بعد ما شوفنا سعر Realme 7 Pro .. خلاص بقى أمر واقع ان الموبايل مدخل نفسه في فئة الـ6000 جنية .. وممكن سعره يقل 100 ولا 200 جنية في المحلات .. ايوه ده سعر Oppo Reno 4 .. فا هل ريلمي 7 برو قدم مميزات أكتر من اوبو رينو 4 علشان ريلمي تقدمه بالسعر ده ؟ ده اللي هنعرفه النهارده في المقارنة.
الكاميرات :-
الكاميرات في المقارنة هنا مهمة جدًا .. وأعتقد الكاميرات مهمة عند أي شخص هيشتري موبايل بـ6000 جنية .. فخلينا نشوف مين الأفضل بين الموبايلين.
الموبايلين بيجو بـ4 كاميرات في الظهر .. الأساسية في Realme 7 Pro بدقة 64 ميجا بيكسل بفتحة عدسة F/1.8 بمستشعر سوني IMX682 .. والأساسية في Reno 4 بدقة 48 ميجا بيكسل بفتحة عدسة F/1.7 بمستشعر سوني IMX586 .. باقي العدسات Ultra Wide وMacro وB&W او عزل .. مفيش فروقات جوهرية بينهم.
السيلفي في الموبايلين بيجي بدقة 32 ميجا بيكسل .. في الـ7 برو فتحة عدسة F/2.5 وفي رينو 4 فتحة عدسة F/2.4.
الـNight Mode في الـ7 برو فيه الـPro Mode اللي بيخليك تقدر تتحكم في الـiSO والـShutter Speed .. وكمان فيه الـStary Mode .. كمان في فلاتر في الـNight Mode .. كل ده مش موجود في Reno 4 .. وكمان في Night Mode في تصوير الفيديوهات في الـ7 برو مش موجود في رينو 4.
جربت أصور في الشمس .. لاقيت الصورة “لاسعة” زيادة بفرق بسيط اوي في Reno 4 عن الـRealme 7 Pro .. ومش ملاحظ أي إختلافات تانية .. جربت أصور Portrait في الظل وبصراحة ملاقيتش أي فرق بين الموبايلين .. جربت أصور مبنى وبشكل مبدأي كده الـReno 4 صورته منورة أكتر .. بس لما عملت Zoom لاقيت تفاصيل أكتر لصالح ريلمي 7 برو.
جربت أصور بوضع تعزيز الألوان في الموبايلين .. الـ ريلمي 7 برو إتعامل مع الصورة صح وطلع لون مُشبع منطقي .. جربت تاني صورة عادية في الشمس ولاحظت ان في تفاصيل أكتر في Realme 7 Pro .. وكمان الـSkin Toon او لون البشرة أحسن شوية في Realme 7 Pro عن الـOppo Reno 4.
جربت أصور صورة InDoor ولاقيت ريلمي 7 برو متفوق بفرق واضح جدًا .. جربت Night Mode بقى ولاقيت ان الـNight Mode بتاع Realme 7 Pro بيعزز الألوان بشكل أفضل والصورة بتطلع منه مشبعة بشكل جميل وطبعًا تفاصيل أكتر على عكس Reno 4 اللي بحس الصورة بتاعته بتبقى بهتانة شوية في الـNight Mode.
بالنسبة بقى للسيلفي فا في الشمس الصريحة .. الوضع محسوم للـ7 برو .. لإن رينو 4 فيه مشكلة الصور السيلفي بتلسع في الشمس .. مش عارف ليه، واكيد الـHDR شغال وانا بصور .. جربت بورتريه في الظل لاقيت ريلمي 7 برو إتحسن شوية في معالجة ألوان صورة الخلفية ومبين شوية من لون السماء على عكس رينو 4 اللي بيعمل عزل بطريقة سخيفة.
بس الـ7 برو فيه مشكلة في لون البشرة .. اللون مش مظبوط، محتاج يفتح عن كدا حاجة بسيطة .. بيفكرني بالصور اللي بتطلع من جوجل كاميرا شوية.
في الإضاءة الداخلية .. تفوق تام لـ ريلمي 7 برو .. رينو 4 تحس انه مفيهوش HDR اصلًا .. وفي الـNight Mode والظلمة هتلاقي تفاصيل كتير أوضح في الـ7 برو .. وفي النهاية جربت أصور صورة في إضاءه مُعتمة بقى .. من غير كلام صورة الـRealme 7 Pro تكسب بإكتساح وفيها تفاصيل أكتر بمراحل عن رينو 4.
بالنسبة بقى لتصوير الفيديوهات فالموبايلين بيصوروا 4K مع 30 فريم في الثانية .. يمكن Realme 7 Pro كان أحسن شوية في الألوان .. الوان الفيديو كانت بهتانة اوي في Reno 4.
وجربت كمان اصور فيديو في شارع ظلمة جدًا وشغلت الـUltra Night Video في Realme 7 Pro .. والوضع ده مش موجود في Reno 4 .. والنتيجة ان الفيديو من ريلمي 7 برو طالع منور أكتر بفرق واضح بس طبعًا في Noise جامدة ظاهرة.
شوف تجربة التصوير فيديوهات وصور بالموبايلين في فيديو المقارنة !
التصميم :-
الموبايلين بلاستيك بالكامل .. مفيش واحد مُميز في الخامات عن التاني .. ريلمي كانت بتتفوق بالزجاج في الفئة دي زمان .. ولكن دلوقتي هي خلاص سحبت من نفسها كارت التميز ده.
لو هنتكلم عن شكل رصة الكاميرات فا هي في Reno 4 شكلها أشيك .. بالنسبة لشكل التصميم فا يمكن شكل الـReno 4 في اللون الأزرق المطفي شيك جدًا .. وعمومًا دي أذواق وانا هسيبك انت تحدد لنفسك مين أحسن.
بروز الكاميرات واحد تقريبًا .. الـOppo Reno 4 البروز جاي على درجتين علشان يحسسك انه خفيف .. إنما الـ7 برو على درجة واحدة .. والإتنين تقريبا نفس البروز.
بلاش أطول أوي في نقطة التصميم لانهم ولاد عم .. الفرق بس Reno 4 أخف وأرفع شوية من الـ7 برو بسبب حجم البطارية الأقل في اوبو رينو 4.
الشاشة :-
الموبايلين بنفس الشاشة تقريبًا .. شاشة بقياس 6.4 بوصة من نوع Super AMOLED وبدقة FHD+ .. الفرق الواضح بيكون في شكل الثقب الواحد الأفضل في الـ ريلمي 7 برو عن الثقبين بتوع رينو 4.
انما Quality الشاشات نفسها واحد .. نفس درجة الألوان .. نفس درجة السطوع .. مفيش أي فرق يذكر ما بينهم .. الإتنين شاشات AMOLED عادية كويسة.
الحافة السفلية في الموبايلين كبيرة .. بس في الـRealme 7 Pro أكبر حاجة بسيطة أوي عن Oppo Reno 4.
الأداء :-
الموبايلين نفس المعالج كوالكوم سناب دراجون 720G بنفس الأداء بنفس الرام الـ8 جيجا بنفس مساحة التخزين الـ128 جيجا اللي من نوع UFS 2.1.
ومسكت الموبايلين مع بعض لاقيتهم نفس الأداء .. حرفيًا بدون أي فرق فا بلاش نتكلم في الجزئية دي.
الأداء الرسومي برده واحد .. لعبة ببجي على High HD .. لعبة كول اوف ديوتي على Very High .. والأداء الرسومي واحد في الموبايلين مفيش أي إختلاف وكمان الإتنين زي بعض في السخونية .. مش بيسخنوا اوي.
البطارية :-
بطارية الـ ريلمي 7 برو أفضل من الـ رينو 4 .. الـ7 برو بتيجي بحجم 4500 مللي امبير لكن اوبو رينو 4 بيجي ببطارية بحجم 4000 مللي أمبير فقط .. هتاخد حوالي ساعة زيادة Screen On في الـRealme 7 Pro.
وكمان في فرق في الشواحن .. الـ7 برو معاه شاحن 65 واط والرينو 4 شاحن 30 واط .. فعليًا لو هنشحن من 15% لحد 100% .. فالـ7 برو بيشحن في 25 دقيقة والرينو 4 شحن في 50 دقيقة.
عوامل الأمان وعناصر اخرى :-
البصمة مُدمجة بالشاشة في الموبايلين .. الإتنين سُراع جدًا زي بعض .. الـFace Unlock سريع في الموبايلين .. يمكن في Reno 4 هو أسرع حاجة بسيطة أوي من Realme 7 Pro.
الموبايلين فيهم Always On Display ولكن الأشكال المُتاحة عندك في Reno 4 أكتر وافضل من Realme 7 Pro اللي مفهوش أشكال .. حاجة بسيطة أنا عارف بس أخيرًا لاقيت حاجه رينو 4 متفوق فيها 😁.
رينو 4 فيه مستشعر الذكاء الإصطناعي اللي بيعمل شوية حاجات لذيذة شرحناها قبل كده في مراجعة Oppo Reno 4 .. ولكن بعد فترة إكتشفنا إن المستشعر ده معظم الوقت بيعلق وهتحتاج تفصله.
صوت ريلمي 7 برو بيجي Stereo .. بيطلع من السماعة السفلية وسماعة المكالمات .. صوت رينو 4 بيطلع من السماعة السفلية فقط .. الفرق النهائي مش كبير في درجة علو الصوت .. يعني نقول 10% أعلى في الـ7 برو .. بس الـBass أو تجسيم الصوت أفضل في Oppo Reno 4.
ونقطة أخيرة .. في زنة بسيطة بتحصل في ظهر الـ7 برو لما بتعلي الصوت على الأخر بسبب موضوع الـStereo ده .. أي حاجة مقلتهاش فهي مُمتازة وشغالة في الموبايلين، مستشعرات كلها زي الفل.
الموبايلين فيهم ميكروفون إضافي لعزل الضوضاء .. شبكات إتصال والـWiFi قوية ومُمتازة في الموبايلين مفيهاش أي مشاكل.
اسعار الموبايلات :-
- موبايل Oppo Reno 4 نسخة الـ128 جيجا مع 8 جيجا رام بسعر 5800 جنية في المحلات
- موبايل Realme 7 Pro نسخة الـ128 جيجا مع 8 جيجا رام بسعر 5900 جنية في المحلات
والإتنين بينفع تركب فيهم كارت ميموري بحجم 256 جيجا مع شريحتين إتصال من الجيل الرابع مع بعض.
الرأي النهائي :-
من الأخر شركة ريلمي المرة ديه قدمت كاميرات أحسن وبطارية أفضل وشحن أسرع 65 واط .. مع صوت Stereo مقبول ولكنه مش أحسن تجربة Stereo ممكن تاخدها.
فأكيد ريلمي 7 برو أفضل بشكل عام .. ولكن هل أنت شايف إن الحاجات اللي ريلمي بتقدمها في ريلمي 7 برو كفيلة إنها تخليك تسيب اوبو رينو 4 وتروح تشتريه ؟ .. خصوصًا أن لسه براند اوبو أقوى من ريلمي في مصر.
Comments