الفترة اللي فاتت واحنا بنراجع اي موبايل لشركة انفينكس مش بنكون متحمسين اوي .. علشان اهم حاجة في الموبايل اللي هي المعالج بيكون ضعيف .. ومع ذلك موبايلات انفينكس كانت بتنجح جدًا في الأسواق المصرية .. لان انفينكس ليها مكانه خاصة عند المصريين في الفئات السعرية الإقتصادية شوية.
المره دي بقى الوضع مختلف مع الـInfinix Note 7 .. لان انفينكس قررت تستخدم معالج محترم يقدر ينافس بقوة في الفئة السعرية اللي الموبايل ده بينزل فيها .. فا احنا النهارده هنعمل مراجعة كاملة للـNote 7 وهقولك في اخر الفيديو رأيي في الموبايل.
التصميم :-
كالعادة الموبايل خامات الظهر والفريم من البلاستيك .. متستناش زجاج من انفينكس في الفئة دي يعني .. بس عمومًا الخامات البلاستيك اللي هنا مش وحشة خالص.
بالنسبة لشكل التصميم بقى .. فالتصميم هنا جريء جدًا جدًا ومُختلف .. من اول ما نزله تسريبات لشكله .. واعتقد انه عجب ناس كتير اوي.
هو مُميز مختلف .. ورصة الكاميرات الكتير اللي في الدايرة مميزه شكل الموبايل جدا .. والوان الموبايل حلوة بس رأيي تخليك في الاخضر او الابيض.
نيجي لأهم نقطة بقى في موضوع التصميم .. الحجم والمسكه في الإيد .. الموبايل ده ضخم .. اعتبره تابلت مش موبايل .. وعلشان احس بحجم الكبير ده حطيته جنب الـNote 9S اللي الناس قالت عليه كبير .. ولاقيت النوت 7 اطول .. وحطيته جنب الـHonor 9X Lite .. وحسيت فعلًا قد ايه ان النوت 7 ضخم.
وعمومًا في ناس كتير برده بيحبوا يشيلوا موبايلات حجمها كبيرة وشاشتها كبيرة في الفئة السعرية القليلة شوية دي.
واخيرًا بروز الكاميرات متوسط .. والجراب اللي مع الموبايل في العلبة بيغطي البروز بالكامل .. والجراب حسيته مش محكم اوي على الموبايل كان محتاج يبقى اصغر من كدا حاجة بسيطة.
الشاشة :-
شاشة عملاقة بحجم 6.95 بوصة يعني قول 7 بوصة .. من نوع IPS LCD بدقة HD+ بس للأسف .. وطبعا مش محتاج اقولك الحجم الكبير للشاشة مع دقة منخفضة هيترجم لكثافة بيكسلات قليلة .. حوالي 258 بيكسل في البوصة الواحدة.
وأكيد الدقة المنخفضة من أهم عيوب الموبايل .. لو ركزت اوي هتحس ان الشاشة مبكسلة .. انما لو انت مش من اللي بيدقق اوي وعاوز شاشة كبيرة .. هتتبسط بالشاشة هنا.
الشاشة فيها ثقب للسيلفي على الشمال .. ممكن تلغي شكل الثقب ده من الإعدادات وتضيف شريطة سودا لو حابب .. بالنسبة لألوان الشاشة فهي متواضعة جدا .. مش احسن تجربة من ناحية الألوان خالص بس هي تقضي الغرض.
والسطوع بتاع الشاشة بقى اتحسن كتير عن موبايلات انفينكس اللي جربتها قبل كدا زي الـInfinix S5 والـS5 Pro .. لا هنا السطوع اعلى شوية ويمكن يكون نفس سطوع الـNote 9S اللي قولت لكم عليه انه سطوع متوسط.
واخيرًا مفيش إعلان رسمي عن طبقة الحماية بس بيجي متركب عليه سكرينة في علبة الموبايل.
الأداء :-
وأخيرا انفينكس استخدمت معالج محترم وهو الميدياتك Helio G70 .. نفس معالج الـRealme C3 واللي على فكرة يعتبر نفس اداء الميدياتيك Helio G80 الموجود في الـRealme 6i !
وكمان في الـInfinix Note 7 معاك 6 جيجا رام .. وواجهة انفينكس الجديده خفيفة نسبيًا .. فالموبايل ادائه كويس .. كل فين وفين اما تحس بتقطيعات خفيفة في الـAnimations بتاعت الواجهة.
وحقيقي مقارنتًا بكل موبايلات انفينكس اللي جربتها الفترة الأخيرة .. الـNote 7 اداءه بالنسبالهم يُعتبر مُمتاز.
بالنسبة للأداء الرسومي بقى .. ببجي بتشتغل كويس جدًا على اعدادات جرافيك High HD .. والجرافيك تمام ومفيش تقطيع وكل حاجة زي الفل .. وكول اوف ديوتي بتشتغل على Low جرافيك وبتشتغل كويس جدًا.
والاي لاحظته ان الموبايل هنا سخونيته قليلة اوي بصراحة وتوزيع الحرارة فيه مُمتاز.
عوامل الأمان وعناصر اخرى :-
انفينكس قالت تواكب التريند وضافت البصمة في زرار الباور .. البصمة سريعة ومن لمسة بتفتح .. وطبعا انت مش هتحتاج تدوس على زرار الباور في حاجة بس اللي لاحظته انه تقيل شوية والدوسه عليه تقيله ومسموعه .. والـFace Unlock سريع ومفيهوش مشاكل.
الموبايل جاي بـAndroid 10 مع واجهة انفينكس اللي اسمها XOS Dolphin 6.1 .. وهتلاقي فيها Dark Theme بيقلب القوائم بتاعت الموبايل لإسود .. ديه حاجة بقت اساسية خلاص في كل الواجهات.
عيوب الواجهة :-
- الإعلانات اللي في الواجهة حرفيًا في كل حته .. ومُزعجة جدًا فعلًا
- متقدرش تعمل نسختين من برامج التواصل الإجتماعي
الموبايل هنا فيه لمبة صغيرة اوي بتنور باللون الأزرق مع الشحن فقط .. منورتش معايا في اي حاجه تاني .. وكل المستشعرات هنا شغالة في الموبايل .. ضوء، تقارب، جيروسكوب وكمان الموبايل بيدعم تركيب وصلة الـOTG.
صوت الموبايل هنا ميزة قوية لإنه بيجي ستيريو .. يعني السماعة اللي تحت بتشتغل مع السماعة بتاعت المكالمات مع نظام صوتي DTS .. بتقدر تغير من جودة الصوت اللي خارج وكمان في Equalizer علشان تتحكم براحتك.
وانا رأيي في الصوت اللي خارج من الموبايل ده إنه عالي .. بس مش نقي اوي .. يعني هتحس انه مزعج احيانًا وهتحتاج توطيه شوية .. بس يظل الصوت العالي Option معاك حتى لو هتوطيه افضل من ما يكون الموبايل صوته واطي.
صوت سماعات المكالمات عالي جدا .. وصوت سماعات الأذن بردة محترم جدًا ومجسم جدًا.
سيبك من كل ده .. شبكات الـWiFi اللي هنا ممتازة والمدى محترم جدا .. وكمان شبكات الإتصال قوية .. والموبايل بيلقط شبكة Mobile Data او مكالمات في اماكن شبكتها ضعيفة .. اول مرة اشكر في شبكة موبايل من انفينكس.
البطارية :-
بطارية ضخمة بتيجي بحجم 5000 مللي امبير .. هتستحمل معاك حوالي من 9 لـ10 ساعات شاشة مفتوحة .. وهتكمل معاك اكتر من يوم مستريح اوي .. بطارية قوية بصراحة.
الموبايل للأسف جاي بمنفذ شحن Micro USB 2.0 قديم بس انفينكس حاطه في علبة الموبايل شاحن سريع 18 واط .. لما جربته شحن البطارية في ساعتين تقريبا .. يعني بردة معنديش مشاكل في بطارية الموبايل ده.
الكاميرات :-
الموبايل بيجي بـ4 كاميرا في الظهر مع فلاش رُباعي نوره قوي جدًا .. الكاميرا الأساسيه 48 ميجا بيكسل بفتحة عدسة F/1.8 والثانيه 2 ميجا بيكسل ماكرو والثالثه 2 ميجا بيكسل للعزل والرابعه VEGA ملهاش إستخدام .. اما السيلفي بيجي بدقة 16 ميجا بيكسل بفتحة عدسة F/2.0 موجود في ثُقب في الشاشة.
طبعا سوفت وير الكاميرا بتاع انفينكس مليان حاجة كتير .. بس اللي يهمني ان اخيرًا بقى في وضع تصوير ليلي اسمه Super Night Mode.
وبشكل عام .. انفينكس طورت كاميرات الموبايل ده تطوير ملحوظ، واول مره الاقي تفاصيل مقبوله في صورة طالعة من موبايل من شركة انفينكس .. بس الألوان لسه مش مظبوطه اوي، مش دي الألوان الواقعية برده .. الصورة مصفرة شوية بشكل عام وألوان البشرة ساعات بتبقى مظبوطه وساعات لأ .. على حسب وضعية التصوير.
واللي ملحوظ اوي الـHDR اللي محتاجين يشتغلوا عليه شوية لإنه لسه مش مظبوط اوي .. والعدسة الـMacro اللي هنا لذيذة وطلعت بيها صور لطيفة .. بس انا عمومًا لا أُفضل العدسة الماكرو وكنت افضل عدسة Ultra Wide .. مش منطقي يعني 4 كاميرات في الضهر وميبقاش فيهم واحده Wide Angle !
والتصوير في إضاءه داخليه برده مش قد كده بس شغال .. وبالنسبة للـSuper Night Mode اللي هنا فا هو بيفرقع الألوان ويعززها بزياده .. مش حاسس انه على المستوى المطلوب برده بس هو بداية من انفينكس إنها تبص على ان في حاجه اسمها Night Mode ولازم نطوره ونشتغل عليه وكده.
ولما بقى نقارن الكاميرا الـ48 ميجا بيكسل بتاعت النوت 7 مع الـ48 ميجا بيكسل بتاعت الـHonor 9X Lite .. في الـHDR هتلاقي الهونر افضل بفرق واضح .. الـNote 7 ضعيف .. وبالنسبة للتفاصيل فالنوت 7 قادر يسد وينافس عادي .. وبالنسبة للتصوير في إضاءه داخلية، الموبايلين مش بيطلعوا لون البشرة المظبوط بس النوت 7 بيجيب نفس التفاصيل بتاعت الـ9X Lite ويقدر ينافس عادي.
نقطة الضعف الكبيره بقى هنا في الـNight Mode .. الصور اللي طالعه من انفينكس سايحة وفيها Noise والألوان مش مظبوطه خالص والتفاصيل اقل بفرق واضح وملحوظ عن الـHonor 9X Lite !
بالنسبة لتصوير الفيديوهات بالـ Infinix Note 7 .. بيصور على 1080p كأقصى جودة مع ثبات الكتروني ضعيف نسبيا و بدون ميك اضافي لعزل الضوضاء.
بالنسبة بقى للكاميرا السيلفي فبرده الـHDR ضعيف .. الصور في الشمس بتلسع بشكل ملحوظ اوي .. وفي بعض اوضاع التصوير لاقيت ان الصور بتصفر زيادة عن الطبيعي.
والتصوير في الإضاءه الداخليه التفاصيل كويسه ومقبوله جدًا بس لون البشرة لأ .. فاتح زيادة عن الطبيعي والوان الصوره عمومًا مش بتبقى حقيقية خالص.
وبالنسبة للكاميرا السيلفي بالليل برده .. مفيش Night Mode ولا في فلاش امامي .. بتعتمد على نور الشاشة بس .. والأداء متواضع جدًا.
بالنسبة لمقارنة سيلفي الـNote 7 مع الـ9X Lite .. الـ9X Lite بيطلع الوان افضل وواقعية اكتر بس التفاصيل احسن بفرق بسيط لصالح النوت 7 .. وكذلك في الإضاءه الداخليه النوت 7 احسن في التفاصيل بس الوانه مش واقعيه.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
سعر الموبايل :-
سعر الموبايل الرسمي 2999 جنيه مصري للنسخة الوحيده المتوفره منه بمساحة تخزين 128 جيجا مع 6 جيجا رام !
وبينفع تركب كارت ميموري بحجم 2 تيرا مع شريحتين إتصال مع بعض في نفس الوقت.
الرأي النهائي :-
موبايل Infinix Note 7 .. مقارنتًا بكل موبايلات انفينكس السابقة يعتبر طفرة .. كفاية التصميم الجديد والمعالج المحترم واضافة شاحن سريع .. واي حد جرب موبايلات انفينكس قبل كدا .. هيحس بنقله نوعية بتجربته للـNote 7.
مميزات نوت 7 مُقارنتًا بالمنافسين :-
- مساحة تخزين 128 جيجا مع 6 جيجا رام
- شاشة ضخمه 7 بوصة للي بيحب الشاشات الكبيره، بس على حساب حجم الموبايل
- بطارية قوية ضخمه مع شحن سريع
- تجربة صوتيه ستيريو محترمه مش موجوده عند المنافسين
- بصمة جانبية سريعة ومفيهاش مشاكل
- اداء مقبول الى حدٍ ما في الفئة دي
عيوب نوت 7 مُقارنتًا بالمنافسين :-
- كاميرات اداءها اقل من المنافسين
- مفيش إمكانية عمل نسختين من برامج التواصل الإجتماعي
- الإعلانات اللي في الواجهة من عيوب الموبايل
- التصميم والخامات من البلاستيك، الـNote 8 من شاومي في الفئة دي بيقدم خامات زُجاجيه مُحترمه
- شاشة HD+ بس وكثافة البيكسلات قليلة جدًا
- منفذ الشحن الـMicro USB 2.0 القديم
وأخيرا .. مقدرش انسى انك لو زودت لحد سعر 3333 جنية هتقدر تشتري موبايل Redmi Note 9s بشاشة FHD+ وخامات زجاجيه محترمه ومعالج اقوى وكاميرات اقوى .. والاختيار ليك، شوف واثق في انهي براند اكتر ؟ .. وتقارير المبيعات هتحكم في الأخر !
Comments