بعد ما عملنا مقارنة بين الـRedmi Note 8 العادي والـRealme 6i .. لاقينا ان ناس كتير فضلت الـNote 8 عن الـRealme 6i .. وعشان كده احنا اختارنا الـNote 8 والـHonor 9X Lite وهنعمل مقارنة بينهم النهارده .. والموبايلين فعلًا شبه بعض في حاجات كتيره.
التصميم :-
حقيقي تحت الـ3000 جنيه مش هتلاقي حاليًا تصميم افضل ولا خامات اغلى وافخم من خامات الموبايلين دول .. الموبايلين بيجو بضهر من الزجاج الفخم الشيك مع فريم الى حدٍ ما اقوى في الـ9X Lite عن الـNote 8 .. وعمومًا هتحس انك مبسوط جدًا وانت ماسك الموبايلين دول.
الـ9X Lite اخف في الوزن وأرفع في التخانة بس أكبر في الحجم حاجه بسيطة من الـNote 8 .. وعلشان متتوهش مني .. الموبايلين هتبقى مبسوط وانت بتستخدمهم بإيد واحدة عادي بدون اي مشاكل.
بس خلي بالك .. الموبايلين بيتزحلقوا بسرعة اوي من الإيد كعادة الخامات الزجاجيه .. مش عايز اقولك وقعوا كام مرة وهما بيتصوروا .. عمومًا اوعى تشيلهم من الجراب.
واه لازم الجراب طبعًا عشان يغطي البروز بتاع الكاميرات .. البروز اكبر شوية في الـNote 8 من الـ9X Lite .. بس تيجي تركب الجراب الشفاف اللي جي مع كل واحد في العلبة .. هتلاقي البروز اختفى في الـNote 8 ولسه ظاهر في الـ9X Lite.
الشاشة :-
الموبايلين دول مُميزين جدًا في الشاشة .. الـ9X Lite بيجي بشاشة كبيره بحجم 6.5 بوصة من نوع IPS LCD بدقة FHD+ .. بس شكل النوتش القديم للأسف هو عيب الشاشة دي.
اما الريدمي نوت 8 بيجي بشاشة 6.3 بوصة من نوع IPS LCD بدقة FHD+ .. مع شكل النوتش الـWater Drop المقبول شوية .. وطبيعي هبقى راضي جدًا عن شاشة بدقة محترمة FHD+ في موبايل بسعر اقل من 3000 جنية.
الشاشتين بيقدموا نفس السطوع تقريبًا تحت الشمس .. والشاومي عليه حماية Corning Gorilla Glass الجيل الخامس من غير سكرينة .. اما الهونر معليهوش طبقة حماية رسمية بس بيجي في العلبة عليه سكرينه.
ملاحظات عن الشاشة :-
- الحواف الأقل وإستغلال الواجهة الأفضل في الـ9X Lite مُمتاز عن الـNote 8
- الوان شاشة الـ9X Lite افضل وتشبعها أعلى من الـNote 8
- شاشة الـNote 8 ظهر فيها مشاكل تطبيق من نسبة قليلة من المستخدمين
وبالتالي انا هدي نقطة أفضلية لشاشة الـHonor 9X Lite هنا .. برغم شكل النوتش القديم .. لإن الشاشة ديه مضمونة لإنها نفس شاشة الـHonor 8X اللي بقاله فترة شغال مع المستخدمين ومحدش اشتكى من الشاشة ديه غير انها مصفرة شوية لو هتدقق اوي وتحطها جنب موبايل تاني منافس.
وبينفع تلغي شكل النوتش في الموبايلين بسهولة من الإعدادات وتضيف شريطة سودا فوق.
الأداء :-
الـ9X Lite بيجي بمعالج Kirin 710 بمعمارية 12 نانو، نفس المعالج الموجود في Y9 2019 .. اما الـNote 8 بيجي بمعالج سناب دراجون 665 بمعمارية 11 نانو.
وحقيقي انا استغربت جدًا لما شوفت كومنتات في مراجعة الـ9X Lite بتقول ان اداء الـKirin 710 اضعف من السناب دراجون 665 .. ازاي بس يا جماعة !
الإتنين تقريبًا نفس الأداء الفعلي .. ده في الـSpeed Test حسيت ان الـ9X Lite كان بيفتح البرامج اسرع شوية .. بس عمومًا سيبك من الـSpeed Test عشان مش هو المقياس الوحيد.
اما بالنسبة للأداء الرسومي فا ببجي بتشتغل على اعدادات جرافيك Medium في النوت 8 .. اما في الـ9 اكس لايت بتشتغل على اعدادات جرافيك High.
في كول اوف ديوتي بقى الوضع معكوس .. هتلاقي النوت 8 بيشغل اللعبة على اعدادات جرافيك Very High .. انما في الـ9 اكس لايت هتلاقيها شغاله على اعدادات جرافيك Low.
وبالتالي انا مش هدي هنا نقطة افضلية لمعالج على التاني .. شايف تقريبًا النتيجة تعادل بين الموبايلين في نقطة المعالج.
عوامل الأمان وعناصر اخرى :-
البصمة في الظهر سريعة في الموبايلين .. الـNote 8 بس الواجهة بتعمل Animation وهو بيفتح بتحسسك انه ابطأ بس لا هما نفس السرعة .. والـFace Unlock برده نفس القصة .. Animation من شاومي ملوش لازمة يحسسك انه ابطأ بس بردة هو نفس السرعة.
وبالكلام عن الواجهات بقى .. الموبايلين عليهم Android 9 .. مفيش حد فيهم جاله Android 10 لحد دلوقتي .. بس الـNote 8 فيه Dark Mode انما الـ9X Lite مفيهوش Dark Mode لحد دلوقتي.
الموبايلين فيهم لمبة اشعارات .. وديه حاجة مهمة وضرورية والحمد لله موجودة في الإتنين .. بس في الـ9X Lite بتنور باكتر من لون.
النوت 8 بيتفوق كعادة موبايلات شاومي في وجود مستشعر الـIR Blaster اللي مش بنلاقيه في موبايلات تانيه .. وكل المستشعرات شغالة بكفاءه في الموبايلين مش هتشتكي من واحد فيهم.
بالنسبة لقوة الصوت في فرق كبير ورهيب لصالح الـNote 8 .. صوت اعلى ومجسم اكتر .. وصوت سماعات المكالمات في الاتنين زي بعض ومتوسط اصلًا مش اعلى صوت سماعات مكالمات خالص .. وصوت سماعات الأذن اعلى في الشاومي ومجسم اكتر عن الاونر.
وأخيرا بالنسبة لقوة الشبكة .. خلينا الاول في شبكات الـWiFi .. الـ9X Lite بيستقبل شبكات واي فاي اكتر اما النوت 8 مش أوي .. وبالنسبة لشبكات الإتصال فالـHonor 9X Lite شبكته مستقره جدًا ومش بتسقط خالص وممتازة في المكالمات في الأماكن اللي شبكتها ضعيفه .. بس الـMobile Data هتحس انها ضعيفه شوية في الأماكن اللي شبكتها ضعيفه.
انما النوت 8 جالنا شكاوي كتير من شبكته انها بتسقط كتير ومش مستقرة على الاطلاق .. فواضح هنا تفوق الـ9 اكس لايت في نقطة الشبكات.
البطارية :-
بطارية النوت 8 بتيجي بحجم 4000 مللي امبير .. وبطارية الـ9 اكس لايت بحجم 3750 مللي أمبير .. مش هيفرقوا عن بعض كتير في الإستخدام .. هيدولك حوالي من 6 لـ7 ساعات شاشة مفتوحة.
وكدا كدا الموبايلين دول مش بيقدموا اقوى بطارية دلوقتي .. اللي بيكسب فيها الـRealme 6i بالبطارية الـ5000 مللي امبير بتاعته.
النوت 8 فيه منفذ USB Type C .. والـ9 اكس لايت بمنفذ Micro USB 2.0 القديم .. والموبايلين بيجي معاهم شاحن 10 واط في العلبة .. والموبايلين بيشحنوا في نفس الوقت تقريبا ساعتين و ربع.
الكاميرات :-
النوت 8 فيه 4 كاميرات في الظهر .. انما الـ9 اكس لايت فيه كاميرتين بس .. الأساسية في الموبايلين 48 ميجا بيكسل .. والشاومي بيتفوق في وجود عدسة Ultra Wide وMacro ودول مش موجودين في الهونر .. انما السيلفي 13 ميجا بيكسل في النوت 8 وبدقة 8 ميجا بيكسل في الهونر.
بالنسبة للتصوير في الشمس .. الـHonor 9X Lite بيطلع صوره بشكل عام احسن .. واقعية والألوان مظبوطه اكتر .. اما التفاصيل فهي قريبه من بعض جدًا في الموبايلين .. والتصوير في الظله بقى لأ الشاومي أفضل وحدة الصوره احسن والتفاصيل أكتر والألوان احسن.
وبالنسبة للتصوير بالـPortrait فا سواء في OutDoor او InDoor لأ النوت 8 متفوق بشكل واضح في البورتريه، التفاصيل والألوان احسن.
أداء الكاميرات قريب جدًا من بعض .. بالنسبة للـNight Mode بقى اللي هيوضح الفرق بينهم .. الـ9X Lite بيخلي الصور Sharp جدًا بزيادة عن الطبيعي .. بس بصراحه تعامل الـNight Mode بتاع الهونر في الصور اللي فيها حاجات كتير بيخليه يقدر ينور حاجات أكتر ويطلع صوره واضحه.
وبرده لما بصور في إضاءه مُنعدمه مع مصدر ضوء قدام العدسات .. الـ9X Lite بيقدر يسيطر على الضوء بطريقة افضل.
بالنسبة لتصوير الفيديوهات .. فموبايل Xiaomi Note 8 يتفوق في دعمه لتصوير جودة 4K .. انما الـ 9X لايت اعلى جودة فيه 1080p.
بالنسبة للسيلفي بصراحة مش حلو في الموبايلين دول .. لو عاوز سيلفي كويس روح للـRealme 6i .. بس اللي لاحظته في معظم الصور السيلفي اللي صورتها بالموبايلين دول .. ان تفاصيل صور الـNote 8 اكتر بس الألوان الى حدٍ ما مظبوطة اكتر في الـ9X Lite .. بس يعني مفيش حد فيهم اقدر اقول عليه سيلفي ممتاز.
وعمومًا في Night Mode في السيلفي في الهونر .. الشاومي مفيهوش .. بس هو مش بيعمل حاجة اوي في الهونر هو بيحاول يشيل الـNoise من الصور وخلاص.
وعموما مقدرش انسى ان الشاومي بيدعم جوجل كاميرا واللي بيخلي تجربة التصوير احسن كتير .. انما الاونر مش بيدعم جوجل كاميرا.
ممكن تشوف الصور و الفيديوهات المتصورة بالموبايلات في فيديو المقارنة في أخر المقالة.
سعر الموبايلات :-
سعر نُسخ النوت 8 :-
- مساحة تخزين 32 جيجا مع 3 جيجا رام بسعر 2400 جنيه مصري
- مساحة تخزين 64 جيجا مع 4 جيجا رام بسعر 2800 جنيه مصري
- مساحة تخزين 128 جيجا مع 4 جيجا رام بسعر 3100 جنيه مصري
اما الـ9X Lite بيجي بنسخة واحده بس بمساحة تخزين 128 جيجا مع 4 جيجا رام بسعر 2888 جنيه مصري .. والموبايلين بينفع تركب فيهم كارت ميموري وشريحتين اتصال مع بعض.
الرأي النهائي :-
الموبايلين متقاربين من بعض زي ما انت شوفت طول المقارنة ..
نقاط تفوق Note 8 على 9X Lite :-
- صوت أعلى
- دعم لتشغيل جوجل كاميرا
- تصوير فيديوهات بجودة افضل
- عدسة Wide Angle
- منفذ USB Type C
- مستشعر IR Blaster
بس لازم تكون متقبل المشاكل اللي ممكن تظهر معاك في الشاشة والشبكة وتكون فاهم ان الـNote 9 ممكن ينزل خلال شهر.
نقاط تفوق 9X Lite على Note 8 :-
- موبايل إعتمادي يعيش أكتر
- مشاكل اقل .. مفيش مشاكل في الشاشة ولا الشبكة
- جودة الوان شاشة أفضل
- شبكة أقوى
بس الاداء العام بتاعه ممكن يقل مع الوقت وكمان الموبايل اصلًا قديم ونزل قبل كدا باسم قديم واتجدد.
اما بقى لو انت يهمك السيلفي الجامد مع معالج رسومي أفضل لأداء الألعاب وبطارية قوية ضخمه وسماعة مكالمات عالية .. فا الأفضل تخليك في الـRealme 6i.
Comments