مراجعة Huawei Freebuds 4 الجديدة – سماعة هواوي الجديدة بمميزات قوية !

سماعة Huawei Freebuds 4 الجديدة من هواوي هي سماعة بتقدم ميزة الـActive Noise Cancellation او لما بتلبسها بتعزل الضوضاء عنك بطريقة او بأسلوب مختلف عن المُعتاد في باقي السماعات .. وهي سماعة حجمها صغيرة بالمقارنة مع مميزاتها اللي هنوضحها ليكم النهارده في مراجعة Huawei Freebuds 4 الجديدة.

ميزة Active Noise Cancellation

السماعة بتيجي بحجم صغير جدًا .. هواوي مُتبنيه فكرة تصميم اسمها Open Fit وده فكر بيحاول يوصل لك السماعة بحجم صغير من غير أي أجزاء سيليكون او كاوتش على السماعة ( الي بتضايق البعض ) ومع ذلك يحتفظ بوجود ميزة عزل الضوضاء ANC.

ميزة عزل الضوضاء بتشتغل في السماعة هنا بأفضل أداء ليها مع الأذن الصغيرة او المتوسطة .. الأذن الكبيرة مش هتاخد منها أحسن اداء .. وطبعًا السماعة مفيش منها مقاسات هي مقاس واحد فقط وهي حجمها صغير مش كبير.

عزل الضوضاء بالسماعة بيتم من خلال السوفت وير .. السماعة مش بتمنع دخول الهواء مثلًا او الضوضاء عن طريق إنها تحط جزء من السيليكون علشان يقفل أذنك، لأ هي بتعزل الضوضاء بتقنية تانية يمكن مش أفضل من إستخدام السيليكون لكنها حافظت على التصميم والحجم الصغير.

توصيل السماعة بالأجهزة الأخرى

من مميزات السماعة دي واللي اتكلمنا عنها بشكل غير مُباشر في فيديو HUAWEI Super Device قبل كده هي ان السماعة تقدر توصلها بجهازين في نفس الوقت وتتنقل بينهم بدون أي مشكلة.

والميزة دي بتشتغل بكامل مميزاتها على كل الأجهزة من كل الشركات .. تقدر تشغلها على موبايلات ابل او اي موبايلات اندرويد وكمان بتشتغل على الـWindows بدون أي مشاكل.

تقدر توصل السماعة بجهازين في نفس الوقت زي اللاب توب والموبايل مثلًا .. وتكون بتسمع حاجه على اللاب توب، لو جالك مُكالمة على الموبايل هتقدر ترد عليها في نفس الوقت والصوت هيتوقف في اللاب توب ولما تخلص المكالمة الوضع هيرجع طبيعي والصوت هيرجع للـ لاب توب تلقائي.

تطبيق AI Life للتحكم في السماعة

من خلال تطبيق AI Life تقدر تعرف كل حاجه عن السماعة وتتحكم فيها، طبعًا عندك نسبة البطارية بتاعت كل سماعة وكمان نسبة البطارية في الـBox نفسه بتاع السماعة .. وكمان عندك الـConnection Center اللي من خلاله تقدر تعرف السماعة متوصلة مع كام جهاز وايه هي الأجهزة وتقدر تفصلها عنهم.

كمان عندك التحكم في عزل الضوضاء واللي بالمناسبة فيه أوضاع وهما Cozy وده اللي بيشتغل في الأماكن اللي الضوضاء فيها بسيطة وفي وضع الـGeneral اللي تستخدمه في الأماكن اللي فيها ضوضاء عاليه.

تقدر من خلال الإعدادات تتحكم في الإيماءات بتاعت السماعة، يعني تقدر تختار الوظيفة او الـAction اللي هيحصل لما تضغط على السماعة اليمين او الشمال .. تقدر تظبط وظيفة لكل ضغطه على كل سماعة.

وفي ميزة كمان وهي Find My Earphones وبتستخدمها لو مش لاقي السماعة وبتدور عليها مثلًا .. بتضغط عليها وبتختار سماعة من الاتنين ولما بتختار السماعة اليمين مثلًا السماعة بتعمل صوت بحيث توصل لها.

الإيماءات لسهولة الإستخدام

وفي كمان ميزة الإيماءات وهي انك لو بتسمع أغاني وشيلت السماعة من أذنك الأغاني هتقف تلقائي ولما تلبس السماعة تاني الأغاني هتشتغل تلقائي، وتقدر تقفل او تشغل عزل الضوضاء من خلال انك تضغط ضغطه مطولة على أي سماعة من الإتنين والوضع هيشتغل او هيقف على حسب وضعه الحالي.

لو ضغطت ضغطتين على السماعة هترد على المكالمة او هتقفل عليها .. او هتوقف الأغنية او هتنقل على الأغنية اللي بعدها، كل ده على حسب الإعدادات اللي انت ظابطها من خلال تطبيق AI Life.

ومن خلال التطبيق تقدر تحدد وظيفة للسماعة اليمين ووظيفة للسماعة الشمال وكل واحده فيهم تعمل حاجه مُعينة .. ولو في مكالمة جايه لك وضغطت ضغطه مُطوله هتقفل على المكالمه .. ولو سحبت لفوق ولتحت على السماعة هتقدر تعلي الصوت وتوطيه بكل سهولة.

أداء وصوت السماعة

لو انت بتحب الصوت العالي أوي وان السماعة توصل لك أقصى صوت ممكن لأذنك فا السماعة مش هتقدملك ده .. السماعة صوتها كويس حلو ومقبول لكن مش أعلى حاجه.

الـBass والـMiddle والـTriple كويسين اه وبيقدموا أداء كويس لكن السماعة نفسها مش هتقدملك أعلى صوت، ويمكن تصميم السماعة الصغير بيسبب انك متاخدش أعلى صوت من السماعة.

بالنسبة للميكروفون فا هو ممتاز الى حد كبير، بيقدر يعزل أصوات الهواء بشكل كبير جدًا بالرغم من حجم السماعة الصغير .. لكن لو في ضوضاء حول الميكروفون مش هيقدملك أفضل أداء تتوقعه.

البطارية وسرعة الشحن

الـBox بتاع السماعة بعد ما بيتشحن بيقدملك وقت إستخدام 14 ساعة .. وبالنسبة للسماعة فا هي تكفي لوقت إستخدام ساعتين في الشحنه الواحدة الكلام ده في حالة انك مشغل ميزة عزل الضوضاء.

لكن لو مش بتستخدم ميزة عزل الضوضاء فا الـBox هيوصل لـ22 ساعة والسماعة هتوصل لـ4 ساعات إستخدام متواصل من غير ما تحتاج تشحنها.

الـBox بيتشحن من خلال منفذ USB Type C وبيشحن في أقل من ساعة .. وكمان بيدعم الشحن اللاسلكي.

هل السماعة ليها إكسسوارات ؟

لسه لحد دلوقتي مفيش حاجه واضحة بخصوص اكسسوارات السماعة Huawei Freebuds 4 الجديدة .. لكن الـ Huawei Freebuds 4i اللي راجعناها قبل كده كان متوفر لها جرابات بأكثر من لون على موقع هواوي ايجيبت الرسمي بسعر 300 جنية .. بالتالي متوقع اننا نلاقي إكسسوارات في وقت قريب لـ Freebuds 4 الجديدة.

الخامات ومقاومة الماء

بالنسبة للـBox بتاع السماعة فا هو سهل الإستخدام الى حد كبير .. سهل تفتحه وتقفله بإيد واحدة والمغناطيس بتاع الباب كويس جدًا وبيقدملك أداء كويس والسماعات مش بتخرج منه بسهولة .. لكن الباب نفسه خامته مش الأفضل والمفصل بتاعه مش قوي اوي .. والـBox فيه لمبة الشحن ومنفذ الـUSB Type C والزرار بتاع الـParing.

هواوي بتقول ان السماعة دي بتيجي بمقاومة للماء IPX4 ودي مقاومة ضعيفة الى حد كبير لرذاذ الماء الخفيف .. فا هي مش مقاومة قوية للماء.

أداء Freebuds 4 في الألعاب

لو موصل السماعة بجهاز واحد فقط وهو اللي انت بتلعب عليه هتلاقي التأخير في الإستجابة قليل جدًا .. وهتاخد منها أداء محترم بشكل كبير ومش هتحس ابدًا ان في أزمة.

لكن لو انت موصل السماعة على ويندوز مثلًا وعلى الموبايل في نفس الوقت .. او موصلها عمومًا على جهازين وبتلعب على واحد منهم هتبدأ تحس ان في أزمة وان التأخير كبير أوي.

سعر Huawei Freebuds 4

السماعة متوفرة للحجز المُسبق بسعر 3199 جنية مصري باللون الأبيض والفضي، وهي متوفرة للحجز من يوم 26 أغسطس وحتى 7 سبتمبر .. وهدية حجز مُسبق باند HUAWEI Band 3e مع ضمان 6 أشهر على السماعة وإشتراك HUAWEI Music هدية.

الرأي النهائي

مميزات Huawei Freebuds 4 :-

• ميزة الإتصال بين أكثر من جهاز في نفس الوقت ومش شرط يكون هواوي
• ميزة الـActive Noise Cancellation
• حجم السماعة الصغير وتصميمها الخفيف
• الإيماءات لطيفة جدًا
• بطارية بتقدم أداء كويس الى حد كبير

عيوب Huawei Freebuds 4 :-

• صوت السماعة مش أعلى حاجة
• الميكروفون مش أحسن حاجه في الأماكن الدوشة أوي
• مقاومة الماء مش فعاله