مراجعة موبايل Oppo A9 2020 – بداية جديدة لأوبو ببطارية عملاقة و 5 كاميرات !

نقول باي باي لفئة الـ F من اوبو .. وندخل على البديل الجديد ليه .. وهي فئة الـ A .. وهنبدأ بمراجعة أول موبايل من فئة A وهو موبايل  Oppo A9 2020 .. الموبايل ده ضاف حاجات جديدة مكنتش موجودة في موبايل Oppo F11 .. بس للأسف مع شوية تنازلات .. وفي المقالة ديه هتعرف الفرق بين الهاتفين مع موبيزل .


التصميم :-

تصميم Oppo A9 2020 متاخد نسخة من Oppo F11 بشكل كبير .. الكاميرات مرصوصة في النص تحتهم البصمة وجملة Designed For A Series تحتهم كلمة اوبو بالرصة المعتادة الجميلة الي محدش يقدر يعترض عليها .

الجديد في الموبايل ده هو رصة التلت كاميرات وجمبهم الكاميرا الرابعة والفلاش ومستشعر البصمة بقا بيضاوي شوية .. مسترخم انا الحتة ديه شوية .

طبعا نفس الخامات البولي كربونيت المعهودة بتاعت اوبو في فئة الـ F محطوطة في الموبايل ده .. الخامات كويسة جدا في ايديك بس بردة لازم تحط الموبايل في الجراب الي جاي معاه علشان ميتبهدلش خرابيش وخدوش وكمان الجراب بيغطي بروز الكاميرا خالص .

واخيرا حابب ابدي اعجابي بلمسة جمالية كدا في الموبايل وهي حلقة خضرا كدا حوالين عدسة الكاميرا الي فوق وبنفس اللون على زرار الباور بتديك كدا ايحاء انك ماسك حاجة برميم في ايديك ع الاقل من ناحية الشكل .

احب افكرك ان الموبايل ده شاشة كبيرة بطارية كبيرة وكل ده بيتحمل ع معادلة الوزن فالموبايل وزنه قريب من الـ 200 جرام وتخانته 9 ملي تقريبا .. يعني مش صغير في الايد خالص ولازم تستخدم ايديك الاتنين وانت بتستعمله .


الشاشة :-

موبايل Oppo A9 2020 حصل فيه تقليل عن Oppo F11 .. الشاشة هنا بدقة HD+ فقط .. كان من الافضل اوبو تستخدم شاشة FHD+ في الفئة السعرية ديه .

عموما الشاشة IPS وحجمها كبير 6.5 بوصة فيها نوتش دروب وتر محطوط فيه السيلفي والحواف حوالين الشاشة مش احسن حاجة .. يعني الحافة السفلية كانت ممكن تبقا احسن من كدا شويتين .

من الأخر الشاشة مش وحشة اوي يعني وبردة مش احسن حاجة في الفئة السعرية ديه .. ادي الشاشة تقييم اقل من المتوسط بسبب دقتها المنخفضة مش اكتر والي ممكن متلاحظهاش لو انت مستخدم عادي مش بتدقق اوي يعني .

الشاشة عليها حماية جوريلا الجيل الثالث و عليها لاصقة حماية كدا مؤقته لحد اما تغيرها وتركب سكرينة على الشاشة .


الاداء :-

بعد ما كان البروسسير ميدياتيك P70 في Oppo F11 .. دلوقتي بقا سناب دراجون 665 في Oppo A9 2020 .. معالج ثماني النواة تكنولوجيا 11 نانو الموفرة شوية في استهلاك البطارية .. اداء الموبايل مش هتحس معاه باي مشاكل .. اداء مستقر وثابت ومفيهوش اي تهنيج والفضل لواجهة Color OS الممتازة .

بالنسبة للاداء الرسومي فهو اقل حاجة بسيطة من Oppo F11 .. لان ببجي كانت بتشتغل على F11 بجودة High HD .. دلوقتي اخرها Medium بس في A9 2020 .. وبالرغم من ذلك فهي شغالة تمام وزي الفل ومفيهاش اي مشاكل والسخونية مقبولة جدا جدا في جسم موبايل A9 2020 .

حابب افكرك ان بروسسير سناب دراجون 665 موجود في موبايلات تانية .. باسعار اقل من 3 الاف جنية .. زي ريلمي 5 العادي و شاومي نوت 8 .


عوامل الأمان و عناصر أخرى :-

بصمة خلفية سريعة وممتازة .. يعيبها بس ان شكلها بيضاوي مش مدور وهتاخد شوية على ما تتعود على حطه صباعك عليها .

وطبعا في فيس ان لوك طيارة في الموبايل كعادة أوبو مش محتاجة كلام .

بالنسبة للسوفت وير مفيهوش جديد .. تقدر تعمل نسختين من برامج التواصل ..  وكمان عندك Private Safe علشان تخفي ملفاتك وبرامجك الخاصة .

ولسه بردة مفيش لمبة اشعارات بس ايقونات الاشعارات بتظهر فوق جمب النوتش .

المستشعرات زي الفل في الموبايل ده .. ضوء تقارب بوصلة جيروسكوب كله زي الفل والراديو شغال بدون اي مشاكل .

شبكة الموبايل فوق الممتازة بردة .. تم تجربتها في اماكن كتير شبكتها ضعيفة ولقط مكالمات ولقط موبايل داتا بدون اي مشاكل .

صوت الموبايل بقا مجسم وعالي بفضل خاصية الستريو سبيكر يعني سماعة المكالمات بتشتغل معاك كسماعة خارجية وبتديك تجربة صوت محترمة جدا في الفئة السعرية ديه .. برغم ان الصوت مش عالي اوي بس مجسم .

صوت سماعة المكالمات عالي وممتاز وصوت سماعات الاذن بردة كويس وزي الفل .


البطارية :-

بطارية موبايل Oppo A9 2020 ضخمة فوق ما تتخيل 5000 مللي أمبير .. تطوير كبير عن F11 .. البطارية مكنتش عارف اخلصها .

استحملت معايا فوق الـ 8 ساعات شاشة مفتوحة .. وكمان واجهة Color OS بقت اخيرا بتجلك عدد ساعات الشاشة المفتوحة .

وكمان مدخل الشحن في A9 2020 بقا Type C مش Micro USB زي الـ F11 .. بس الحلو ميكملش لان الموبايل جاي معاه شاحن 10 واط في العلبة مش الشاحن الفوك السريع الي بيجي مع الـ F11 .. وبالتالي الموبايل شحن تقريبا في 3 ساعات الاربع وده وقت كبير اوي اوي اوي .. خصوصا اخر 5% في البطارية بيقعدوا كتير اوي .


الكاميرات :-

كاميرا موبايل Oppo A9 2020 الخلفية 4 كاميرات .. الاساسية 48 ميجا بيكسل فتحة عدسة 1.8 .. الكاميرا التانية 8 ميجا بيكسل للتصوير الواسع فتحة عدسة 2.3 ومعاك كاميرتين تانين 2 ميجا بيكسل للعزل والبورترية .. والسيلفي 16 ميجا بيكسل فتحة عدسة 2.0 .

باختصار .. تجربة الكاميرات الخلفية كويسة جدا في اضاءة الشمس والظلة .. ولما الاضاءة بتقل هتستخدم وضع NightScape علشان تاخد صور بتفاصيل اوضح والتجربة قريبة جدا جدا من Oppo F11 .. وطبعا A9 2020 بيزيد عنه عدسة التصوير الواسع .. اما وضع البورترية فالتجربة هنا معجبتنش خالص وحاسس انها محتاجة لتحديث سوفت وير .

اما بالنسبة للسيلفي .. فالتجربة هنا اقل بفرق بسيط عن Oppo F11 .

هتلاقي الصور المتصورة بالموبايل في فيديو المراجعة في أخر المقالة .


السعر والرأي النهائي :-

السعر الرسمي 5350 جنية للنسخة 128 جيجا مع 8 جيجا رام وينفع تركب كارت ميموري وشريحتين اتصال مع بعض .

من الأخر كدا علشان ملغبطكش .. Oppo A9 2020 تطوير عن Oppo F11 في ايه ؟

حجم بطارية أكبر صعب تخلصه في يوم كامل الا لو انت مش بتسيبك الموبايل من ايديك .. فيه عدسة وايد انجل هتضفلك تجربة كويسة من اوبو .. فيه صوت ستريو سبيكر بردة مكنش موجود في الفئة السعرية ديه .. مدخل USB Type C و 8 جيجا رام .. ديه التطويرات الملحوظة في موبايل A9 2020 عن Oppo F11 .

بس كان نفسي الموبايل ده يبقا شاشة FHD+ ويجي معاه شاحن سريع فوك بكدا كان هيبقا مفيهوش اي نواقص او عيوب بالنسبالي وديه الحاجات الي موبايل Oppo F11 العادي افضل فيها من وجه نظري .

مميزات

  • بطارية ضخمة 5000 مللي أمبير .
  • عدسة تصوير واسع من اوبو .
  • شاشة كبيرة 6.5 بوصة .
  • مستشعر بصمة سريع جدا .
  • صوت الموبايل ستريو .
  • شبكة الهاتف قوية و ممتازة .
  • امكانية تركيب كارت ميموري وشريحتين اتصال مع بعض .

عيوب

  • يفتقر الهاتف للشاحن السريع فيتم شحن البطارية في 3 ساعات .
  • شاشة بدقة منخفضة HD+ .
  • خامات تصنيع من البلاستيك .
  • لا يدعم لمبة اشعارات .
  • لا يقدم افضل اداء ممكن من الكاميرات الموجودة بالهاتف فيحتاج الي تحديث لظبط الكاميرات أكثر .

فيديو المراجعة على اليوتيوب :-

قد يعجبك أيضا...

Comments

جاري التحميل...