مقارنة بين Realme 5 Pro و Realme 3 Pro – تطور طبيعي ولا مفيش تغيير ؟!

موبايل Realme 5 Pro نازل مصر خلال أيام ان شاء الله .. احنا جربنا الموبايل وعلشان هو قريب جدا من Realme 3 Pro .. في المقالة ديه هعمل مقارنة بين الـ 5 برو والـ 3 برو .. وهنشوف ايه الحاجات الي اتغيرت وهل فعلا هو عالج عيوب الـ 3 برو البسيطة ولا لا ؟

التصميم :-

نفس الخامات البولي كربونيت الي بتتخربش بسهولة مع الوقت والاستخدام .. بس الي اختلف هنا هو الشكل او النقشة .. بقت دياموند كات .. بصراحة هي اشيك بكتير من الريلمي 3 برو القديم .. وكمان رصة الـ 4 كاميرات ورا بتديك فخامة كدا .. فعلا ظهر الـ 5 برو بقا مميز جدا .

الوزن والمسكة في الايد مفيهاش مشاكل وتقريبا Realme 5 Pro نفس الـ Realme 3 Pro .. لان الـ 5 برو اتقل بـ 10 جرام تقريبا واتخن حاجة بسيطة اوي وديه حاجات مش هتاخد بالك منها .

الشاشة :-

مفيش اي حاجة اتغيرت هنا نفس الشاشة الـ 6.3 بوصة IPS بدقة FHD+ ومع التجربة الفعلية .. فالشاشة متغيرتش خالص في الـ 5 برو عن الـ 3 برو .

لو شايف ان الشاشة مصفرة معاك ممكن تدخل في اعدادات الشاشة .. وتخليها مايلة للأزرق وبالتالي الصفار ده هيختفي تقريبا .. الاصفرار البسيط ده علشان يحافظ على عينيك .. ويقلل من الاشعة الضارة ليك .

نفس النوتش الدروب وتر .. نفس الحماية على الشاشة من جوريلا .. والشاشة ادتني نفس الاداء والسطوع والالوان وكل حاجة .. من الاخر مفيش جديد .

الاداء :-

تغيير بسيط اوي ممكن متحسش بيه اصلا .. من سناب دراجون 710 في الـ Realme 3 Pro لـ سناب دراجون 712 في الـ Realme 5 Pro .. الفرق هو 0.1 جيجا هرتز في النواتين الي بيقوموا بالمهام الصعبة .. مع نفس التكنولوجيا الـ 10 نانو ونفس المعالج الرسومي الادرينو 616 .

مقدرش اعتبر ان ده ابجريد قوي وفي نفس الوقت مقدرش اقول اني زعلان ان ريلمي محطتش معالج اقوى .. لان ريلمي محتفظة بتسعير مميز جدا للموبايل ده في فئة سعرية اصلا مفيش منافسين لسه لحد دلوقتي بيقدموا معالج سناب دراجون ولا 710 ولا 712
.

الاداء كويس جدا .. ومعاك وضع High Performance الي بيخلي البروسسير ياخد راحته اكتر في استهلاك البطارية وبالتالي بيديلك اداء أفضل وأفضل .. الي لاحظته ان سخونية ال 5 برو اقل حاجة بسيطة اوي من الـ 3 برو .. وديه حاجة كويسة بردة .

ببجي اشتغلت على High HD في الموبايلين .. مفيش اوبشن اعلى من كدا .. واشتغلت بكفاءة ومفيش اي تهنيج على الموبايلين .

عوامل الأمان وعناصر اخرى :-

مفيش اي اختلاف بصمة خلفية في الموبايلين نفس السرعة .. الي هي سريعة جدا اصلا .

ونفس الـ Face Unlock السريع جدا جدا بردة في الموبايلين .

بالنسبة لقوة الشبكة وعلو الصوت وسماعة المكالمات والمستشعرات .. مفيش اي اختلاف جوهري بين الموبايلين .. لأن اصلا كل الكلام ده كان كويس جدا في الـ 3 برو ويعتبر هو هو نفس اداء الـ 5 برو  .. ولسه بردة مفيش لمبة اشعارات في الموبايلين .. ولسة بردة مش بيجي مع الموبايل سماعة أذن في العلبة بتاعته .

البطارية :-

نفس البطارية الـ 4000 مللي أمبير مع الشحن السريع جدا الفوك 3 .. الي بيشحن البطارية بالكامل في ساعة وربع تقريبا .. العيب الي كان في الـ 3 برو هو مدخل الشحن Micro USB V.2.0 والي اتغير في الـ 5 برو وبقا USB Type C .

الكاميرات :-

وهنا التطوير حصل بقا .. اربع كاميرات في الظهر في الـ 5 برو .. الاساسية 48 ميجا بيكسل بمستشعر Sony IMX 586 فتحة عدسة 1.8 والتانية 8 ميجا بيكسل للتصوير الواسع فتحة عدسة 2.2 و واحدة 2 ميجا بيكسل ماكرو الاخيرة 2 ميجا بيكسل للعزل .. والسيلفي بقا 16 ميجا بيكسل فتحة عدسة 2.0 .

احب افكرك سريعا كدا ان الريلمي 3 برو كان بكاميرتين الاساسية 16 ميجا بيكسل مستشعر Sony IMX 519 والتانية 5 ميجا بيكسل للعزل والسيلفي كان 25 ميجا بيكسل فتحة عدسة 2.0 .

سوفت وير الكاميرات في الريلمي 5 برو زاد عليه وضع خاص للتصوير الـ 48 ميجا بيكسل وكمان هتلاقي ظاهر فيه الكروما بوست تقدر تستخدمه في الوضع ده علشان تاخد صورة برزليوشن كبير وتفاصيل اكتر .. الـ 3 برو كان فيه وضع 64 ميجا بيكسل موجود في الاكسبرت اسمها الترا اتش دي .

بعد تجربة فعلية للكاميرات وهتلاقي الصور موجودة في فيديو المقارنة الي موجود في أخر المقالة .. اكتشفنا ان الريلمي 5 برو الكاميرات اتحسنت بشكل كبير في التصوير والصور بقت واقعية اكتر والتفاصيل اوقع بدون اللعب كتير في الألوان زي ما الريلمي 3 برو كان بيعمل .

وكمان النايت مود اتحسن كتير في تصوير الاشخاص في الـ 5 برو بقا يجيب لون بشرة وتفاصيل واقعية أكتر .

وبالنسبة لتصوير الفيديوهات فالاتنين بيصوروا على 4K بجودة 30 فريم في الثانية بدون تثبيت الكتروني والي بيشتغل على جودة 1080p بجودة 30 فريم في الثانية والي لاحظناه ان تصوير الفيديوهات بليل بقا احسن كتير في الـ 5 برو عن الـ 3 برو .

والسيلفي التصوير مختلفش كتير في الموبايلين .

الأسعار والرأي النهائي :-

الريلمي 5 برو هينزل خلال أيام بمتوسط سعر تحت الـ 4 الاف جنية للنسخة 64 جيجا مع 4 جيجا رام ومتوسط سعر تحت الـ 5 الاف جنية للنسخة 128 جيجا مع 8 جيجا رام … وينفع تركب كارت ميموري وشريحتين اتصال مع بعض في نفس الوقت .

وده يعتبر نفس تسعير الـ Realme 3 Pro وقت ما نزل وممكن يبقا اقل كمان في السعر لو شاومي فاجئتنا بتسعير مميز لل شاومي نوت 8 و شاومي نوت 8 برو .. هنشوف الي هيحصل لان لازم ريلمي ترد على تسعير الشاومي .. كل ده هيبان خلال أيام .

وعموما الـ Realme 5 Pro يعتبر تطوير بسيط اوي عنه في معالج احدث بفرق مش هتحس بيه اوي .. ونقشة ظهر وتصميم اشيك شوية .. ورصة الـ 4 كاميرات مع تجربة جديدة بتطلع صور الوان وتفاصيل واقعية اكتر وتجربة جديدة للعدسة الوايد انجل الي مكنتش موجودة في الـ 3 Pro ومقدرش انسى مدخل الشحن بقا USB Type C ونوع الذاكرة الداخلية بقا أسرع UFS 2.1 .

وزي ما قلت قبل كدا الـريلمي 3 برو كان واحد من افضل الموبايلات بأقل مشاكل في الفئة السعرية تحت 4 الاف جنية .. والـ 5 برو جاي يكمل وراه مش اكتر .

تغير من الـ Realme 3 Pro  للـ Realme 5 Pro .. لا منصحكش .. لو معاك الـ ريلمي 2 برو وعاوز تغير للـ 5 برو اقولك اة غير كدا لا .

انما لو معاك الـ Realme 3 Pro وعاوز تغيير حقيقي .. استنى الـ Realme XT الي هينزل مصر ان شاء الله شهر نوفمبر وهنعمله مراجعة كاملة قبل ميعاد نزولة في مصر .

وزي ما قولنا في أول المقالة .. موبايلات ريلمي الي نازلة مصر خلال أيام من دلوقتي هما Realme 5 و Realme 5 Pro .. وان شاء الله هنعمل مراجعة قريب لـ ريلمي 5 العادي .

لسه شوية على الـ XT ينزل مصر ومفيش أخبار عن الـ X2 .

فيديو المقارنة على اليوتيوب :-