مراجعة Realme 8 5G الجديد – يستاهل تشتريه ولا لأ ؟

ريلمي عندها مجموعة موبايلات منزلتش مصر .. وبتنزل لنا منهم النهارده موبايل Realme 8 5G واللي يعتبر أول موبايل 5G من ريلمي في مصر .. شركات المعالجات حاليًا بتنزل كل المعالجات الجديدة داعمة للـ5G .. وبالتالي شركات الموبايلات لما بتيجي تنزل موبايل يا بتختار معالج قديم 4G يا بتروح لمعالج 5G فيه كل التقنيات الجديدة.

المعالج الـ5G اللي موجود في Realme 8 5G فيه مجموعة تقنيات حديثة وكمان دقة تصنيعه أفضل من الأجيال اللي فاتت، بالنسبة لـ Realme 8 و Realme 7 بيتقدموا بمعالجات 4G بدقة تصنيع 12 نانو ميتر، اما Realme 8 5G بيتقدم بمعالج 5G بدقة تصنيع 7 نانو ميتر، ومن مميزاتها انها بتوفر أكتر في الإستهلاك بخلاف تقنيات تانيه.

التصميم :-

تصميم موبايل Realme 8 5G الجديد بيجي بالكامل من البلاستيك البولي كاربونيت .. وده منطقي بالنظر لسلسلة Realme 8 اللي بتنزل كلها بخامات من البلاستيك.

الظهر هنا لامع للاسف مش مطفي وده بيخلي الموبايل يظهر فيه البصمات بشكل رهيب .. وبروز الكاميرات متوسط والجراب اللي مع الموبايل بيغطي البروز.

الموبايل وزنه معقول 185 جرام وتخانه 8.5 ملم .. مفيش مشاكل في مسكة الموبايل في الايد .. والتصميم عادي جدًا مش مختلف او مميز مثلًا.

الشاشة :-

شاشة هنا بتيجي بحجم 6.5 بوصة من نوع IPS LCD بدقة FHD+ مع تردد بيوصل لـ90 فريم في الثانية .. هي هي شاشة Realme 7 القديم.

ريلمي قررت تستخدم شاشة IPS LCD بتردد 90 هيرتز وهي بتعمل الموبايل ده، وخلت اختيار الشاشة الـAMOLED متوفر في Realme 8 Pro و Realme 8.

الشاشة من ناحية السطوع مقبولة جدًا على انها IPS LCD .. من ناحية الالوان مقبولة برده .. ولكن لو قارنتها باي شاشة أموليد اكيد هتخسر دي مش محتاجه كلام.

الأداء :-

معالج الموبايل ميدياتك Dimensity 700 بتكنولوجيا 7 نانو .. معالج محقق اعلى من 300 الف نقطة على Antutu Benchmark.

معالج نشيط مفيهوش مشاكل مع الـ90 هيرتز .. الأداء كان كويس جدًا في تجربتي للموبايل ده .. اللي ملحوظ اوي السخونية قليلة في جسم الموبايل حتى مع الضغط عليه ودي حاجة كويسة.

المعالج ده ممكن ميكنش اقوى معالج في فئة الـ4000 جنية .. ولكن هو معالج مش هيسببلك اي أزمة في الإستخدام بالاضافة لتوفير البطارية والسخونية القليلة.

ببجي بتشتغل هنا على High HD .. التجربة كانت معقولة .. يمكن حسيت الجرافيك مش احسن حاجة ولكن الاداء سريع وهتقدر تلعب لفترات بدون ما تعاني من السخونية الجامدة في جسم الموبايل.

عوامل الأمان وعناصر اخرى :-

الموبايل فيه بصمة سريعة على زرار الباور .. في Face Unlock سريع برده مفيهوش مشكلة.

فيه NFC .. كويس جدًا .. ولكن مفيهوش ولا لمبة اشعارات و لا ميكروفون اضافي لعزل الضوضاء.

المستشعرات كلها شغالة زي الفل .. حتى مستشعر التقارب بتاع المكالمات كويس جدًا ومش بيغلط.

صوت الموبايل للأسف Mono .. والصوت متوسط والـBass ضعيف شوية او شويتين بصراحة.

شبكات الموبايل ده مفيهاش ولا غلطة .. سواء واي فاي او اتصال .. الشبكة قوية جدا جدا.

البطارية :-

بطارية الموبايل 5000 مللي امبير .. استحملت معايا حوالي 8 ساعات واكتر شاشة مفتوحة في استخدام عنيف .. وانا مشغل الـ90 هيرتز اكيد .. وقت كويس جدا.

ولكن اللي مش كويس الشاحن المرفق 18 واط بس .. بيشحن البطارية في ساعتين .. وقت كتير شوية .. احنا متعودين من ريلمي على شواحن سريعة اوي .. الشاحن ده بصراحة جاي غلطة كده.

الكاميرات :-

هنلاقي 3 كاميرات في الظهر .. الأساسية 48 ميجا بيكسل فتحة عدسة F/1.8 والتانية ماكرو والتالتة عزل ومفيش Ultra Wide للأسف .. والسيلفي 16 ميجا بيكسل فتحة عدسة F/2.1.

مستوى اداء الكاميرات هنا مقارب جدا لكاميرات ريلمي 7 .. نقدر نقول كاميرا 48 ميجا بيكسل كويسة شغالة .. وارجع واقولك برده دي مش احسن كاميرا في الفئة السعرية بتاعتها.

ولما قارنتها مع Redmi Note 10 5G اللي بيجي بنفس المعالج لاقيت تفوق واضح لكاميرات ريلمي تفاصيلها وألوانها اوضح.

السيلفي مقبول برده في ريلمي .. الصور ساعات بتلسع في الشمس شوية .. ولكن الأداء العام مقبول .. وبرده بيتفوق بفرق واضح عن Redmi Note 10 5G.

بالنسبة لتصوير الفيديوهات بالموبايل فا المعالج مش بيدعم تصوير فيديوهات 4K وبالتالي أعلى جودة هي الـ1080p .. في وضع اسمه Ultra Stady Mode بيزود الثبات في تصوير الفيديوهات .. والموبايل للأسف مفيهوش ميكروفون اضافي لعزل الضوضاء.

سعر Realme 8 5G :-

• نسخة واحدة 128 جيجا مع 6 جيجا رام بسعر رسمي 4290 جنية مصري مع خصم 200 جنية لفترة محدودة

بينفع تركب شريحتين إتصال من الجيل الخامس مع كارت ميموري بحجم 1 تيرا في نفس الوقت.

الرأي النهائي :-

الموبايل مُقارنًة بـRedmi Note 10 5G لو انت محتاج الـ5G فا هو بيقدم شاشة أحسن من ناحية الألوان والسطوع مع شبكة أفضل وكاميرات أحسن بفرق ملحوظ .. كل ده بزيادة سعرية حوالي 400 جنية عن Redmi Note 10 5G.

بصرف النظر عن الـ5G اللي لسه بدري عليه حاليًا، Realme 8 5G كموبايل فا هو مش أحسن اختيار في الفئة دي .. وناقصة مميزات كتير قوية زي الصوت الـStereo والشاشة الـAMOLED والشاحن السريع وغيرهم من المميزات اللي مش موجودة فيه .. وفي الوضع الحالي لو عاوز موبايل من ريلمي فا Realme 7 بنفس السعر وأفضل في حاجات كتير.