مقارنة بين أفضل موبايلين في فئة 3000 جنية في السوق المصري، موبايلين متكاملين الى حد كبير .. وده بعد ما اسعار الموبايلات غليت وبقيت محتاج تزود الفلوس علشان تاخد مواصفات كويسة. الموبايلات اللي هنقارن بينها هي Redmi Note 11 اللي لسه نازل مع Galaxy A22 المُتميز من سامسونج.
التصميم :-
خامات الموبايلات الخارجية بالكامل من البلاستيك كالمعتاد في الفئة السعرية دي .. ريدمي نوت 11 الظهر بتاعه مطفي اما جالاكسي A22 الظهر بتاعه بيلمع وبالتالي بيظهر فيه الخدوش والبصمات بسهولة.
مسكة الموبايلين في الإيد قريبة جدًا من بعض، يمكن جالاكسي A22 أثقل حاجه بسيطة جدًا، وفي جراب موجود في علبة نوت 11 لكن مش موجود مع جالاكسي A22.
بالنسبة لشكل التصميم فا النقطة دي أذواق، لكن الشكل الأحدث شوية هو شكل وتصميم ريدمي نوت 11 .. وفي بروز في الكاميرا الخلفية في الموبايلين، يمكن يكون أزيد حاجه بسيط في نوت 11.
الشاشة :-
شاشة Redmi Note 11 من نوع AMOLED بحجم 6.4 بوصة بدقة FHD+ بمعدل تحديث 90 هيرتز .. شاشة Galaxy A22 نوعها Super AMOLED بحجم 6.4 بوصة برده لكن بدقة HD+ وبتدعم معدل تحديث 90 هيرتز.
الشكل الأحدث للكاميرا السيلفي موجود في الـNote 11 لإنه في ثُقب، لكن A22 السيلفي موجود في نوتش في الشاشة، والحافة السُفلية للـA22 أكبر حاجه بسيطة عن الـNote 11.
دول أفضل شاشات في الفئة السعرية دي بلا منافس، شاشات مشبعة بالألوان والسطوع بتاعهم عالي، مفيش فرق بينهم في جودة الألوان والسطوع، الاتنين ممتازين، يمكن سطوع نوت 11 اعلى من A22 تحت الشمس.
ألوان شاشة Galaxy A22 مائلة لإنها تكون Warm شوية لكن الـNote 11 ألوانه Cold أكثر، وطبعًا كثافة بيكسلات شاشة نوت 11 أفضل بسبب انه FHD+ مش HD+ بس.
موبايل ريدمي نوت 11 عليه طبقة حماية Corning Gorilla Glass الجيل الثالث، وبيجي في العلبة متركب عليه سكرينه .. اما جالاكسي A22 معليهوش حماية رسمية ومش بيجي متركب عليه سكرينة.
الأداء :-
ريدمي نوت 11 بيجي بمعالج كوالكوم سناب دراجون 680 بتكنولوجيا 6 نانو ميتر .. اما جالاكسي A22 بيجي بمعالج ميدياتك Helio G80 بتكنولوجيا 12 نانو ميتر.
نوت 11 بيتفوق في نوع الذاكرة الداخلية اللي أسرع من A22 .. وبيتفوق في سرعة أكثر في فتح البرامج والتنقل بينهم والإستخدام اليومي العادي.
اما Galaxy A22 فا هو بيقدر يحتفظ بالبرامج المفتوحة في الخلفية وقت أطول من ريدمي نوت 11 .. وبيتفوق في الأداء الرسومي، ببجي بتشتغل على High HD اما في نوت 11 بتشتغل على Medium بس.
المعالج الرسومي الموجود في Galaxy A22 أقوى شوية من الموجود في نوت 11 .. وبالنسبة للسخونية فا معالج نوت 11 بتكنولوجيا 6 نانو إستهلاكه أقل وبالتالي سخونيته أقل، ولكن بفرق بسيط.
عوامل الأمان وعناصر اخرى :-
مستشعر بصمة الإصبع موجود على زِر الباور في الموبايلين، بصمة سريعة وممتازة في الموبايلين، يمكن هتحتاج تدوس بشكل أجمد شوية في الـGalaxy A22، الـFace Unlock ممتاز في Note 11 لكن بطيء في A22.
الموبايلين فيهم Always On Display لعرض الإشعارات، بس Note 11 فيه أشكال أكثر تقدر تستخدمها، والموبايلين فيهم ميكروفون اضافي لعزل الضوضاء.
موبايل ريدمي نوت 11 فيه IR Blaster .. وموبايل Galaxy A22 فيه NFC وفيه كمان إمكانية انك تعمل نسختين من برامج التواصل الإجتماعي.
الفرق الكبير بين الموبايلين في الصوت، صوت Redmi Note 11 بيكون Stereo وصوت عالي جدًا ومحترم جدًا، اما في Galaxy A22 فا الصوت Mono وهو ضعيف مقارنًة بالـ نوت 11.
مستشعر التقارب مش موجود حقيقي في الموبايلين، بس نقدر نقول ان اداءه أحسن شوية في الـA22 عن Note 11 .. ومستشعر الإضاءه مش موجود في A22.
بالنسبة للشبكات فا الـWiFi هيتفوق فيه ريدمي نوت 11 بإنه بيقدر يلقط شبكات أكثر والمدى أكبر، اما شبكات الإتصال فا الاتنين ممتازين جدًا ومفيش أي مشاكل.
البطارية :-
بطارية الموبايلين 5000 مللي أمبير. حرفيا انت قدام موبايلين ممتازين في البطارية، متقلقش منهم خالص .. بالرغم ان معالج شاومي موفر أكثر إلا ان سوفت وير سامسونج أذكى في إستهلاك البطارية والنتيجة ان الإتنين يقعدوا 8 ساعات شاشة مفتوحة لو استخدامك متوسط !
بس الفرق بيبان مع الشواحن .. جالاكسي A22 معاه شاحن 15 واط بطيء وبيشحن في ساعتين .. انما نوت 11 معاه شاحن سريع 33 واط بيشحنه في ساعة .. ودي نقطة تفوق واضحه وصريحة لـ ريدمي نوت 11.
الكاميرات :-
العدسة الأساسية في A22 بدقة 48 ميجا بيكسل وفيها مثبت بصري حقيقي، اما في Note 11 فا هي 50 ميجا بيكسل ومفيهاش مثبت بصري، والسيلفي 13 ميجا بيكسل في الموبايلين.
تفوق واضح لصالح Galaxy A22 في التصوير، موبايل بيطلع صور محترمة جدًا بـ3 الاف جنية فقط، صورت بالموبايلين نفس الصور ودائمًا بميل لصور الـA22 .. معالجة الصور والألوان في الإضاءات العالية لصالح A22 .. ضبط الألوان ولون السماء والـHDR لصالح A22 .. البورتريه بكل تأكيد لصالح A22.
حتى العدسة الـUltra Wide لصالح الـA22، وفي الإضاءه الداخلية هتلاقي A22 متفوق في الألوان وفي التفاصيل، وكمان الـNight Mode أحسن في Galaxy A22 عن ريدمي نوت 11.
بالنسبة للسيلفي فا نفس السيناريو، الـA22 أفضل في البورتريه وفي التصوير العادي .. يمكن الـHDR مش بيظبط أوي، الألوان أفضل والتفاصيل أفضل، لكن في إضاءه داخلية الاتنين بيقدموا أداء متواضع بتفوق بسيط اوي لصالح A22.
الموبايلين بيدعموا تصوير فيديوهات بجودة 1080p .. للأسف مبقاش في 4K في الفئة السعرية دي .. جالاكسي A22 فيه مثبت بصري حقيقي ودي نقطة قوة كبيرة جدًا، اما نوت 11 بيعتمد على المثبت الإلكتروني .. والموبايلين فيهم ميكروفون اضافي لعزل الضوضاء.
أسعار الموبايلات :-
سعر Galaxy A22 :-
- نسخة 64 جيجا مع 4 جيجا رام بسعر 3000 جنية
- نسخة 128 جيجا مع 4 جيجا رام بسعر 3550 جنية
- نسخة 128 جيجا مع 6 جيجا رام بسعر 4000 جنية
سعر Redmi Note 11 :-
- نسخة 64 جيجا مع 4 جيجا رام بسعر 3400 جنية
- نسخة 128 جيجا مع 4 جيجا رام بسعر 3700 جنية
- نسخة 128 جيجا مع 6 جيجا رام بسعر 4000 جنية
وتقدر تركب كارت ميموري مع شريحتين إتصال من الجيل الرابع في نفس الوقت.
الرأي النهائي :-
نقاط تفوق Redmi Note 11 :-
- تصميم جديد
- شاشة ممتازة بسطوع ممتاز
- معالج قوي في الأداء اليومي
- صوت Stereo محترم
- مستشعر IR Blaster
- شاحن سريع 33 وات
نقاط تفوق Galaxy A22 :-
- كاميرات ممتازة جدًا وفيها مثبت بصري
- أداء كويس في الألعاب
- شاشة ممتازة لكن دقة أقل من نوت 11
- دعم الـNFC
- إمكانية عمل نسختين من برامج التواصل الإجتماعي
- سعر أرخص
سواء اشتريت نوت 11 او جالاكسي A22 الاتنين اختيارات ممتازة، أنصحك بالنسخ الـ64 جيجا او الـ128 جيجا مع 4 رام، بلاش النسخة الـ128 جيجا مع 6 جيجا رام علشان سعرها غالي.
Comments