واخيرا جربنا الشاومي Mi Note 10 .. الي عامل قلبان بسبب الكاميرات بتاعته الي مصنفه من اعلى الكاميرات في العالم دلوقتي .. تخيل كدا انك بتاخد موبايل بكاميرات جامدة جدا بسعر معقول .. ولو حطيت الكاميرا بتاعته جمب المنافسين هل فعلا هو الي هيكسب ؟ هل في اي تنازلات في النوت 10 من شاومي ؟ ده الي هتعرفه لما تقرأ المقال ده !
التصميم :-
نبدأ بالتصميم .. اللون الأبيض الي معانا جامد جدا شبه ظهر الـP30 Pro من هواوي .. لون ابيض كدا فيه تدريجه خفيفة بتظهر مع انعكاس الضوء عليه .. شخصيا شايف اللون ده اجمد من الوان الموبايل التانيه اللي هي الإسود والأخضر .. الموبايل طبعا خامة من الزجاج محترمة جدا وفريم معدن قوي .. التقفيل نظيف والموبايل فعلا مسكته برميم كعادة مُعظم هواتف شاومي في سلسلة الـMi .
بس هو وزنه تقيل نسبيا 208 جرام وتخانته كبيرة شوية 9.7 مللي .. الي محسن المسكة في الايد الكيرفات اللي في الظهر والي في الشاشة واللي بتخلي الموبايل يبات في ايديك كدا بشكل مريح .. بس خلي بالك برده هو بيتزحلق بسهولة لإنه من الزجاج .. ويعني بردو لازم تتعود على وزنه وتخانته كدا لان زي ما قولتلك هو تخين وتقيل نسبيا.
طبعا في بروز كبير للكاميرات الخماسية الي هنتكلم عنها كمان شوية في المقالة .. ممكن تغطي البروز ده بالجراب الشفاف الي جاي مع الموبايل في العلبة.
الشاشه :-
حرفيا ديه افضل واحلى شاشة موبايل جربته من شاومي واحلى شاشة في الفئة السعرية ديه، شاشة كبيرة 6.47 بوصة بدقة FHD+ من نوع AMOLED .. الكلام ده كله عادي شوفناه كتير .. الي مش عادي هنا هي الاطراف المنحنية او الـCurved Edges للشاشة .. الشاشة مكملة كدا معاك يمين وشمال بشكل فخم وجامد جدا جدا .. بتديلك تجربة استخدام مفيش زيها في السعر ده حاليا.
بس طبعا هنا الشاشة فيها نوتش محطوط فيه السيلفي .. مفيش فكرة الشاشة الكاملة بالسلايدر الموجودة في الـMi 9T .. ممكن تشوفها عيب .. بس بالنسبالي مش عيب لان فعلا الاطراف المنحنية هتشيل من دماغك اي انطباع سلبي عن الشاشة واستغلال الحواف والكلام ده كله، انت معندكش حواف يمين وشمال اصلًا !
الشاشة سطوعها عالي بس مش قوي مقارنتًا بالمُنافسين .. بس مش هيقصر معاك في الاستخدام والسطوع تحت الشمس كويس جدا .. والالوان كويسة وحلوة جدا مفيهاش اي مشاكل.
بس خلي بالك الشاشة الايدج ديه سهل جدا لما الموبايل يقع انها تتكسر .. وطبعا تكلفة تغيرها هتبقا غالية اغلى من الشاشة اللي مفيهاش الـEdge .. فلازم تحط النقطة ديه في حساباتك.
والنوتش اللي في الشاشة ينفع تلغية من واجهة شاومي كالعادة .. وينفع برده تلعب في درجة الالوان تخليها دافية اكتر ومايلة للاحمر او باردة وماية للازرق، انا شخصيا بفضل درجة الازرق اكتر.
واخيرًا الشاشة عليها حماية كورنينج جوريلا جلاس الجيل الخامس .. والموبايل مش متركب عليه سكرينة بس انا ركبتله سكرينة عادي لاني مش هقدر امشي بالشاشة الاموليد اللي بالإنحناءات ديه من غير ما احافظ عليها لإنها زي ما وضحتلك تكلفة تغيرها غاليه !
الأداء :-
شاومي مدياك في الموبايل ده شاشة نظيفة خامة محترمة كاميرا جامدة .. وعلشان تحافظ على سعر الموبايل ويفضل في الفئة المتوسطة العُليا .. مقدرتش تستخدم معالج فلاج شيب .. واستخدمت معالجها المفضل في الفئة المتوسطة وهو سناب دراجون 730G .. بتكنولوجيا 8 نانو .. معنديش اي مشاكل في الاداء .. مفيش اي تهنيجات او تقطيعات حصلت معايا.
بالنسبة للاداء الرسومي .. فالموبايل ده بتقدر تشغل عليه ببجي على اعدادات جرافيك High HD واللعبة شغالة زي الفل وتجربة اللعب على الشاشة الكرف ديه جامدة جدا هتحسسك انك جوا اللعبة، وCall Of Duty اشتغلت على اعلى اعدادات جرافيك فيري هاي وبدون بردة اي مشاكل، واخيرا Fortnite شغالة على اعدادات جرافيك متوسطة وشغالة بكفاءة بدون اي مشاكل.
يعني من الاخر شاومي Mi Note 10 بيقدملك معالج الى حدٍ ما مقبول في الفئة السعرية بتاعته بس مش معالج فلاج شيب زي ما متعودين من شاومي .. وكون وجود موبايل منافس زي Realme X2 Pro بمعالج رائد بسعر قريب .. يخلي كفة الـ ريلمي تميل اكتر ناحية الناس الجيمرز الجامدين .. اما الجيمرز العاديين والي عاوزين تجربة الشاشة والكاميرا اللي هنا .. النوت 10 هيكفيك وزيادة.
واحب افكرك ان الاداء في شاومي مي نوت 10 تقريبا مماثل لموبايل Xiaomi Note 8 Pro من ناحية الاداء الرسومي .. وطبعا بنص السعر او اقل .. بس مش هتاخد نفس الشاشة والكاميرات اللي هنا .. وان يكن اني شايف ان الكاميرا الخلفية بتاعت النوت 8 برو تكفي الغرض وزيادة بصراحة.
عوامل الامان والشبكة :-
البصمة مدمجة بالشاشة سريعة وعملية بس لما ركبت الاسكرينة بقت ابطأ حاجة بسيطة ولكنها برده مقبولة ومش بتغلط .. بس يعني في اسرع من كدا بصراحة بسعر اقل زي الـReno 2F .. ديه مش اسرع بصمة بالسعر ده، الفيس ان لوك سريع ومفيهوش مشاكل خالص في استخدامي ليه .. ونقطة إيجابيه هنا ان مفيش سلايدر يطلع عشان يتعرف على وشك.
بص بقا يا سيدي الموبايل ده جاي بواجهة شاومي الـMIUI 11 .. اول ما تطلعه من العلبه هتلاقي فيه شوية لاج أو تهنيجات .. في تحديث هتلاقيه واصلك هتعمله هتلاقي الموبايل اتظبط جدا، الدارك او النايت مود شغال حلو جدا على الموبايل ده لان الاسود بيبقا فعلا اسود ومن كل زوايا الرؤية مش رمادي زي الموبايلات التانية بس لسه الفيس بوك بردة مش بيبقا اسود.
طبعا اوبشن عمل نسختين من برامج التواصل والكلام ده كله موجود، الكورة المساعدة الي فيها شوية اختصارات لذيذة اوبشن حلو جدا برده وبتبقا مخفية كدا جوا الايدج وهتفيدك جدا انصحك تفعلها.
الموبايل مفيهوش لمبة اشعارات بس خاصية الـAlways On Display موجوده واللي بتعرضلك ايقونات الاشعارات الي جاتلك .. وان يكن اني ملقتش فيها ايقونة المكالمات .. مظهرش عليها غير ماسنجر .. نتمنى تظبط بتحديث، وطبعا مستشعر الـIR المميز بتاع شاومي موجود والمستشعرات شغالة بكفاءة على الموبايل ده بدون اي مشاكل والموبايل كمان بيدعم الـNFC.
بالنسبة لصوت الموبايل فهو Mono او من سماعة واحدة تحت على الشمال وحقيقي انا مش عارف ليه المكان الرخم ده .. بس بالنسبة لجودة الصوت فهو عالي جدا ومجسم، بالنسبة لصوت سماعة المكالمات فهو عالي وممتاز، وصوت سماعات الاذن جامد جدا وفيه مدخل 3.5 وخرج الصوت بتاعه محترم اوي.
واخيرا بالنسبة لشبكة الموبايل فهي ممتازة جدا ومواجهتش معاها اي مشاكل.
البطارية :-
بطارية ضخمة جدًا 5260 مللي أمبير .. بس متخليش الارقام تخدعك .. البروسيسور حاسه بيسحب زيادة عن الطبيعي وهيديك اداء بطارية 4000 مللي او 4500 مللي أمبير من شاومي .. تحس ان الواجهة مش عارفه تستغل البطارية صح.
عموما البطارية طحنتها شغل استحملت معايا 5 ساعات ونص على اقصى درجات الاستخدام .. لو استخدام مستريح هتكمل معاك 8 ساعات شاشة مفتوحة في يوم كامل من الاستخدام.
الفكرة بقا هنا الشاحن .. شاحن جامد بزيادة 30 وات .. بيشحن البطارية كلها في ساعة واحدة بس عن طريق منفذ شحن USB Type C.
الكاميرات :-
وهنا اول مرة نشوف كاميرا خماسية او Penta Camera .. بص يا سيدي الرئيسية بتيجي بدقة 108 ميجا بيكسل بفتحة عدسة F/1.7 مع مستسعر سامسونج HMX .. بتصور بدقة 27 ميجا بيكسل وبتدمج 4 صور في بعض وفيها مثبت بصري حقيقي .. العدسة التانية 12 ميجا بيكسل فتحة عدسة F/2.0 زوم 2 اكس وبتصور بردة بيها البورترية .. العدسة التالتة 5 ميجا بيكسل فتحة عدسة F/2.0 للزوم اوبتيكال 10Xوبتوصل لحد 50X Digital .. والعدسة الرابعة 20 ميجا بيكسل فتحة عدسة F/2.2 للتصوير الواسع Ultra Wide .. واخيرًا الكاميرا الخلفية 2 ميجا بيكسل فتحة عدسة F/2.4 للتصوير الماكرو، ايه كل العدسات ديه .. وعلى فكرة العدسات كلها حقيقية وشغالة وليها استخدامات هنتكلم عنها.
بالنسبة للسيلفي في الموبايل فهو موجود بدقة 32 ميجا بيكسل بفتحة عدسة F/2.0 وموجود في النوتش اللي فوق في الشاشة لإن الشاشة هنا مش كاملة.
نفتح بقا ابلكيشن الكاميرا هتلاقي عندك تحت الـ5 عدسات .. العدسة الرئيسية 1 اكس والتانية 2 اكس والتالتة 5 اكس والي ممكن تعمل منها زوم اكتر لحد 50x .. وتروح الناحية التانية تلاقي عدسة 0.6 اكس للتصوير الواسع والي بعدها اللي هتلاقي عليه صورة الوردة ديه العدسة الماكرو، وطبعا عندك وضع الـ108 ميجا بيكسل والي بيدمج البيكسلات.
شاومي نوت 10 بيقدملك كاميرات قوية هتديك افضل تفاصيل في الفئة بتاعته .. خصوصًا بوضع الـ108 ميجا بيكسل اللي هيديك صور كبيرة جدًا حجمها ممكن يوصل لـ30 ميجا ومليانه تفاصيل مفيش كاميرا تانيه في الفئة دي هتديهالك .. بنلاقي موبايلات قوية في الفئة دي بتديك كاميرات كويسه لكن مننساش ان النوت 10 بيقدم كاميرا من اقوى الكاميرات الموجوده في العالم في موبايلا حاليًا !
بالنسبة للتصوير العادي بالموبايل انت هتاخد صور واقعيه جدًا .. والصور بتنقلك الحقيقه من غير اي لعب في الالوان وهتديك كمان تفاصيل كتيره جدا بنتيجة ممتازة في الاخر .. والتصوير البورتريه هنا حلو جدا التفاصيل والعزل وتحديد الاطراف ممتاز جدا .. وفي البورتريه كمان هتاخد صور نهائية حلوه جدا وسينيمائيه كده تحسها متصوره بكاميرا بروفيشنال.
لما تيجي تصور ورده او شجر او منظر طبيعي عمومًا هتتأكد بقى من الالوان الواقعيه جدا الحقيقيه اللي الكاميرا بتطلعها والتفاصيل الكتيره اللي بتاخدها من الكاميرا دي.
بالنسبة للزوم فا انت عندك زوم لحد 5 اكس اوبتيكال بدون اي تغير في الالوان او التفاصيل ومن غير اي اهتزاز في التصوير .. من اول الـ5 اكس زوم فيما فوق بتبدأ الكاميرا تتهز جامد منك لكن برده هتاخد صوره كويسه بتفاصيل واضحه .. مثلًا لو عايز توصل لرقم تليفون على يافطه بعيده هتعرف توصلها بإستخدام الـ50 اكس عادي زي الصورة دي.
العدسة الواسعة الـUltra Wide Angle في الموبايل هنا ممتازة ومحترمه جدا .. هتديك تفاصيل كتير بشكل ممتاز والصورة بتكون حلوه جدا لإنها واسعة اوي وفيها تفاصيل كتير، كمان الالوان في الـUltra Wide ممتازة على عكس معظم الموبايلات اللي مبتعرفش تسيطر على الالوان لما بتصور بالعدسة الواسعه .. والصورة فعلًا بتكون واسعه جدا.
بالنسبة للتصوير بالليل فهو ممتاز بشكل خطير برده .. انت بتاخد صورة جميله بطريقة غريبة الوان وتفاصيل وتعامل حلو مع الاضاءه بشكل بيطلعلك في الاخر صور ممتازة جدا .. والنايت مود هنا ممتاز جدا بيعملك دمج لأكتر من صورة عشان يقدملك في الاخر صورة نهائية مفيهاش اي نويز او تعامل وحش مع الاضاءه او تفاصيل طايره.
الموبايلات اللي بتنافس الـMi Note 10 هما Oppo Reno 2 و Realme X2 Pro، الموبايلين دول يعتبر بيشتغلوا بسوفت وير واحد لكن لكل واحد فيهم توجه وكل واحد فيهم بيقدم صورة مُختلفه عن التاني .. الرينو 2 والاكس 2 برو بيحاولوا يلعبوا في الوان الصورة وتفاصيلها بحيث تطلع احسن .. لكن المعالجه اللي من النوع ده للصور مش هتحبها زي ما هتحب الصور اللي بتفاصيل والوان واقعيه اللي بيقدمهالك الـMi Note 10.
وفعلًا في جميع احوال التصوير سواء في مكان مغلق او تصوير خارجي بتصور منظر طبيعي او اشخاص فالشاومي هيديك تفاصيل اكتر والوان واقعيه جدا على عكس الـX2 Pro والـReno 2 اللي هيلعبوا في الوان الصورة وتفاصيلها.
بالنسبة للسيلفي فا احنا متعودين من شاومي على كاميرا خلفية ممتازة بس السيلفي مش بتبقى الافضل ودايمًا المُنافسين بيكسبوا في نقطة السيلفي، لكن هنا في المي نوت 10 شاومي قدمت كاميرا سيلفي محترمه جدًا جدًا بتطلع صور ممتازة وتفاصيل مقبوله جدًا في السعر ده والوان واقعيه وممتازة وفي البورتريه بردو بتطلع تفاصيل كويسه والوان كويسه جدًا والعزل بتاعها ممتاز برده.
وكمان لما بتتصور سيلفي لشخصين مثلًا في اغلب الموبايلات العزل بيتم في شخص واحد والشخص التاني مبيتحددلوش اطراف والعزل النهائي للأشخاص مش بيكون حلو .. هنا في الـMi Note 10 العزل ممتاز جدًا وبيحدد الاطراف بشكل إحترافي جدًا وبيحافظ في نفس الوقت على الوان وتفاصيل الصورة.
بالنسبة لتصوير الفيديوهات فموبايل شاومي مي نوت 10 بيصور بالكاميرا الخلفية 4K بجودة 30 اطار في الثانية بالعدسة الرئيسية والعدسة الـ 2X والعدسة الـ 10X والعدسة الـ Wide // كل العدسات ديه تقدر تصور بيها 4k .
ممكن تشوف الصور و الفيديوهات المتصورة بالموبايل في فيديو المراجعة في أخر المقالة !
سعر الموبايل :-
سعر الموبايل الرسمي للنسخة 128 جيجا مع 6 جيجا رام حوالي 8000 جنيه مصري .. اما النسخة الـ256 جيجا مع 8 جيجا رام فا هي سعرها 9000 جنيه مصري .. ومينفعش تركب كارت ميموري في الموبايل لانه بيدعم فقط شريحتين إتصال.
الرأي النهائي :-
الموبايل ده بيقدملك كاميرا مش موجوده في الفئة السعرية بتاعته، وتقدر تنافس موبايلات فلاج شيب اقوى وبفرق سعر .. شاشة محترمه جدًا AMOLED بـEdge وبصمة تحت الشاشه مش الأسرع بس دقيقه ومبتغلطش ويُعتمد عليها، وسعر الموبايل بالنسبة لكل اللي بيقدمهولك ده كويس جدا.
لو انت اصلًا مش هامك الكاميرات الجباره دي يعني عايز موبايل يطلعلك صور كويسه وخلاص من غير ريزوليوشن كبير ومن غير زوم كتير والكلام ده كلو فا اكيد حاجه زي الـMi 9T هتكون مناسبة جدًا ليك فهو هيديك تجربة ارخص واوفر من المي نوت 10 او حتى ممكن توفر وتجيب الشاومي نوت 8 برو.
وبالمناسبة .. ليه المي نوت 10 منزلش بمعالج رائد؟ عشان يحافظ على السعر اكتر ويدي فرصه للمي 10 اللي المفروض ينزل قريب انه يتميز في حاجه وبالتأكيد هتكون هي الاداء.
مميزات
- أفضل تجربة كاميرات سواء خلفية أو أمامية في هذه الفئة السعرية .
- شاشة ممتازة باطراف منحنية .
- تصميم متين ولكنه تقيل نسبيا .
- بطارية كبيرة مع شحن سريع 30 وات .
- يدعم مستشعر الـ IR .
عيوب
- لا يدعم تركيب كارت ميموري .
- سماعة الموبايل الخارجية مكانها على الشمال مما قد يتسبب في كتمها اثناء اللعب على الهاتف .
- لا يقدم أفضل معالج في هذه الفئة السعرية .
- ثقل وزن الهاتف نسبيا .
Comments