كلنا منتظرين الـRealme 6 Pro والـRealme 6 .. واحنا في موبيزل منتظرينهم جدا جدا ، بس ريلمي في مصر ليها رأي تاني .. لانها إكتفت بنزول الـRealme C3 والـRealme 6i .. قدمنالكم مراجعة Realme C3 و دلوقتي جيه دور Realme 6i عشان نقول لكم ايه انطباعتنا عنه .. وايه اللي بيميزه عن الـRealme 5 .. وبرده حابب اوضحلك في بداية المراجعة ان Realme 6i من وجة نظر شركة ريلمي هو التطوير او الجيل الجديد لـRealme 5 وهو اللي هياخد مكانه في الفئة السعرية بتاعته .. انما الـRealme 6 للاسف هيبقى في فئة سعرية اعلى.
التصميم :-
موبايل ريلمي 6i بيجي بخامات بلاستيك وفريم بلاستيك .. وللأسف ده أول عيب في الموبايل .. بس ريلمي شايفه ان استخدام البلاستيك في الفئة السعرية ديه مش عيب .. هي وجهات نظر مش اكتر .. والموبايل واخد نفس ابعاد وحجم الـRealme 5 بالظبط.
الفرق بس ان الـRealme 6i الوانة مختلفة وغريبة .. وبصراحة الوان الموبايل مش حلوة أوي ( هي أزواق شخصية ) .. وعموما اللون الأبيض اللي بنراجعه احلى بكتير من اللون الاخضر اللي شكله مش لطيف .
طبقة الطلاء اللي هنا مطفية شوية .. علشان الموبايل ميظهرش فيه خرابيش بسهولة .. البروز في الكاميرات متوسط .. ومعاه جراب في العلبة لتغطية البروز ده.
الشاشة :-
شاشة تقليدية جدا .. حجمها 6.5 بوصة من نوع IPS LCD وبدقة قليلة شوية HD+ وده تاني عيب في الموبايل لان دقة الشاشة منخفضة.
الشاشة فيها نوتش للسيلفي والحافة السفلية كبيرة نسبيا .. نفس الشاشة شوفناها في Realme C3 الارخص منه وشوفناها في الـRealme 5 القديم.
ممكن تحس بس باختلاف بسيط في درجة الالوان ما بين الـRealme 6i والـRealme 5 .. بس الأداء الفعلي والسطوع تحت الشمس والكلام ده .. مش هتلاقي جديد.
الموبايل بيجي متركب عليه سكرينه في العلبة والشاشة عليها حماية Corning Gorilla Glass الجيل التالت .
لحد دلوقتي مفيش فرق بين Realme 6i و Realme 5 في خامات التصنيع وفي الشاشة.
الأداء :-
وهنا الـRealme 6i بيجي بـ معالج جديد بنشوفه لاول مرة في الفئة السعرية ديه وهو الميدياتك Helio G80 بمعمارية 12 نانو .. معالج محترم جدًا وحاليا هو افضل معالج في الفئة السعرية بتاعت الـ2800 جنية لحد وقت نشر المراجعة.
المعالج بيقدملك اداء يومي ممتاز .. هتحس انه بيقدم نفس اداء الـRealme C3 اللي جاي بمعالج Helio G70 وارخص منه .. بس الفرق ممكن تلاحظه لو بتخرج من لعبة تقيله او ابلكيشن تقيل مثلًا في الـRealme 6i هتحس الموبايل سلس اكتر من الريلمي C3 اللي اشتكينا منه في النقطة ديه.
انما في الاداء الرسومي .. الـRealme 6i زي الـRealme C3 .. بيشغل ببجي على اعدادات جرافيك High HD واللعبة بتشتغل كويس وسلسلة جدا .. للاسف كول اوف ديوتي شغالة برده على جرافيك Low و Medium ومفيش Optimization للمعالج مع اللعبة ديه.
وبالنسبة للسخونية في جسم الموبايل مع الاستخدام المكثف .. فهو بيسخن نفس سخونية الـRealme C3 اللي قولت انها مقبولة ومتوزعة كويس في جسم الموبايل علشان الخامات البلاستيك.
ومن الاخر .. الـRealme 6i يعتبر Upgrade او تطوير خفيف اوي يكاد يكون غير ملحوظ عن الـRealme 5 في الأداء الفعلي .. وقريب جدا من اداء الـRealme C3 اللي ارخص منه.
عوامل الامان وعناصر اخرى :-
الريلمي 6i جاي ببصمة في الظهر تقليديه .. سريعة جدا ومفيهاش اي مشاكل .. وجاي برده بـFace Unlock سريع ويُعتمد عليه.
الموبايل جاي برده بواجهة Realme UI 1.0 الجديده المبنية على Android 10 اللي بقى فيها Dark Mode واللي برده هتحس اداءه مش قد كدا بسبب الشاشة الـIPS.
الموبايل مفيهوش لمبة اشعارات ولا فيه بديل ليها .. المستشعرات كلها شغاله بكفاءة مش هتواجه معاها اي مشاكل.
الصوت بتاع الموبايل جاي من سماعة واحدة وصوته زي الـRealme 5 بالظبط .. اديله درجه متوسط .. مش واطي ومش هيضايقك زي الريلمي C3 .. وهو مش اعلى حاجة زي الـRedmi Note 8 مثلا.
صوت سماعة المكالمات كويس بس مش اعلى حاجة وصوت سماعات الاذن كويس جدا .. واخيرا بالنسبة للشبكه بتاعت الموبايل .. في فترة استخدامي البسيط .. ملاقيتش فيها مشاكل .. وحسيتها احسن من شبكة الـRealme C3 بفرق بسيط.
البطارية :-
نفس البطارية الضخمة بتاعت الـRealme C3 والـRealme 5 موجودة في الـRealme 6i وهي الـ5000 مللي امبير.
البطارية ادتني اداء محترم جدا ودخلت في الـ10 ساعات شاشة مفتوحة .. يعني هتستحمل معاك يومين ونص مستريح زي اخواته Realme C3 وRealme 5.
بس المميز هنا بقى واللي فارق الموبايل ده عن الـC3 والريلمي 5 .. انه جاي بمنفذ الشحن الـType C وشاحن 18 وات في العلبه .. بيشحن البطارية في ساعتين إلا ربع .. وديه نقطة قوة ( ميزة مهمة ) في موبايل Realme 6i.
الكاميرات :-
موبايل Realme 6i جاي بتطوير محترم في الكاميرات .. اربع كاميرات في الظهر، الأساسيه 48 ميجا بيكسل بفتحة عدسة F/1.8 والثانيه 8 ميجا بيكسل فتحة عدسة F/2.3 للتصوير الواسع، والتالته 2 ميجا بيكسل ماكرو والأخيره 2 ميجا بيكسل للعزل.
الكاميرا السيلفي 16 ميجا بيكسل مع فتحة عدسة F/2.0 وموجوده في النوتش.
في الإستخدام الفعلي بقى، الموبايل بصراحه اتطور كتير في التصوير .. التفاصيل بقت واضحة وكتيره والصور بقت Sharp اكتر .. يعني ممكن نقول ان هنا الـ6i فرق فعلًا عن الـC3 وعن الـRealme 5 في جزئية الكاميرات.
طبعًا الموبايل بيصور 12 ميجا بيكسل وفي وضع تانيه 48 ميجا بيكسل لدمج البيكسلات في صوره واحده، حسيته مش فارق اوي بصراحه لما استخدمته.
الـChroma Boost بقى ادائها اتحسن في الموبايل ده عن الـRealme 5 بفرق واضح، الصور مبقتش تفرقع من الألوان، بقت اهدى شوية.
بالنسبة للعدسة الـMacro ادائها على اده جدًا .. مش مميزه خالص .. والعدسة الـWide Angle متغيرتش برده، نفس العدسة الموجوده في Realme 5 القديم.
وبالنسبة للتصوير في اضاءه داخلية برده الكاميرا لسه مش محافظه على اداء كويس وكم تفاصيل محترم.
بالليل الموبايل بيقدر يطلع صور كويسة بس لازم تحافظ على مصدر اضاءة قريب منك.
وعمومًا عملنا مقارنة بين الـRealme 6i و الـRealme 5 عشان نشوف فرق التطوير بالظبط في الكاميرات .. وبصراحة في كل الصور حسينا فعلًا بتطور الكاميرات، ولكن خلي بالك .. مش هو ده التطوير اللي يخليك تغير من Realme 5 لـRealme 6i .. هو في تطوير طبعًا لإنه الجيل الجديد بس مش لدرجة التغير.
بالنسبة بقى للكاميرا السيلفي .. اداءها عادي مش هتحس انك ماسك موبايل بسيلفي جامد .. الوان البشره معجبتنيش والتفاصيل حاسسها مش كتير .. ساعات البورتريه كان بيغلط .. بس عمومًا هي بتقدم اداء مقبول في السعر ده.
بس بتحتاج مصدر اضاءه كويس عشان تطلع صوره كويسه فيها تفاصيل .. لما عملنا مقارنة السيلفي جنب الـRealme 5، شوية هتحس ان الريلمي 5 افضل وشويه هتحس ان الـ6i افضل .. بس نقدر نقول الاداء متقارب جدا لان اصلا سيلفي الريلمي 5 كان كويس.
وللأسف موبايل Realme 6i في نقطة تصوير الفيديوهات مش بيقدر يصور 4K .. ممكن تصور فيديوهات اعلى جودة 1080p بالكاميرا الخلفية.
ممكن تشوف الصور والفيديوهات المتصورة بموبايل Realme 6i في فيديو المراجعة في أخر المقالة.
الأسعار :-
موبايل Realme 6i في منه نسختين .. النسخة الصغيرة الـ64 جيجا مع 3 جيجا رام دي بسعر 2890 جنية وبيكون عليها خصم بتوصل لـ2790 جنية في اوقات مُعينه على موقع سوق .. ودي النسخة اللي انا بنصحك بيها بالرغم من قلة حجم الرامات في السعر ده.
والنسخة الكبيرة واللي بتيجي بمساحة تخزين 128 جيجا مع 4 جيجا رام ودي سعرها بيكون 3390 جنية وهتلاقيها ارخص حاجه بسيطه في المحلات.
وعموما الموبايل هيكون موجود على سوق ابتداءا من اليوم 1 أبريل ان شاء الله.
و ينفع تركب كارت ميموري بحجم 256 جيجا مع شريحتين الإتصال في وقت واحد مع بعض عادي.
الرأي النهائي :-
- موبايل Realme 6i النسخة الصغيرة الـ64+3 .. هتبقى بتقدم افضل معالج و افضل بطارية مع اسرع شحن .. و كاميرا خلفية وسيلفي على قد المنافسة في الفئة السعرية ديه.
- بس لازم اقولك تاني على أهم العيوب .. انخفاض دقة الشاشة و الخامات البلاستيك و عدم وجود لمبة اشعارات و عدم القدرة على تصوير فيديوهات 4K.
طيب ليه احنا مش بنرشح النسخة الكبيرة الـ128 جيجا مع 4 جيجا رام ؟! .. علشان السعر بتاعها هيبقى قريب جدا من اصغر نسخة من الـRealme 6 العادي اللي كلكم مستنينه واللي افضل من Realme 6i في كل حاجة .. وان شاء الله ريلمي 6 و ريلمي 6 برو ينزلوا مصر في أخر شهر أبريل أو أول شهر مايو على أقصى تقدير.
او لو مستعجل ممكن بنفس سعر النسخة الـ128+4 من ريلمي 6i .. تشتري Realme 5 Pro النسخة الصغيرة 128+4 اللي اعلى وافضل من Realme 6i في اكتر من حاجة زي المعالج والكاميرات.
ريلمي 6i احسن من ريلمي 5 في إيه ؟
- منفذ USB Type C مع الشاحن السريع في العلبه
- معالج احسن بفرق بسيط
- كاميرا خلفيه بتقدم اداء افضل
Comments