وانت بتشتري موبايل بـ3000 جنية .. بتبقى محتاج ايه ؟ موبايل يعيش .. ولا موبايل يقدملك مواصفات عالية بس تيجي بعد فترة تلاقي فيه مشكلة ؟ .. الشركة اللي أكيد سايبه ذكرى معاك زمان لو انت كنت بتشيل موبايلات من 10 سنين فاتوا .. شركة نوكيا .. وهي منزله موبايل جديد في فئة سعر الـ3000 جنية وهو الـNokia 5.3.
نوكيا دايمًا كانت بتسعر موبايلاتها غلط .. يعني الموبايل ينزل بسعر مش منطقي خالص .. ونجرب الموبايل ونقول عليه غالي ونتفاجيء بعدها بكام شهر إن الموبايل رخص الف جنية وبقى سعره حلو على مواصفاته .. وأكبر مثال على ده هو الـNokia 7.2 .. بس دلوقتي نوكيا غيرت سياستها .. وفعلًا سعرت Nokia 5.3 صح مع بداية نزوله.
التصميم :-
تصميم الموبايل وخاماته الخارجية بتيجي من البلاستيك .. او زي ما شركة نوكيا بتقول عليه بوليمر .. بلاستيك مضغوط بيتحمل صدمات اكتر .. والـFinish بتاعه حلو والتصميم نفسه شيك.
الموبايل وزنه كويس .. حوالي 185 جرام وتخانه 8.5 ملم وتوزيع الوزن هيحسسك إنه خفيف جدًا في ايديك.
الموبايل فيه زرار Google Assistant مُنفصل على الجنب الشمال .. وللأسف ملوش إستخدام تاني .. وأنا شخصيًا قفلته خالص.
بروز الكاميرات هنا في الموبايل خفيف أوي .. وكمان في جراب مُرفق في العلبة علشان يغطيلك البروز الخفيف ده.
الشاشة :-
شاشة الموبايل ده بتيجي بحجم 6.5 بوصة من نوع IPS LCD بدقة HD+ .. الشاشة واخده شكل النوتش الـWater Drop القديم .. وكمان الحواف حوالين الشاشة كبيرة شويتين تلاته.
الفئة السعرية ديه موجود فيها الـ9X Lite والـNote 9 بشاشات بدقة FHD+ .. وبالتالي شاشة الـNokia 5.3 هتخسر جنبهم في الدقة وكثافة البيكسلات.
أما بالنسبة لشاشة الـ5.3 لوحدها فهي ألوانها كويسة .. هي مايلة للأزرق شوية ودية أعتقد بتعجب ناس كتير وممكن تعدل درجة اللون براحتك.
سطوع الشاشة تحت الشمس كويس جدًا ويمكن يكون من أحسن الموبايلات في الفئة ديه من ناحية السطوع .. وزوايا الرؤية كويسة جدًا في الشاشة ديه.
واخيرًا .. الشاشة عليها حماية Corning Gorilla Glass الجيل الثالث ومفيش سكرينة متركبة على شاشة الموبايل.
الأداء :-
الموبايل جاي بمعالج كوالكوم سناب دراجون 665 بتكنولوجيا 11 نانو .. معالج أقل حاجة بسيطة من المُنافسين اللي بيجوا بمعالجات ميدياتيك بتقدم سكور اعلى شوية في Antutu.
وكمان نوع الذاكرة الداخلية هنا النوع البطيء الـEMMC 5.1 .. وده النوع المُتعارف عليه في الفئة السعرية ديه.
هل ده معناه إن أداء الموبايل وحش ؟ لأ خالص إطلاقًا .. الموبايل جاي بـAndroid One مفيهوش أي إضافات من نوكيا .. وبالتالي الواجهة خفيفة جدًا على الموبايل وهتحس بسلاسة تشغيل ومفيش أي مشاكل أو تهنيجات ظهرت معانا في فترة الإستخدام .. والأداء مُرضي جدًا على سعر الموبايل.
الأداء الرسومي .. ببجي بتشتغل على اعدادات جرافيك Medium وشغالة بشكل مقبول .. وكول اوف ديوتي بتشتغل على إعدادات جرافيك Very High واللعبة بتشتغل كويس جدًا.
بس اللي لاحظته بقى .. البطارية إستهلاكها عالي جدًا في الألعاب خصوصًا لو بتلعب وإنت فاتح على الـData .. وكمان بيبقى في سخونية كبيرة في الحته اللي فوق الكاميرا من الظهر ومن نفس الحته قدام من الشاشة.
عوامل الأمان وعناصر اخرى :-
البصمة في ظهر الجهاز غاطسة شوية لجوه وهتقدر تميزها بسهولة حتى وإنت مركب الجراب .. وسرعتها مقبولة مش سريعة اوي ومش بطيئة .. أما البطيء فهو الـFace Unlock .. بياخد وقت على ما يتعرف على وشك.
الموبايل بيجي بـAndroid One مفيش إضافات كتير في السوفت وير .. ومفيش مثلًا ميزة عمل نسختين من برامج التواصل .. بس فيه Dark Mode عادي .. وفيه بعض المُميزات في الـGestures تقدر تستخدمها لو حابب .. زي السحب على البصمة علشان تنزل قائمة الإشعارات مثلًا.
لمبة الإشعارات مُدمجة بزر الباور ونورها واضح وبتنور باللون الأبيض فقط .. الموبايل ده من أرخص الموبايلات الداعمة للـNFC.
الموبايل داعم لمُستشعر الضوء والتقارب بس للأسف مفيش تسجيل مكالمات وكمان الموبايل مفيهوش Gyroscope .. مش عارف ليه ..
صوت الموبايل متوسط .. زيه زي الـRedmi Note 9 بالظبط .. وصوت سماعات المكالمات عالي ومسموع كويس .. وصوت سماعات الأذن برده كويس جدًا.
بالنسبة لشبكات الإتصال .. الـWiFi قوي والمدى بتاعه حلو جدًا .. أما شبكة المُكالمات .. فهي مُتوسطة زيها زي الـNote 9 كنت بجربهم سوا .. كنت متوقع الـ5.3 يبقى أحسن بس لأ هو مش أحسن.
البطارية :-
بطارية بتيجي بحجم 4000 مللي أمبير .. وكل المُنافسين خلاص بيقدموا بطارية 5000 مللي أمبير .. هتستحمل معاك إستهلاك متوسط حوالي 6 ساعات .. رقم مش كبير أوي.
المشكلة في الشاحن المُرفق الـ10 واط .. بيشحن البطارية بالكامل في 3 ساعات إلا ربع .. وقت طويل شوية.
الكاميرات :-
الموبايل جاي بـ4 كاميرات في الظهر .. الـساسية 13 ميجا بيكسل بفتحة عدسة F/1.8 .. والتانية 5 ميجا بيكسل للتصوير الواسع .. والتالتة 2 ميجا بيكسل ماكرو والرابعة 2 ميجا بيكسل للعزل.
والسيلفي بيجي بدقة 8 ميجا بيكسل بفتحة عدسة F/2.0 وهو موجود في نوتش في الشاشة.
سوفت وير الكاميرات مُنظم وشيك وبيدعم الـNight Mode ولكن في الكاميرا الأساسية فقط .. مفيش Night Mode في السيلفي .. والموبايل داعم لـ جوجل كاميرا.
لما نيجي نجرب تطبيق الكاميرا الأساسي على الموبايل .. هنلاقي الصور مُعظمها الى حدٍ ما بهتان شوية من ناحية الألوان .. الصور مش مُعززة خالص بالألوان .. وكمان التفاصيل مش كتير والعزل مش حلو اوي.
اما العدسات الثانوية، العدسة الـUltra Wide والعدسة الـMacro مُتواضعين جدًا بصراحة.
والتصوير في إضاءة داخلية لازم إضاءة عالية علشان تلاقي تفاصيل .. ولو الإضاءة قليلة شوية هتلاقي مُعظم التفاصيل إتمسحت.
اما بالنسبة للـNight Mode فهو كويس جدًا وأداءه فاجئني بصراحة .. ومُعالجة الصور فيه بتخليها حلوة جدًا.
بس اللي مُميز هنا بقى هو إستخدام جوجل كاميرا .. بيخلي الصور حاجة تانية خالص .. تفاصيل أحسن، الوان احسن، والـDinamic Range أحسن .. كل حاجة بتتظبط في الصور بإستخدام جوجل كاميرا.
حتى الـNight Mode اللي هو اصلًا حلو بيبقى أحسن والتفاصيل بتبقى أكتر بإستخدام جوجل كاميرا.
لما نقارن بقى النوكيا 5.3 مع الـRedmi Note 9 .. تفوق واضح في التفاصيل للـNote 9 .. وبالنسبة لجوجل كاميرا فا الـ نوت 9 مش بيدعم جوجل كاميرا لذلك المٌقارنة بتطبيق الكاميرا الأساسي في الموبايلين.
وبشكل عام Note 9 متفوق في كل أوضاع التصوير تقريبًا معادا الـNight Mode واللي هيتفوق فيه الـNokia 5.3 بفرق بسيط.
اما بالنسبة للسيلفي فا بصراحة السيلفي هنا مش حلو خالص .. تفاصيل قليلة مع عزل مش مظبوط ولون بشرة مش مظبوط .. الألوان بهتانة عمومًا في الصور اللي بتطلع من السيلفي اللي هنا .. ده غير إن مُمكن تلاقي الصور بتلسع منك في بعض الأوضاع.
وطبعًا لما الإضاءة بتقل متسألش عن جودة او Quality الصور ولا التفاصيل ولا الألوان ولا أي حاجة خالص.
بس مع تجربة جوجل كاميرا .. الوضع بيبقى أحسن كتير .. الصور بتتحسن بشكل ملحوظ من ناحية التفاصيل والألوان وكل حاجة .. ولكن برده لسه مش الأداء الـWow او المُرضي بشكل كبير .. بس لو هتشتري الموبايل ده مينفعش تعيش من غير جوجل كاميرا.
نقارن مع الـNote 9 اللي السيلفي فيه أصلًا مش أفضل حاجه .. هتلاقي إن النوت 9 كسب النوكيا في كل أوضاع التصوير السيلفي .. وبرده من غير جوجل كاميرا.
بالنسبة بقى لتصوير الفيديوهات فالموبايل ده بيدعم تصوير فيديوهات 4K بجودة 2160p .. والموبايل مفيهوش ثبات إلكتروني على الـ4K وعلى الـ1080p للأسف .. وده لإن الموبايل مفيهوش Gyroscope زي ما وضحنا فوق .. والموبايل فيه مايكروفون إضافي لعزل الضوضاء.
شوف تجربة تصوير صور وفيديوهات في فيديو المراجعة في أخر المقالة.
سعر الموبايل :-
سعر الموبايل الحالي في المحلات حوالي 2750 جنيه .. وفي خلال يومين تلاته هيرفع لـ2990 وده السعر الرسمي الجديد بعد زيادة الأسعار.
وبينفع تركب كارت ميموري بحجم 512 جيجا مع شريحتين إتصال مع بعض في نفس الوقت عادي.
الرأي النهائي :-
مميزات Nokia 5.3 :-
- أداء مُستقر سلس مع 4 جيجا رام
- أندرويد خام وضمان تحديثات مُستمرة
- لا يوجد أي عيوب او مشاكل
- وجود لمبة الإشعارات والـNFC
عيوب Nokia 5.3 :-
- جودة الشاشة مش الأفضل
- تصميم الشاشة وإستغلال الحواف
- سخونة الهاتف في الألعاب
- لا يوجد دعم للشحن السريع
- كاميرا سيلفي أقل من المُنافسين
- لا يوجد مُستشعر الـGyroscope
Comments