مقارنة Poco M3 مع Samsung A12 – أفضل موبايل بـ2500 جنية ؟

النهارده هنقارن بين أفضل موبايلين بسعر حول الـ2500 جنية مصري .. وهما Poco M3 من شاومي و Galaxy A12 من سامسونج، دول اكتر موبايلين منطقيين حاليًا في الفئة السعرية دي .. الـA12 اللي بيبيع جامد جدًا بسبب اسم سامسونج وبعض المميزات اللي فيه .. والـM3 اللي يعتبر بيتباع بسعر حلو جدًا مُقارنًة بأخواته من نفس الشركة.


التصميم :-

لما تمسك جالاكسي A12 و بوكو M3 في ايديك هتلاقي M3 أتخن شوية وأعرض من A12 .. بالنسبة للوزن فا الـM3 وزنه 198 جرام اما الـA12 وزنة 205 جرام .. ومش هتلاحظ فرق الوزن ده خالص.

خامات الموبايلين من البلاستيك بالكامل أكيد .. الظهر بتاعهم مصنفر علشان ميظهرش فيه خرابيش وبصمات بسهولة .. تصميم الـM3 شيك وأحدث شوية اما تصميم A12 فا هو هادي وكلاسيك.

بروز الكاميرات في الموبايلين معقول جدًا ومفيهوش مشكلة .. لكن الـPoco M3 بيجي معاه جراب في العلبة اما الـA12 مش بيجي معاه جراب في العلبة.

بوكو M3 وزنه أخف وتصميمه أشيك ومعاه جراب في العلبة !

الشاشة :-

الشاشتين بحجم 6.5 بوصة من نفس النوع .. والشاشتين بنوتش للسيلفي .. بوكو M3 بدقة FHD+ .. انما جالاكسي A12 بدقة HD+ .. وكده في نقطة تفوق للـPoco M3 في الدقة الأعلى.

مش هتحس بفرق الدقة بين الشاشتين غير لما تشغل محتوى او فيديو بدقة عالية .. والـM3 فيه نقطة تفوق تانية وهي ان الحافة السُفلية للشاشة أصغر من A12 .. والفرق بسيط مش كبير.

من ناحية الألوان وزوايا الرؤية والسطوع فا شاشة الـGalaxy A12 أحسن حاجه بسيطة عن Poco M3 .. والـM3 عليه حماية Corning Gorilla Glass الجيل الثالث ومتركب عليه سكرينة .. اما الـA12 مش بيجي عليه سكرينة ومفيش اعلان رسمي عن طبقة الحماية الموجودة على الشاشة.

يعني انت دلوقتي قدامك الدقة الأعلى في البوكو لو بتتفرج على محتوى بجودة عالية كتير .. وقدامك السامسونج بسطوع اعلى و الوان احسن بفرق بسيط اوي لو استخدامك تحت الشمس كتير و سوشيال ومكالمات .

بوكو M3 بدقة أعلى وطبقة حماية وسكرينة .. جالاكسي A12 بألوان أحسن وسطوع أحسن.

الأداء :-

بوكو M3 بيجي بمعالج سناب دراجون 662 اما جالاكسي A12 بيجي بمعالج ميدياتك Helio P35 واللي هو أقل بفرق ملحوظ عن معالج الـPoco M3 .. ونوع الذاكرة في بوكو M3 بيكون UFS 2.1 اما جالاكسي A12 بيجي بزاكرة من النوع القديم الإقتصادي eMMC 5.1.

بالرغم من فرق المواصفات ده لكن النتيجة في الأداء الفعلي متقاربة جدًا بين الموبايلين في الإسخدام اليومي العادي من برامج وسوشيال ميديا ومكالمات وتصفح وما الى ذلك .. السوفت وير له عامل كبير في التجربة الفعلية .. سوفت وير شاومي تقيل شوية في الفئة الإقتصادية.

سوفت وير سامسونج هو كمان مش خفيف على فكرة، لكن هنا النسخة الـCore اللي مش موجود فيها مميزات كتير .. نقدر نقول نسخة مُخففة ولذلك السرعة معقولة شوية عن شاومي.

الـPoco M3 أحسن في الألعاب شوية .. هو ايوه بيشغل الألعاب على نفس اعدادات الجرافيك المتوسطة زي A12 لكن الـM3 أداءه مستقر أكتر في الألعاب وتسقيط الفريمات أقل لإن المعالج الرسومي اللي في الـM3 أقوى من A12.

ملخص الكلام ده، لو يهمك الألعاب بشكل رئيسي وعايز أحسن أداء في الفئة الإقتصادية يبقى روح لـRedmi 9 او Infinix Hot 10 .. الإثنين هيقدمولك أداء أفضل في الألعاب، لكن متسألش عن كاميرات ولا شحن سريع.

الأداء الفعلي متقارب بسبب الواجهات .. لكن المواصفات وتجربة الألعاب أقوى في Poco M3.

عوامل الأمان وعناصر اخرى :-

في الفئة الإقتصادية بيهمك أكيد البصمة .. الموبايلين فيهم بصمة على زرار الباور .. وسرعة الإتنين قريبه جدًا من بعض، اما الـFace Unlock فا هو أسرع في Poco M3 عن Galaxy A12 بفرق واضح.

الموبايلين بيجو بنظام تشغيل Android 10 .. الـA12 نسخة الـCore مفيهاش Selector Folder .. والـPoco M3 مفيهوش Second Space .. الموبايلين فيهم Split Screen و Floating Window وعمل نسختين من برامج السوشيال ميديا.

ولكن كالعادة مفيش لمبة إشعارات في الموبايلين للأسف .. وبالنسبة للمستشعرات فا A12 مفيهوش أي مستشعرات، ولا ضوء ولا تقارب ولا جيروسكوب .. التقارب والضوء شغال سوفت وير وأداءهم مش حلو خالص .. اما الـM3 فيه مستشعر ضوء وتقارب حقيقيين وشغالين كويس .. والجيروسكوب اللي فيه سوفت وير مش حقيقي.

في المكالمات الـPoco M3 هيقفل الموبايل بدون أي أخطاء وانت بتتكلم .. اما الـGalaxy A12 هيغلط وهيحتاج انك تحرك الموبايل كتير على ودنك او تستعمل زرار الباور .. وبالنسبة لظبط درجة السطوع فا هتلاقيها شغالة أسرع في M3 لإن الموبايل بيستخدم مستشعر حقيقي.

وبالنسبة لتسجيل الصوت فا الـPoco M3 بيستخدم برنامج إتصال جوجل .. اللي بيقول للي قدامك انك بتسجل المكالمة، اما الـGalaxy A12 تسجيل المكالمات فيه بيتم من غير أي مشاكل.

الـPoco M3 بيجي بصوت Stereo ممتاز وأعلى بفرق كبير عن Galaxy A12 اللي صوته ضعيف جدًا .. ومننساش ان Poco M3 فيه مستشعر الـIR Blaster المُميز اللي مش موجود في A12.

بالنسبة لقوة الشبكات فالموبايلين زي بعض تقريبًا .. شبكات الـWiFi متوسطة مش أحسن حاجه .. وشبكات الإتصال متوسطة برده وده عمومًا الطبيعي بتاع الفئة السعرية دي حاليًا.

عوامل أمان وشبكات زي بعض .. مستشعرات أفضل وصوت أقوى في Poco M3.

البطارية :-

بوكو M3 بيجي ببطارية 6000 مللي امبير .. اما جالاكسي A12 بيجي ببطارية 5000 مللي امبير .. تفوق بسيط للـM3 واللي ممكن يكمل معاك 10 ساعات شاشة مفتوحة اما الـA12 فا هيكمل معاك في حدود 9 ساعات شاشة مفتوحة .. ومن الأخر البطاريات ممتازة في الموبايلين.

الشاحن المرفق مع Poco M3 بيجي بقوة 22.5 وات بس بيشحن بقوة 18 وات .. اما الـGalaxy A12 بيشحن بقوة 15 وات .. والموبايلين منفذ الشحن فيهم USB Type C.

جربت أشحن الموبايلين مع بعض .. وفي خلال ساعتين وربع الـGalaxy A12 وصل 100% اما الـPoco M3 في نفس الوقت وصل لـ94% بس .. وكان لسه قدامه حوالي ربع ساعة علشان بطاريته الكبيرة .. والـM3 سخن أكتر وهو بيشحن عن الـA12.

بطاريات ممتازة متوازنة في الموبايلين.

الكاميرات :-

الموبايلين بكاميرا خلفية رئيسية 48 ميجا بيكسل فتحة عدسة F/1.8 .. ولكن السامسونج يتفوق في وجود عدسة متواضعة للتصوير الواسع 5 ميجا بيكسل فتحة عدسة F/2.2 البوكو مفيهوش العدسة دي .. وبقية العدسات ماكرو وعزل .. السيلفي 8 ميجا بيكسل في الموبايلين .. في السامسونج فتحة عدسة F/2.2 وفي بوكو فتحة عدسة F/2.1.

طبعا انتوا عارفين ان جوجل كاميرا شغال على Poco M3 وبيطلع نتايج ممتازة .. كنت جربته في مراجعة Poco M3 .. ولكن جوجل كاميرا مش شغال على Galaxy A12 وبالتالي انا هقارن بدون جوجل كاميرا علشان مظلمش حد.

بالرغم من ان الموبايلين 48 ميجا بيكسل إلا اني إتفاجئت ان كاميرا A12 أحسن بشكل ملحوظ .. ألوان كويسة جدا ومظبوطة والـHDR شغال بجد مش هزار .. ولون السماء مظبوط جدًا .. عجبتني تقريبًا كل الصور اللي في اضاءات عالية للسامسونج عن البوكو .. ومننساش عدسة الـUltra Wide بأداء متواضع في الـA12.

لما الإضاءة تقل مفيش Night Mode في سامسونج A12 وفي نايت في بوكو M3 .. وبصراحة الصور ولا بتبقى حلوة هنا ولا حلوة هنا .. كل واحد فيه عيوب وده برده منطقي في الفئة السعرية دي.

بالنسبة للسيلفي فا كالعادة برده تفوق واضح للـGalaxy A12 من ناحية الألوان والـHDR .. برغم برده ان الاتنين 8 ميجا بيكسل ولكن التجربة الفعلية بتبين ان في فرق ما بينهم .. ولو ناوي على بوكو M3 فا لازم تحمل جوجل كاميرا علشان الأداء يتحسن شوية.

بالنسبة بقى لتصوير الفيديوهات فا الموبايلين بيدعموا تصوير فيديوهات 1080p ومفيش أي نوع من أنواع التثبيت الإلكتروني .. ده الطبيعي في الفئة الإقتصادية.

شوف تجربة التصوير صور وفيديوهات بالموبايلين في فيديو المراجعة !

أداء الكاميرات في Galaxy A12 أفضل.

اسعار الموبايلات :-

سعر Poco M3 :-

  • نسخة 64 جيجا مع 4 جيجا رام بسعر 2500 جنية مصري
  • نسخة 128 جيجا مع 4 جيجا رام بسعر 2750 جنية مصري

والموبايل بيدعم تركيب شريحتين إتصال 4G وكارت ميموري بحجم 515 جيجا.

سعر Galaxy A12 :-

  • نسخة 64 جيجا مع 4 جيجا رام بسعر 2500 جنية مصري
  • نسخة 128 جيجا مع 4 جيجا رام بسعر 2750 جنية مصري

وبيدعم تركيب شريحتين إتصال من الجيل الرابع مع كارت ميموري بحجم 1 تيرا في نفس الوقت.


الرأي النهائي :-

نقاط تفوق Poco M3 :-

  • شاشة بدقة أحسن
  • معالج أقوى خصوصا في الألعاب
  • صوت Stereo أعلى
  • مستشعر IR Blaster
  • مستشعرات حقيقية ضوء و تقارب
  • معاه جراب شفاف في العلبة

نقاط تفوق Galaxy A12 :-

  • شاشة بسطوع أفضل وألوان أحسن
  • كاميرا أمامية أفضل
  • كاميرا خلفية أفضل
  • عدسة تصوير بزاوية واسعة
  • سماعات في العلبة

الإختيار بُناءًا على إستخدامك .. يعني لو بتتفرج على فيديوهات كتير في البيت يبقى Poco M3 علشان دقة الشاشة الأعلى والصوت الـStereo .. اما لو بتصور كتير وبتستخدم الموبايل كتير في الشمس يبقى Galaxy A12.

لو يهمك الأداء في المقام الأول بعيدًا عن أي حاجه يبقى اشتري ريدمي 9 او انفينكس هوت 10 .. الاتنين سعرهم في حدود 2400 جنية، بس متسألش على الكاميرات ولا الشحن السريع لأن ادائهم مش حلو!

هينزل قريب في الفئة الإقتصادية موبايل Galaxy M12 .. ده خليط بين الـGalaxy A12 والـGalaxy A21s، وأتوقع ان سعره يكون في حدود 2800 جنية وكالعادة هيتحرق لـ2500 جنية ويبقى بديل كويس للـA12.

وفي النهاية أحب أقولك لو لو رفعت المبلغ المتوفر لحد 3200 جنية هتلاقي Redmi Note 10 و Galaxy M21 ودي موبايلات أحسن بكتير من الموبايلات اللي قارننا بينهم النهارده.

قد يعجبك أيضا...

Comments

جاري التحميل...