مقارنة Redmi Note 9 Pro مع Realme 6 – أفضل موبايل بـ4 الاف جنية ؟

دي مقارنة كاملة بين الـRedmi Note 9 Pro والـRealme 6 علشان نعرف مين أفضل موبايل في الفئة السعرية الـ4 الاف جنيه ويكون بيقدملك أفضل قيمة مقابل سعر وفي نفس الوقت ميبقاش فيه مشاكل كتير .. وفي نهاية المُراجعة دي هعرفكم موقف الـGalaxy M31 والـNova 7i بالنسبة للموبايلات دي.


التصميم :-

بالنسبة للخامات الـRealme 6 جاي بخامات خارجية بالكامل من البلاستيك .. اما Redmi Note 9 Pro جاي بتصميم ظهر زجاجي عليه حماية Corning Gorilla Glass الجيل الخامس مع فريم من البلاستيك.

ريلمي 6 وزنه أخف، بحكم إن ظهره من البلاستيك، وشاشته كمان أصغر .. وكمان أبعاده وحجمه أقل بفرق واضح عن النوت 9 برو .. وبالتالي فأكيد إستخدام الريلمي 6 بإيد واحدة هيبقى أسهل من الـNote 9 Pro.

نيجي لنقطة بروز الكاميرات السخيفة جدًا في الموبايلين .. البروز كبير جدًا في الموبايلين .. بس الجرابات اللي بتيجي في العلبة بتغطي البروز ده.

ظهر صور كتير لمُستخدمين حقيقيين لـ موبايلات شاومي من سلسلة نوت 9 الجديدة، بيشتكوا من ظهور تراب بداخل فريم الكاميرات .. فحقيقي الموضوع ده مُقلق جدًا .. وتوكيل شاومي فاجئني وإتعامل كويس وعمل إستبدال او إسترجاع للفلوس.

نوت 9 برو يكسب في تصميم أشيك وخامات خارجية أفضل .. ريلمي 6 يكسب في حجم أقل وتقفيل أفضل.

الشاشة :-

شاشة الـNote 9 Pro ضخمة .. بتيجي بحجم 6.67 بوصة من نوع IPS LCD بدقة FHD+ وبتردد عادي 60 هيرتز وبثقب للسيلفي في منتصف الشاشة.

أما شاشة الـRealme 6 بتيجي أصغر، بحجم 6.5 بوصة من نوع IPS LCD بدقة FHD+ بتردد أعلى 90 هيرتز وبثقب للسيلفي على يسار الشاشة.

بص من الأخر كدا وبعد تجارب كتير .. من ناحية الألوان وQuality او جودة الشاشة .. شاشة الـRealme 6 أفضل .. بتقدر تجيب درجات ألوان أكتر وأحسن.

وكمان .. التردد الأعلى اللي في شاشة الـRealme 6 .. هيديلك سلاسة ونعومة أكتر في الـScroll الكتير .. بالنسبة لدرجة سطوع الشاشة تحت الشمس .. الإتنين قُريبين جدًا من بعض.

وأخيرًا بالنسبة للحماية على الشاشة .. الـNote 9 Pro بيجي بطبقة حماية Coring Gorilla Glass الجيل الخامس اما الـRealme 6 بنفس طبقة الحماية بس الجيل الثالث .. والموبايلين متركب عليهم سكرينه.

ريلمي 6 هيكسب في نقطة الشاشة.

الأداء :-

بإختصار .. المعالج Helio G90T المتواجد في Realme 6 أقوى من معالج سناب دراجون 720G الموجود في Redmi Note 9 Pro .. وكمان واجهة ريلمي مُستقرة أكتر من واجهة شاومي حاليًا.

بس في حاجة بقى .. بعض المُستخدمين بيفضلوا معالجات كوالكم سناب دراجون على الميدياتيك .. إعتقادا منهم إنها مُعَمِرة أكتر وبتعيش أكتر بدون مشاكل .. بالرغم من إن مفيش مشاكل لحد دلوقتي في الـG90T.

وعلشان الناس اللي بتقلق من سخونية مُعالجات ميدياتك، ده إختبار عملته علشان نشوف حرارة المعالجات من التجربة الفعلية ليها.

  • شحنت الموبايلين لـ100%
  • أعلى درجة سطوع للشاشة في الموبايلين
  • شغلت لعبة ببجي
    اعدادات الجرافيك على High HD على الموبايلين
  • جربت اللعب نص ساعة على الموبايلين

بعد نصف ساعه لعب، موبايل Realme 6 بطاريته وصلت الى 91% اما الـNote 9 Pro بطاريته وصلت لـ93% بس .. ولو حسبنا كده حسب حجم كل بطارية في الموبايلين هنلاقي ان ريلمي إستهلك 387 مللي امبير .. اما الـNote 9 Pro إستهلك 351 مللي امبير.

ده معناه ان إستهلاك نوت 9 برو للبطارية أقل من إستهلاك ريلمي 6 .. وبالنسبة للسخونية فا سخونية Realme 6 كانت أكتر حاجه بسيطة من سخونية الـNote 9 Pro .. بس مش فرق كبير.

بالنسبة للعبة كول اوف ديوتي .. شغالة على نفس إعدادات الـGraphic على الموبايلين Very High .. اما فورت نايت، شغالة على اعدادات جرافيك High على الـRealme 6 .. وعلى اعدادات جرافيك Medium على الـNote 9 Pro.

ريلمي 6 أداءه أعلى خصوصًا في الألعاب .. نوت 9 برو موفر أكتر وسخونيته أقل.

عوامل الأمان وعناصر اخرى :-

البصمة على زرار الباور في الموبايلين .. الـRealme 6 أسرع بفرق واضح .. كذلك الحال في الـFace Unlock .. برده الـRealme 6 أسرع بفرق ملحوظ جدًا .. ريلمي أشطر من شاومي في عوامل الأمان.

زي أي مقارنة بنعملها .. الـNote 9 Pro متفوق على الـRealme 6 في أكتر من حاجة .. زي لمبة الإشعارات ومستشعر الـIR Blaster والمايكروفون الإضافي لعزل الضوضاء .. كل ده موجود في الـ9 برو ومش موجود في الريلمي 6.

وكمان في الـNote 9 Pro تقدر تعمل نُسختين من كل البرامج .. مش زي الـRealme 6 اللي بيسمحلك تعمل نسختين من برامج السوشيال ميديا بس.

المستشعرات مفيهاش مشاكل شغالة زي الفل في الموبايلين .. لو عندك مشكلة فيهم في موبايلك إتأكد إنك مركب سكرينة مظبوطة مش مغطية المستشعرات.

أما بالنسبة للصوت .. تفوق واضح للـNote 9 Pro هنا .. وصوت الـSpeaker في الـNote 9 Pro أعلى بفرق بسيط أوي .. صوت سماعات المكالمات برده أعلى في الـNote 9 Pro بفرق بسيط.

ريلمي 6 فيه تسجيل مكالمات اما الـNote 9 Pro فا للأسف مفيش فيه إمكانية تسجيل المكالمات .. وصوت سماعات الأذن فـ الإتنين قريبين جدًا من بعض.

بالنسبة لقوة الـWiFi .. فا الـRealme 6 أقوى وبيقدر يجيب شبكات Wi Fi أكتر.

أما شبكة الإتصال .. فهنا تفوق واضح وصريح لشبكة Realme 6 عن الـNote 9 Pro اللي قولنا في المراجعة بتاعته إن شبكته متوسطة مش ممتازة .. اما شبكة الـRealme 6 مُمتازة وكمان مفيش حد إشتكى منها.

شبكة وعوامل أمان أفضل في ريلمي 6 .. صوت أفضل ومستشعرات ومميزات أكتر في نوت 9 برو.

البطارية :-

بطارية الـRedmi Note 9 Pro أكبر .. بتيجي بحجم 5020 مللي أمبير .. اما بطارية الـRealme 6 فا هي بتيجي بحجم 4300 مللي أمبير .. مع الإستخدام الفعلي .. النوت 9 برو هيستحمل معاك 7 ~ 10 ساعات حسب إستخدامك .. اما ريلمي 6 هيستحمل معاك 6 ~ 8 ساعات.

الموبايلين بيجي معاهم الشواحن السريعة اللي بتشحن بقوة 30 واط .. وعلشان فرق حجم البطارية في الـNote 9 Pro فا هو بيشحن في ساعة وربع .. والـRealme 6 بيشحن في ساعة واحدة بس.

نوت 9 برو يكسب في البطارية الأفضل .. ريلمي 6 يكسب في شحن أسرع بفرق ربع ساعه فقط.

الكاميرات :-

الموبايلين فيهم 4 كاميرات خلفية .. نفس مستشعر العدسة الرئيسية مُستخدم في الموبايلين .. 64 ميجا بيكسل بمستشعر سامسونج GW1 .. عدسة Ultra Wide بدقة 8 ميجا بيكسل .. عدسة ماكرو 5 ميجا بيكسل في Note 9 Pro و2 ميجا بيكسل في Realme 6 .. واخر عدسة 2 ميجا بيكسل للعزل في الموبايلين.

اما عن الكاميرا السيلفي فا هي في الموبايلين بدقة 16 ميجا بيكسل .. فتحة العدسة في Note 9 Pro هي F/2.5 اما في الـRealme 6 فهي F/2.0 بس.

في المقارنة انا إعتمدت على تطبيق الكاميرا الأساسي بتاع كل موبايل .. ومستخدمتش Google Camera .. لإن لحد دلوقتي منزلش جوجل كاميرا فيه Night Sight لموبايل Realme 6.

في مراجعة Redmi Note 9 Pro قولنا عليه “فتوة الكاميرات”، الموبايل ده اما تحطه جنب اي موبايل تاني بسعرة .. هيقدر ينافس ويتفوق عليه في الكاميرات .. ولما جربنا الـNote 9 Pro جنب الـRealme 6 كاميرا النوت 9 برو طلعت نتائج أقوى بفرق ضخم وملحوظ في مُختلف اوضاع التصوير.

ده مش معناه ان Realme 6 كاميراته مش كويسه .. بس الـNote 9 Pro هو اللي فعلًا طفرة في الفئة السعرية دي من ناحية الكاميرات .. شاومي قدرت تقدم كاميرات قوية يُعتمد عليها حتى في الـNight Mode اللي هو عظيم جدًا في الموبايل ده.

اما بالنسبة للسيلفي فا في الإضاءة العالية مقدرتش احدد بالظبط مين أقوى من مين .. لون البشرة كان أفضل في الـRealme 6 ومش كويس اوي في الـNote 9 Pro.

بس بالليل بقى وفي الإضاءه الضعيفه لاقيت نتيجة غريبة جدًا .. موبايل Note 9 Pro متفوق على Realme 6 من غير Night Mode وبفتحة عدسة ديقة جدًا .. مش عارف ليه Realme 6 بيقدم أداء ضعيف اوي كده في السيلفي بالليل.

بالنسبة بقى لتصوير الفيديوهات .. الموبايلين بيصوروا بجودة 4K ومفيش طبعًا ثبات إلكتروني في التصوير الـ4K .. لكن في الـ1080p بـ30 فريم في الثانيه هتلاقي مُثبت إلكتروني عادي .. وكمان الـNote 9 Pro فيه مايكروفون اضافي لعزل الضوضاء .. اما الـRealme 6 مفيش فيه المايكروفون الإضافي ده.

شوف تجربة تصوير الصور والفيديوهات بالموبايلين في الفيديو في أخر المقال !

نوت 9 برو يكسب في 90% من أوضاع التصوير سواء بالكاميرا الخلفية أو الأمامية

أسعار الموبايلات :-

سعر موبايل Realme 6 :-

  • النسخة الـ128 جيجا مع 4 جيجا رام بسعر 4000 جنية
  • النسخة الـ128 جيجا مع 8 جيجا رام بسعر 4500 جنية

والموبايل بيدعم تركيب شريحتين إتصال 4G مع كارت ميموري بحجم 256 جيجا في نفس الوقت.

سعر موبايل Note 9 Pro :-

  • النسخة الـ64 جيجا مع 6 جيجا رام بسعر 3900 جنية ( مش هتنزل تاني )
  • النسخة الـ128 جيجا مع 6 جيجا رام بسعر 4400 جنية

الموبايل بيدعم تركيب شريحتين إتصال برده 4G مع كارت ميموري بحجم 512 جيجا.

ريلمي 6 النسخة الصغيرة بمساحة تخزين أكبر .. والنسخة الكبيرة هتوفرلك رامات أكتر.

الرأي النهائي :-

هعرفك رأيي النهائي وهرتبلك الموبايلات اللي موجوده في فئة الـ4 الاف جنيه من حيث القيمة مقابل السعر .. وزي ما وضحتلكم في بداية المُقارنة فانا هعرفكم وضع فئة الـ4 الاف جنيه حاليًا بالـ4 موبايلات الموجوده فيها واللي هما نوت 9 برو وريلمي 6 والـGalaxy M31 والـNova 7i.

note 9 pro vs realme 6

المركز الأول: Redmi Note 9 Pro :-

موبايل نوت 9 برو بيقدم مجموعة مواصفات مُتكاملة مع أعلى قيمة مقابل السعر .. بس للأسف الموبايل بيظهر فيه عيوب وهي مشكلة التراب اللي بيدخل في فريم الكاميرا ومشكلة الشبكة اللي متُعتبرش قوية اوي في الموبايل ده.

المركز الثاني: Realme 6 :-

ويظل ريلمي 6 هو الإختيار اللي مفيش فيه مشاكل .. بس من ناحية القيمة مقابل السعر هيكون في المركز التاني بعد نوت 9 برو مع الشاشة الـ90 هيرتز والمعالج القوي وعوامل الأمان الأسرع.

المركز الثالث: Galaxy M31 :-

وده بيقدم شاشة اموليد مع كاميرات مُحترمه ( ممكن تبقى بنفس قوة كاميرات نوت 9 برو ) مع بطارية ضخمة .. بس لو محتاج أداء قوي بلاش الموبايل ده .. نقطة الأداء فيه نزلته للمركز التالت من حيث القيمة مقابل السعر.

المركز الرابع: Nova 7i :-

ده شايفة شخصيًا أكتر موبايل في الفئة دي ممكن يعيش بأداء مُستقر وثابت .. موجود في المركز الرابع بسبب عدم وجود خدمات جوجل .. الكاميرا الخلفية اللي هتكون أضعف من المُنافسين .. والأداء الضعيف في الألعاب.

هات نوت 9 برو لو عايز تاخد موبايل متكامل بيقدملك أفضل قيمة مقابل سعر مع عيوب ممكن تظهر وممكن لا .. هات ريلمي 6 لو عايز موبايل قيمته مقابل السعر مقبوله بس امان ومفيش فيه مشاكل .. هات M31 لو عايز إسم كبير زي سامسونج مع شاشة اموليد وبطارية ضخمة .. هات نوفا 7i لو عايز موبايل للإستخدام البسيط جدًا اللي يعيش معاك أطول وقت.

فيديو المراجعة :-

قد يعجبك أيضا...

Comments

جاري التحميل...