قناة موبيزل على يوتيوب داخله على الـ400 الف مُشترك .. وعشان كده بنحضرلكم جيف اواي مُحترم وهنعلن عنه على قناتنا على اليوتيوب، متنساش تشترك في القناة من هنا ولما فيديو الجيف اواي ينزل متنساش تشوفه وتشترك !
بص يا سيدي .. اليومين الي فاتوا .. نزل موبايلين جُداد تحت الـ2000 جنية .. اولهم الـHuawei Y6s .. والتاني Samsung Galaxy A01 .. فاحنا جربنا الموبايلين فترة .. وهنقلكم رأينا بكل صراحة فيهم .. وهل في منافسين افضل بسعرهم ولا لأ ؟ وامتى تشتريهم ؟ كل ده هتعرفه لما تقرأ المقارنة دي النهاردة !
التصميم :-
بص يا سيدي .. الفئة الاقتصادية معروف عنها .. لو هتاخد براند او ماركة مشهورة .. لازم يبقا الموبايل من البلاستيك .. وهنا هواوي وسامسونج موبايلاتهم من البلاستيك بالكامل فريم و ظهر.
كشكل عام .. عاجبني اكتر لون الـA01 المطفي اللى كله على بعضه حته واحدة كدا .. بدل الـY6s اللي مقسوم نصين ده، بس يعني هي ف الاول وف الاخر ازواق.
طبعا الـGalaxy A01 حجمه اصغر لان شاشته اصغر .. والموبايلين بصراحة خفاف جدا 150 جرام .. ومسكتهم ف الايد كويسة جدا.
طبعا مفيش بروز كاميرات .. لان اصلا الكاميرات هنا على ادها اوي .. ومفيش ولا واحد فيهم معاه جراب شفاف ف العلبة ! .. وديه حاجات بتضايق الزبون المصري الأصيل في الفئة الاقتصادية.
الشاشة :-
شاشات اقتصادية بحته .. السامسونج جالاكسي A01 شاشه TFT بحجم 5.7 بوصة و الهواوي Y6s شاشة IPS LCD بحجم 6.09 بوصة .. والاتنين فيهم نوتش Drop Water او قطرة المياه .. والاتنين بدقة HD+ اكيد.
طبعا الشاشات على قدها حبتين تلاته .. السطوع تحت الشمس مقبول بس مش هتشوفهم تحت شمس قوية اوي.
بس الصراحة في تشغيل الفيديوهات .. حسيت شاشة الهواوي احسن .. درجات الالوان فيها اكتر .. والفيديوهات اوضح شوية عن شاشة السامسونج الي حستها بهتانة شوية.
وفي الاول وفي الاخر .. الشاشات في الفئة السعرية ديه مش بتبقا ممتازة يعني .. هي شاشة تقضي الغرض بس مش اكتر.
الحواف حوالين الشاشة كبيرة حبتين تلاته .. خصوصا الحافة السفلية في الموبايلين، وشاشة الواوي عليها سكرينة .. وشاشة السامسونج مش عليها .. وطبعا مفيش اي حماية رسمية عليهم.
الأداء :-
سامسونج الحمد لله رمت معالجات الاكسينوس الاقتصادية بتاعتها .. واستخدمت معالج كوالكوم سناب دراجون 439 .. معالج معنديش معاه مشاكل في الفئة السعرية ديه .. اما هواوي مستخدمين معالج Mediatek Helio P35 .. المعالجين دول معمارية 12 نانو على الورق .. معالج الهواوي اعلى شوية في الارقام وفي الحقيقية برده.
الـGalaxy A01 بيجي بـ2 جيجا رام و الهواوي 3 جيجا رام .. والهواوي واخد نفسه شوية في فتح البرامج والتنقل والكلام ده .. الي ساعات كنت بحس ان السامسونج بيعاني فيها شوية.
بس يعني اوعى تفتكر ان الهواوي مش بيقطع ولا بيهنج .. لان اصلا واجهة هواوي الي هنا تقيله شوية .. وبالكلام عن الواجهات .. فسامسونج متفوقه باندرويد 10 على الـA01 .. انما الهواوي باندرويد باي 9.0 على الـY6s.
بالنسبة للاداء الرسومي .. لعبة ببجي تقدر تشتغل على Medium على الموبايلين .. بس منصحكش .. انزل لاقل اعدادات جرافيك والعب لو عرفت .. حسيت ان الاداء الرسومي افضل شوية في السامسونج عن الهواوي.
وفي النهاية ولا السامسونج ولا الهواوي اصلا موبايلات بتاعت تشغيل العاب .. كمل المقارنة وفي الاخر هقولك مين بنفس سعرهم تعرف تلعب عليه العاب.
عوامل الامان وعناصر اخرى :-
الـY6s فيه بصمة سرعتها كويسة بالسعر ده .. الـA01 مفيهوش بصمة اصلا .. انما الفيس ان لوك موجودين في الموبايلين .. بس في الهواوي اسرع بردة شوية عن السامسونج.
الهواوي بيتفوق بوجود لمبة اشعارات .. انما السامسونج للاسف مفيهوش، وبالنسبة للمستشعرات .. الموبايلين مفيهمش جيروسكوب .. بس فيهم مستشعرات ضوء وتقارب حقيقية.
بالنسبة لصوت الموبايلات ديه .. الـA01 السماعة ف الظهر .. المكان ده رخم وبيتكتم بسهولة .. انما الـ هواوي سماعة واحدة تحت على اليمين .. والهواوي صوته اعلى.
صوت سماعات المكالمات عالي اوي وممتاز ف الموبايلين .. لان اساس الموبايلات ديه انها بتاعت مكالمات وخلاص، وصوت سماعة الاذن مقبول في الموبايلين.
بالنسبة لقوة الشبكة .. فهنا لاقيت تفوق بسيط لصالح السامسونج في قوة استقبال الشبكة بفضل استخدام معالج سناب دراجون .. وده بردة مش معناه ان الهواوي وحش .. هو بس السامسونج افضل حاجة بسيطة.
البطارية :-
الاتنين بطاريتهم 3000 مللي أمبير .. معاهم شواحن 5 فولت 1 امبير يعني 5 وات بس .. وكمان منفذ شحن قديم Micro USB 2.0.
وبصراحة الواحد بعد ما شاف بطاريات 5000 مللي في الفئة السعرية ديه في الـInfinix Hot 5 وف الـRedmi 8A .. مقدرش اشكرلك في بطاريات السامسونج والهواوي.
بس اللي اقدر اقولهولك باستخدام معقول البطارية هتستحمل معاك 5 ساعات شاشة مفتوحة وده وقت مش وحش.
بس الوحش بقا زمن الشحن .. الهواوي بيشحن في ساعتين ونص بالكامل والسامسونج بيشحن في 3 ساعات بالكامل .. بالرغم من انهم نفس حجم البطارية ونفس قوة الشاحن بس زمن الشحن الفعلي افضل في الهواوي عن السامسونج بنص ساعة.
الكاميرات :-
سامسونج ضايفة كاميرتين في الضهر .. الاساسية 13 ميجا بيكسل بفتحة عدسة F/2.2 والتانية 2 ميجا بيكسل بفتحة عدسة F/2.4 مخصصة للعزل، انما Huawei Y6s عدسة واحدة 13 ميجا بيكسل فتحة عدسة F/1.8 .. المفترض انها اوسع شوية من السامسونج.
والسيلفي في السامسونج 5 ميجا بيكسل فتحة عدسة F/2.2 انما في الهواوي المفترض انها احسن شوية 8 ميجا بيكسل فتحة عدسة F/2.0.
اول فرق .. السامسونج فيه لايف فوكس او بورترية .. انما الهواوي مفيهوش .. وده تفوق واضح وصريح للسامسونج .. وفي حاجة كمان موجودة في السامسونج وهي الـHDR .. والي بيخلي في Dinamic Range ولو بسيطة وعلى قده شوية في الصور .. والكلام ده بردو مش موجود ف الهواوي.
بس بشكل عام ارجع وافكرك ان ديه موبايلات اقتصادية مش مطلوب منها كتير في نقطة الكاميرات .. بس بشكل عام فضلت صور السامسونج في كل الصور تقريبا فيما عدا بليل .. علشان فتحة عدسته ضيقة شوية .. بس غياب معالجة الصور في الهواوي مخليه مش قادر يستغل فتحة العدسة الكويسة في التصوير بليل.
بالنسبة للسيلفي فهنا السامسونج بردة فيه لايف فوكس او بورترية والهواوي مفيهوش .. بس طبعا اللايف فوكس في السامسونج لسه لون البشرة خالص .. وبردة لون البشرة في الهواوي فاتح عن الطبيعي .. بس الصورتين مش قد كدا.
وباقي الاوضاع حدث ولا حرج يعني .. مفيش موبايل متفوق عن التاني بفرق واضح .. كدا كدا لو مفيش اضاءة كويسة مش هتلاقي تفاصيل اصلا في الصور .. بس يعني في صور مُعينه كدا بليل عجبتني اكتر في السامسونج بفضل معالجة الصورة مش اكتر.
ممكن تشوف الصور والفيديوهات المتصورة بالموبايلين في فيديو المراجعة في أخر المقالة.
اسعار الموبايلات :-
السامسونج A01 .. نسخة 16 جيجا مع 2 جيجا رام وينفع تركب كارت ميموري وشريحتين اتصال بـ1800 جنية، الهواوي Y6s .. نسخة 64 جيجا مع 3 جيجا رام وينفع بردة تركب شريحتين وكارت بسعر 2000 جنية.
الموبايلين معهمش جراب في العلبة .. والسامسونج معاه سماعات أذن والهواوي معهوش سماعات أذن في العلبة.
ومن الأخر .. لو انت محتار بينهم .. فانا شايف الهواوي بيقدم تركيبة افضل شوية بسبب البصمة والمساحة والرام الاكتر ولمبة الاشعارات والصوت الافضل وطبعا كل الكلام ده ب 200 جنية زياده في الهواوي.
وبردة من الاخر .. الموبايلات ديه هتبيع كتير ف المحلات بسبب ثقة المستخدمين في اسم سامسونج وهواوي بعيدا عن مواضيع المواصفات .. وكمان نقطة الانتشار نقطه مهمة .. انك هتلاقي الموبايلات ديه في كل محل ف مصر.
الرأي النهائي :-
الهواوي Y6s هو هو موبايل Honor 8A الي نازل من سنة تقريبا .. مفرقش اي حاجة .. هل ده معناه انه تركيبه وحشة دلوقتي .. لا انا شايف بسعره الحالي .. فهو مقبول جدا.
السامسونج .. المساحة والرام غير مناسبين خالص بصراحة وهيضايقوك جدا في الاستخدام .. وموضوع السماعة اللي في الظهر ده موضوع قديم وعفى عليه الزمن عيب نشوفه في 2020 حتى لو موبايل اقتصادي.
وف الاخر لازم افكرك بالبدايل الموجودة .. Redmi 8 الي بيقدم بطارية 5000 ومنفذ USB Type C وكاميرات احسن وتصميم افخم.
ولازم افكرك بردة الـNokia 5.1 Plus الي قولنا عليه في فيديو الترشحيات بخامة زجاج ومعالج P60 الممتاز اللي مش هتلاقي موبايل بيقدم اداء افضل منه بسعر دلوقتي تحت الـ2000 جنية.
Comments