متعودين دائمًا على مواصفات قوية بأسعار رخيصة من شاومي .. النهارده هنقدملكم مراجعة Poco X3 Pro .. لو عايز تجيب أرخص موبايل للألعاب بمعالج قوي فـ شاومي بتقدملك الموبايل ده بمعالج رائد وبسعر بيبدأ من 4600 جنية بس .. في المراجعة هتعرف كل حاجه عن الموبايل والتنازلات اللي فيه علشان يتقدم بالسعر ده.
التصميم :-
الموبايل بيجي بنفس تصميم Poco X3 NFC بدون أي إختلاف، بنفس الملاحظات .. شاومي إهتمت في الموبايل ده بالمعالج والأداء بس واللي هنتكلم عليهم كمان شوية.
الموبايل وزنه تقيل لإنه حوالي 215 جرام .. وتخانته 9.8 مللي .. مينفعش تتعود عليه بسرعة إلا لو موبايل القديم كان تقيل جدًا، والخامات في الموبايل من البلاستيك.
في جزء كده او شريط بالعرض مكتوب عليه POCO بيدي إنعكاس حلو مع الإضاءه .. لطيف وملمسه مختلف عن ملمس جوانب الموبايل كلها.
بروز الكاميرات كبير وسخيف للأسف .. وفي جراب في العلبة علشان يغطي البروز ده.
الشاشة :-
شاشة بحجم 6.67 بوصة من نوع IPS LCD دقتها FHD+ والتردد فيها بيوصل لـ120 هيرتز .. هي هي نفس شاشة الـPoco X3 NFC بدون أي إختلاف.
حتى لما شغلت الشاشتين لاقيتهم نفس الأداء .. اللي لاحظته كمان ان سطوع بوكو X3 NFC القديم اعلى بفرق بسيط اوي اوي عن البرو .. وعمومًا الفرق مش كبير تمامًا.
وعمومًا جودة الشاشة الـIPS LCD بتاعت الـ بوكو X3 برو مش أحسن حاجة .. مش أحسن زوايا رؤيا ولا تشبع ألوان ولا أحسن سطوع .. يعني لو بتتفرج على فيديوهات كتير وبتتصفح الموبايل كتير تحت الشمس الموبايل ده مش ليك.
لما جربت الموبايل مع الـRedmi Note 10 Pro لاقيت فرق ضخم جدًا بصراحة في الألوان والسطوع لصالح ريدمي نوت 10 برو .. بس كل موبايل منهم مُوجه لمُستخدم مختلف وده اللي هوضحهولك في اخر المراجعة.
وأخيرًا شاشة Poco X3 Pro عليها طبقة حماية Corning Gorilla Glass الجيل السادس .. والموبايل بيجي في العلبة متركب عليه سكرينه.
الأداء :-
نيجي لأهم حاجه في الموبايل بقى وهي المعالج .. معالج كوالكوم سناب دراجون 860 بتكنولوجيا 7 نانو ميتر .. معالج قوي جدًا وسريع جدًا .. بالسعر اللي الموبايل ده نازل بيه فـ ده أقوى أداء بدون أي تفكير .. وكمان نوع ذاكرة التخزين هنا UFS 3.1 علشان يبقى معاك أقوى باكيدج أداء في الفئة دي.
اول ما جربت الموبايل ده وجربت الأداء بتاعه افتكرت علطول Nova 5T و Honor 20 .. حاجه كده من الزمن الجميل، أداءهم كان ممتاز .. ولحد دلوقتي أداءهم ممتاز بفضل المعالج القوي.
وهنا تيجي الاجابة اللي دائما بتسألوا عليها .. انا عاوز اجيب موبايل يفضل شغال بكفاءة فتره كبيرة .. لو جبت موبايل بمعالج قوي زي بوكو X3 برو فانت اكيد ضامن اداء قوي لفترة كبيرة جدا.
بوكو X3 برو سريع .. مش هيحسسك بعجز واجهة شاومي .. لإن كل حاجة بتتعمل بسرعه .. Animations فتح وقفل البرامج والتنقل بينهم .. التنقل في الواجهة .. حاجة فوق فوق الممتازة.
الموبايل أسرع من Poco X3 NFC واسرع من Redmi Note 10 Pro بفرق كبير .. فرق اكبر من 50% .. والـ120 هيرتز في الموبايل محسسوين جدًا لإن المعالج قادر يشغلهم في معظم الأوقات على عكس الموبايلات التانية.
ببجي اشتغلت على Ultra HDR .. جودة خرافية اكيد .. وهتاخد تجربة محترمة جدًا سريعة جدًا ناعمة جدًا مع الصوت الـStereo اللي هنا كمان هتلعب وانت مبسوط .. كول اوف ديوتي برده شغلتها واكيد شغالة ولا كان الموبايل مشغلي كاندي كراش.
ولكن في نقطة مهمة، التبريد بتاع الموبايل مش الأفضل .. الموبايل بيسخن بعد 10 دقائق من الإستخدام التقيل .. هو مش بيولع جدًا وكده لكن بيسخن أكتر من الطبيعي بـ15% مثلًا .. السخونية معظمها بيبقى من النص العلوي لظهر الموبايل حول الكاميرات .. وصل تحديث من شاومي للموبايل حجّم السخونية شوية وخلاها متتخطاش نسبة مُعينة.
وده حصل لإنهم خلوا للأداء حد مُعين بحيث الموبايل ميعلاش أكتر وبالتالي الأداء بيقل شوية .. مع إختيار Antutu أقل نتيجة وصلنا ليها هي 437 الف نقطة يعني أقل 10% من أقصى رقم الموبايل بيحققه .. والموبايل برده معداش درجة السخونية المقبولة بعد كل الإختبارات دي.
جربت ألعاب PUBG تحت الشمس فترة كبيرة والأداء كان ثابت ومستقر وإضاءه الشاشة على أعلى حاجه مع السخونية المقبولة برده .. وكده كده جسم الموبايل كله من البلاستيك فا بيقدر يشتت الحرارة بسرعة، وأحب أقولك ان السخونية هنا زي اللي بتحصل في الـG90T في الـNote 8 Pro لو تفتكر.
عوامل الأمان وعناصر اخرى :-
البصمة هنا موجودة على زِر الباور .. بصمة طيارة، أسرع بصمة من شاومي بالسعر ده .. مش بتغلط ولا مرة لو فضلت تفتح وتقفل الموبايل .. وكمان الـFace Unlock صاروخي ومش بيلحق يدوب تدوس بيفتح.
الموبايل اول ما فتحته وصل له تحديث .. الموبايل بيخرج من العلبة على اندرويد 11 .. والموبايل بيدعم الـSecond Space .. وفيه لمبة إشعارات بتنور مع الشحن، وبيدعم تسجيل مكالمات ببرنامج جوجل.
الموبايل فيه الـNFC وفيه ميكروفون اضافي لعزل الضوضاء .. وفيه مستشعر الـIR Blaster، الـCombo الجامد بتاع شركة شاومي اللي متعودين عليه.
الصوت هنا Stereo زي الـX3 NFC والصوت عالي جدًا ولكن مع هزة بسيطة في الظهر .. والمستشعرات كلها حقيقية وشغاله، مستشعر التقارب الي بيقفل الشاشة على ودنك وانت بتعمل مكالمة ممتاز وبيشتغل بكفاءه.
اما بالنسبة لقوة الشبكات .. الـWi Fi ممتاز جدا جدا .. شبكات الإتصال في Poco X3 Pro تاخد تقييم فوق المتوسط .. مخدتش ممتاز لان لسه شبكة Redmi Note 10 العادي هي أقوى شبكة جربتها من شاومي لحد دلوقتي في الفترة الأخيرة والبوكو اكس 3 برو في المركز الثاني وراه.
البطارية :-
بطارية بحجم 5160 مللي أمبير .. أداءها مش خيالي .. أداءها معقول .. متوسط 7 ساعات شاشة مفتوحة على استخدام متوسط مش تقيل اوي .. لو تقلت في الإستخدام عدد الساعات ده هينزل.
وطبعًا في الإستخدام مشغل الـ120 هيرتز .. مينفعش يبقى معايا معالج زي ده وأشغله على 60 هيرتز في الأخر، ما هو مش موبايل ابل !
وعمومًا أنا معرفش ليه في أخر 3 موبايلات من شاومي جربتهم حسيت اداء البطاريات مبقاش زي زمان .. اتمنى في التحديثات الأداء يتحسن يا شاومي.
الشاحن المرفق المعتاد 33 واط بيشحن البطارية في ساعة .. معنديش اي مشاكل معاه.
الكاميرات :-
الكاميرا الخلفية رباعية .. الأساسية 48 ميجا بيكسل فتحة عدسة F/1.8 بمستشعر سوني IMX582 .. ايوة نفس سينسور ريدمي نوت 10 .. التانية 8 ميجا بيكسل فتحة عدسة F/2.2 والتالتة 2 ميجا بيكسل ماكرو والرابعة 2 ميجا بيكسل عزل .. والسيلفي 20 ميجا بيكسل فتحة عدسة F/2.2 .. وشغلت جوجل كاميرا.
بص بإختصار عشان هتلاقي جدل كبير حول الكاميرات هنا .. الكاميرا الخلفية اللي في بوكو X3 برو تقدر تقول عليها كاميرا 48 ميجا بيكسل كويسة جدًا مع معالج قوي بيقدر يعالج الصور كويس .. ده تتوقع منه ايه ؟
تتوقع منه أداء معقول متوسط .. مش أقوى اداء لان المستشعر أكيد اقل من مستشعرات الـ64 والـ108 ميجا بيكسل .. ولكن بيعوضك المعالج القوي اللي بيعالج الصور كويس جدًا وبيحاول ميحسسكش بأي نقص او تقصير في الأداء .. يعني انا لو هقيم الكاميرات هنا ولا هقول عنها انها مميزة ولا هقول انها عيوب .. كاميرات متوسطة.
والسيلفي متغيرش .. السيلفي المعتاد من شاومي .. لون البشرة مش أفضل حاجة .. وتحس كده ان في تغيير في لون بشرتك في كل صورة بتاخدها .. وعموما الأداء معقول الصبح وفي الإضاءة العالية .. وكالعادة لما الإضاءة تقل جامد .. إستخدم جوجل كاميرا أرحم .. وبرده زاوية التصوير مش واسعة في صور السيلفي.
بالنسبة بقى لتصوير الفيديوهات فا الموبايل بيصور لحد جودة 4K مع 30 فريم في الثانية .. وفي ثبات إلكتروني على الجودة دي كالمتوقع بسبب المعالج القوي اللي هنا .. الثبات موجود على 1080p وموجود في التصوير السيلفي كمان .. والموبايل فيه ميكروفون اضافي لعزل الضوضاء.
شوف مقارنة تصوير مع Poco X3 NFC و Note 10 Pro وتجربة تصوير الفيديوهات في فيديو المراجعة !
سعر Poco X3 Pro :-
- نسخة 128 جيجا مع 6 جيجا رام بسعر 4600 جنية
- نسخة 256 جيجا مع 8 جيجا رام بسعر 5100 جنية
والموبايل بيدعم تركيب شريحتين إتصال 4G او شريحة واحدة مع كارت ميموري بحجم 1 تيرا.
الرأي النهائي :-
لو انت Gamer ؟
لو معاك 5000 جنية وانت Gamer بتلعب على الموبايل وبتلعب ألعاب تقيلة كتير .. فا بدون أي تفكير أشتري Poco X3 Pro هو أفضل خيار للألعاب في فئته السعرية وإستحمل الملاحظات والعيوب اللي عرفتها في المقالة زي السخونية الزيادة والشاشة بسطوع والوان مش الأفضل والتصميم التقيل نسبيا والكاميرات المتوسطة.
لو مش Gamer ؟
لو انت مش Gamer والألعاب مش أولوياتك ومش هتلعب ألعاب تقيلة وبتغير موبايلك كل سنة أو اتنين .. يبقى هات Redmi Note 10 Pro هتبسط أكتر بالشاشة الأفضل والتصميم الأجدد والكاميرات الأقوى.
تقدر ترفع المبلغ ؟
لو تقدر تزود الفلوس اللي معاك لـ6000 جنية أو اكتر حاجة بسيطة وعايز تاخد معالج قوي وفي نفس الوقت شاشة AMOLED ممتازة وتصميم أجدد يبقى تستنى Poco F3 اللي هينزل قريب .. وهنعمله مراجعة بكل تأكيد.
Comments