مقارنة Poco X3 NFC مع Realme 7 – أفضل موبايل متكامل بـ 4000 جنية ؟

وقت نزول Redmi Note 9 Pro و Realme 6 عملنا ليكم مقارنة علشان نوضح أفضل موبايل بـ4000 جنية .. ودلوقتي بما ان كل شركات الموبايلات نزلت الجديد عندها .. ريلمي نزلت Realme 7 .. وشاومي نزلت Poco X3 .. فإيه المانع نعمل مقارنة ما بينهم بما انهم ابرز منافسين في الفئة السعرية دي.

فئة الـ4000 جنية فئة مهمة جدًا .. وناس كتير جدًا بتشري موبايل في الفئة دي .. وأكيد بيبقى عاوز ياخد من الموبايل أحسن أداء وأحلى كاميرا وأقوى بطارية وأفضل شاشة .. ده غير شوية Options كده.


التصميم :-

الموبايلين بالكامل من البلاستيك .. كنت قولت في مراجعة Poco X3 NFC ان الفريم معدني .. بس في فيديوهات وضحت ان الفريم بلاستيكي .. فا خلاص أمر واضح أن الموبايلين بالكامل من البلاستيك.

وانا بصراحة ميال أكتر لتصميم Realme 7 وده بيرجع لـ3 اسباب .. أول سبب شكل التصميم نفسه .. معجبنيش اوي في X3 ودي أذواق بشكل عام .. تاني سبب بروز الكاميرات كبير جدًا في الـX3 بعيدًا عن شكل رصة الكاميرات نفسها برده اللي مش لطيفة أوي .. هنا بروز كاميرات ريلمي 7 اقل بكتير .. ومفيش تراب بيدخل كاميرات الـPoco X3 على فكرة !

تالت وأخر سبب .. أبعاد ووزن ريلمي 7 أصغر و أخف من الـX3 .. الـ بوكو X3 موبايل كبير .. لازم وانت بتجيبه تبقى عارف انك هتجيب موبايل ضخم.

والموبايلين جاي معاهم جرابات في العلب بتاعتهم .. علشان تحافظ على الظهر من الخربشة وتحمي بروز الكاميرات الموجود في الموبايلين.

ريلمي 7 يتفوق على بوكو X3 NFC في نقطة التصميم

الشاشة :-

بوكو X3 بيجي بشاشة 6.67 بوصة IPS LCD بدقة FHD+ بتردد بيوصل لـ120 هيرتز .. مع ثقب صغير أوي في منتصف الشاشة.

ريلمي 7 شاشة 6.5 بوصة IPS LCD دقتها FHD+ بتردد بيوصل لـ90 هيرتز .. مع ثقب أكبر على الشمال.

الحافة السفلية لشاشة بوكو اكس 3 أصغر من شاشة ريلمي 7 .. وكمان ثقب سيلفي شاومي أصغر من ريلمي .. وبالتالي هنا في تفوق لإستحواذ شاشة Poco X3 بشكل واضح عن شاشة ريلمي 7.

جودة الشاشتين قريبين جدًا من بعض .. اللي لاحظته ان شاشة بوكو X3 بتخلي الألوان فاتحة شوية .. ده الطبيعي بتاعها وممكن تلعب في درجات الوان الشاشة من اعدادات الواجهة .. إنما Realme 7 الطبيعي بتاعها ألوان مُشبعة شوية.

سطوع الشاشتين قريب جدًا من بعض تحت الشمس .. مش هتحس بفرق جوهري ما بينهم.

وأخر فرق بينهم موضوع التردد فإستجابة شاشة بوكو X3 أسرع ولكن بفرق بسيط أوي عن ريلمي 7 .. الفرق مش كبير ولكن الفرق موجود.

والشاشتين بيجو في العلبة متركب عليهم سكرينة جاهزة.

تفوق بوكو X3 في الإستحواذ والثقب الأصغر والتردد الأعلى

الأداء :-

وهنا تيجي الحيرة بتاعت كل مرة .. لو بتشتري موبايل في فئة سعرية معينة .. تشتري موبايل بمعالج كوالكم ولا ميدياتيك.

السؤال ده لو سألتهولي من فترة مثلًا من سنة .. كنت هقلك بـ4000 جنية أقوى معالج عندك هوا الـG90T اللي شوفناه في Note 8 Pro وبعده في Realme 6 .. لأن وقتها مكنش في موبايل في فئة الـ4000 جنية بيقدم معالج كوالكم يضاهي قوة الـG90T أو حتى قريب منه .. الـSD730G كان أغلى.

دلوقتي الوضع اختلف .. لإنك بتختار بين الـG95 في ريلمي 7 والـSD732 في بوكو X3 .. الإتنين نفس السعر .. لأ وكمان البوكو أرخص .. فأنا شايف معظم المستخدمين ومنهم أنا هيفضل كفة الكوالكم .. لأن الـSD732 أداءه قوي ويقدر يسد مع الـG90 وليه شوية مميزات عنه أهمهم السخونية الأقل وكمان بتقدر تستخدم جوجل كاميرا.

الأداء الفعلي بتاع الموبايلين قريب جدًا من بعض .. بس الفكرة في الواجهات .. واجهة ريلمي سلسة أكتر من واجهة شاومي وبالتالي هي معوضة شوية ان ريلمي بـ90 هيرتز وشاومي بـ120 هيرتز ومخليه في الأخر الأداء مُتقارب جدًا وساعات كمان ريلمي بيفتح البرامج أسرع ولكن مش بفرق ملحوظ .. مش هيفرق في الإستخدام !

وطبعًا مننساش ان الـX3 بـ6 جيجا رام وريلمي 7 واخد نفسه أكتر بنسخة واخدة 8 جيجا رام وده مخلي واجهة ريلمي حرة أكتر في الحركة عن واجهة شاومي .. والأداء الرسومي قريب جدا من بعضه في الموبايلين.

لعبة ببجي بتشتغل على High HD على الموبايلين .. ولعبة كول اوف ديوتي بتشتغل على Very High في الموبايلين بس في الـX3 بتشتري على فريمات Very High انما في ريلمي على High بس.

وزي ما قولتلك فوق .. السخونية أقل شوية في Poco X3 NFC والتبريد اللي فيه أحسن شوية من التبريد اللي في ريلمي 7.

بوكو X3 NFC بيقدم معالج أفضل نظرًا لبعض الأسباب اللي وضحتها فوق

عوامل الأمان وعناصر اخرى :-

البصمة على زرار الباور في الموبايلين .. بس ريلمي 7 أسرع في الفتح .. وكذلك الحال الـFace Unlock برده يلمي 7 أسرع .. لسه ريلمي متفوقة في سرعة عوامل الأمان عن شاومي.

حاجات موجودة في بوكو X3 ومش موجودة في ريلمي 7 :-

  • لمبة الإشعارات
  • مستشعر الـIR Blaster
  • مايكروفون اضافي لعزل الضوضاء
  • الـNFC

ودي حاجات مهمة وبتهم ناس كتير جدًا .. مش مجرد مميزات بسيطة .. والمستشعرات كلها موجودة وشغال بكفاءة في الموبايلين .. ضوء، تقارب، جيروسكوب .. متقلقش من النقطة دي.

بالنسبة للصوتيات .. زي ما انتوا عارفين Poco X3 NFC صوته Stereo وصوته أعلى بنسبة 30% مثلًا من ريلمي 7 .. بس انتوا عارفين برده في زنة في الظهر مع الصوت الـStereo وده ولو لغيتها هتلاقي الصوت بقى متعادل تقريبًا .. وعلى فكرة يا جماعة الزنة دي مش هتأثر على حاجة في عمر الموبايل.

بالنسبة قوة شبكات الـWiFi والإتصال .. البوكو X3 ياخد 8 من 10 .. وريلمي 7 ياخد 9 من 10 .. لسه ريلمي أقوى حاجة بسيطة في الشبكات لحد وقتنا هذا.

مميزات أكتر في Poco X3 .. عوامل أمان أسرع في ريلمي 7

البطارية :-

بطارية البوكو بحجم 5160 ملي أمبير وبطارية ريلمي 4500 مللي أمبير .. لو ريلمي قعد 7 ساعات فالبوكو هيقعد 7 ونص مثلا بنفس الإستخدام تقريبا .. الفرق الفعلي مش كبير أوي ما بينهم.

الفكرة في الشواحن .. ريلمي 7 اللي نزل مصر بشاحن 65 واط بيشحن البطارية بسرعة مهولة في نص ساعة .. انما بوكو X3 جاي معاه شاحن 33 واط بيشحن في حوالي ساعة .. هو سريع برده بس ريلمي أسرع .. وغير كدا ريلمي 7 بيسخن أقل شوية وهو بيشحن عن بوكو X3.

بطارية بوكو X3 أكبر بفرق بسيط .. ريلمي 7 شاحنه أسرع بفرق ضخم

الكاميرات :-

الموبايلين جايين بـ4 كاميرات .. يهمنا الأساسية .. البوكو X3 بدقة 64 ميجا بيكسل بفتحة عدسة F/1.9 بمستشعر سوني IMX682 .. والريلمي 7 بـ48 ميجا بيكسل فتحة عدسة F/1.8.

السيلفي في بوكو X3 NFC بدقة 20 ميجا بيكسل بفتحة عدسة F/2.2 .. وفي ريلمي 7 بدقة 16 ميجا بيكسل بفتحة عدسة F/2.1.

عملنا قبل كده فيديو على قناة موبيزل على يوتيوب كان فيه مقارنة بين كاميرات موبايلات منهم ريلمي 7 وبوكو X3 .. وكتير منكم إختار وفضل الكاميرا الخلفية بتاعت Poco X3 NFC عن Realme 7.

فيديو مقارنة الكاميرات :-

الفكرة ان بوكو X3 سوفت وير الكاميرات بتاعه بيعزز الألوان أوي فا بيخلي عينك تحب تشوفها .. طبعًا جوجل كاميرا شغال على الـ بوكو ومش شغال على ريلمي 7 .. وبإختصار بوكو X3 من غير جوجل كاميرا يقدر يسد جامد قصاد ريلمي 7 .. بالتالي بإستخدام جوجل كاميرا هتاخد صورة حقيقية أقوى بفرق ضخم عن ريلمي 7.

بس اللي واضح أوي هو تفوق Poco X3 NFC في الإضاءات الضعيفة بفضل المُستشعر الأفضل الموجود فيه واللي خلاه يكسب Realme 7 بكل سهولة.

اما ندخل على السيلفي بقى فالوضع هنا معكوس .. شاومي مش بتعمل تعمل كاميرا سيلفي قوية في حدود الفئة السعرية دي .. بالتالي انا شايف ان كاميرا ريلمي 7 أفضل .. لكن بجوجل كاميرا السيلفي بيتحسن كتير في Poco X3.

بالنسبة بقى لتصوير الفيديوهات فالموبايلين بيصوروا فيديوهات على 4K مع 30 فريم في الثانية .. الإتنين فيهم مثبت إلكتروني بس في ريلمي 7 بيشتغل على 1080p بس اما في بوكو X3 الثبات الإلكتروني بيشتغل على 4K عادي .. وبوكو X3 بيدعم ميكروفون اضافي لعزل الضوضاء اما ريلمي 7 مش بيدعم.

بوكو X3 أفضل في الكاميرا الخلفية .. ريلمي 7 أفضل في السيلفي

أسعار الموبايلات :-

سعر بوكو X3 NFC :-

  • نسخة 64 جيجا مع 6 جيجا رام بسعر 4000 جنية
  • نسخة 128 جيجا مع 6 جيجا رام بسعر 4400 جنية

سعر ريلمي 7 :-

  • نسخة واحدة فقط 128 جيجا مع 8 جيجا رام بمتوسط سعر 4600 جنية في المحلات

ريلمي 7 بيدعم تركيب شريحتين إتصال من الجيل الرابع مع كارت ميموري بحجم 256 جيجا .. اما بوكو X3 بيدعم تركيب شريحتين إتصال 4G او شريحة واحدة بس مع كارت ميموري بحجم 256 جيجا برده.


الرأي النهائي :-

ريلمي 7 يتفوق على بوكو X3 في :-

  • تصميم اشيك ( أذواق )
  • كاميرا خلفية بروزها أقل
  • عوامل أمان أسرع
  • شبكات إتصال أقوى بفرق بسيط
  • كاميرا سيلفي أفضل
  • دعم تركيب شريحتين إتصال وكارت ميموري في نفس الوقت
  • نسخة 8 جيجا رام
  • شاحن أسرع بقوة 65 وات

بوكو X3 يتفوق على ريلمي 7 في :-

  • شاشة إستحواذها أكبر
  • تردد شاشة بيوصل لـ120 هيرتز
  • معالج قوي من كوالكوم داعم لجوجل كاميرا
  • سخونية أقل
  • مميزات شاومي المُعتادة :-
    الـIR Blaster
    لمبة إشعارات
    مايكروفون اضافي لعزل الضوضاء
    الـNFC
  • كاميرا خلفية أقوى خاصة في التصوير الليلي وتصوير الفيديوهات
  • سماعات Stereo
  • أعلى نسخة سعر أرخص من ريلمي بحوالي 200 جنية

فيديو المراجعة :-

قد يعجبك أيضا...

Comments

جاري التحميل...