النهارده هنقدملكم مراجعة Poco X3 GT الجديد من شاومي .. موبايل بيقدم مجموعة مواصفات قوية جدًا، بطارية كبيرة مع أسرع شحن في الفئة السعرية دي .. ومعالج رائد قوي بدقة تصنيع 6 نانو ميتر .. لكن طبعًا لازم يكون في تنازلات ولازم تعرف امتى تفكر تشتري الموبايل ده وامتى تشوف المنافسين.
التصميم :-
تصميم بوكو X3 GT مختلف شوية، الخامات بتيجي بالكامل من البلاستيك وفي نقشة على الظهر بتلاحظها لما ايدك بتلمس الموبايل .. التصميم يعتبر إقتصادي شوية مش فخم، مش أحسن حاجه في الفئة دي .. ومش احسن حاجه من شاومي بالتحديد لإننا متعودين منها على تصميمات وخامات فاخرة في الفئة دي زي Mi 11 Lite و Poco F3.
البلاستيك هنا ليه ميزتين .. أول ميزة وهو أنه صعب الكسر، لو وقع منك مش هيتكسر بسهولة، ولو اتضغط عليه جامد مش هيتكسر .. والميزة التانية هي تشتيت الحرارة واللي تعتبر مهمه في الموبايل ده.
بروز الكاميرا الخلفية كالعادة مش صغير .. بيتغطي بالجراب المُرفق مع علبة الموبايل .. الموبايل وزنه 193 جرام وده وزن تقيل، وسُمك 8.9 مللي وده سُمك كبير .. مسكته في الإيد معقولة، مش هتضايقك لكنها مش أحسن حاجه.
الشاشة :-
أكبر تنازل في الموبايل ده هو شاشته .. شاشة 6.6 بوصة من نوع IPS LCD بدقة FHD+ بتردد بيوصل الى 120 هيرتز .. شاشة قريبة جدًا من شاشة Poco X3 NFC و Poco X3 Pro.
ألوان الشاشة وسطوعها أقل من أي شاشة AMOLED في الفئة السعرية دي .. حتى من شاومي نفسها عندها شاشات محترمة جدًا في الفئة دي زي Poco F3 اللي شاشته تكسب وتتفوق بجدارة على شاشة Poco X3 GT.
الميزة القوية اللي في الشاشة هنا هي طبقة الحماية، الموبايل بيتقدم بطبقة حماية Corning Gorilla Glass Victus ودي أعلى طبقة حماية متوفرة حاليًا .. والشاشة بتيجي متركب عليها سكرينه.
الأداء :-
أقوى حاجه في الموبايل ده هي الأداء، الموبايل بيجي بمعالج ميدياتك Dimnsity 1100 5G بيشتغل بدقة تصنيع 6 نانو ميتر .. معالج قوي شديد، أداءه بيتفوق على معظم الموبايلات المنافسة من باقي الشركات .. وكمان ده أول موبايل ينزل بمعالج 6 نانو ميتر في الفئة السعرية دي ودي ميزة قوية.
بس تعالى نفكر بطريقة تانية .. شاومي نفسها عندها Poco F3 بمعالج SD870 من كوالكوم .. واللي بيقدر يحقق نتيجة أعلى على Antutu Benchmark .. فا هل في فرق في الأداء بين الموبايلين يخليك تروح لـPoco X3 GT وتتنازل عن الشاشة الـAMOLED والخامات الأفضل في Poco F3 ؟
للأسف مفيش فرق يستاهل انك تاخد التنازلات دي .. الموبايلين أداءهم محترم جدًا وسريع جدًا .. الاتنين 120 هيرتز .. يمكن Poco X3 GT سخونيته أقل وإستهلاك البطارية أفضل عن Poco F3 .. وده طبيعي لإن F3 بيشتغل بمعالج 7 نانو ميتر وخاماته زجاجية .. اما X3 GT بمعالج 6 نانو ميتر وبلاستيك .. مع مراعاه فرق حجم البطارية.
في نقطة تانية .. سرعة القراءه والكتابة على Poco X3 GT أسرع من Poco F3 بالرغم من أن الاتنين نفس النوع وهو USF 3.1 وده بيأكدلك ان التجربة هي الدليل على الأرقام.
هل ممكن تختار موبايل من الإتنين F3 أو X3 GT بُناءًا على المعالج ؟
أداء الموبايلين الفعلي مُتقارب جدًا .. بوكو X3 GT أسرع في القراءه والكتابة وأحسن في إستهلاك البطارية والسخونية، بوكو F3 المعالج أقوى شوية .. هل ده معناه انك ممكن تفضل واحد عن التاني بسبب المعالج ؟ الإجابة: لأ، خرج نقطة المعالج من حساباتك لإن الاتنين ممتازين، وشوف باقي الحاجات اللي تهمك في الموبايل.
الأداء الرسومي في Poco X3 GT كويس جدًا .. ببجي بتشتغل على Ultra HDR والأداء كويس جدًا .. ومتقلقش من السخونية اللي في نطاق الألعاب وانت في درجة حرارة غرفة، لكن لو إستخدمت الموبايل إستخدام تقيل وتصوير 4K في الشمس مثلًا هتلاقي الموبايل سخن جامد.
عوامل الأمان وعناصر اخرى :-
بصمة على زرار الباور .. عملية وسريعة جدًا ومفيش فيها اي مشاكل .. الـFace Unlock كويس جدًا برده ومفيهوش أي مشاكل .. في NFC وميكروفون عزل للضوضاء ومستشعر الـIR Blaster.
للأسف مفيش أي طريقة تعرف بيها ان جالك إشعارات، لإن مفيش لمبة اشعارات، ومفيش Always On Display كمان بسبب أن الشاشة IPS LCD.
الصوت في الموبايل Stereo وفي إهتزاز بيحصل في جسم الموبايل لما تعلي الصوت على الأخر.
الموبايل مفيهوش مدخل 3.5 مللي لكن في وصلة تحويل من Type C لـ 3.5 مللي بتكون موجودة في العلبة .. والموبايل مش بيدعم تركيب كارت ميموري.
مستشعر التقارب موجود لكن سوفت وير وبيشتغل عن طريق الكاميرا .. بيقفل الشاشة ولكن للأسف مش مستقر والتجربة بتاعته مش أفضل حاجه خالص .. اما شبكات الاتصال والواي فاي فالشبكة كويسة جدًا ومفيش فيها أي مشاكل.
البطارية :-
بطارية الموبايل بتيجي بسعة 5000 مللي امبير .. بتستحمل وقت إستخدام 7 ساعات وأكثر حاجه بسيطة .. حسب استخدامك، والشاحن المرفق 67 وات، أسرع شاحن في الفئة السعرية دي بيشحن البطارية بالكامل في أقل من 50 دقيقة.
الكاميرات :-
كاميرا خلفية ثُلاثية، الأساسية 64 ميجا بيكسل بفتحة عدسة F/1.8 والثانية 8 ميجا بيكسل بفتحة عدسة F/2.2 وهي Ultra Wide والأخيرة 2 ميجا بيكسل ماكرو .. السيلفي 16 ميجا بيكسل بفتحة عدسة F/2.5.
قارنت بين Poco X3 GT و Poco F3 .. وحقيقي مش شايف إختلاف جوهري بينهم .. الموبايلين في الكاميرات متواضعين جدًا، مينفعش يكون أهم حاجه عندك التصوير وتشتري موبايل فيهم.
المفروض ان العدسة الـ64 ميجا بيكسل بتاعت Poco X3 GT تطلع أداء أحسن شوية من العدسة الـ48 ميجا بيكسل بتاعت Poco F3 .. ولكن معالجة الصور مش قد كده خالص في X3 GT لإن المعالج ميدياتك ومعالجات ميدياتك معروف انها مش بتقدم أفضل معالجة في الصور.
بالنسبة للسيلفي فا للأسف سيلفي بوكو X3 GT وحش جدًا .. سيلفي لا يرقى انه يبقى موجود في موبايل بالسعر ده .. ممكن تقارنه بموبايل بنصف سعره ويكسبه في السيلفي عادي.
بالنسبة لتصوير الفيديوهات فا الموبايل بيدعم تصوير فيديوهات بجودة 4K مع 30 فريم في الثانية وبجودة 1080p مع 60 فريم في الثانية مع مثبت إلكتروني .. مع دعم ميكروفون اضافي لعزل الضوضاء.
سعر Poco X3 GT :-
- نسخة 128 جيجا مع 8 جيجا رام بسعر 6000 جنية
- نسخة 256 جيجا مع 8 جيجا رام بسعر 6600 جنية
مع دعم تركيب شريحتين إتصال من الجيل الخامس لكن للأسف مفيش دعم لتركيب كارت ميموري.
الرأي النهائي :-
مميزات Poco X3 GT :-
- معالج قوي جدًا
- أسرع شحن في الفئة دي
- ذاكرة تخزين سريعة جدا
- عوامل أمان سريعة
- صوت ستريو + IR
عيوب Poco X3 GT :-
- شاشة جودتها مش الأفضل
- شكل التصميم إقتصادي مع خامات ليست الأفضل
- مستشعر التقارب تجربته ليست الأفضل
- كاميرا سيلفي ضعيفة
- مفيش لمبة إشعارات
- مفيش مدخل السماعات الـ3.5 مللي
وفي النهاية احنا شايفين ان بوكو X3 GT كان محتاج ينزل أرخص من كده بفرق كبير علشان يبعد عن الفئة السعرية اللي بينافس فيها Poco F3 .. لإن بوكو F3 أحسن منه في التصميم والخامات والشاشة والكاميرا السيلفي .. يمكن نقطة التفوق الواضحه لصالح X3 GT في سرعة الشحن فقط.
Comments