في سوق الموبايلات .. فئة الـ 2000 جنية فئه اقتصادية جدا .. العيوب فيها بتبقا كتير .. وعلشان احنا في موبيزل نقدر نفيدكم .. في المقالة ديه جمعنا أكتر موبايلين عليهم جدل في الفئة ديه وهنعمل مقارنة بينهم، وهما الـRealme C3 وحش الجيمز في الفئة الاقتصادية وموبايل سامسونج الاقتصادي الجديد Galaxy M11 .. علشان نقدر نعرف مين أفضل موبايل بسعر 2000 جنية !
التصميم :-
الـM11 والـC3 .. الموبايلين من البلاستيك .. بس حقيقي عاجبني اكتر تصميم الـC3 .. الموبايل فيه نقشه حلوه على الظهر وكمان ملمسه خشن شويه مش بلاستيك كده .. وده مخلي الموبايل صعب يظهر فيه خرابيش.
انما الـGalaxy M11 كلاسيكي لأقصى درجة .. مفيهوش اي ابداع .. والـM11 اقصر من الـC3 واسهل شويه في المسكه في الايد .. بس الموبايلين نفس الوزن والتخانة.
بروز الكاميرا الخلفية في الـC3 اكبر بفرق واضح عن الـM11 اللي مفيهوش بروز اصلًا .. وخلي بالك الموبايلين مش بيجي معاهم اي حاجة في العلبة غير الشاحن .. ولا في جراب ولا سماعة.
الـM11 فيه مايكروفون اضافي بتاع عزل الضوضاء .. انما الـC3 مفيهوش الميك ده .. ريلمي مبتحطش المايك ده حتى في موبايلاتها الأغلى مش عارف ليه !
الشاشة :-
وهنا بنشوف تريند الشاشة الكاملة اللي بثقب للسيلفي من سامسونج في موبايل اقتصادي .. حاجة حلوة جدا .. بس لما نبص على Quality او جودة الشاشة بقى في M11 .. الشاشة من نوع TFT LCD وبحجم 6.4 بوصة وبدقة HD+ .. اما الـRealme C3 بيجي بشاشه حجمه 6.5 بوصة ونوعها IPS LCD بدقة HD+.
الحافة العلوية في M11 كبيرة شوية .. حاسس ان الحافة ديه كانت محتاجه تقل علشان استمتع بتجربة الشاشة الكامله اللي بثقب .. بس طبعا ده موبايل اقتصادي وكدا.
لما نتكلم عن الالوان ودرجات السطوع .. هنلاقي السامسونج بيخسر في المعركه لأول مرة .. لإن الـC3 هنا درجات الوان الشاشة فيه أفضل ودرجات سطوعها أعلى بفضل الشاشة الـIPS LCD اللي الجوده بتاعها احسن شوية من الـTFT بتاعت سامسونج.
يعني من الأخر .. سامسونج بتديلك شكل شاشة حلو وراكب التريند في الفئة الاقتصادية .. بس على حساب جودة الألوان والسطوع اللي ممكن متفرقش معاك وممكن متحسش بيها .. واللي هي بالتأكيد أفضل في الـRealme C3.
حاجة أخيرة .. الـGalaxy M11 استجابة اللمس على الشاشة مفيهاش اي مشاكل لحد دلوقتي .. الـRealme C3 في بعض المستخدمين اشتكوا من تأخر استجابة الـTouch لما بيكتبوا بسرعة على الكيبورد في النص السفلي من الشاشة.
وأخيرًا، الـRealme C3 بيجي في العلبه متركب على الشاشه سكرينه، اما الـGalaxy M11 مش بيجي متركب عليه سكرينه.
الأداء :-
وهنا سامسونج مستخدمه المعالج التقليدي القديم كوالكوم سناب دراجون 450 بتكنولوجيا 14 نانو .. انما ريلمي مستخدمه معالج ميدياتيك Helio G70 .. وده بإختصار اقوى معالج في الفئة الاقتصادية دلوقتي.
بص مع الأداء العادي .. برامج مكالمات الكلام ده .. مش هتحس بفرق كبير اوي يعني .. يعني اللي اقصده لو استخدامك خفيف اي حاجة هتقضي الغرض .. حتى لو بتلعب العاب خفيفة .. بغض النظر عن وقت تحميل اللعبة اللي اكيد اسرع في الريلمي .. اللعبة نفسها من جوا هتبقى كويسة في الموبايلين.
الكلام ده لحد اما تفكر تفتح لعبة تقيله زي لعبة ببجي .. هتلاقي الـM11 بيشغلها على اعدادات جرافيك Medium .. وممكن اللعبة تسقط فريم ولا اتنين وانت بتلعب .. انما الـC3 بيشغلها على High HD .. واللعبة بتشتغل زي الفل بدون اي مشاكل.
فأكيد أكيد .. لو اهتمامك العاب في الفئة الاقتصادية .. اتجاهك هيميل اكتر ناحية الـC3.
عوامل الأمان وعناصر اخرى :-
الموبايلين فيهم بصمة في الظهر .. بس الريلمي اسرع .. والـFaceUnlock برده الـRealme C3 اسرع بس بفرق بسيط اوي عن الـM11.
الموبايلين جايين من العلبة علطول مع اندرويد 10 .. وديه حاجة عظيمة جدًا وحلو جدا اننا نشوفها في الفئة الاقتصادية .. الموبايلين فيهم Dark Mode برده لزوم الروشنه .. ومفيش لمبة اشعارات في الموبايلين ولا في بديل عنها للأسف.
مستشعرات الضوء والتقارب موجودين في الموبايلين .. بس الجيروسكوب للأسف مش موجود في الـM11 .. موجود في الـC3 بس للأسف .. وبالتالي كده هيبقى عندك مشكلة في الـNavigation او الخرائط في الـM11 بشكل واضح عن الـC3 اللي معتقدش انه هيعلق معاك.
بالنسبة لصوت الموبايل .. الاتنين صوتهم اصلًا مش عالي اوي وده طبيعي في الفئة السعرية ديه .. بس الريلمي صوته اعلى حاجة بسيطة.
صوت سماعات المكالمات عالي وكويس في الموبايلين .. وصوت سماعات الأذن مقبول في الموبايلين برده.
بالنسبة لقوة الشبكة .. خلينا نبدأ بالـWiFi .. وكعادة سوفت وير سامسونج اللي بيعمل فلتر للشبكات الضعيفة ومش بيظهرها على عكس الريلمي اللي بيظهر شبكات أكتر.
انما شبكات الإتصال .. فانا قولت في مراجعة Realme C3 انه متوسط مش قوي اوي في الشبكة .. وكذلك الـM11 برده مش قوي اوي بس مقبول .. الإتنين إدوني نفس الأداء المتوسط في قوة استقبال شبكات الإتصال.
البطارية :-
الاتنين فيهم بطاريات ضخمة 5000 مللي أمبير .. بس طبعا الـC3 هيقعد معاك وقت Screen On اكتر علشان معالج موفر اكتر وسوفت وير موفر اكتر .. يعني ممكن يستحمل معاك مثلًا ساعة ساعتين زيادة.
الفكرة بقى في زمن الشحن .. الـC3 جاي بمنفذ Micro USB 2.0 قديم وشاحن 10 واط بس بيشحن البطارية في ساعتين ونص.
انما الـM11 جاي بمنفذ USB Type C وبيشحن بشاحن سريع بقوة 15 وات .. هيشحن البطارية في ساعتين فقط.
الكاميرات :-
الموبايلين جايين بـ3 كاميرات في الضهر .. نبدأ بالـM11 .. جاي بعدسة رئيسية 13 ميجا بيكسل بفتحة عدسة F/1.8 والتانية 5 ميجا بيكسل للتصوير الواسع بفتحة عدسة F/2.2 و الاخيرة 2 ميجا بيكسل للعزل .. وديه حاجة كويسة من سامسونج اننا نشوف عدسة Ultra Wide بالسعر ده.
انما الـC3 جاي بـ3 كاميرات بردة .. الأساسية 12 ميجا بيكسل بفتحة عدسة F/1.8 والتانية 2 ميجا بيكسل للتصوير عن قُرب، ماكرو .. والأخيرة 2 ميجا بيكسل للعزل.
والسيلفي 8 ميجا بيكسل فتحة عدسة F/2.0 في الـM11 في ثقب الشاشة .. و5 ميجا بيكسل بفتحة عدسة F/2.4 في نوتش الشاشة في الـRealme C3.
اما بالنسبة للتجربة الفعلية، لما بتيجي تصور اشخاص سواء بورتريه او تصوير عادي Out Door او مش في مكان مُغلق .. هتلاحظ تفوق للـGalaxy M11 في الصور، بيجيب الوان واقعيه وتفاصيل اكتر والشكل النهائي بيكون احسن .. اما بالنسبة لتصوير منظر طبيعي هنلاحظ تفوق في الـRealme C3 بسبب وضع الـChroma Boost اللي بيخلي الألوان احسن.
وفي التصوير في مكان مغلق برده بنلاحظ نفس الكلام .. تصوير الأشخاص بيكون احسن بفرق واضح في الـM11 .. اما في الاضاءه الضعيفه الـC3 بيكون احسن بشكل واضح.
بالنسبة بقى للتصوير السيلفي، فهنلاقي ان في تفوق واضح للـC3 عن الـM11 .. الألوان احسن والتفاصيل احسن .. الـM11 الوانه بتسيح وبيروح في حته بعيده شويه مع ان رقم السيلفي بتاعه افضل، اما في التصوير في مكان مغلق الـM11 الى حدٍ ما بيجيب صوره كويسه .. بيجيب تفاصيل محترمه وبيحاول يجيب الوان كويسه وبينجح في ده الصراحة.
بالنسبة لتصوير الفيديوهات بقى فالـM11 بيصور فيديوهات بجودة 1080p .. طبعا مش هتلاقي فيه اي ثبات إلكتروني لإن دي فئة إقتصاديه .. والمميز هنا ان في اتنين مايكروفون فوق وتحت واحد منهم بيعزل وينقي الصوت .. وممكن كمان تصور فيديوهات بالعدسه الـUltra Wide بس مش بينفع تتنقل من العدسه الاساسيه للواسعه وانت بتصور.
اما الـRealme C3 بيصور برده فيديوهات على جوده 1080p .. برده مفيش ثبات إلكتروني ودي حاجه مش مطلوبه من موبايل اقتصادي .. خصوصًا الريلمي C3 لإن الموبايل ده التركيز فيه على المعالج والأداء مش على التصوير.
ممكن تشوف الصور والفيديوهات المتصورة بالموبايلات في فيديو المقارنة في أخر المقالة.
الأسعار :-
- موبايل Galaxy M11 نسخة واحده 32 جيجا مع 3 جيجا رام بسعر 2222 جنيه ومتاح على موقع جوميا من بداية شهر مايو
- موبايل Realme C3 نسخة واحده 64 جيجا مع 3 جيجا رام بسعر 2290 جنيه
والموبايلين بينفع تركب فيهم كارت ميموري مع شريحتين إتصال 4G في نفس الوقت مع بعض !
الرأي النهائي :-
ريلمي C3 يتفوق على جالاكسي M11 في :-
- تصميم اشيك
- شاشة اكبر بألوان افضل
- معالج اقوى في الألعاب التقيلة
- بصمة أسرع
- كاميرا سيلفي أفضل
- مستشعر جيروسكوب لتجربة GPS افضل
- شبكه واي فاي اقوى
- مساحة تخزين اكبر 64 جيجا
سامسونج M11 يتفوق على Realme C3 في :-
- شاشة كاملة مع ثُقب للسيلفي
- منفذ الشحن الـUSB Type C
- الشحن السريع الـ15 وات
- مفيش بروز في الكاميرا الخلفية
- عدسة Ultra Wide
- كاميرا خلفيه اداءها احسن في الاضاءات العالية
- مايكروفون اضافي لعزل الضوضاء
Comments