام وتخانه 7.7 ملم وأبعادة صغيرة اوي .. الموبايل ريشة حرفيًا جنب الموبايلات اللي في المقارنة هنا .. الـNote 10 Lite وزنه 204 جرام وتخانه 9.7 ملم .. والـM51 وزنه 214 جرام وتخانه 9.5 ملم .. والـM51 هو الأكبر حجمًا.
الشاشة :-
الـM51 بشاشة بحجم 6.7 بوصة من نوع Super AMOLED Plus بدقة FHD+ وفيها ثُقب كبير في منتصف الشاشة .. الـReno 4 شاشة 6.4 بوصة من نوع AMOLED بدقة FHD+ وفيها ثقبين على الشمال .. الـNote 10 Lite شاشة 6.47 بوصة من نوع AMOLED بدقة FHD+ بنوتش للسيلفي وEdges في أطراف الشاشة علشان تزود من فخامة الموبايل .. والـ3 شاشات بالتردد العادي الـ60 هيرتز.
كـ سطوع فا الأعلى هو الـM51 ثم الـReno 4 ثم الـMi Note 10 Lite.
كألوان .. كلهم بصراحة مُمتازين .. أنا دايمًا بميل للـAMOLED بتاعت سامسونج .. بس ده ميمنعش ان الـNote 10 Lite فيها تشبع ألوان محترم .. والرينو 4 برده مش وحشة.
حواف الشاشة .. الحافة السفلية الأقل للـNote 10 Lite ثم الـGalaxy M51 ثم الـReno 4 بأكبر حافة سفلية فيهم.
أما بالنسبة لفخامة الشاشة في إيدك .. الأمر محسوم للـNote 10 Lite بسبب الـEdges اللي على الأطراف .. بعدها الـM51 بحجم شاشة كبير وثقب في النص .. وفي المركز الأخير في الفخامة الـReno 4.
بشكل عام بقى ومن الأخر لو هناخد بكل النقط اللي اتكلمنها فيها .. المركز الاول السامسونج ثم المركز التاني الشاومي ثم الأخير الاوبو .
الأداء :-
الـM51 والـNote 10 Lite بيجو بمعالج سناب دراجون 730G .. اما الـReno 4 بيجي بمعالج سناب دراجون 720G وبإختصار بحس الـ730 أنشط شوية من الـ720 اللي تحسه خملان كده.
الـ3 موبايلات أدائهم سلس وسريع .. ولكن رينو 4 ساعات بيتأخر في فتح البرامج مقارنتًا مع الـM51 والـNote 10 Lite .. وده بسبب المعالج مش أكتر.
وفي النهاية لو انت حيران .. انا شايف الـM51 والـNote 10 Lite قريبين جدًا من بعض وأحسن بفرق بسيط عن الـReno 4 ولكن في نقط تانية للرينو 4 أفضل زي السخونية مثلًا.
الـNote 10 Lite بسبب الجسم الزجاجي والفريم المعدني هو بيسخن أكتر بكتير من الـM51 والـReno 4 .. وده بيظهر معايا وانا بلعب او بصور ودول الحاجتين اللي بيضغطوا جامد على الموبايل.
فالبالتي وبعد القصة ديه كلها .. أنا هنا هفضل الـM51 بشكل عام في الأداء والسخونية .. بعده الـMi Note 10 Lite .. المركز الأخير هيجي الـOppo Reno 4.
الأداء الرسمي التلاته واحد .. ببجي على High HD .. كول اوف ديوتي على Very High .. فورت نايت على Medium .. ومفيش فروقات في الأداء الرسومي ما بين التلاته .. الفرق بس في السخونية اللي لسه موضحهالك.
عوامل الأمان وعناصر اخرى :-
معجب أكتر بـ بصمة الـM51 في زرار الباور سريعة وعملية .. يجي وراها الـReno 4 بصمة في الشاشة سريعة جدًا .. يجي وراهم الـNote 10 Lite بصمة في الشاشة متوسطة السرعة.
أسرع Face Unlock هو الـOppo Reno 4 كالعادة .. وراه Mi Note 10 Lite سرعته كويسة .. المركز الأخير الـM51 بيتأخر شوية في الـFace Unlock.
الـMi Note 10 Lite فيه مستشعر الـIR Blaster اللي مش موجود في الموبايلات الباقية .. الـReno 4 فيه مستشعر ذكاء إصتناعي بيخليك تتحكم في الشاشة من غير ما تلمسها .. وكنت شارحة بالتفصيل في مراجعة Oppo Reno 4.
الـM51 والـMi Note 10 Lite فيهم ميزة الـNFC واللي مش موجود في الـReno 4.
أفضل مستشعر مقاربة موجود في الـReno 4 حقيقي بيقفل الشاشة على ودنك .. الـM51 والـNote 10 Lite المستشعرات بتعتمد على السوفت وير وممكن تغلط والشاشة تفضل مفتوحة على ودنك وأنت بتعمل مكالمة.
أعلى صوت Speaker هو الـMi Note 10 Lite ثم الـOppo Reno 4 ثم الـM51 أقل صوت فيهم.
أقوى WiFi وشبكة إتصال للـOppo Reno 4 واللي بعده الـNote 10 Lite واللي بعده الـM51 أقل واحد فيهم.
البطارية :-
أكبر بطارية 7000 مللي أمبير في الـM51 هتستحمل معاك 11 ساعة شاشة مفتوحة .. اللي بعده الـMi Note 10 Lite بحجم 5260 مللي أمبير بتستحمل حوالي 7 ساعات شاشة مفتوحة .. الأخير الـReno 4 بطارية صغيرة 4000 مللي أمبير هتستحمل حوالي 5 ساعات شاشة مفتوحة.
الـM51 معاه شاحن 25 واط بيشحن في ساعتين إلا ربع .. والـNote 10 Lite معاه شاحن 30 واط بيشحن في ساعة .. والـReno 4 معاه شاحن 30 واط بيشحن في 50 دقيقة علشان حجم بطاريته صغير أوي.
أسعار الموبايلات :-
سعر Galaxy M51 :-
- نسخة 128 جيجا مع 8 جيجا رام بسعر 6666 جنية
سعر Oppo Reno 4 :-
- نسخة 128 جيجا مع 8 جيجا رام بسعر 6300 جنية رسمي وبيوصل 6000 جنية في المحلات
سعر Mi Note 10 Lite :-
- نسخة 128 جيجا مع 8 جيجا رام بسعر 6000 جنية
الـReno 4 والـM51 بيدعموا تركيب شريحتين إتصال 4G مع كارت ميموري .. اما الـNote 10 Lite بيدعم شريحتين إتصال فقط ومش بيدعم كارت ميموري.
الرأي النهائي :-
مميزات Galaxy M51 :-
- بطارية عملاقة ممتازة
- شاشة بحجم ضخم جدًا
- أداء كويس وسخونة قليلة
- كاميرا خلفية كويسة جدًا
- دعم الـNFC
مميزات Reno 4 :-
- مستشعر مقاربة حقيقي
- قوة إستقبال الشبكات أفضل
- وزن أخف وسُمك أقل
- مستشعر الذكاء الإصطناعي
- كاميرا سيلفي كويسة جدًا
مميزات Mi Note 10 Lite :-
- خامات خارجية هي الأقيم والأفضل
- شكل خارجي فخم مع Edges
- صوت Speaker عالي جدًا
- مستشعر الـIR Blaster
- دعم الـNFC
- كاميرا خلفية محترمة جدًا بس بتحتاج تعديل بسيط في الألوان
Comments