بقالنا فترة كبيرة منتظرين موبايلات الفئة المتوسطة بالموضة الجديدة Notch وبعد ما خلاص عرفنا اسعار اقوى موبايلين في الفئة ديه وهما Oppo F7 و P20 Lite من هواوي .
هنحاول نركز في المقارنة ديه اننا نوضحلكم مواصفات الموبايلين ومين الي يتفوق فيهم ؟!
وطبعا هيدخل السباق في الفئة المتوسطة موبايل جديد من شاومي Xiaomi Redmi Note 5 الي كلنا منتظرين نزوله بفارغ الصبر لانه هو الوحيد الي هيقدر ينافس قوة موبايلات اوبو و هواوي الجديدة .
مش هنطول عليكم في المقدمة , خلينا ندخل في المقارنة علاطول ..
الأداء :
– كلنا يهمنا الموبايل الي نشتريه يبقا اسرع موبايل ف العالم من ناحية الاستجابة , متقلقش موبايل Oppo F7 و موبايل Huawei P20 Lite ادائهم العادي من حيث الاستجابة والتنقل بين التطبيقات هيكون ممتاز .
– بس بالنسبة للشخص الـ Gamer او الي بيحب يلعب العاب تقيلة على الموبايل هنقله اوبو F7 أفضل لانه بمعالج ثماني النواة ميدياتيك Helio P60 ومش معنى انه ميدياتيك انه ضعيف , لا خالص المعالج ده بتكنولوجيا 12 نانو الموفرة جدا في استهلاك الطاقة وبيحتوي على 4 انوية من نوع Cortex-A73 الي سرعة استجابتهم ممتازه , واربعة تانيين من نوع Cortex-A53 , وكمان المعالج ده بيحقق 121 الف نقطة في اختبار Antutu لاداء المعالج , وده رقم كبير جدا جدا في الفئة ديه من الموبايلات .
– طب وبالنسبة لهواوي P20 Lite .. هوا وحش ؟ , لا خالص هو بيجي بمعالج ثماني بردة من تصنيع هواوي وهو معالج قديم شوية Kirin 659 كل الانوية بتاعته من نوع Cortex-A53 المتوسطة الاداء والموبايل قدر يحقق 75 الف نقطة في اختبار Antutu , نتيجة كويسة ومحترمة معناها اداء كويس , بس لو طلعت فوق شوية وشوفت الاوبو جاب كام هتلاقيه افضل برقم محترم .
خلاصة الكلام , اداء الـ Oppo F7 أفضل .
الكاميرا :
– متصدقش كل الي بيتقالك في الاعلانات , هواوي دائما بتلعب ع حته عدد الكاميرات بس ف الحقيقة اهم حاجه في الكاميرا فتحة العدسة اد ايه ومستشعر التصوير الي فيها , اي حاجه تانية مجرد ارقام .
– موبايل Oppo F7 بيلعب بشكل اساسي ع الكاميرا السيلفي الي بتيجي ب 25 ميجا بيكسل بفتحة عدسة f/2.0 وفيها شوية ذكاء اصطناعي علشان تقدر تعمل عزل في الصورة وتقدر تعمل تجميل لوشك ف الصورة بكل سهولة , كالعادة بتاعت اوبو الكاميرا الامامية حلوة جدا وهتاخد منها صور ممتازة وديه اهم نقطة في الموبايل , اما بالنسبة للكاميرا الخلفية فهي 16 ميجا بيكسل بفتحة عدسة واسعة f/1.8 وبردة تقدر تعمل بيها عزل , فتحة العدسة هنا هتقدر تمرر ضوء كبير في الاضاءة الضعيفة والنتيجة هتكون ممتازة للتصوير حتى في الاضاءة المنخفضة .
– موبايل Huawei P20 Lite ع عكس اخواته الكبار مش بيجي بعدسات Leica , الموبايل بيجي بكاميرا امامية 16 ميجا بيكسل بفتحة عدسة f/2.0 بس مفيهاش الذكاء الاصطناعي الموجود في اوبو , او لحد دلوقتي متحطش ف السوفت وير , وممكن ينزل في اي لحظه تحديث يظبط الكلام ده كله , هتاخد من الكاميرا الامامية صور حلوة لو الاضاءة معاك , لو مفيش الصور جودتها هتقل برغم ان الموبايل بيعمل وميض كدا من الشاشه علشان ينور بس مش بيعمل تأثير فعلي , بالنسبة للكاميرا الخلفية فهي مزدوجة 16 ميجا بيكسل بفتحة عدسة f/2.2 والتانية 2 ميجا بيكسل f/2.4 , هتقدر تعمل بيها عزل وهتطلع صور حلوة جدا بس للاسف علشان فتحة العدسة ضيقة , لما الاضاءة تقل هتلاقي الصور مش حلوة وابتدى يظهر فيها noise بشكل كبير .
خلاصة الكلام , كاميرات Oppo F7 أفضل .
الشاشة :
– الموضة في 2018 هي الشاشة الي فيها Notch او قطع في النص فوق كدا ف الشاشة , وزي ما نزلت ف موبايل فلاج شيب زي الايفون X , الموضة نزلت في موبايلات فئة متوسطة .
– موبايل Oppo F7 بشاشة فيها Notch بقياس 6.23 بوصة من نوع IPS LCD بدقة Full HD+ بابعاد 19:9 مع حماية من Corning Gorilla Glass 5 ضد الخدوش والصدمات .
– موبايل P20 Lite بشاشة فيها Notch بقياس 5.84 بوصة من نوع IPS LCD بدقة Full HD+ بابعاد 19:9 ومفيش حماية على الشاشة .
هنا مفيش نقطة جوهرية مختلفة في الشاشات , بس كالعادة هواوي مفيش حماية على الشاشة ولكن اوبو بتدعم حماية على الشاشة ويبقا هنا الأفضلية لـ اوبو , بردة .
التصميم :
– وهنا هنتكلم عن خامات التصنيع والوزن والابعاد .
– موبايل Oppo F7 بيجي بابعاد كبيرة شوية 156×75.3×7.8 مم مع وزن 158 جرام وتصميم من البولي كربونيت .
– اما موبايل هواوي P20 Lite بيجي بابعاد 148.6×71.2×7.4 مم مع وزن 148 جرام وتصميم من الزجاج مع اطار معدني .
منقدرش نحكم في التصميم لان ديه اراء ولكن من وجه نظري شايف ان Huawei P20 Lite يكسب ف انه افضل ف المسكه بايد واحدة ووزن اخف وفيه اطار معدني شيك .
البطارية :
– نقطة خلاف كبيرة دايما البطارية هتقعد اد ايه وهتتشحن ف اد ايه ؟!
– موبايل Oppo F7 بيجي بطارية 3400 مللي أمبير بس للأسف مفيهاش شحن سريع وهي بتشحن عن طريق مدخل microUSB 2.0 , الموبايل فيه معالج موفر للطاقة يعني البطارية هتوصل ل 6 ساعات screen on واستخدام يوم واكتر من يوم من غير شحن .
– اما بالنسبة ل P20 Lite فالبطارية 3000 مللي أمبير بس بتدعم الشحن السريع عن طريق مدخل USB Type C , الموبايل بنفس المعالج والبطارية دول قدروا يقعدوا لحد 5 ساعات ونصف screen on واستخدام يوم مش اكتر , بس معاك شاحن سريع هيخليك تشحن اكتر من نصف البطارية في نصف ساعة فقط .
الخلاصة اني افضل بطارية بتشحن بسرعة , يبقا الافضل P20 Lite خصوصا مع وجود USB Type C .
باقي المميزات :
الموبايلين نازل عليهم اندرويد اوريو , فيهم خاصية face unlock سريعة , بالاضافة لبصمة في الظهر سريعة بردة من غير مشاكل , الاتنين بيدعموا نظارات الـ VR وبيدعموا الراديو FM .
موبايل اوبو فيه درج لشريحتين اتصال وكارت ميموري , اما هواوي الدرج فيه مكان لشريحتين اتصال او شريحة وكارت ميموري وهنا يتفوق اوبو F7 .
موبايل اوبو بيدعم تشغيل شريحتين الاتصال معا ع 4G وديه حاجه ممتازة , اما الهواوي فشريحة 4G والتانية 3G .
وهنا يبان تفوق موبايل Oppo F7 في بعض الخواص الاضافية .
السعر :
– موبايل اوبو F7 بنسخة 64 جيجا + 4 جيجا رام بسعر 5990 جنية
– موبايل Huawei P20 Lite بنسخة 64 جيجا + 4 جيجا رام بسعر 5499 جنية
فرق سعر حوالي 500 جنية هيخلي نقطة التفوق في السعر لصالح الهواوي , ولكن زي ما وضحنا الاوبو F7 تفوق في اكثر من نقطة على الهواوي واعتقد فرق السعر مُستحق .
Comments