مراجعة Oppo Reno 3 Pro بشبكة الجيل الخامس – السلاح السري لشركة اوبو !

اوبو عندها سلاح سري مكتمه عليه .. لو نزل قريب هيعمل قلبان .. وهو الـReno 3 Pro .. احنا دلوقتي هنراجع النسخة الـ5G الي نزلت برا .. وخلي بالك في تسريبات كتير عن النسخة الـ4G من الموبايل ده .. فيعني احتمال نزوله مصر والوطن العربي كبير جدا .. فقولنا نوريكم ايه الي عجبنا وايه الي معجبناش في الموبايل ده.


التصميم :-

اكتر حاجة عجبتني في الموبايل ده بجد التصميم .. التصميم فعلا غريب! .. مبهر من كل النواحي .. في الشمس جامد جدا ولونه بيغمق كدا بين الأحمر والسماوي .. وفي الظلة الألوان بتبقى افتح شوية وبردة جامد جدا وبشكل عام التصميم مُمتاز جدًا.

مش هتكلم عن الخامات .. الخامات المستخدمه هنا برميم جدا .. ظهر زجاجي فخم عليه طبقة حماية Corning Gorilla Glass 5 .. والفريم طبعا من الالومنيوم .. مش هتلاقي احسن من كدا خامات خارجية بصراحة.

في بروز بسيط للكاميرات ممكن تغطيه بالجراب الي جاي مع الموبايل في العلبة .. بس انا مش عارف ليه بقا في بروز .. يعني في الجيل القديم Reno 2 الكاميرات كانت غاطسة جوه الموبايل ومفيش بروز نهائي .. دلوقتي خلوها بارزه تاني علشان يقللوا من تخانة الموبايل.

مش ديه القضية بقا .. مسكة الموبايل حلوة جدا جدا .. ابعاده صغيرة وملوم في الايد وتخانة اقل من 8 ملم ووزن 171 جرام .. حاجة فعلا محترمة وارحم بكتير من ابعاد ووزن الرينو 2 القديم.


الشاشه :-

شاشة اموليد بحجم 6.5 بوصة بدقة FHD+ وكثافة بيكسلات 402 بيكسل لكل بوصة .. شاشة ممتازة .. والشاشة تقدر تشتغل بـ90 هرتز علشان تديك سلاسة تشغيل افضل من الـ60 هرتز اللي متعودين عليها .. وطبعا تقدر تختار الشاشة تشتغل على ايه عموما وكمان ممكن تسيب الموبايل هو اللي يختارك.

بالاضافة كمان لإنحناءات بسيطة اوي في شاشة الموبايل من الاطراف علشان تديك احساس كدا بالفخامة وانت ماسك الموبايل ده .. والـEdges او الإنحناءات دي مش كبيره اوي مش هتدايقك يعني لأ هي بسيطه بس مدياك طابع فخم وانت بتستخدم الموبايل.

الشاشة فيها ثقب للسيلفي .. وديه حاجة كويسة اننا بقينا نشوف ثقب في الشاشات الاموليد في موبايلات تانيه غير موبايلات سامسونج .. الثقب صغير جدا وموجود فوق على الشمال .. ومينفعش تلغيه من الاعدادات.

وبردة ده تغير في سياسة اوبو .. لانها كانت متبنيه الشاشات الكاملة اللي باسلايدر .. بس دلوقتي خلاص تخلت عن فكرة السلايدر .. وده بردة خلى الموبايل يبقا اخف زي ما وضحنا في فقرة التصميم.

عموما الشاشة بشكل عام .. ممتازة .. سطوع تحت الشمس كويس وعالي ومش هيقصر معاك خالص .. وكمان الالوان ودرجاتها ممتازة في الموبايل ده.

وكمان في وضع OSIE Vision لو فعلته الالوان بتبتقى مشبعه اكتر واكتر علشان تديك تجربة احلى لو انت بتحب الالوان المشبعة اوي في الفيديوهات.

وبالنسبة للحماية .. الشاشة عليها حماية كورنينج جوريلا جلاس الجيل الخامس والموبايل بيجي في العلبة متركب عليه سكرينة.


الأداء :-

الموبايل جاي بأحدث وافضل معالج سناب دراجون في الفئة المتوسطة حتى الان وهو سناب دراجون 765 واللي بيجي بتكنولوجيا 7 نانو وبيدعم شبكات الجيل الخامس .. واعتقد النسخة الـ4G من الموبايل ده ممكن تيجي بنفس معالج Reno 2 القديم سناب دراجون 730 او ممكن نشوف مفاجئة باستخدام معالج من معالجات ميدياتيك الجديدة .. لسه الامور مش واضحة.

بشكل عام اداء الموبايل ممتاز وكمان واجهة الـColorOS 7.0 الجديدة المبنية على اندرويد 10 بقت مستقرة اكتر وفعلا محسساك انك شايل فلاج شيب في ايديك.

بالنسبة للاداء الرسومي .. ببجي بتشتغل على اعدادات جرافيك High HD واللعبة شغالة بكفاءة وزي الفل.

لعبة Call Of Duty شغالة على اعدادات جرافيك Very High .. وفورت نايت شغالة على اعلى اعدادات جرافيك برده الي هي Epic .. يعني من الاخر مفيش اي تقصير في الاداء الرسومي في الموبايل ده.


عوامل الامان وعناصر اخرى :-

بصمة مدمجة بالشاشة هي فوق شوية في الشاشة مش تحت زي ما متعودين من اوبو .. بس هي سريعة جدا ويعتمد عليها ومش بتغلط .. والـFaceunlock سريع جدا جدا زي ما متعودين من اوبو والمرادي مفيش سلايدر زي الـReno 2 او الـ2F يعني الموضوع هيبقى اسهل واسرع وامان اكتر.

السوفت وير الجديد بتاع اوبو بقا فيه الدارك مود والي بالمناسبة هنا الـDark Mode ممتاز بفضل الشاشة الممتازة والاسود بيبقى إسود واضح وصريح من كل زوايا رؤية الموبايل.

تقدر تتحكم في شكل الايقونات وديه ميزة جديدة بقت موجودة في الواجهة هنا، وطبعا شكل ستارة الاشعارات اتغير وبقا واشيك ومرتب اكتر.

بالنسبة للصوت .. فالصوت هنا ستريو .. السماعة الي تحت بتشتغل مع سماعة المكالمات علشان تديك تجربة صوتية ممتازة من ناحية علو الصوت والبيز وتوزيع الصوت.

وصوت سماعة المكالمات عالي وممتاز .. ومفيش مدخل 3.5 ملم علشان تحط سماعة اذن قديمة .. ممكن توصل سماعة Type C الي بتيجي مع الموبايل في العلبه بتاعته.

واخيرا شبكة الموبايل .. مش ديه النسخة اللي جايه مصر بس عموما الشبكة بتاعت الموبايل ده ممتازة ومفيهاش مشاكل وشغالة معانا على الجيل الرابع في مصر عادي جدا.


البطارية :-

البطارية المعهودة بتاعت اوبو بحجم 4000 مللي امبير .. استحملت معايا لحد 6 ساعات شاشة مفتوحة وده وقت كويس جدا.

الموبايل بيجي معاه شاحن جديد VOOC 4.0 بيشحن بقوة 30 واط وبيشحن البطارية لحد 80% في نص ساعة .. بس بعد 90% الشحن السريع بيفصل علشان يحافظ على البطارية وبكدا يبقى زمن الشحن بالكامل حوالي ساعة وخمس دقايق.


الكاميرات :-

الموبايل جاي بـ4 كاميرات في الظهر، الأساسية منهم بدقة 48 ميجا بيكسل بفتحة عدسة F/1.7 وفيها مثبت بصري بمستشعر Sony IMX 586 والتانية للزوم حقيقي 2X ولحد 20X رقمي بدون مثبت بصري ودقتها 13 ميجا بيكسل فتحة عدسة F/2.4، والثالثه 8 ميجا بيكسل للتصوير الواسع فتحة عدسة F/2.2 والاخيرة عدسة ملهاش لازمة B&W بدقة 2 ميجا بيكسل بفتحة عدسة F/2.4.

والسيلفي الموجود في ثقب الشاشة بيجي بدقة 32 ميجا بيكسل بفتحة عدسة F/2.4.

بشكل عام الكاميرا الخلفية عجباني جدا .. احسن من المتوقع بصراحة .. بتطلع تفاصيل كتير الوان مظبوطة Dynamic Range كويس جدا .. العدسة الـUltra Wide Angle زيها زي كل موبايلات الفئة المتوسطة مفيهاش جديد .. العدسة الزوم كمان جربتها وممتازة جدا .. لو عايز تشوف الزوم فيها بيوصل لفين شوف الفيديو اللي موجود في اخر المقاله.

والكاميرا حتى في الاضاءات الداخلية لسه بتحافظ على نفسها وبتطلع صور كويسة جدا والبورترية كمان مظبوط جدا.

وبليل الـNight Mode سريع وقوي وبيقدر فعلا يطلع صور احسن لو اصلا الاضاءة مكنتش كويسة .. انما لو الاضاءة كويسة منصحكش تستخدم النايت مود لانه هيفتح الصورة زيادة عن اللزوم وخلاص ومش هتلاقي نتيجة حلوه.

وبالنسبة للفيديوهات فالموبايل بيصور فيديوهات 4K بجودة 30 اطار لكل ثانية.

بالنسبة للسيلفي فهي مش حلوة خالص فالموبايل ده الصور بتلسع جامد في الشمس .. ولون البشرة بيبقى عجيب وغريب ومش منطقي خالص على موبايل في الفئة السعرية ديه.

في الظلة طبعا الصور بتطلع كويسة .. لو مطلعتش كويسة نولع في الموبايل يعني.

وفي ظروف التصوير الاضاءات القليلة شوية .. هتحس بشوية Noise في صور السيلفي بسبب فتحة العدسة الضيقة حبتين تلاته.


سعر الموبايل :-

الموبايل اصغر نسخة فيه 128 جيجا مع 8 جيجا رام وهي دي الي بجربها وسعرها بره 550 دولار يعني حوالي 8500 جنية .. ومينفعش تركب كارت ميموري فيها .. بتركب شريحتين اتصال فقط.


الرأي النهائي :-

بصراحة من الأخر كدا .. الموبايل اه برميم جدا في مسكته .. تصميم شيك وشاشة جامدة جدا وبطارية كويسة وكاميرا خلفية نظيفة .. بس بصراحة سعره عالي جدا .. وفي جزء كبير من السعر رايح لحته دعم الـ5G الي احنا مش محتاجينها.

تسريب الكاميرا السيلفي للنسخة الـ 4G من رينو 3 برو

فاتمنى النسخة الـ4G اللي من الموبايل ده الي نزل ليها تسريبات ان في ثقبين للسيلفي مش واحد زي ده والي السيلفي فيه هيبقا 44 ميجا بيكسل وكمان الكاميرا الخلفية هتبقا 64 ميجا بيكسل زي ما التسريبات بتقول .. تبقى سعرها منطقي شوية عن النسخة الـ5G من الـReno 3 Pro.


فيديو المراجعة :-

قد يعجبك أيضا...

Comments

جاري التحميل...