مراجعة موبايل Realme XT – ملك بدون تاج في الفئة المتوسطة !

شركة ريلمي دايما بتحب تقدم أفضل قيمة مقابل سعر و دايما بتقدم خلطة يعتمد عليها وسط المنافسين علشان كده جربنا موبايل ريلمي الجديد اللي كلكم سألتوا عليه وهو الـ Realme XT اللي بيجي بشاشة سوبر أموليد مع معالج Snapdragon 712 و كاميرا خلفية رباعية الاساسية 64 ميجا بيكسل مع سيلفي مميز و بطارية 4000 مللي أمبير.

في مراجعة النهاردة هننقلكم تجربتنا مع الموبايل و ايه الفرق بينه وبين الـ ريلمي 5 برو مع مميزاته و عيوبه و أدائه بالتفصيل.


مواصفات Realme XT :-

  • أبعاد الهاتف 158.7x 75.2×8.6 ملم.
  • وزن الهاتف 183 جرام مع تصميم الظهر من الزجاج والفريم من البلاستيك.
  • تأتي شاشة الهاتف سوبر أمولد بقياس 6.4 بوصة مع دقة Full HD+ بجودة 1080*2340 بيكسل مع 403 كثافة بيكسلات و حماية من جوريلا جلاس الجيل الخامس.
  • معالج الهاتف هو Qualcomm Snapdragon 712 مع معالج رسوميات Adreno 616.
  • يمكنك اضافة كارت ذاكرة خارجي يصل الى 256 جيجا بايت فى منفذ منفصل.
  • الهاتف متوفر بنسخة واحدة 128 جيجا بايت مع ذاكرة عشوائية 8 جيجا رام
  • يأتي الهاتف بنظام تشغيل اندرويد 9.0 Pie و من المخطط تحديثه الى أندرويد 10 مع واجهة مستخدم Color OS 6.0.
  • كاميرا الهاتف الخلفية تأتي رباعية بجودة 64+8+2+2 ميجا بيكسل و فلاش احادى LED و تصوير فيديو بجودة 4K و 1080 بيكسل مع مثبت اليكتروني gyro EIS.
  • كاميرا السيلفي تأتي بجودة 16 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية.
  • بطارية الهاتف تأتي بسعة 4000 مللي أمبير تدعم تقنية الشحن السريع 20 واط.
  • يدعم الهاتف مستشعر بصمة الاصبع المدمج بشاشة الهاتف ويدعم Face Unlock.
  • متوفر بالهاتف ميكروفون اضافي لإزالة الضوضاء.
  • يدعم الهاتف تشغيبل الراديو FM.
  • متوفر بالهاتف خاصية OTG و الجيروسكوب.
  • متوفر بالهاتف دعم شبكات الجيل الثاني والثالث والرابع GSM/HSPA/LTE عن طريق شريحتين اتصال من نوع Nano.
  • الهاتف متاح في الأسواق بألوان الأبيض و الأزرق.

 

مميزات ريلمي XT :-

  • يمكنك استخدام شريحتين اتصال و كارت ذاكرة خارجي فى نفس الوقت.
  • بطارية الهاتف تقدم أداء مميز حيث 4000 مللي أمبير.
  • أرخص أسرع بصمة مدمجة بالشاشة.
  • شاشة سوبر أموليد تقدم أداء مميز و رائع.
  • كاميرا الهاتف الخلفية والسيلفي كلاهما تقدم أداء مميز.
  • منفذ Type C مع شاحن سريع لسرعة عالية فى اعادة شحن الهاتف.
  • تصميم جميل و أنيق مع خامات زجاجية أخيرا من ريلمى.
  • من أوائل الهواتف اللى هيوصلها تحديث اندرويد 10.
  • حماية على الشاشة من جوريلا الجيل الخامس مع اسكرينة من الشركة على الهاتف.

 

عيوب Realme XT :-

  • لا يوجد لمبة اشعارات بالهاتف.
  • صندوق الهاتف لا يحتوي على سماعات الرأس Headphones.
  • بروز الكاميرا الخلفية يجبرك على استخدام جراب للهاتف.
  • كان من الأفضل لو استخدمت ريلمى معالج أقوي.
  • يتم كتم سماعة الهاتف اثناء اللعب بسبب نقله الي اليسار.

التصميم :-

كل موبايلات ريلمي القديمة بلاستيك لكن المرة دي أخيرا ريلمي اكس تي ظهره من الزجاج مع اطار بلاستيكي .. التصميم شيك جدا و الجميل أنه مختلف خالص عن فئة الريلمي 5 و ال 5 برو علشان يعني تبقا premium ومميز عنهم ما انت هتدفع فلوس أكتر بقا.

شكل الكاميرا فى ظهر الهاتف و الخط الأصفر اللامع على زر التشغيل .. حاجات فعلا تحسسك بتطوير كبير ونقلة نوعية و انت ماسك الموبايل ده عن الـ 5 برو.

بس للأسف مش حاسس بمتانه الزجاج ف ايدي أوي بصراحة درجة المتانة أقل شوية من الشاومي Mi 9T و من الاوبو Reno 2F و ده احساس شخصي جايز مثلا علشان وزن الموبايل أقل 183 جرام،  عموما الموبايل خفيف في الايد وسهل الاستخدام بايد واحدة و خفة وزنه عن باقي الموبايلات الزجاج هتنفعك ف أنه لو وقع مش هيتكسر بسهولة مش أكتر و الشركة بتقول عليه حماية على الظهر جوريلا الجيل الخامس.

بروز الكاميرات زيه زي ال 5 برو يخليك صعب تمشي بالموبايل من غير جراب علشان الجراب الي معاه يغطيلك البروز بالكامل.

تحتوي الواجهة الأمامية للهاتف علي شاشة بقياس 6.4 بوصة أعلاها نجد نوتش صغير علي شكل Drop water بداخله الكاميرا الأمامية بجودة 16 ميجا بيكسل مع سماعة المكالمات و مستشعر القرب و لا يوجد بالهاتف لمبة اشعارات.

علي الجانب الأيمن للهاتف نجد زر التشغيل Power button لفتح وغلق الهاتف.

علي الجانب الأيسر للهاتف نجد أزرار رفع و خفض الصوت و منفذ لدخول شريحتين الاتصال أو شريحة واحدة و كارت ذاكرة خارجي.

أسفل الهاتف نجد ميكروفون المكالمات و السماعة الخارجية و منفذ كابل الشحن Type C و منفذ 3.5 ملم لسماعات الرأس Headphones مع الميكروفون العازل للضجيج.

فى أعلى يسار ظهر الهاتف نجد اطار معدنى يجمع ما بين الكاميرا الخلفية الرباعية بجودة 64+8+2+2 ميجا بيكسل بشكل عمودى يعطي فخامة فى الشكل و بجانبهم فلاش أحادى LED و بالأسفل على اليسار شعار الشركة realme.

الهاتف متوفر في الأسواق بألوان الأبيض و الأزرق.


الشاشة :-

هنا تاني تطوير عن الـ 5 برو، شاشة الـ Realme XT نوعها سوبر أموليد بحجم 6.4 بوصة وبدقة Full HD plus. تعرض 16 مليون لون بدقة Full HD+ بجودة 1080*2340 بيكسل مع كثافة بيكسلات 403 بيكسل لكل بوصة بأبعاد 19.5:9 مع دعم حماية من نوع Corning gorilla glass 5 مع تركيب اسكرينة للحماية على الشاشة مسبقا.

الشاشة أعلاها نوتش على شكل قطرة ماء Drop water و لا يمكنك الغائه من الاعدادات.

الشاشة ألوانها مشبعة جدا هتحس ساعات أن الأحمر رايح للبرتقالي شوية ممكن تغير درجة الألوان من اعدادات الشاشة و تجيب الدرجة اللي تريح عينيك.

عموما الشاشة سطوعها عالي و ألوانها مشبعة و إن يكن هي مش أفضل شاشة أموليد موجودة و لكنها نقلة عن الشاشات الـ IPS LCD الموجودة في كل موبايلات ريلمي السابقة زي الريلمي 5 برو.

و بما أن الشاشة أموليد هتلاقي عندك اوبشن Screen off Clock بيعرض الساعة والتاريخ ونسبة البطارية والمكالمات الفائتة و الرسائل والشاشة مقفولة .. كان نفسي يظهر عليه أيقونات الماسنجر والواتساب بس للأسف مبتظهرش وكان نفسي تظهر عشان تعوض غياب لمبة الاشعارات.


الأداء :-

هنا مفيش أي تطوير عن ريلمي 5 برو لأن Realme XT بيجي بنفس المعالج سناب دراجون 712 ثمانى النواة يعمل بقوة تردد 2*2.3 جيجا هرتز Kyro 360 gold و 6*1.7 جيجا هرتز Kyro 360 silver و هو معالج مميز في الاستخدام اليومي مش هيقصر في أي حاجة و الموبايل فعلا قدم نفس أداء الريلمي 5 برو اللي مكنش مقصر في أي حاجة.

بس حابب اوضحلك أن وجود الريلمي اكس تي في فئة سعرية أعلى خلاه يخبط بشكل مباشر في الشاومي Mi 9T اللي بيجي بمعالج سناب دراجون 730 و اللي أدائه أكيد أفضل و لو علي المدى البعيد .. لازم تبقى عارف أن بالمبلغ اللي هتدفعه ريلمي اكس تي مش هيقدملك أفضل معالج.

وكان نفسي الاكس تي ينزل بالنسخة اللي بمعالج سناب دراجون 730 بس ريلمي شايفه أنها محتاجة تقدم باكديج متكاملة بسعر منافس والاسناب دراجون 730 هيرفع سعر الموبايل أوي و بالتالي مش هتقدر توفره بالمعالج ده.

وبالنسبة للأداء الرسومي بمعالج Adreno 616 لعبة PUBG شغالة ع high HD زي الفل مفيش اي مشاكل.


لعبة Call of duty شغالة علي أعلى اعدادات جرافيك مفيش أي مشاكل.

ولعبة fortnite كمان زي ما كانت شغالة بشكل رسمي ع ريلمي 5 برو فهي شغالة هنا بردوا​ وبتشتغل على اعدادات جرافيك متوسطة.

يتوافر الهاتف بنسخة بذاكرة داخلية 128 جيجا بايت مع 8 جيجا بايت رام و يمكنك​ زيادة المساحة الداخلية للهاتف عن طريق إضافة كارت ذاكرة خارجي يصل الى 256 جيجا بايت فى منفذ منفصل عن شريحتين الاتصال.


عوامل الأمان و الصوت :-

ريلمي استغلت الشاشة الأموليد و بقي عندنا بصمة مدمجة في الشاشة و أحب اطمنك أن البصمة اللي في الشاشة هنا سريعة لدرجة تنافس الموبايلات الفلاج شيب و أسرع من الـ Mi 9T و أسرع من السامسوج A70 و دي أحد المميزات القوية اللي ف الموبايل ده.

خاصية قفل الوجه face unlock سريعة و يعتمد عليها.

صوت الريلمي اكس تي عالي ومجسم زيه زي ال 5 برو تقريبا بس الحاجة العجيبة الغريبة هو ان مكان السماعة اتنقل تاني من ع اليمين للشمال وده المكان الي بيخلي الصوت يتكتم و انت بتلعب.

صوت سماعات المكالمات عالي وممتاز زي ال 5 برو و صوت سماعات الأذن بردوا​ عالي ومجسم.


الدعم و الاتصال :-

يدعم الهاتف شبكات اتصال الجيل الثاني والثالث والرابع GSM/HSPA/LTE عن طريق شريحتين اتصال من نوع نانو, شبكة الريلمي هنا ممتازة حرفيا من أحسن الموبايلات من ناحية الشبكات اللي جربتها هو و النوكيا 7.2 الفترة الاخيرة ويمكن أحسن من الـ 5 برو كمان في الشبكة اللي هي أصلا كانت ممتازة.

يدعم الهاتف Wi-Fi 802.11 a/b/g/n/ac dual band مع دعم خاصية Wi-Fi direct و امكانية انشاء Hotspot.

يدعم الهاتف بلوتوث الاصدار الخامس A2DP,LE.

يدعم الهاتف GPS مع خواص .A-GPS GLONASS BDS ,GALILEO

متوفر بالهاتف دعم مستشعرات القرب و السرعة و البوصلة و الضوء و تعمل بكفاءة.

يدعم الهاتف تشغيل الراديو FM.

يدعم الهاتف مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.

متوفر بالهاتف خاصية OTG حيث يمكنك توصيل أى USB driver للهاتف و يمكنك نقل أى بيانات من و الى.


نظام التشغيل و واجهة المستخدم :-

الهاتف يتم اصداره بنظام اندرويد 9.0 Pie و يوجد تخطيط لتحدسثه الى نظام أندرويد 10 و واجهة مستخدم Color OS 6.0.

سوفت وير ريلمي وصله تحديث على​ معظم الموبايلات القديمة زي ريلمي 5 برو و تم اضافة ال dark mode واللي موجود بردة ف ال XT و اللي مع الشاشة الأموليد أدائه حلو أوي بيفكرني ب night mode السامسونج والمميز هنا ان الفيس بوك كمان بقا بالدارك مود.

أما بقية السوفت وير مفيش جديد عن الريلمي 5 برو غير في حاجتين تقريبا اللي هما اوبشن ال Screen of clock اللي اتكلمنا عنه في الشاشة و اوبشن تعديل شكل البصمة الموجودة في الشاشة.

و تتمتع الواجهة بالعديد من المميزات و الخصائص حيث يمكنك التحكم فى اخفاء ازرار التحكم الثلاث و استخدامهم فى نفس الوقت حيث تقوم بلمس الشاشة من أسفل لاعلى فى جهة اليمين للرجوع للخلف و فى المنتصف كا زر HOME و من جهة اليسار لفتح ال Recent apps أو استخدام ال assistive ball و هو دائرة فى أى مكان بالشاشة حيث تقوم بلمسها لمرة للرجوع للخلف و مرتين لفتح ال recent apps و ضغطة مطولة ل home.

يدعم الهاتف خاصية Clone apps حيث يمكنك أن تقوم بتحميل نسختين من أى تطبيق مثل What’s app و Facebook و Messenger .
يدعم الهاتف ميزة Private safe و اللى تقدر تحتفظ فيها بملفاتك الخاصة و اخفائها.

تدعم الواجهة خاصية تسجيل المكالمات بشكل تلقائي و لكن يجب تفعيلها من الاعدادات اولا.

يمكنك الهاتف من أخذ screenshot بثلاثة أصابع على الشاشة كما يمكنك قسم الشاشة الى نصفين Split screen و استخدام تطبيقين فى نفس الوقت عن طريق سحب الشاشة من أسفل الى أعلى بثلاثة أصابع.

أصبحت التطبيقات مجمعة فى درج التطبيقات بدلا من أن تكون مبعثرة على الشاشة.


البطارية :-

موبايل Realme XT نفس بطارية الريلمي 5 برو 4000 مللي امبير صمدت متوسط 6 ساعات و شوية شاشة مفتوحة في يوم كامل من الاستخدام و دا وقت مقبول جدا.

اللي بيخلي معادلة البطارية حاجة كويسة جدا هي الشاحن السريع المرفق ف العلبة الـ 20 واط اللي بيشحن البطارية بالكامل عن طريق مدخل USB Type C في أقل من ساعة ونص لحد 100%.


الكاميرات :-

ع الورق و بالارقام الريلمي اكس تي اتطور عن الريلمي 5 برو في الكاميرا الخلفية الرئيسية.

الريلمي XT بيجي بكاميرا خلفية رباعية الاساسية 64 ميجا بيكسل مع مستشعر سامسونج الجديد GW1 مع فتحة عدسة 1.8 و العدسة التانية 8 ميجا بيكسل مع فتحة عدسة 2.3 للتصوير الواسع wide angel و العدسة التالتة 2 ميجا بيكسل للعزل والعدسة الأخيرة 2 ميجا بيكسل للتصوير الـ macro.

مع فلاش احادى LED و تصوير فيديو بجودة 4K 2160 بيكسل مع 30 اطار فى الثانية و بجودة 1080 بيكسل مع 30 لقطة فى الثانية مع دعم مثبت اليكتروني gyro EIS فى هذه الجودة فقط و ايضا التصوير بجودة 720 بيكسل مع 30 اطار فى الثانية مع دعم التصوير بوضع بانوراما و HDR .

السيلفي هنا 16 ميجا بيكسل فتحة عدسة 2.0 مع تصوير فيديو بجودة 1080 بيكسل.

بالنسبة لأداء الكاميرات الخلفية والسيلفي .. فهو ممتاز بدون اي مناقشة .. بس مفرقش كتير اوي عن الريلمي 5 برو والي اصلا كان ممتاز .. ولو عاوز تشوف صور متصورة بالموبايل ممكن تشوفها في فيديو المراجعة في أخر المقالةز


محتويات صندوق الهاتف :-


هاتف Realme XT و تم تركيب اسكرينة للحماية عليه مسبقا من الشركة
كُتيب التعليمات والتشغيل والضمان
الشاحن بقوة VOOC
كابل الشحن Type C
دبوس معدني لفتح درج الشريحة
جراب سيلكون شفاف لحماية الهاتف

ملحوظة : صندوق الهاتف لا يحتوي على سماعات الأُذن Earphones.


سعر الهاتف :-

السعر الرسمي تم الاعلان عنه 5390 جنيه مصري للنسخة 128 جيجا مع 8 جيجا رام و هيبدا حجزها من علي سوق دوت كوم من يوم 14 نوفمبر.


تقييم الهاتف :-

الهاتف هنا بيقدملك خلطة محترمة في الفئة المتوسطة، تصميم زجاجي مش أقوى حاجة بس مقبول مع شاشة أموليد بنوتش بدون موتور علشان اللي خايف منه مع دقة ممتازة.

بصمة في الشاشة ممكن تاخد لقب أرخص أسرع بصمة مدمجة في الشاشة.

معالج أدائه كويس جدا بس زي هو المركز التاني ف الفئة السعرية بتاعة الـ 5 الاف ورا الـ Xiaomi Mi 9T وهو ده التاج الي في عنوان المقالة .. لان تاج الموبايل هو المعالج والتاج اخده الشاومي من الريلمي.

كاميرات حلوة جدا و علي قدر عالي من المنافسة سواء الخلفية أو الامامية.

ومقدرش انسى الشاحن السريع المميز بتاع ريلمي اللي بيشحن البطارية بالكامل في وقت أقل من المنافسين.

مفيش أي عيوب قاتلة ظهرت في الموبايل ده في وقت تجربتنا له و هنفضل نجربه فترة كبيرة و ننقلكم انطباعتنا بعد شهر و أكتر من الاستخدام.

و من الاخر الريلمي XT تي عبارة عن 5 برو بس بشاشة أموليد و بصمة في الشاشة وتصميم أشيك شوية ده الفرق المحسوس بينهم و اللي بالتبعية هيعمل بينهم فرق سعر حوالي 800 جنية.


فيديو مراجعة الموبايل على اليوتيوب :-

قد يعجبك أيضا...

Comments

جاري التحميل...