مقارنة بين اهم موبايلين في فئة الـ5 الاف جنيه وهم الـRealme XT والـOppo Reno 2F، الموبايلين ولاد عم لإن شركة ريلمي تبع شركة اوبو والاتنين تبع نفس الشركة الأم واللي هي BBK واللي عندها فيفو و وان بلس، وكل موبايل من الموبايلين اللي بنقارن بينهم النهارده ليه اتجاه معين ومُوجه لفئة مُعينه.
التصميم :-
أول ما تمسك الموبايلين في ايديك، هيجيلك احساسين عكس بعض، الأول هو احساس الظهر الزجاجي اللي بيديلك انطباع إنك ماسك موبايل Premium وخامات محترمه، ودي الحقيقة لأن Realme XT و Reno 2F جايين بظهر زجاجي مع فريم من البلاستيك وحقيقي دي حاجة غريبة جدا … ايه اللي جاب البلاستيك في الفريم في الفئة السعرية دي، بس هما يعني ليهم وجه نظر علشان الفريم البلاستيك هيعيش أكتر لو اتعمل صح على عكس الفريم المعدن اللي هو ممكن يتقشر بسهولة.
الـXT بيعمل انعاكسات بيضاوية كدا علي الظهر مع الشمس إنما الـ2F بيظهر خطوط متوازية لبعضها كدا جمب بعض مع برده تغير اللون الابيض ده لألوان دافية زي الأحمر و الأورنج كدا مع انعكاس الضوء عليه.
الاتنين أبعادهم قريبة من بعض .. يمكن بس الـ2F أطول حاجة بسيطة من الـXT وبالنسبة للوزن فالـ2 اف أتقل بردوا حاجة بسيطة والتقل ده راجع لوجود سلايدر السيلفي اللي بيعتبر ميزة في الرينو عن الـXT !
عجبني ف الـ2F إن مفيش بروز كاميرا نهائي .. الكاميرا غطسانة كدا جوا الظهر علشان متعملكش أي مشاكل لو هتستخدم الموبايل من غير جراب، إنما الـXT في بروز كبير وواضح في الكاميرات بيتغطى بالجراب الشفاف اللي جاي مع الموبايل، والرينو 2F معاه جراب شفاف بردوا في العلبة.
أوبو شاطرة أوي في سلايدر السيلفي وحاطة ف الـ2 اف سلايدر شيك كدا بيعمل ألوان متغيرة وهو طالع ونازل .. سلايدر متين زي الـMi 9T اعتقد هيعيش معاك بدون مشاكل.
ولو مقلق من فكرة وجود سلايدر في موبايلك، ريلمي بتاخدك من ايديك وتقولك تعالى خد نوتش لطيف فيه السيلفي بدون اي خوف من فكرة وجود حاجة بتتحرك في موبايلك.
الشاشة :-
علشان أوبو متبنية السلايدر طبيعي تجربة الشاشة الكاملة بتاعتها هتبقا أحسن، Reno 2F جاي بشاشة أموليد 6.5 بوصة كاملة بدون نوتش اما الريلمي XT جاي بشاشة سوبر أموليد 6.4 بوصة بنوتش صغير للسيلفي مينفعش تلغيه من الاعدادات، والاتنين بدقة Full HD PLUS.
الحافة السفلية في الـXT أقل حاجة بسيطة أوي من الرينو 2F لو هتركز أوي يعني، بس طبعا وجود النوتش في أعلى شاشة الاكس تي يخلي الرينو 2 اف يكسب طبعا في استغلال الشاشة لواجهة الموبايل وكمان هيقدملك متعة اكتر في مشاهدة الفيديوهات والالعاب.
بالنسبة للألوان، الاكس تي بيفتح الألوان شوية عن الطبيعي إنما الرينو 2 اف ألوانه مطفية شوية تحسها واقعية اكتر ولو مسكت الموبايلين جنب بعض هتحسن ان الرينو شاشته احسن، وعموما كدا كدا الشاشتين كويسين وسطوعهم مناسب و حلو جدا و مش هتواجه مشاكل في استخدامهم.
الشاشتين عليهم حماية جوريلا الجيل الخامس. والموبايلين لما تطلعهم من العلبة هتلاقي متركب عليه اسكرينة.
الاداء :-
ريلمي اكس تي موجه للشباب أكتر وحاطين فيه معالج كوالكوم سناب دراجون 712 وده معالج بالتأكيد أفضل من ميدياتيك هيليو بي 70 الموجود في الرينو 2 اف، و علشان اختصر عليك وقتك فبكل تأكيد معالج الـRealme XT أفضل من الـ2F علي المدى البعيد وأفضل في الأداء الرسومي.
إنما في الأداء اليومي والاستخدام العادي صعب تحس يعني إن في فرق جوهري ما بينهم، يعني لو انت شخص استخدامك برامج سوشيال ميديا و مكالمات ومسجات وألعاب خفيفة أي واحد فيهم هيقضى الغرض و زيادة بس لو انت راجل بتحب الألعاب الثقيلة وعاوز أداء أفضل طبعا خليك مع الـXT.
نتكلم علي الأداء الرسومي في الألعاب، الريلمي اكس تي والرينو 2 اف الاتنين بيشغلوا PUBG علي High HD وشغالة بكفاءة على الموبايلين، اما Call Of Duty شغالة علي Very High في XT انما ف الـ2F شغالة على High بس مش Very High.
و لعبة Fortnite شغالة علي اعدادات جرافيك متوسطة على XT ومش بتشتغل اصلا على الـOppo Reno 2F عشان كده نقول الـXT يكسب في نقطة الألعاب، بس برده لو انت حد بيحب الألعاب لازم تبقى فاهم ولا الـXT ولا الـ2F بيقدموا أفضل معالج في الفئة السعرية دي لأنهم قريبين جدا من سعر الـHonor 20 اللي بيجي بمعالج كيرن 980 واللي بيديلك تجربة أداء أفضل جدا خصوصا في الألعاب.
عوامل الأمان وحماية الخصوصية :-
كنت حاسس ان الاكس تي أسرع في البصمة المدمجة بالشاشة بس اما جربت الاتنين مع بعض كتير يعني تقريبا الاكس تي والـ2 اف نفس سرعة البصمة المدمجة بالشاشة، وبالنسبة للـFaceunlock فطبيعي هتفتكر ان الـXT اسرع علشان مفيش سلايدر لسه هيطلع ويتعرف عليك، بس الحقيقية إن الـ2F طلع طيارة برده والاتنين في الاخر متعادلين ف سرعة بصمة الوجه.
الجميل من ريلمي إنها اضافت الـDark Mode في الاكس تي و للأسف مش موجود لسه ف الـ2 اف، والاتنين فيهم عمل نسختين من برامج التواصل الاجتماعي عادي جدا، والموبايلين مفيهمش أي مشاكل في المستشعرات بتاعتهم.
الموبايلين مفيش فيهم لمبة اشعارات وطبعا الأوبو بيعرض أيقونات اشعارات أكتر لأن مفيش نوتش محجم الموضوع والاتنين فيهم خاصية Screen Of Clock بتعرض ساعة وأيقونة المكالمات الفائتة والرسائل على الشاشة المطفية، مستنين تحديث يضيف أيقونات بقية البرامج بتاعة السوشيال.
الصوت والشبكة :-
الرينو أعلى حاجة بسيطة عن الـXT وكمان مكان السماعة بتاع الأوبو أحسن وهو تحت علي اليمين مش علي الشمال زي الـXT اللي ممكن يتسبب في كتم الصوت احيانا و انت بتلعب، في سماعات الأذن الوضع معكوس وهنا الـXT أحسن بفرق بسيط أوي، وسماعات المكالمات الموبايلين ممتازين و الصوت عالي بدون أي مشاكل.
و بالنسبة للشبكة، أوبو و ريلمي ممتازين في الشبكات ودول أحسن موبايلين عندهم في الفئة المتوسطة وهما مهتمين جدا بموضوع الشبكة والموبايلين دول من أفضل الموبايلات اللي ممكن تجيبها في التعامل مع الشبكات في الأماكن اللي تغطيتها ضعيفة.
البطارية :-
الاتنين زي بعض 4000 مللي أمبير معاهم نفس الشاحن الـVOOC 3.0 اللي بيشحن بقوة 20 وات، بصراحه شاحن محترم جدا والاتنين طبعًا منفذ الشحن فيهم USB Type C والاتنين بيستحملوا نفس الوقت تقريبا من 6 لـ7 ساعات شاشة مفتوحة حسب استخدامك، الموبايلين مفيش مشاكل معاهم بصراحة في موضوع البطاريات ده.
الكاميرا :-
خناقة كبيرة بين فكرة معالجة ريلمي للصورة و فكرة معالجة أوبو، رغم إنهم ولاد عم بس طريقة معالجة الصور مختلفة تمامً، بالنسبة للأرقام سيبك منها، علي الورق أكيد الـRealme XT أحسن بكاميرا رئيسية 64 ميجا بيكسل بمستشعر سامسونج الجديد GW1 إنما الأوبو كاميرته الخلفية دقتها 48 ميجا بيكسل عادية خالص وطبعا في كاميرات تانية زي Ultra Wide Angle وMacro والعزل !
السيلفي في الموبايلين واحد، بيجي بدقة 16 ميجا بيكسل وفتحة العدسة فيه F/2.0 والسيلفي موجود في النوتش بالنسبة للأكس تي وموجود في السلايدر بالنسبة للـ2F.
الاكس تي يتفوق في وجود Night Mode في السيلفي في سوفت وير الكاميرا العادي, اما الـ2F لسه موصلوش التحديث ده وكمان الاكس تي بيدعم تشغيل جوجل كاميرا إنما الـ2 اف مفيش نسخة جوجل كاميرا كويسة له.
لما تيجي تصور أشخاص بـ موبايلات اوبو وريلمي اقفل الـDazzle أو الـChroma Boost علشان ميغيرش ألوان الصورة، وبيظهرلك فرق معالجة ألوان كل كاميرا .. الاكس تي لعب في لون البشرة شوية، والبورتريه دة نفس اللي حصل ف الاتنين قصوا بنفس الطريقة.
لما تيجي تصور مبنى مثلا فالاكس تي بردوا لعب في الألوان شوية، باختصار بيخلي الصورة أحلى بفلتر بسيط كدا على الصور، وطريقة معالجة الألوان مختلفة، الريلمي الصورة أحلى بس بعدت شوية عن الحقيقية اللي أوبو قدرت تنقلها بصورة أحسن.
الـWide Angle نفس الشيء، الاكس تي بيطلع صور احلى من الأوبو على عكس الصورة الحقيقيه اللي اوبو بيعرف ينقلها مظبوطه، في الاضاءة الداخلية الاكس تي حلو وكذلك البورترية إنما في الأوبو الصورة مصفرة شوية عن الطبيعي والريلمي الصورة فيها أحمر شوية عن الطبيعي .. شوف مين منهم مناسب لاستخدامك.
بالليل بقي فيه تشغيل الـNight Mode في الاتنين، و تلاقي الفرق يظهر الريلمي تفاصيله أكتر، بس برده لسه الريلمي بيلعب في الألوان وبشكل أكبر كمان في الـNight Mode، ولو صورة في عتمة أو ظلام خالص، الريلمي فرض عضلاته ولعب جدا في الصورة بمعالجة غريبة حصلت ليها والأوبو نقلك الواقع وطلعلك الصورة زي ما هي بس مليانة Noise.
لو هنصور اشخاص بالليل هنلاقي الريلمي مطلع صور أحسن شوية بالـNight Mode بس شخصيًا مبفضلش اصور اشخاص بالنايت مود.
نتكلم بقي علي السيلفي، باختصار هنقول إن أحسن سيلفي فئة متوسطة حاليا هو Realme XT اما الـReno 2F في المركز التاني مثلا، بس الاكس تي فعلا بيطلع ألوان و تفاصيل مظبوطة جدا جدا مفيهاش غلطة حتى لما تدخل اضاءة داخلية يفضل الريلمي ممتاز في التفاصيل و الألوان، وبالليل معاك وضع تصوير عادي وNight Mode كمان علشان تاخد صور حلوة علي طول مليانة تفاصيل .. وفعلا صور السيلفي بتاعة الاكس تي كسبت أي حد في الفئة السعرية بتاعته لحد دلوقتي.
بالنسبة لتصوير الفيديوهات الريلمى بيتفوق فى امكانية التصوير بجودة الـ4K زي معظم موبايلات الفئة المتوسطة، وللأسف معالج الاوبو مش بيدعم تصوير الـ4K ودي نُقطة سلبية في الموبايل، وبالنسبة لميكروفون عزل الضوضاء عند تصوير الفيديوهات متميز في الريلمي عن الأوبو.
ممكن تشوف الصور والفيديوهات المتصورة بالموبايلين في فيديو المقارنة في أخر المقالة.
سعر الموبايل :-
بالنسبة لموبايل XT بيجي بنسخة واحده بمساحة تخزين 128 جيجا مع 8 جيجا رام ودي بتيجي بسعر 5400 جنيه مصري، اما الرينو 2F بيجي بنسخة واحده برده بمساحة تخزين 128 جيجا مع 8 جيجا رام وسعرها الرسمي 5490 جنيه والموبايلين بينفع تركب فيهم شريحتين وكارت ميموري في نفس الوقت.
رأي موبيزل النهائي :-
موبايل ريلمي XT واوبو Reno 2F من افضل الموبايلات حاليًا في فئة الـ5 الاف جنيه، لو انت عايز اداء افضل في الالعاب مع سيلفي برنس جدًا وبتحب الصور اللي الوانها متعدله ومفرقعه شوية وخايف من فكرة السلايدر، الريلمي XT بتاعك يا معلم !
اما لو انت بتحب الفخامه والتصميم المُميز والخامات الفخمه المحترمه بدون بروز في الكاميرات وعايز تجرب الشاشة الكامله مع سلايدر سيلفي شياكه وبينور وكدا وعايز كاميرات الوانها واقعيه جدًا يبقى الـReno 2F بتاعك يا برنس !
وبرده لازم تبقى عارف ان موبايل Honor 20 بالسعر ده او حتى Huawei Nova 5T هيدولك اداء افضل من الاكس تي والرينو 2 اف في الالعاب وهيدولك كاميرا خلفية افضل بفرق كبير وبسعر قريب جدًا، الهونر 20 بحوالي 5800 في المحلات والنوفا 5 تي بحوالي 6300 في المحلات، انصحك تفكر فيهم لو عايز اداء احسن وبتلعب العاب كتير ومحتاج كاميرا خلفية اقوى بفرق واضح عن ريلمي و أوبو.
Comments