مراجعة موبايل Realme X2 Pro – تركيبة ممتازة لمحبي الألعاب ولكن !

احنا في موبيزل متعودين اننا مش بنراجع موبايلات مش نازله مصر بشكل رسمي .. المرة ديه الوضع مختلف حبتين .. موبايل Realme X2 Pro موبايل جامد جدا من ناحية الاداء .. وللاسف ريلمي في مصر مش هتنزله بشكل رسمي من خلالها .. بس في اكتر من محل او بيدج اونلاين ممكن تشتري منهم موبايل ريلمي X2 برو .. والموبايل بالفعل انتشر وفي اكتر من الف واحد اشتراه في مصر .. فمكنش ينفع افوت اني اعملك مراجعة على الموبايل الجامد جدا ده .. وهقلك تحديدا امتى تتعب شوية وتدور على الموبايل ده وتشتريه ؟

التصميم :-

النسخة العادية من Realme X2 Pro بتيجي بظهر زجاجي وفريم معدني وحاجة اخر فخامة زي الصورة الي فوق ديه .

انما النسخة الي معانا هنا هي النسخة الماستر ايديشن Master Edition .. حاجة تانية مميزة ومختلفة .. التصميم هنا عجيب وغريب ولا هو كربون فيبر ولا هو جلد ولا هو ازاز .. ملمسة مختلف .. تحس ملمسه انك مركب جراب .. حاجة برميم مختلفة بصراحة .. والتصميم الشيك ده ممضي من Naoto Fukasawa صاحب فكرة التصميم ده .

بس التصميم كالعادة فيه البروز الكبير شوية بتاع الكاميرات الي هيخليك صعب تمشي بالموبايل من غير جراب ولازم تركب الجراب الي جاي معاه في العلبة .

الموبايل وزنه 200 جرام مش خفيف ومش تقيل بس تخانته مقبولة 8.7 ملم .. مسكته في الايد مفيهاش مشاكل .

الشاشة :-

الشاشة هنا ممكن تكون محبطة شوية بالنسبة لناس كتير .. لانها شاشة ريلمي المعهودة الي بنوتش .. لسه بردة مفيش شاشة كاملة .. حجمها 6.5 بوصة .. بجودة سوبر اموليد بدقة FHD+ .

المميز في الشاشة هنا بقا درجة تحديثها .. 90 هرتز .. وديه بتفرق في عدد الفريمات الي الشاشة تقدر تحدثها وتعرضها ليك ف الثانية الواحدة .. تجربة جامدة جدا .. هتحس بيها وانت بتعمل سكرول سريع كدا لحاجات ورا بعض على الشاشة مش هتحس باي تقطيع بيحصل .. وكمان هتحس بيها في الالعاب لو عمال بتعمل حركات كتير في اللعبة .. هتحس فعلا اد ايه استجابة الشاشة ديه ممتازة .

بس طبعا الـ 90 هرتز بترفع شوية من استهلاك البطارية .. عندك اوبشن في السوفت وير تنزلها لـ 60 هرتز علشان تحافظ على البطارية .

الشاشة عليها حماية جوريلا الجيل الخامس .. والموبايل هتطلعه من العلبه متركب عليه سكرينة .

سطوع الشاشة عالي جدا وفعلا محترم وينافس بقوة مع الموبايلات التانية وجودة الألوان محترمة جدا في شاشة موبايل Realme X2 Pro .

الأداء :-

الموبايل ده بيقدم افضل اداء في الفئة السعرية بتاعته .. وممكن اديله جايزة افضل قيمة مقابل سعر بسبب جزء الاداء .. معالج رائد سناب دراجون 855 بلس .. احسن معالج سناب دراجون في العالم موجود في موبايل Realme X2 Pro .

هيديلك تجربة اداء سريعة جدا .. لدرجة تخليك لو اتعودت على الموبايل ده مش هتعرف تتعامل مع اي موبايل فئة متوسطة تاني .. كل حاجه سريعة بدرجة غريبة .. فتح التطبيقات والتنقل ما بينها .. مستحيل تلاقي اي تأخر في الاستجابة .. معالج طيارة حرفيا حتى فتح الالعاب سريع جدا .

بالنسبة للاداء الرسومي .. اي حاجة وكل حاجة جامدة جدا على الموبايل ده .. حتى التجربة هنا افضل من معالج كيرن 980 .

ببجي بتشتغل على HDR وفريم ريت اكستريم .. و اللعبة شغالة سموس اوي وهتلاحظ ان الجرافيكس احسن بكتير عن اي موبايل تاني .

كول اوف ديوتي شغالة على Very High وفريم ريت Max .. واللعبة شغالة بشكل محترم جدا .

واخيرا فورت نايت شغالة على ايبك Epic الي هي اعلى اعدادات جرافيك والعبة شغالة زي الفل بدون اي مشاكل .

ومن الأخر .. موبايل ريلمي اكس 2 برو .. بيقدملك افضل تجربة اداء رسومي من ناحية المعالج والشاشة الـ 90 هرتز .. صعب تلاقيها في اي منافس ليه .

عوامل الأمان و عناصر أخرى :-

موبايل Realme X2 ro فيه بصمة مدمجة بالشاشة مش طبيعية .. سريعة جدا جدا وعمرها ما بتغلط رغم سرعتها ديه .

وكمان الفيس ان لوك Face Unlock وانت بس لسه بتلمس زرار الباور تلاقي الموبايل فتح .. بصراحة عوامل الأمان في الموبايل ده ممتازة .

طبعا الموبايل بيجي بسوفت وير Color OS 6.1 المبني على اندرويد 9 .. تقدر بكل سهولة تحمل من المتجر الصيني برنامج جوجل كروم .. ومن جوجل كروم تدور على البلاي ستور APK وتحمله وتسطب كل خدمات جوجل عادي زي اليوتيوب و Gmail وبيشتغلوا بكل كفاءة على الموبايل .

الدارك مود شغال زي الفل على الموبايل ده .. وكمان الفيس بوك بيبقا دارك او اسود .

سوفت وير الموبايل موجود فيه عمل نسختين من برامج التواصل .. وللاسف كالعادة مفيش لمبة اشعارات وخاصية Screen off clock بتعرضلك ايقونة الميزد كول والمسجات بس .. مفيش اشعارات من باقي البرامج على الشاشة المطفية .

صوت الموبايل محترم جدا لانه استريو جاي من السماعة الي تحت وسماعة المكالمات كمان وبيديلك تجربة صوتية محترمة جدا جدا .

صوت سماعات المكالمات عالي وممتاز و صوت سماعات الاذن بردة حلو جدا وفي مدخل سماعات 3.5 ملم .

شبكة الموبايل .. ممتازة ومفيهاش اي مشاكل زي معظم موبايلات ريلمي الي بنجربها .

البطارية :-

بطارية ريلمي المعهودة 4000 مللي أمبير استحملت معايا مع استخدام شاق ومعدل تحديث للشاشة 90 هرتز حوالي 5 ساعات .. هتقعد اكتر لو استخدام معقول .. معنديش مشاكل مع البطارية علشان الشاحن المرفق .

الموبايل جاي معاه شاحن كام واط بقا ؟ .. 50 واط .. بيشحن البطارية بالكامل في نص ساعة .. انت متخيل .. بصراحة تجربة الشحن الفائق السرعة هنا تخليني عمري ما اقول على البطارية في Realme X2 Pro انها وحشة .

الكاميرات :-

وهنا ريلمي مطورتش كتير ف الكاميرات … الكاميرا الخلفية رباعية .. الاساسية زي بتاعت Realme XT بجودة 64 ميجا بيكسل فتحة عدسة F/1.8 مع مستشعر سامسونج GW1 .. والتانية 13 ميجا بيكسل فتحة عدسة F/2.5 للزوم 2X .. والتالتة 8 ميجا بيكسل فتحة عدسة F/2.2 للتصوير الواسع والاخيرة 2 ميجا بيكسل للعزل .

والسيلفي 16 ميجا بيكسل فتحة عدسة F/2.0 موجود في نوتش الشاشة .

الكاميرا الخلفية لموبايل Realme X2 Pro زيها زي Realme XT بالظبط في معالجة الصور وفي الجودة كمان من وجه نظري .. نفس التعديل في الالوان الي بيروح ناحية الاحمر شوية .. والي يعني بيعجب ناس كتير علشان شكل الصورة من بعيد بيبقا حلو .. بس لما بتعمل زوم ف الصور بتحس التفاصيل قليلة شوية .

الكاميرا بتعدل جامد في الوان الورد والشجر .. الصور تشبعها للالوان بيبقا ازيد من الطبيعي علشان يطلع شكلها حلو .

العدسة الوايد انجل عادية .. مفيش جديد اقوله فيها .. هي مش اجمد عدسة وايد انجل بس تفاصيلها والوانها كويسة  .

والتصوير الماكرو هنا كويس بس مينفعش تقرب اوي من الحاجة الي بتصورها لان مفيش عدسة مخصصة للماكرو .

التصوير في اضاءة داخلية لسه بردة اللعب في لون البشرة والتيشرت موجود ولما بعمل زوم بلاقي التفاصيل ممسوحة نسبيا .

والتصوير في اضاءات ضعيفة معجبنيش تعامل النايت مود وحاسس انه محتاج تحديث لان الصور بتفقد تفاصيل كتير والألوان بتبقى مش واقعية خالص !

السيلفي بقا كويس .. بس حاسه مش أفضل حاجة .. يعني الـ HDR مش أفضل حاجة والصور ساعات ممكن تلسع أو تميل للأصفر في الشمس .

بس البورترية كويس والقص مظبوط معنديش مشاكل معاه .

حتى في الاضاءة الداخلية لسه القص كويس والتفاصيل مقبولة .

بليل بقا في اضاءات صعبة لازم تستخدم النايت سكيب علشان هتلاقي صورة احلى بكتير من وضع التصوير العادي .

بالنسبة لتصوير الفيديوهات العدسة الرئيسية بتصور 4K لحد جودة 60 فريم في الثانية .. انما العدسة الزوم و الوايد انجل بتصور لحد 1080p فقط !

يعني من الأخر Realme X2 Pro مش بيقدم أفضل كاميرا في فئته السعرية .. يعني ممكن موبايل بـ 5000 جنية يبقا زيه وأفضل في الكاميرات .. ريلمي مستخدمتش كاميرات جامدة في الموبايل ده علشان تحافظ على سعره لانها مستخدمه معالج رائد وشحن فائق السرعة وصوت ستريو وشاشة 90HZ .

ممكن تشوف الصور والفيديوهات المتصورة بالموبايل في فيديو المراجعة في أخر المقالة .

سعر الموبايل :-

الموبايل ملوش سعر رسمي .. ممكن تجيبه من محل او ستور اونلاين بسعر حوالي 8500 جنية للنسخة 256 جيجا مع 8 جيجا رام وينفع تركب شريحتين اتصال ومينفعش تركب كارت ميموري .

علبة الموبايل فيها الموبايل وجراب والشاحن 50 واط و وصلة Type C … مفيش سماعات أذن كالعادة !

تقييم الموبايل النهائي :-

تشتري موبايل Realme X2 Pro لو همك الاساسي الالعاب .. لان الموبايل ده زي ما قلتلك بيديلك افضل معالج رائد حاليا بسعره مع شاشة اموليد حلوة 90 هرتز وشحن فائق السرعة وصوت عالي ستريو .. كل التركيبة ديه تديلك اداء ممتاز ممتاز في الالعاب والاستخدام الشاق .. حاجة كدا تعيش معاك سنتين تلاته قدام من غير اي تقصير .

متشتريش ريلمي X2 برو .. لو بتدور على موبايل منتشر .. لانه اصلا مش موجود بشكل رسمي في مصر فمستحيل تلاقيله اكسسوارات وتصليحه هيبقا صعب شوية .. ومتشريش بردة الـ Realme X2 Pro في حالة انك عاوز كاميرا جامدة لانه مش بيقدم افضل كاميرا بسعره وبالسعر ده لو بتدور على كاميرا محترمة أنصحك تشوف موبايل Xiaomi Mi Note 10 .

مميزات

• أفضل معالج بالعالم سناب دراجون 855 بلس يقدم أداء مذهل خصوصا في الألعاب .
• شحن 50 واط سريع جدا يشحن البطارية في نصف ساعة بالكامل .
• صوت ستريو عالي ومجسم .
• أسرع مستشعر بصمة مدمج بالشاشة .
• شاشة أموليد بمعدل تحديث عالي 90HZ .

عيوب

• لا يدعم تركيب كارت ميموري .
• شكل النوتش بالشاشة قديم نسبيا .
• عدم توافر الهاتف بشكل رسمي في الأسواق المصرية من ريلمي .
• لا يدعم لمبة اشعارات .
• اداء الكاميرات الخلفية ليس الأفضل خصوصا في التصوير الليلي .

فيديو مراجعة الموبايل :-