عيلة الـRedmi Note 9 من شاومي فيها 3 موبايلات .. من فترة راجعنا الـRedmi Note 9S والـRedmi Note 9 العادي .. والنهاردة هنراجع Redmi Note 9 Pro الأخ الكبير .. والي بيتميز بكاميرا خلفية قوية جدا.
التصميم :-
الـRedmi Note 9 Pro جاي بتصميم بظهر زُجاجي فخم مع فريم من البلاستيك .. مع شكل كاميرا خلفية رُباعية في المربع الموجود في أعلى مُنتصف الظهر .. والتصميم الخارجي عليه حماية Corning Gorilla Glass الجيل الخامس.
التصميم شيك، ده رأيي الشخصي فيه .. بس هو بنفس تصميم الـRedmi Note 9S بدون إختلاف .. الفرق بس في وجود كلمة 64 ميجا بيكسل الموجودة تحت الكاميرات بدال 48 ميجا بيكسل في Note 9S.
التصميم عندي عليه بعض التحفظات القديمة وهكررها تاني النهارده :-
- الموبايل وزنه تقيل
- الموبايل حجمه كبير
هتحتاج وقت على ما تاخد عليه - الكاميرات بارزة بروز كبير عن جسم الموبايل
هتحتاج تركب الجراب اللي جاي مع الموبايل في العلبه
بس أنصحك تشتري جراب تاني من اللي فيه “باب” بيقفل خالص على الكاميرات .. علشان موضوع التراب اللي بيدخل الكاميرات .. المشكلة اللي حصلت مع ناس كتير في Note 9S.
الشاشة :-
شاشة الـNote 9 Pro مش أقوى حاجة فيه على الإطلاق .. شاشة كبيرة حجمها 6.67 بوصة من IPS LCD بدقة FHD+ وفيها ثُقب للسيلفي في منتصف الشاشة تقدر تلغيه من الإعدادات.
انا عارف دلوقتي إنك بتسأل هل الشاشة ديه فيها ظل حوالين ثقب السيلفي او فيها تسريب إضاءة ؟ .. الإشاعة اللي طلعت على الـNote 9S .. وأحب اقولك في البداية، الشاشة اللي هنا نفس شاشة Note 9S.
وانا قولت في مراجعة Redmi Note 9S إن الكلام اللي بيتقال عن الشاشة هنا مُجرد إشاعات غير منطقية .. وطبيعي تلاقي ظل خفيف حول ثقب في شاشة IPS LCD .. فبلاش نأفور الموضوع.
اما بالنسبة لرأيي في الشاشة .. فحقيقي هي متُعتبرش نقطة قوة في الموبايل ده غير إن بس حجمها الكبير .. لإن عندك المُنافسين بيقدموا شاشات أموليد زي الـGalaxy M31 او شاشات IPS LCD بتردد 90 هيرتز زي الـRealme 6.
فلو إنت عايز تجيب الـRedmi Note 9 Pro .. تأكد من إنك هتاخد تجربة شاشة عادية جدُا بألوان شاشة عادية جدُا بسطوع شاشة عادي جدًا بدون اي ميزة.
والشاشة عليها حماية من نوع Corning Gorilla Glass الجيل الخامس .. والموبايل بيجي في العلبة متركب عليه سكرينة.
الأداء :-
الموبايل جاي بمعالج كوالكوم سناب دراجون 720G .. بيشتغل بدقة تصنيع 8 نانو ميتر .. لو رجعت لمراجعة Redmi Note 9S .. فأنا قولت إن الأداء حلو .. بس الواجهة مش مُستقرة اوي وفيها بعض التقطيعات الخفيفة.
الكلام ده أقل هنا كتير وهقولك ليه .. لإني لما جربت الـNote 9S كانت النسخة الـ4 جيجا رام .. إنما هنا النسخة اللي معايا من الـNote 9 Pro بتيجي بـ6 جيجا رام .. وفرق الرام مش فارق في سُرعة الموبايل على قد ما هو فارق في إن الواجهة تاخد راحتها في الإستخدام.
الأداء هنا كويس ومعقول ومش هتحس بتقصير منه على الإطلاق .. بس برده مُشكلة إن تطبيق الكاميرا بتاع شاومي بيعلق ومش بيفتح موجوده هنا .. وديه نفس مشكلة الـNote 9S وأتمنى تحديث يحل المشكلة ديه بسرعه.
الأداء الرسومي مُطابق للـNote 9S مفيش فرق .. المعالج بيشغل لعبة PUBG على High HD واللعبة بتشتغل كويس جدًا .. ولعبة Call Of Duty شغالة على إعدادات جرافيك Very High وبتشتغل بدون اي مشاكل.
واخيرًا لعبة Fortnite بتشتغل على المعالج ده بشكل رسمي وبتشتغل على اعدادات جرافيك Medium ودي اعدادات كويسه جدًا لموبايل بالسعر ده .. مش مطلوب منه أكتر من كده.
ملخص الأداء .. الـNote 9 Pro اداءه مُرضي ولكنه مش الأقوى او مش الـWow يعني .. ويبقى الـHelio G90T الموجود في الـNote 8 Pro والـRealme 6 اداءه أحسن.
وبالمناسبة .. سخونية معالج كوالكوم سناب دراجون 720G أقل بفرق ملحوظ جدًا عن معالج ميدياتك Helio G90T .. وده بيرجع للأداء الأقوى في الـG90T على حساب سخونيه أكتر.
عوامل الأمان وعناصر اخرى :-
البصمة مُدمجة في زُرار الباور .. الموبايل طويل فالبصمة فوق شوية، لو إيدك صغيرة ممكن تاخد وقت على ما تتعود .. أداء البصمة مقبول بسبب الـAnimations اللي في الواجهة .. كذلك الحال في الـFace Unlock .. الـAnimation مبطأ من سرعته.
طبعًا إنت زهقت وعايز تشوف فرق بين النوت 9 برو والنوت 9 اس .. لإنهم اخوات لحد دلوقتي .. أول فرق في دعم الـNFC الموجود في البرو ومش موجود في الـ9S .. الميزة اللي ممكن تبقى مُفيدة مُستقبلًا.
الـNote 9 Pro .. جاي بردة بمستشعر الـIR Blaster ومايكروفون عزل الضوضاء وباقي الحاجات اللي موجوده في عيلة Note 9 كُلها .. وفيه بردة لمبة إشعارات .. نورها ضعيف بس موجودة وشغالة مع الإشعارات.
الموبايل فيه نفس الـHaptic Feedback الموجود في الـNote 9S واللي هيحسن من تجربة الـVibration مع الـTouch .. لو إشتريته انصحك تجربة.
المُستشعرات كلها شغالة بدون مشاكل .. وجربت مستشعر المُقاربة بتاع المُكالمات ومش بيعلق .. لو فيه مشكله معاك إتأكد إنك مركب سكرينة مش مغطية سينسور المقاربة.. وللأسف مفيش تسجيل مكالمات.
صوت الموبايل نفس صوت الـ9S .. صوت محترم عالي ومُجسم .. وصوت سماعات المكالمات عالي ومش هيضايقك .. وصوت الـAUX مُمتاز.
بالنسبة لشبكات الموبايل .. فالـWiFi قوي والمدى بتاعه كويس .. وتحميل التطبيقات من الـPlay Store بيفضل شغال عادي والشاشة مطفية.
أما قوة إتصال الشبكات .. فالموبايل هديله تقييم متوسط .. في الأماكن اللي شبكتها ضعيفة أوي مُمكن تلاقي موبايلك غير مُتاح .. وبصراحة الشبكات في مصر اليومين دول صعبة جدًا على اي موبايل.
البطارية :-
بطارية ضخمة بتيجي بحجم 5020 مللي امبير .. وهي نفس بطارية الـNote 9S هتستحمل معاك 7 ~ 10 ساعات شاشة مفتوحة على حسب إستخدامك.
الفرق التاني في الموبايل ده عن الـNote 9S هو الشاحن المُرفق واللي بيجي هنا بقوة 33 واط .. بيشحن البطارية بالكامل في ساعة وربع وده وقت مُمتاز جدًا .. وكدا زمن الشحن مش هيبقى أقل في حاجة عن المنافس المباشر Realme 6.
الكاميرات :-
وهنا هنلاقي الفرق الثالث بين الـNote 9 Pro والـNote 9S .. الـ9 برو جاي بكاميرا خلفية رُباعية، الأساسية 64 ميجا بيكسل بفتحة عدسة F/1.9 بمستشعر سامسونج GW1 .. مع عدسة تانية 8 ميجا بيكسل فتحة عدسة F/2.2 للتصوير الواسع .. والعدسة التالتة 5 ميجا بيكسل فتحة عدسة F/2.4 وهي ماكرو .. والأخيرة 2 ميجا بيكسل للعزل.
الكاميرا السيلفي هي نفسها اللي موجوده في الـNote 9S بدون إختلاف .. كاميرا بدقة 16 ميجا بيكسل فتحة عدسة F/2.5 موجوده في ثقب الشاشة
نفس نسخة Google Camera اللي إشتغلت على Note 9S إشتغلت هنا برده على الـNote 9 Pro.
لو تفتكر معايا، الكاميرا بتاعت Note 9S كانت مُمتازة .. وبالتبعية الـNote 9 Pro .. الكاميرات بتاعته مُمتازة أكتر وأكتر .. تفاصيل كتير وDynamic Range محترم جدًا .. العدسات الـUltra Wide والـMacro مش مميزين خالص .. اداءهم عادي.
التصوير في الإضاءات الداخلية والإضاءات الضعيفة كويس جدًا بفضل التفاصيل الكتير والـNight Mode اللي بينور الصور زيادة عن الطبيعي .. ومش هتحتاج لتطبيق جوجل كاميرا كتير في الكاميرا الخلفية .. لإن هنا سوفت وير شاومي وتطبيق الكاميرا الأساسي هيديلك اللي انت عاوزه وزيادة في الكاميرا الخلفية.
لما نيجي نقارن بين الـ9S والـ9 برو علشان نشوف فرق مستشعر الكاميرات .. هنلاقي الـ9 برو بيقدم تفاصيل أكتر في الإضاءات العالية بفرق بسيط .. اما لما الإضاءة تقل شوية هتلاقي فرق تفاصيل كتير .. وفي الـNight Mode الفرق واضح جدًا تفوق الـ9 برو.
اما بالنسبة للكاميرا السيلفي .. فأنا هنا حاسس إن لون البشرة مش مظبوطه اوي .. فاتحه زيادة عن الطبيعي .. بس كتفاصيل فهي مُمتازة في ضوء الشمس.
وزيها زي الـ9S، لما الإضاءة تقل هتلاقي التفاصيل بتقل كتير والصور بتتمسح شوية .. ولازم تستخدم جوجل كاميرا في التصوير بالليل في السيلفي علشان فعلًا سوفت شاومي بيطلع صور مش حلوة خالص.
لما نقارن الـ9 برو بالـ9S في السيلفي .. هنلاقي فرق لون بشرة بسيط .. أحسن شوية في الـ9S وده اللي قولتلهولك من شوية .. ومع إستخدام جوجل كاميرا هتلاقي صور سيلفي بليل مُمتازة ومليانة تفاصيل وLook سينمائي كدا في الصور.
بالنسبة لتصوير الفيديوهات فالـNote 9 Pro زي الـNote 9S بالظبط .. بيصور فيديوهات بجودة 4K مع 30 فريم في الثانيه بدون مُثبت إلكتروني .. وبيصور كمان بجودة 1080p مع 30 فريم في الثانيه بوجود مثبت إلكتروني.
الموبايل فيه مايكروفون اضافي لعزل الضوضاء، بيحسن شوية من التجربة الصوتيه في تصوير الفيديوهات .. والموبايل بيقدملك المميزات المُعتاده من شاومي في تصوير الفيديوهات زي انك بتقدر تصور فيديو بالعدسة الـMacro بجودة الـ1080p وتقدر كمان تصور بالوضع السينيمائي اللي هيديك فريم إسود فوق وتحت.
شوف الفيديوهات و الصور المتصوره بالموبايل في فيديو المراجعة في اخر المقال.
سعر الموبايل :-
الموبايل بيجي في السوق المصري بنسختين :-
- النسخة الـ64 جيجا مع 6 جيجا رام بسعر 3888 جنيه
- النسخة الـ128 جيجا مع 6 جيجا رام بسعر 4299 جنيه
وبينفع تركب في الموبايل شريحتين إتصال وكارت ميموري بحجم 512 جيجا مع بعض في نفس الوقت.
الرأي النهائي :-
نقاط تفوق Note 9 Pro على Note 9S :-
- كاميرا خلفيه أقوى خاصة في الـNight Mode
- دعم خاصية الـNFC
- شحن أسرع بفرق ملحوظ
- أقل نسخة 6 جيجا رام
ولو انت محتار بينهم فانا أنصحك تزود الفرق البسيط وتجيب Note 9 Pro وتاخد موبايل متكامل أكتر.
نقاط ضعف وعيوب في Note 9 Pro :-
- بروز الكاميرات الكبير
- وزن الموبايل وحجمه الكبير
- شاشة عادية مفيهاش اي ميزة
- البصمة مش أسرع حاجه
- تهنيجات وتقطيع في أبلكيشن الكاميرا
- الكاميرا السيلفي كانت محتاجه تبقى أحسن
- قوة الشبكه في الموبايل مش أفضل حاجه
- لا يدعم تسجيل مكالمات
Comments