مراجعة Poco X3 NFC – صفقة شاومي الممتازة في الفئة المتوسطة !

موبايل جديد من شركة شاومي عليه جدل كبير وهو Poco X3 NFC .. الموبايل ده عامل قلبان وعليه كلام كتير أوي .. شوية بالسلب،  وشوية بالإيجاب .. فا خليني في المراجعة بتاعته النهارده أحاول أوضحلك الأمور بشكل كبير علشان تقدر تحكم بنفسك .. وهقولي رأي في الموبايل بشكل عام في أخر المراجعة.

التصميم :-

الظهر بيجي من البلاستيك مع فريم من البلاستيك برده ( مش معدن تم التأكيد ) .. الكاميرات مرصوصة في شكل عجيب .. لازم عينك تشوفه كل يوم بتاع 10 او 15 مرة كده علشان تقدر تتقبله .. وعادي أنا تقبلته .. بس هي في الأول والأخر أذواق.

بس اللي مش مقبول كالعادة بروز الكاميرات في موبايلات شاومي عمال يكبر في كل موبايل عن التاني .. الجراب المُرفق الشفة بتاعته يادوب بتبقى عند أعلى حته في الكاميرات .. بس برده الأفضل نحاول نشتغل على إننا نقلل البروز يا شاومي خصوصا إن أصلًا الموبايل مش رفيع يعني .. مفيش تراب دخل في الكاميرات لحد دلوقتي .. علشان اللي هيسأل.

الموبايل وزنه حوالي 215 جرام وتخانه 9.4 ملم .. الموبايل أبعاده كبيره علشان شاشته كبيره .. مش سهل خالص تستخدمه بايد واحدة لو أنت ايدك صغيرة.

ظهر الموبايل لامع وبيبصم بسهوله أوي وأعتقد هيتخربش بسهولة .. وكلمة POCO مكتوبة بشكل كبير شوية على ظهر الموبايل وبتطفي وتنور وتعمل انعكاسات كدا على حسب ما الضوء يجي على الكلمة.

مش عارف لو الكلمة دي كانت صغرت مثلًا كان هيبقى الظهر أشيك ولا لأ .. خاصة إن الظهر كبير وفاضي وأنا حاسس إنهم قصدوا يكبروا الكلمة علشان تملى الظهر ده.

الموبايل مقاوم لطرطشة الماء بشهادة IP53 يعني الموبايل متقفل كويس .. بس مش هينفع تنزل بيه حمام السباحة !

وبشكل شخصي .. أنا معجب أكتر بتصميم Note 9S و Note 9 Pro من شاومي بالظهر الزجاجي اللامع .. بس البوكو X3 يكسب في المواصفات .. خلينا نشوف.

الشاشة :-

شاشة كبيرة بحجم 6.67 بوصة من نوع IPS LCD بدقة FHD+ بتردد بيوصل لـ120 هرتز مع ثقب صغير اوي للسيلفي في نص الشاشة .. وحقيقي أنا مبسوط من فكرة دخول الـ120 هيرتز في الفئة المتوسطة .. بعد ما ريلمي كانت محتكراها وبعدها انفينكس الـ90 هيرتز .. شاومي ردت بقوة بصراحة في X3 !

خليني أتكلم عن Quality الشاشة نفسها الأول .. متقلقش منها .. شاشة حلوة ألوانها معقولة .. وممكن تظبط درجة ألوان الشاشة براحتك من الـSettings بتاعتها .. سطوعها معقول جدًا تحت الشمس.

الحافة السفلية مقبولة على سعر الموبايل والثقب بتاع السيلفي صغير جدًا .. أصغر من Realme 7 وأصغر من ريدمي نوت 9 برو .. الشاشة عليها حماية Gorilla Glass الجيل الخامس وكمان متركب عليها سكرينة.

ندخل على الجزئية الأهم وهي الـ120 هيرتز .. التردد العالي اللي هنا Dinamic يعني بيتغير على حسب المعروض .. وبيقل لوحده لو الموبايل سخن مثلًا .. بس حقيقي التردد العالي محسوس جدًا .. محسوس بالدرجة اللي لو أنت لسه شاري مثلًا موبايل 60 هيرتز وجيت تجرب X3 هتحس إنه ناعم معاك أكتر وسلس أكتر وده بفضل الـ120 هيرتز.

أنت بس ساعات ممكن تحس بالنقله اللي الموبايل بيعملها وهو بيغير تردد الشاشة لوحده .. لو أنت سريع الملاحظة هتاخد بالك من اللقطات دي .. بس عمومًا هي مش مؤثرة خالص ومش هتحس بتقصير منها.

الأداء :-

معالج كوالكوم سناب دراجون 732G الجديد بمعمارية 8 نانو ميتر .. بإختصار ده أحسن معالج فئة متوسطة حاليًا داعم لشبكات الـ4G فقط .. ملناش دعوة بالـ5G .. والمعالج ده تحسه كده نازل لينا للناس اللي عاوزه معالج كوالكم كويس وفي نفس الوقت مش عايزه 5G .. فإختيار شاومي للـSD732G أنا شايفه كويس جدًا.

طيب ليه أنا شايفه كويس جدًا ؟ لإن المعالج متوازن بشكل كبير .. بيقدم أداء يومي عادي قوي في التطبيقات والتصفح والمكالمات لا غبار عليه .. وفي نفس الوقت بيقدم أداء رسومي قوي .. ممكن ميكونش الأقوى ولكنه فعليًا ميقلش حاجة في إعدادات الـGraphics عن المُنافس المباشر من MediaTek وفي نفس الوقت مش بيسخن زي Mediatek.

وأخر حاجة بحبها في معالجات كوالكم هو دعم برنامج جوجل كاميرا واللي هتكلم عنها في جزئية الكاميرات .. ومجملًا أنا شايف تركيبة SD732G والـ120 هيرتز كويسين جدًا .. اللي بس تحسه حمل شوية عليهم الواجهة .. واجهة MIUI 12 تقيله نسبيًا وهي هنا جايه بالـPoco Launcher اللي مغير شكل الـIcons بتاعت الواجهة شوية.

وأنت بتـLaunch الموبايل في الأول لما تطلعه من العلبة هتلاقي حاجة إسمها Get Recommendations إقفلها علشان الإعلانات تقل شوية في الواجهة .. ولكن بتبقى برده موجودة في بعض الأماكن زي بعد ما تسطب أي برنامج .. هتلاقي إعلان ظاهرلك وتحته Open للبرنامج اللي أنت سطبته.

بالنسبة للأداء في العاب الأندرويد بقى فا لعبة PUBG بتشتغل على High HD ومفيش اعدادات أعلى من كده .. لعبة Call Of Duty بتشتغل على High وفريمات Max واللعبة بتشتغل كويس جدًا .. لعبة Fortnite بتشتغل على إعدادات جرافيك Medium وبتشتغل بشكل مقبول جدًا.

الألعاب بتشتغل كويس جدًا وSmooth جدًا وإستجابة اللمس على الشاشة في الألعاب هتعجبك جدًا .. لو انت راجل Gamer فعلًا وفاهم الموبايل ده هيكيفك أوي.

وبالنسبة للسخونية فالموبايل أكيد مع الألعاب التقيله بيسخن بس سخونية معقولة .. مش بيسخن أوي .. والسخونية متوزعه كويس في كل أجزاء الموبايل مش متجمعه في حته واحدة.

وعلى فكرة جربت أعمل Screen Record وأنا بلعب ومظهرش أي تقطيعات في الفريمات ولا أي حاجة وفضلت ألعب عادي بدون أي مشاكل لإني سمعت ناس بتتكلم عن النقطة دي.

عوامل الأمان وعناصر اخرى :-

البصمة مدمجة بزرار الباور .. وبإختصار هي مش أسرع بصمة .. بتاخد لقطة شاشة سوداء كده وتسمع صوتها وبعد كده تفتح.

الـFace Unlock برده نفس القصة .. لازم لقطة الأول بس على الـLock Screen وبعد كده يفتح .. عمومًا أحنا مش متعودين أن شاومي تقدم أسرع بصمات وأتمنى يشتغلوا عليها أكتر وأكتر الفترة الجاية.

الموبايل جي بـStereo Speaker يعني الصوت بيخرج من السماعة السفلية ومن سماعة المكالمات .. ومع رفع الصوت للأخر هتلاقي زنه في جسم الموبايل والزنة ديه كانت موجودة في ريلمي 7 برو الـStereo برده بس الزنة كانت أخف شوية من X3.

عمومًا لو الزنة ضايقتك ممكن تلغي الـStereo خالص وتخلي الصوت يطلع من السماعة اللي تحت .. الصوت الإجمالي هيقل حوالي 30% ولكن الزنة هتختفي نهائيًا ولا كأن في حاجة موجودة.

في تسجيل مكالمات تبع برنامج اتصال جوجل المُثبت على الموبايل .. في ميكروفون إضافي لعزل الضوضاء .. وكمان فيه مستشعر الـIR Blaster اللي بيهم ناس كتير.

المستشعرات كلها موجودة .. NFC، ضوء، تقارب، جيروسكوب .. وكمان فيه لمبة إشعارات .. هي صغيرة اوي بس موجودة .

وبالنسبة لقوة الشبكات والـWiFi فا لحد دلوقتي تمام مفيش فيهم أي مشاكل وهي عموما اضعف حاجة بسيطة من شبكات أوبو الي تظل الأقوى .. ولكن شبكة الشاومي مقبولة جدا زي سلسلة الريدمي نوت 9 كلها.

البطارية :-

بطارية بتيجي بحجم 5160 مللي أمبير .. وفي فترة إستخدامي للموبايل أنا مقفلتش الـ120 هيرتز .. مشغلهم علطول وسايب الـSoftware يتعامل .. وأنا شايف البطارية أقل حاجة بسيطة من نوت 9 برو فعليًا .. ده أكيد لازم يبقى موجود علشان تردد الشاشة ولكن الفرق مش كبير .. يعني لو الـ9 برو قعدت 9 ساعات شاشة مفتوحة البوكو هيكون 7 ~ 8 ساعات.

وكده كده معاك شاحن سريع 33 واط بيشحن البطارية في حوالي ساعة .. الموبايل بيسخن شوية وهو على الشاحن بس متقلقش مش هينفجر يعني .. والأفضل طبعًا متستخدمتش الموبايل وهو على الشاحن وأما تحطه يشحن حطه على مكتب مش على سرير.

الكاميرات :-

الموبايل جاي بـ4 كاميرات خلفية .. الأساسية بدقة 64 ميجا بيكسل بفتحة عدسة F/1.9 بمستشعر Sony IMX682 .. والتانية 13 ميجا بيكسل فتحة عدسة F/2.2 للتصوير الواسع .. والتالتة 2 ميجا بيكسل ماكرو والرابعة 2 ميجا بيكسل للعزل .. والسيلفي الموجود في ثقب الشاشة 20 ميجا بيكسل فتحة عدسة F/2.2.

التنقل بين أوضاع التصوير في سوفت وير الكاميرا مش سلس أوي ومش بطيء أوي .. حاجة كده في النص .. بس مش بيعلق ومش بيـLag حاليًا في فترة تجربتي ليه.

من كام يوم نزلنا فيديو مقارنة بين كاميرات بوكو X3 وريلمي 7 وريدمي نوت 9 برو .. اشترك في قناة موبيزل على يوتيوب علشان يوصلك كل الفيديوهات اول ما تنزل هناك علطول !

وزي ما قولتلكم في فيديو مقارنة الكاميرات .. بوكو X3 عجبتني كاميراته أكتر .. بيحب دايمًا يعزز ألوان الصور اللي طالعة من الكاميرا الخلفية علشان عينك تحب تشوفها .. الوان السما حلوة جدًا .. وعندك برده جوجل كاميرا لو حابب تاخد تجربة تصوير حقيقية بالألوان الحقيقية بدون أي تعديلات .. وممكن مع شوية تفاصيل زيادة احيانا.

أنا شايف الكاميرا الخلفية هنا بصراحة كويس جدًا جدًا على فئته السعريه بل ممكن تكون الأقوى .. أنا مش عارف ازاي في ناس بتقول على الكاميرا دي وحشه .. حضرتك قارنتها بمين .. صورت بالاتنين سوا في نفس الوقت ؟

السيلفي بتاع البوكو زيه زي Note 9S و Note 9 Pro .. سيلفي مش حلو .. في الإضاءة العالية هتاخد صور كويسة .. لكن لما الإضاءة تقل الأداء بيبقى ضعيف .. هنا أكيد هتحتاج جوجل كاميرا علشان تاخد صور سيلفي كويسة تقدر تستخدمها على السوشيال ميديا بشكل مُباشر.

ساعات كنت بعمل Edit بسيط أوي للصور اللي طالعة من جوجل كاميرا وبتبقى ساعتها كويسة جدًا .. ولكن أرجع وأقولك تطبيق الكاميرا العادي بتاع شاومي بيطلع صور سيلفي مش حلوة وممسوحة من التفاصيل في الإضاءات المعتدلة والخفيفة.

حمل جوجل كاميرا الاصدار 7 من هنا .

بالنسبة لتصوير الفيديوهات فالموبايل بيصور فيديوهات بجودة 4K مع 30 فريم في الثانية .. وفي ثبات إلكتروني موجود وشغال كويس جدًا على الجودة دي .. وفي وضع الـStady Mode لو عايز تصور على 1080p مع ثبات أقوى .. ولو عايز تصور مشهد رياضي .. وفي فلاتر تقدر تضيفها وانت بتصور الفيديو.

فيديو مقارنة الكاميرات :-

سعر الموبايل :-

• نسخة 64 جيجا مع 6 جيجا رام بسعر 4000 جنية
• نسخة 128 جيجا مع 6 جيجا رام بسعر 4400 جنية

والموبايل بيدعم تركيب شريحتين إتصال 4G او شريحة واحدة مع كارت ميموري بحجم 256 جيجا .. فا خلي بالك لو هتستخدم الشريحتين وبتحمل حاجات كتير خليك في النسخة الكبيرة الـ128 جيجا.

الرأي النهائي :-

الموبايل ده لو مظهرش فيه عيوب بعد فترة من الإستخدام .. هيكون هو موبايل الموسم من شاومي واللي هياخد الراية من Redmi Note 8 Pro .. لو تفتكر الموبايل ده حقق إنتشار رهيب وقدم لشاومي شعبية كبيرة أوي.

ولو انت محتار بين Redmi Note 9S او Redmi Note 9 Pro و Poco X3 NFC فطبعا البوكو هو الأفضل فيما عدا جزئية التصميم الخارجي مش اكتر.

مميزات Poco X3 NFC :-

• شاشة كبيرة بتردد 120 هيرتز
• معالج قوي من كوالكوم
• صوت Stereo عالي
• بطارية كبيرة مع شحن سريع
• كاميرا خلفية قوية جدًا
• تصوير فيديوهات ممتاز
• لمبة الإشعارات
  والـNFC
  والـIR Blaster
• تسعير مُمتاز جدًا

عيوب Poco X3 NFC :-

• كاميرا سيلفي مش حلوة
• بصمة مش الأسرع
• بروز الكاميرات الخلفية كبير جدًا
• مفيش دعم لتركيب شريحتين مع كارت في نفس الوقت
• موبايل حجمه وأبعادة كبيرة ووزنه تقيل نسبيًا

فيديو المراجعة :-