شركة أوبو أطلقت موبايلين جُداد في الفئة المتوسطة وهم Oppo Reno 6 4G و Oppo Reno 6 5G بشكل رسمي، وبالفعل الموبايلات وصلت لنا في موبيزل وجربناها والنهارده هنقدم لكم المراجعة وهنوضحلكم هل في تطوير في سلسلة Reno 6 الجديدة عن سلسلة Reno 5 اللي فاتت ولا لأ.
مراجعة Oppo Reno 6 5G :-
التصميم :-
الموبايل ده تصميمه من أقوى النقط فيه .. تصميم تحبه لما تشوفه في الصور او لما تلمحه مع حد من بعيد، ولما تمسك الموبايل في إيدك هيعجبك أكتر كمان، وهتحب خاماته وتقفيله.
اوبو قلدت شركة ابل بس بإبداع .. وعملت تصميم خارجي أفضل من تصميم iPhone 12 .. الموبايل ظهره زجاجي مصنفر علشان متظهرش فيه البصمات.
فريم معدني مسطح .. والفريم معمول حلو اوي بحيث تقدر تمسك الموبايل في إيدك من غير ما يضايقك خالص .. غير ايفون 12 اللي بيضايقك شوية لما تمسكه فتره.
فريم الموبايل نفسه مش تخين لأنه 7.6 ملم .. ده غير وزن الموبايل الخفيف 182 جرام .. وفي الأخر معتقدش في حد هيختلف على تصميم الموبايل ده انه جامد جدًا.
الشاشة :-
الموبايل جاي بشاشة 6.4 بوصة من نوع AMOLED بدقة FHD+ بتردد بيوصل لـ90 هيرتز .. مع ثقب صغير للسيلفي .. شاشة كويسة من ناحية الألوان والسطوع والجودة.
الحواف بتاعت الشاشة قليلة جدًا ومقبولة جدًا، من الأخر الشاشة مش هتدايقك في الإستخدام إطلاقًا.
ولكن كان نفسي في تردد 120 هيرتز .. عشان تفرق عن الجيل اللي فات .. لأن الشاشة كده يعتبر متغيرتش ومفيهاش جديد واحنا دائمًا بنقدر أي تطوير يحصل في الموبايل.
الأداء :-
اوبو استخدمت في الموبايل ده معالج من ميدياتك اسمه Dimensity 900 وده معالج داعم لشبكات الجيل الخامس بيشتغل بتكنولوجيا 6 نانو ميتر.
المعالج ده أكيد اقوى من SD720G .. معالج نشيط مش هيدايقك في الإستخدام، ولكنه مش أقوى معالج موجود في الفئة السعرية دي .. الموبايل مش رخيص، في معالجات كتير أقوى كده كنا نتمنى نشوفها في الموبايل ده.
لو انت استخدامك متوسط فا أداء المعالج هنا مع سوفت وير ColorOS بتاع اوبو السلس مع الـ90 هيرتز والـ8 جيجا رام هيقدمولك تجربة كويسة مستقرة بدون أي مشاكل.
تجربة الألعاب مش جامدة .. ببجي بتشتغل على High HD بس مفيش تقطيع واللعبة بتشتغل كويس، بس لو كان المعالج أقوى كنا هنلاقي اعدادات جرافيك أعلى.
وأخيرًا بسبب الفريم المعدن في الموبايل مع الظهر الزجاجي، هتحس ان الموبايل بيسخن بسرعة شوية عن الطبيعي .. او بمعنى تاني انت هتحس بالسخونية بسرعة وده الطبيعي من الخامات المُستخدمة هنا.
عوامل الأمان وعناصر اخرى :-
بصمة موجودة تحت الشاشة وسريعة جدًا كعادة شركة اوبو .. من أسرع البصمات اللي تقدر تعتمد عليها، والـFace Unlock سريع جدًا وكويس برده .. وفي Always On Display.
واجهة اوبو تقدر تزود الرامات لحد 5 جيجا زيادة من مساحة التخزين بتاعت الموبايل علشان تقدملك سماحية أكبر في فتح برامج أكثر من غير ما تقفل.
الموبايل ده فيه Haptic Feedback محترم .. بيديلك احساس لطيف وانت بتستخدم الـTouch بتاع الموبايل وتقدر تتحكم في درجته من درجات كتير .. ميزة لطيفة جدًا الحقيقة، ومش موجودة في Reno6 4G بالمناسبة.
صوت الموبايل Mono مش Stereo للأسف، وهو نفس صوت الجيل اللي فات، نقدر نقول انه متوسط .. مع ان اوبو كانت تقدر تقدم ميزة السماعات الـStereo وكانت هتفرق في التجربة .. ومفيش مدخل 3.5 مللي بالمناسبة.
المستشعرات كلها شغالة ومفيش ولا غلطة .. مستشعر التقارب بتاع المكالمات شغال بشكل ممتاز جدًا.
ولا ننسى نقطة التفوق الكُبرى لكل موبايلات اوبو على مُنافسيها .. الشبكات سواء Wi Fi او اتصال فا هي ممتازة في كل موبايلات اوبو وممتازة في الموبايل ده برده.
البطارية :-
البطارية هنا 4300 مللي أمبير .. لو كانت كبرت شوية كانت هتبقا أفضل .. عمومًا هي هتقدم وقت إستخدام 6 ~ 7 ساعات شاشة مفتوحة .. يعني لو نزلت من البيت في اول اليوم شاحن الموبايل هترجع تلاقيه 20% لو استخدامك متوسط.
ولكن الشاحن المرفق اللي مع الموبايل سريع اوي 65 واط .. بيشحن البطارية في نص ساعة .. هو اه ده نفس شاحن الجيل اللي فات برده .. بس هو شاحن سريع وسرعته ممتازة.
الكاميرات :-
الكاميرا الخلفية ثلاثية .. الأساسية 64 ميجا بيكسل فتحة عدسة F/1.7 والتانية 8 ميجا بيكسل للتصوير الواسع فتحه عدسه F/2.2 والاخيرة ماكرو 2 ميجا بيكسل .. والسيلفي 32 ميجا بيكسل فتحة عدسة F/2.4.
مستوى الكاميرات محصلش فيه تغيير .. كالعادة معالجة جيدة من الصور بفضل الـHDR وتعزيز الألوان اللي بيحصل من سوفت وير اوبو.
ولكن كنت اتمنى اي تطوير في الكاميرات عن الجيل السابق .. مثبت بصري في العدسة الرئيسية مثلًا زي سامسونج وفيفو .. او كاميرا زوم .. اي تطوير حقيقي.
ولكن زي ما قولتلك الكاميرا عادية مقبولة في مختلف الظروف .. ساعات هتحس ان الصور ناعمة شوية او تفاصيلها قليلة في حالة لو هتصور بورترية مثلًا .. أما في المجمل الأداء متوسط .. ومعتقدش ان دي افضل كاميرا بالسعر ده.
السيلفي كويس .. عمومًا انا بحب السيلفي بتاع مجموعة BBK .. بيعرفوا يعملوا سيلفي كويس.
بالنسبة لتصوير الفيديوهات فالموبايل بيصور 4K مع 30 فريم في الثانية .. وفي ميزة الـLive HDR اللي بتقدر تعالج لون السماء وانت بتصور علشان تاخد أحسن تفاصيل مُمكنه.
سعر Oppo Reno 6 5G :-
- نسخة 128 جيجا مع 8 جيجا رام بسعر 8990 جنية مصري
والموبايل بيدعم تركيب شريحتين إتصال من الجيل الخامس لكن مش بيدعم تركيب كارت ميموري.
الرأي النهائي :-
مميزات Oppo Reno 6 5G :-
- تصميم شيك
- خامات كويسة جدًا
- شحن سريع جدًا
- مستشعرات ممتازة
- بصمة تحت الشاشة سريعة
- شبكات قوية جدًا
- سوفت وير مستقر
- كاميرات باداء مقبول ولكن بدون تطوير
عيوب Oppo Reno 6 5G :-
- صوت الموبايل Mono
- مش مقاوم للماء
- سعر غالي
- المعالج ضعيف الى حد كبير
- مفيش مدخل الـ3.5 مللي
- مفيش مكان لتركيب كارت ميموري
- مساحة 128 جيجا مش 256 جيجا
مراجعة Oppo Reno 6 4G :-
التصميم :-
الموبايل هنا بالتصميم التقليدي القديم بتاع اوبو .. خامات بلاستيك والظهر مصفنر وفيه كيرفات في الظهر .. مفيهوش جديد يتقال .. نفس شكل وخامات الجيل اللي فات.
يمكن اوبو شايفه مثلا ان التصميم ده حلو فا مرضيتش تغيره تمامًا .. معرفش الحقيقة السبب .. هو التصميم حلو فعلًا .. بس لو كان فيه تغيير بسيط كان هيبقى افضل .. والموبايل وزنه 173 جرام وتخانه 7.8 مم.
الشاشة :-
شاشة بحجم 6.4 بوصة AMOLED بدقة FHD+ بتردد 90 هيرتز .. الشاشة مفيهاش جديد اقوله .. الشاشة شبه جدا شاشه الجيل اللي فات .. شاشة معقولة مقبولة جدًا .. ألوان كويسة سطوع عالي .. مقدرش اقول ان الشاشة فيها عيب.
ولكن مشكلتي ان مفيهاش تطوير .. ولكن خلينا نتكلم بالمنطق .. شاشة الـReno 6 5G الأغلى منه مطورتش .. فا أكيد شاشة الـReno 6 4G الأرخص مش هتتغير .. اوبو شايفه الشاشة كويسة ومش محتاجه تطوير.
الأداء :-
نفس المعالج اللي اوبو استخدمته قبل كده وهو سناب دراجون 720G .. مش هقولك نعذرهم لأن في أزمة في المعالجات بسبب الكورونا والكلام ده .. وكل الشركات بتعاني.
ولكن انا اتوقع ان اوبو منزله رينو 6 4G مكان رينو 5 4G بالظبط في المحلات وبنفس سعره بدون اي اختلاف .. لمجرد يبقى موديل أحدث موجود وخلاص.
أداء الموبايل هنا مش كارثه .. سامسونج بتستخدم نفس المعالج برده في اشهر موبايلاتها في الفئة المتوسطة .. بس انا بدور دايما على المعالج الاقوى لانه روح الموبايل .. واوبو هنا مستخدمتش معالج أقوى، المعالج أداءه مقبول لكنه مش الأفضل بالمقارنة مع موبايلات شاومي، وسخونيته كويسه علشان من البلاستيك.
عوامل الأمان وعناصر اخرى :-
الموبايل فيه بصمة تحت الشاشة سريعة وعمليه وفيه Face Unlock ممتاز .. وفيه Always On Display .. وصوت الموبايل بيجي Mono برده مش Stereo.
لكن هنا في مدخل السماعات الـ3.5 مللي على عكس الـReno6 5G .. ومستشعر التقارب هنا شغال ممتاز مفيش فيه أي مشاكل، والشبكة مفيهاش ولا غلطه، ممتازة جدًا.
البطارية :-
بطارية الموبايل 4300 مللي أمبير برده ادائها متوسط 6 ~ 7 ساعات شاشه مفتوحه.
الشاحن اللي جاي مع الموبايل نفس شاحن الـ5G بقوة 65 واط .. ولكن هيشحن فعلي بـ50 واط بس وهيشحن البطارية في اقل من ساعة إلا ربع .. برده مفيش جديد.
الكاميرات :-
الموبايل بيجي بأربع كاميرات خلفية الأساسية 64 ميجا بيكسل بفتحة عدسة F/1.7 والتانيه 8 ميجا بيكسل بفتحة عدسة F/2.2 للتصوير الواسع والكاميرات الأخيرة ماكرو وعزل .. والسيلفي 44 ميجا بيكسل بفتحة عدسة F/2.4.
اداء الكاميرات مفيش فيه أي تطور عن Oppo Reno 5 4G اللي فات .. هو هو بنفس الأداء من غير أي اختلاف سواء في السيلفي او الخلفية، الأداء مش حلو ومش وحش .. كان لازم يحصل تطوير.
سعر Oppo Reno 6 4G :-
- نسخة واحدة 128 جيجا مع 8 جيجا رام بسعر 5990 جنية مصري
بينفع تركب شريحتين إتصال من الجيل الرابع مع كارت ميموري بحجم 512 جيجا في نفس الوقت.
الرأي النهائي :-
مميزات Oppo Reno 6 4G :-
- تصميم خفيف شيك
- شاحن سريع
- سوفت وير مستقر
- بصمة سريعة في الشاشة
- شبكة ممتازة
- كاميرات مقبولة
عيوب Oppo Reno 6 4G :-
- المعالج ضعيف محتاج تطوير
- الصوت Mono مش Stereo
- التصميم قديم وتقليدي
- مفيش جديد عن Reno 5 4G القديم
وطبعًا لو معاك Oppo Reno 5 4G منصحكش انك تغير لـ Reno 6 4G خالص .. مفيش أي فرق يستاهل التغيير.
Comments