مراجعة Realme 6 – هل يستحق سعره ؟ وايه هي عيوبه ؟

احنا كنا أول ناس تعمل خبر عن سلسلة الـRealme 6 الجديده لما نزلت في الهند .. وساعتها قولنالكم في مقالة الخبر أسعار الهند .. وقولنا انها هتبقى أزيد في مصر كالعادة .. بس بعد ما ريلمي أعلنت عن الاسعار الرسمية في مصر .. في ناس كتير اعترضت على السعر .. وبعض الناس شافوا إن السعر أزيد شوية عن الطبيعي.

بس ريلمي في مصر ليها وجهة نظر .. وهي ان موبايل زي الـRealme 6 اللي هعملكم عنه Review دلوقتي .. بيقدم تركيبة مواصفات .. مفيش اي منافس بيقدمها دلوقتي بسعره ولا حتى أغلى منه .. ! فهل الكلام ده حقيقي .. هل الموبايل فعلًا يستاهل تمنه ؟

التصميم :-

أكبر تنازل في الموبايل ده هو التصميم البلاستيكي بالكامل .. اللي البعض بيشوفه ميزة علشان الموبايل صعب يتكسر لو وقع .. وخصوصًا ان تكلفة تغيير الظهر بتبقى غالية شوية لو زجاج .. والبعض التاني بيشوفه عيب لإن في موبايلات منافسة بتصميم زجاجي.

سيبك بقى من الخامات .. نشوف شكل التصميم .. عدم وجود البصمة في الظهر .. مع شكل النقشة اللي بتبقا عبارة عن زي اشعة كده بتتحرك على الموبايل مع تحرك الضوء عليه .. مخلي شكل الموبايل حلو جدا، ده رأيي .. ممكن التصميم ميعجبكش عادي.

كان نفسي يغيروا شكل رصة الكاميرات اللي زهقنا منها خلاص .. بس تقريبا هما مأجلين الموضوع ده للجيل الاجدد .. والمفروض ان الجيل الأجدد ده هو ريلمي 6 اصلًا !

الموبايل وزنه 191 جرام وتخانته 9 مللم .. مش صغير ومش كبير اوي .. وده اللي متعودين عليه من ريلمي في الفئة المتوسطة مفيش جديد في النقطة ديه.

بروز الكاميرات كبير كالعادة .. وبيتغطى بالجراب اللي جاي مع الموبايل في العلبة.

الشاشة :-

شاشة IPS LCD بحجم 6.5 بوصة بدقة FHD+ .. بس ريلمي مخليه الشاشة ديه في حته تانية خالص بالنسبة للمنافسين علشان حاجتين.

اولهم الـPunch Hole او ثقب الكاميرا السيلفي الموجود على الشمال .. علشان الشاشة تبقى مسيطرة على اكبر جزء ممكن من مساحة واجهة الموبايل .. تاني حاجة وهي معدل تحديث الشاشة .. اللي هنا بيوصل لـ90 هيرتز.

وبالتالي انت بتاخد شاشة موبايل جديدة ومختلفة خالص من ريلمي في الفئة السعرية ديه .. بس بالنسبة للاستخدام الفعلي بقى .. ؟

بص .. الوان الشاشة كويسة .. مفيهاش جديد .. الشاشة Sharp وزوايا الرؤية كويسه جدا .. والـPunch Hole او الثقب حجمه معقول ولا هو كبير ولا هو صغير ومكانه كويس جدا في الشاشة .. والسطوع مقبول تحت الشمس .. مش اعلى حاجة ولكنه مقبول جدا.

بس النقطة كلها في الـ90 هيرتز .. محستش بيهم أوي .. او بمعنى اصح .. مش حاسس بالطفرة النوعية في إستخدام الشاشة ديه على الـ90 هيرتز .. فأنا حابب اقول ان ريلمي كلفت نفسها زيادة على الفاضي بالميزه ديه واللي ممكن كتير من المستخدمين ميحسوش بيها.

وبشكل شخصي .. شايف الشاشات الـAMOLE الـ60 هيرتز العادية وحتى لو بنوتش .. هتبقى أفضل بكتير في الاستخدام الفعلي من شاشة IPS LCD بمعدل تحديث 90 هيرتز.

وأخيرًا .. الشاشة عليها حماية Corning Gorilla Glass الجيل الثالث .. والموبايل بيجي في العلبة متركب عليه سكرينه.

الأداء :-

بص .. ركز معايا .. ريلمي استنت المنافس بتاعها اللي هو شاومي وسابتهم يستخدموا الميدياتيك Helio G90T .. المعالج اللي عليه جدل كبير في موبايل شاومي السابق الـNote 8 Pro .. وريلمي وقفت تتفرج تشوف انطباع الناس بعد فترة مع المعالج ده.

كان في الأول بنقول بيسخن ولكن بعد فتره من التحديثات .. اداء المعالج استقر ومبقاش بيجي منه شكاوي .. تقوم ريلمي تعمل ايه ؟

استخدمت نفس المعالج الميدياتيك هيليو G90T اللي بيجي بمعمارية 12 نانو ميتر في موبايل Realme 6 واتخلت عن السناب دراجون.

طيب المعالج ده اداءه كويس ؟ .. اه اداءه كويس جدا .. معالج حمار شغل حرفيًا .. تحس المعالج ده متحمس علطول انه تضغط عليه علشان يجيب اللي عنده .. الأداء اليومي العادي في الموبايل ده ممتاز مفيهوش اي مشاكل.

بس كان في بعض الاشاعات عن ان الـRealme 6 بيسخن في الأداء الرسومي في الألعاب .. بعد ما طلعنا الموبايل من العلبه وعملنا كام تحديث كان وصل بالفعل .. وطحنا الموبايل استخدام.

منهم لعب ببجي 4 ساعات متواصل مرتين .. لاقينا الموبايل بيسخن بس مش بيولع نار .. وتقدر تمسكه وتلعب عادي لفترات طويلة بدون اي مشاكل .. وبدون ما احس ان في مشكله في إستنزاف البطارية او اي حاجة .. وحقيقي اداء الميدياتيك G90T ده مثالي في الألعاب.

المعالج بيشغل لعبة ببجي على Ultra HDR.

لعبه كول اوف ديوتي بتشتغل على اعدادات جرافيك Very High .. واللعبة بتشتغل زي الفل برده بدون اي مشاكل.

طيب سيبك من كل ده .. اتقل لعبة وهي فورت نايت شغالة على اعدادات جرافيك High وبرده شغالة بـFrame Rate محترم وبدون اي مشاكل.

يعني من الأخر .. موبايل Realme 6 بيقدملك اداء ممتاز ومحترم في فئته السعريه .. بس متنساش ان في موبايل موجود بالفعل كان بيقدم نفس الاداء من شاومي وهو الـNote 8 Pro !

عوامل الأمان وعناصر اخرى :-

البصمه اتشالت من الظهر واتحطت في زرار الباور .. المكان الممتاز واللي خلاص كل الشركات بقت تفكر فيه كمكان اساسي .. البصمة سريعة جدا جدا وعملية جدا.

والـFace Unlock مقدرش اقول عليه غير انه صاروخي .. من اسرع بصمات الوجه اللي شفتها في الفئة السعرية ديه لحد دلوقتي.

طبعًا الموبايل جاي بـAndroid 10 بواجهة Realme UI 1.0 الجديده .. واللي بقت مياله اكتر ناحية الاندرويد الخام شوية .. وبعدت شويه في شكلها عن الـColorOS بتاعت اوبو اللي كانت ريلمي بتستخدمها قبل كدا.

طبعًا مش محتاج اقولك اني اول حاجه عملتها لما استخدمت الموبايل ده هو تفعيل الـDark Mode اللي بيخلي تجربة الموبايل جامدة جدا .. بس خلاص يعني حكينا عن الـDark Mode ده كتير قبل كدا.

الموبايل كعادة ريلمي .. مفيش لمبة اشعارات ولا في بديل ليها .. معرفش ناويين يحلوا الموضوع ده امتى بصراحة لإنه رزل .. والموبايل فيه كل المستشعرات ضوء، تقارب، بوصلة وجيروسكوب .. كلهم شغالين زي الفل بدون اي مشاكل.

بالنسبة لصوت الموبايل فهو جاي من سماعة واحدة صوتها عالي بس مش مجسم .. لو عاوز صوت مجسم هتزود وتطلع للـRealme 6 Pro اللي مميزينه بموضوع الصوت المجسم .. وصوت سماعات المكالمات عالي وممتاز .. وصوت سماعات الأذن عالي بس برده مفيهوش تجسيم اوي.

وأخيرًا بالنسبة لشبكة الموبايل .. فكعادة موبايلات ريلمي .. الشبكة كويسة جدا ومفيهاش اي مشاكل.

البطارية :-

بطارية بتيجي بحجم 4300 مللي أمبير .. قولت انها مش هتكفي بسبب المعالج الشديد والشاشة الـ90 هيرتز .. وحقيقي انا اول ما طلعت الموبايل من العلبة مخلي الشاشة على الـ90 هيرتز ومش حاسس باي تقصير في اداء البطارية.

استحملت معايا اكتر من 7 ساعات شاشة مفتوحة على استخدام قاصي جدا منهم اكتر من 4 ساعات ببجي مثلًا .. فأداء البطارية كويس مفيهوش مشاكل.

وحتى لو انت استهلاكك تقيل .. فـ ريلمي لأول مره بتحط شاحن 30 واط في العلبة بيشحن البطارية عن طريق منفذ الـUSB Type C بالكامل حرفيًا في أقل من ساعة.

الكاميرات :-

فاكر كاميرات الـRealme XT اللي كانت عجباكم .. ريلمي ريحت دماغها وحطت نفس الكاميرا الخلفية هنا .. الاساسية 64 ميجا بيكسل بفتحة عدسة F/1.9 بمستشعر سامسونج GW1 .. ومعاك عدسة تانية 8 ميجا بيكسل Ultra Wide فتحة عدسة F/2.3 وعدسة 2 ميجا بيكسل ماكرو وعدسة 2 ميجا بيكسل للعزل.

والكاميرا السيلفي الموجوده في ثقب في شمال الشاشة بتيجي بدقة 16 ميجا بيكسل مع فتحة عدسة F/2.0.

اداء الكاميرا الخلفية فعلاً قوي وتقدر تعتمد عليه .. الصور مليانة تفاصيل .. والألوان بقت مظبوطة جدا .. معالجة ريلمي للصور اتحسنت جدًا جدًا .. الصور في الظلة والشمس مظبوطة بالشعره .. مش حاسس بأي تقصير في الأداء ومش حاسس ان في كاميرا بتطلع صور افضل بالسعر ده دلوقتي.

مشاكل ريلمي مع الوان الشجر والورد اتحلت .. الصور مبقاش يحصل فيها Over Saturation وبقت ميالة اكتر للواقعية مع تاتش بسيط اوي من ريلمي لتحسين الصور مع وضع الـChroma Boost.

العدسة الـUltra Wide تجربتها مفيهاش جديد .. كويسة وهتقدر تستخدمها في الاضاءات المعتدلة مش الضعيفه اوي.

نرجع تاني للعدسة الرئيسية وبالنسبة للتصوير في الاضاءه الداخليه .. الصور لسه مليانه تفاصيل ولون البشره مظبوط حتى بعد ما بعمل زوم .. وحتى البورتريه مظبوط برده والعزل وتحديد الاطراف مظبوط بالشعره في الاضاءه الداخلية .. عاش يا ريلمي.

نجرب بقى الـNight Mode ونشوف بيقول ايه .. السوفت وير بيحاول انه يفتح الصوره بأي طريقه .. بص هي التفاصيل زي ما هيا .. الموضوع كله ان السوفت وير بيعلي اضاءة الصوره مش اكتر .. ومع ذلك فالاداء بردة كويس ومقبول جدا .. ومعنديش معاه مشاكل في ظروف التصوير الصعبه.

طب تعالى بقى نجرب الـRealme 6 مع الـRealme XT ونشوف فرق الأداء بينهم عامل ايه ( صور المقارنة في فيديو المراجعة في أخر المقالة ).

الـXT كان ومازال بيلعب في الألوان جامد .. بس الـRealme 6 اللعب في الالوان قل كتير .. والألوان ولون البشره بقى مايل جدًا للحقيقه بس بالنسبة للتفاصيل فهما واحد تقريبا .. فرق لعب الألوان يبان برده في تصوير الشجر والورد.

في الاضاءات الداخلية بقى لو تفتكر الـXT كان بيعدل جامد في الألوان .. وده وضح وظهر لما صورت اكتر من صورة بالريلمي 6 جمب الاكس تي .. الألوان كانت مظبوطة اكتر في الـRealme 6.

الـNight Mode بقى .. الـRealme 6 بقى على وضعه جدًا .. وبيقدر يخلي الصور مايلة اكتر للحقيقة من غير ما يعملها Reddish او يخليها مايلة للأحمر زي ما كان الاكس تي بيعمل.

اما بالنسبة للكاميرا السيلفي .. السيلفي كويس جدًا في الاضاءات العالية .. والعزل مظبوط والوان البشرة والصورة عمومًا مظبوطة .. ريلمي شاطرة في السيلفي انتوا عارفين.

حتى في الاضاءات الداخلية الصور بتطلع مظبوطة ولو حتى بورترية .. بس مشكلتي كلها في السيلفي في التصور بليل.

لازم مصدر ضوء كويس علشان الصورة تطلع كويسة وفيها تفاصيل .. ولما بجرب الـNight Mode بتاع السيلفي حرفيًا بيمسح تفاصيل الصورة وبيخليها سايحة ومش مظبوطة خالص .. فاداء السيلفي هنا بليل بصراحة اقل من المتوقع بكتير .. يعني متقدرش تعتمد على الـNight Mode بتاع السيلفي هنا خالص .. تحس انه محتاج تحديث.

وعلشان بردة احكم على السيلفي واشوف انا صح ولا غلط حطيته جمب الـXT .. اللي كان برنس السيلفي .. هتلاقي مفيش فرق جوهري بين الموبايلين في التصوير في اضاءات عالية .. نفس الصور الممتازة في الموبايلين.

الفرق بيظهر مع الاضاءات القليلة شوية تلاقي الاكس تي بيظبط الالوان اكتر .. بس اللي بيوضح الفرق بقى هو الـNight Mode في السيلفي في الموبايلين .. الـRealme 6 وحش جدا لما حطيته جمب الاكس تي !

اما بالنسبة بقى لتصوير الفيديوهات، الموبايل بيصور 4K بـ30 فريم وبيصور 1080p بـ60 فريم وبيصور Slow Motion، والموبايل بيدعم الثبات الإلكتروني على جودة 1080p مع 30 فريم بس .. والعدسة الـUltra Wide بينفع تصور بيها فيديوهات 1080p برده بس مينفعش تنقل من العدسه الاساسية للـUltra Wide وانت بتصور.

ممكن تشوف الصور والفيديوهات المتصورة بالموبايل في فيديو المراجعة في أخر المقالة.

سعر الموبايل :-

موبايل Realme 6 نزل في مصر بنسختين بس .. الأولى الصغيره بمساحة تخزين 128 جيجا مع 4 جيجا رام ودي بسعر 3990 جنيه وديه اللي كنا بنجربها .. اما النسخة الكبيره بمساحة تخزين 128 جيجا مع 8 جيجا رام ودي بسعر 4490 جنيه.

والنسختين بينفع تركيب فيهم كارت ميموري بحجم 256 جيجا مع شريحتين إتصال من الجيل الرابع في نفس الوقت !

الرأي النهائي :-

ريلمي 6 بيقدملك ايه في الفئة السعرية دي ؟

• أفضل كاميرا خلفيه .. من ناحية التفاصيل ومعالجة الوان الصور
• أسرع شحن بعد الهواوي Nova 7i
• شاشة كامله بمعدل تحديث 90 هيرتز ( ده لو هيفرق معاك يعني )
• أداء محترم وقوي وتعتمد عليه ( شوفناه قبل كده من شاومي )

العيوب اللي في ريلمي 6 :-

• خامات بلاستيك كعادة ريلمي
• مفيش لمبة اشعارات
• اداء الكاميرا السيلفي بالليل مش حلو
• تصوير فيديوهات بالكاميرا الخلفية وتسجيل الصوت مش على قدر عالي من المنافسة

ولو عايز تعرف رأيي في السعر .. فالموبايل ده اقل نسخه منه نزلت بمساحة 128 جيجا مش 64 جيجا زي الهند .. فا لو هتضيف الضرايب والجمارك .. فأقل نسخه كان سعرها المقبول من وجه نظري حوالي 3700 جنية.

ومن الأخر .. ده كان رأينا في الـ ريلمي 6 .. ولو انت متردد او محتار .. فمتقلقش .. احنا هنعملكم كل المقارنات الحقيقة الممكنة بين الريلمي 6 ومنافسينه اللي نازلين قريب زي الـRedmi Note 9S والـGalaxy M31 .. علشان نشوف فعلًا مين فيهم الموبايل اللي هيبقى برنس الفئة المتوسطة الجديد.

فيديو المراجعة :-