مقارنة Samsung A21s مع Xiaomi Note 9 – مين أفضل موبايل بـ3000 جنية ؟!

لما نقول موبايل بـ3000 جنية .. هنلاقي عندنا وحش المواصفات الـRedmi Note 9 .. وهنلاقي وحش المبيعات وهو الـGalaxy A21s .. وهنا تيجي الحيرة .. تشتري سامسونج ولا شاومي في الفئة السعرية القليلة ديه .. طبعًا أي حد فاهم مواصفات هيروح للـNote 9 لإن ارقامه مُجملًا أعلى .. ولكن أنا هنقلك لك تجربة فعلية لإن الأرقام مش كل حاجة.


التصميم :-

زمان كانت شاومي بتتفوق في الفئة السعرية الأقل إنها كانت زجاج .. بس دلوقتي خلاص الـNote 9 من البلاستيك .. وأكيد الـA21s من البلاستيك برده .. في كده تعادل في نقطة الخامات.

شكل التصميم بقى .. شكل الـNote 9 ممكن يكون أحدث شوية .. بس برده شكل الـA21s مش وحش .. والموضوع ده أذواق ويختلف من واحد للتاني.

الموبايلين وزنهم قريب من بعض .. النوت 9 وزنه 199 جرام والـA21s وزنه 192 جرام والإتنين تخانتهم 8.9 والإتنين نفس الأبعاد تقريبًا .. مفيش إختلافات جوهرية بينهم.

النوت 9 بروز الكاميرات بتاعه كبير شوية .. وده بيعرضه لبعض مشاكل دخول التراب .. ولو حصلت متقلقش التوكيل بيتعامل وبيغير الموبايل .. اما الـGalaxy A21s بروز الكاميرات فيه قليل جدًا ومجاش شكاوي من تقفيله عمومًا.

ولكن .. في نقطة تفوق هنا للـNote 9 .. الموبايل جاي معاه جراب في العلبة .. انما الـA21s مفهوش جراب في العلبة وهتضطر تشتريله جراب طبعًا أول ما تشتري الموبايل.

الخامات واحدة .. تقفيل الـA21s أفضل .. الـNote 9 معاه جراب في العلبة .. وشكل التصميم أذواق.

الشاشة :-

شاشة موبايل Note 9 بتيجي بحجم 6.53 بوصة من نوع IPS LCD بدقة FHD+ .. وشاشة A21s بحجم 6.5 بوصة من نوع TFT LCD بدقة HD+ .. والشاشتين فيهم ثقب للسيلفي صغير على الشمال وحجم الثقب واحد تقريبًا في الشاشتين.

وبإختصار .. كثافة بيكسلات النوت 9 أحسن بسبب الدقة الأحسن .. والسطوع واحد في الإتنين تقريبًا مش هتحس بفرق جوهري ما بينهم.

بس اللي واضح أوي هو إستغلال واجهة الموبايل أحسن في الـNote 9 شوية .. يعني الحافة العلوية للشاشة أقل شوية من الحافة العلوية لشاشة الـA21s.

وكمان شاشة الريدمي نوت 9 عليها حماية Corning Gorilla Glass 5 والشاشة عليها سكرينة .. إنما الـA21s ولا في حماية ولا سكرينة.

موبايل Note 9 يتفوق في شاشة بدقة أعلى وحواف أقل وطبقة حماية وسكرينة على الشاشة.

الأداء :-

موبايل Redmi Note 9 جاي بمعالج ميدياتيك Helio G85 بمعمارية 12 نانو .. اما الـA21s فا هو جاي بمعالج Exynos 850 بمعمارية 8 نانو.

طبعًا النتيجة بتاعت Antutu Benchmark بتقول ان في تفوق تام وصريح للـNote 9 على الـA21s .. بس ده كأرقام .. هل الأداء الفعلي فارق أوي كدا ؟

مبدئيًا الموبايلين بنفس نوع الذاكرة الداخلية الـeMMC 5.1 .. لما عملت Speed Test للموبايلين ممكن تشوفه من فيديو المقارنة .. هنلاقي الـNote 9 بيفتح أسرع حاجه بسيطة عن الـA21s .. والفرق بينهم قليل جدًا مش زي ما انتوتو وضح.

وكده كده سوفت وير شاومي الموجود على Note 9 تقيل شوية وفيه تقطيعات بتحصل فجأه خصوصًا على النسخة الـ3 رام اللي جربتها.

والسامسونج عارفين كدا كدا السوفت بيبقى تقيل شوية من البداية يعني الموبايل مش بيضحك عليك بأداء وهمي لأ هو ثابت على درجة معينة من السرعة مش سريعة أوي ومش بطيئة أوي .. حاجة كدا في النص .. شوف إنت هترتاح لمين أكتر.

لما نيجي نشوف البرامج المفتوحة في الخلفية .. هنلاقي شاومي بيقفل كل البرامج المفتوحة في الخلفية وبيعيد تحميل .. جايز علشان النسخه ديه الـ3 رام والنسخة الـ4 رام هيكون أداءها افضل .. إنما الـA21s منظم جدًا وهو كده كده بنسخه واحدة 4 جيجا رام ومقفلش ولا برنامج في الخلفية.

بالنسبة للأداء الرسومي .. فالموبايلين زي بعض بالظبط .. ببجي بتشتغل على اعدادات جرافيك High HD في الموبايلين .. وكول اوف ديوتي بتشتغل على اعدادات جرافيك Medium في الموبايلين.

والتجربة الفعلية الإتنين قريبين جدًا من بعض .. وسخونية السامسونج أقل شوية من الشاومي لإن المعالج بمعمارية أحدث 8 نانو وموفر أكتر.

نوت 9 اداءه أفضل بفرق مش كبير .. الـA21s سخونية أقل والـRam Management محترمة جدًا.

جايز النسخة الـ4 جيجا رام من الـNote 9 تبقى أفضل في موضوع البرامج المفتوحة في الخلفية .. وفعلًا الناس شكرت في النسخة الـ4 رام من النوت 9 عن الـ3 رام .. لذلك الـA21s مش متفوق بشكل قاطع.


عوامل الأمان وعناصر اخرى :-

البصمة في الظهر في الموبايلين .. الإتنين بنفس السرعة تقريبًا .. يمكن نوت 9 بيتعرف عليك أسرع بس Animation الواجهة التقيل بتاع شاومي بيخلي النتيجة تعادل .. إنما الـFace Unlock لأ النوت 9 أسرع بفرق ملحوظ.

طبعًا الموبايلين مفيهمش لمبة إشعارات ولا في بديل عنها .. والموبايلين بـAndroid 10 والإتنين عليهم Dark Mode ممكن تشغله وتستمتع بالقوائم السوداء.

 

شاومي تتفوق في النوت 9 بمستشعر IR Blaster موجود في الطرف العلوي للموبايل واللي بيخليك تتحكم في الأجهزة الكهربائية .. وده مش موجود في الـA21s.

وكمان تتفوق شاومي في وجود حساس إضاءة لظبط درجة سطوع الشاشة بشكل أدق من الـA21s اللي مفيهوش حساس إضاءة والموبايل بيعتمد على السوفت وير والكاميرا الأمامية في تحديد درجه السطوع.

السامسونج فيه تسجيل مكالمات .. الميزة اللي فيه كتير بيدور عليها مش عارف ليه .. إنما الشاومي مفيهوش الميزة ديه.

صوت الموبايليين متوسط .. النوت 9 أعلى حاجة بسيطة من الـA21s .. وصوت سماعات المكالمات عالي ومُمتاز في الموبايلين.

بالنسبة لقوة شبكات الـWiFi والإتصال فا الإتنين زي بعض .. وأديهم تقييم 7 من 10 يعني متوسط ومفيش حد أحسن من التاني.

عوامل أمان اسرع ومستشعرات أكتر وصوت اعلى في نوت 9 .. وتسجيل المكالمات في A21s.

البطارية :-

بطارية الموبايلين بتيجي بحجم 5000 مللي أمبير .. وده مش معناه إن الأداء بتاع الموبايلين زي بعض .. بطارية السامسونج هتستحمل معاك أكتر شوية لإن المُعالج اللي هنا موفر جدًا في إستهلاك البطارية.

لو هنتكلم بالارقام فالشاومي ممكن يستحمل 9 ساعات شاشة مفتوحة والسامسونج ممكن يوصل لـ11 ساعة شاشة مفتوحة بنفس الإستخدام.

الشحن بقى .. الـGalaxy A21s معاه شاحن 15 واط .. ومنفذ الشحن من نوع USB Type C .. وبيشحن البطارية بالكامل في ساعتين بس .. عاش جدًا.

الـRedmi Note 9 معاه شاحن 22.5 واط والموبايل بيدعم شحن 18 واط .. بس الشاحن بيطلع 22.5 واط و20 واط و15 واط .. مفيش 18 واط .. فبالتالي الموبايل بيشحن بقوة 15 واط فقط والموبايل شحن معايا في ساعتين ونص.

الـA21s افضل من ناحية إستهلاك البطارية وزمن الشحن الأسرع.

الكاميرات :-

الموبايلين جايين بـ4 كاميرات في الظهر بنفس الوظائف .. والأساسية 48 ميجا بيكسل في الموبايلين .. فتحة العدسة أوسع ف الشاومي لإنها F/1.8 لكن في سامسونج بتيجي F/2.0.

والسيلفي 13 ميجا بيكسل في الموبايلين .. فتحة العدسة أوسع ف السامسونج F/2.2 وفي الشاومي F/2.3.

عايز بس في البداية اقولك إن سوفت وير الكاميرا بتاع سامسونج مفهوش Night Mode .. إنما الـNote 9 فيه Night Mode طبعًا

أنا مُعجب جدًا بصور سامسونج .. حقيقي .. ووضحت ده في مراجعة Galaxy A21s وبوضحة تاني دلوقتي .. صورت مجموعة صور مختلفة وفعلًا الـA21s مُميز في مُعالجة الألوان وبيطلع صورة حلوة وعينك تحب تشوفها .. ده غير الـHDR المُمتاز !

بالنسبة للـUltra Wide .. فا لما جربتها لاقيت الـA21s زاوية التصوير بتاعته أوسع والألوان أفضل .. والـMacro في الموبايلين معجبتنيش .. أنا شايف الماكرو ملوش لازمة اصلًا.

نرجع للعدسة الرئيسية في الإضاءات الداخلية وهنلاقي لسه الـA21s متفوق بشكل واضح على الشاومي حتى في الصور الـPortrait.

لما نظلم الدنيا شوية .. بالرغم من إن السامسونج مفهوش Night Mode .. إلا إنه قادر يسد بشكل قوي جدًا ويمكن مطلع ألوان أحسن كمان .. بس التفاصيل أقل شوية من النوت 9.

ولما نظلمها خالص .. هنلاقي صورة الشاومي أفضل شوية من ناحية إن الصورة Sharp أكتر وفيها تفاصيل أكتر حاجة بسيطة .. بس أنا مش شايف فرق Wow أو رهيب عن صورة الـA21s.

اما بالنسبة للسيلفي فا العزل مش قد كده في الـA21s .. والتفاصيل كمان أقل شوية .. بس ده ميمنعش إن لسه الـA21s الألوان المظبوطة .. بس زي ما قولتلك التفاصيل أحسن في الـNote 9.

وبالنسبة لتصوير الفيديوهات فالموبايلين بيصوروا على 1080p ومفيش 4K في الموبايلين .. الـNote 9 هتلاقي فيه ثبات إلكتروني اما الـA21s فا هو مفيهوش مثبت إلكتروني .. زاوية التصوير أوسع وأحسن في الـA21s والألوان مُشبعة أكتر .. والموبايلين فيهم مايكروفون اضافي لعزل الضوضاء.

كاميرا خلفية أفضل في A21s .. وسيلفي أفضل وتصوير فيديوهات أفضل في Note 9.

أسعار الموبايلات :-

موبايل A21s بيجي بنسخة واحدة بس في السوق المصري :

  • النسخة الـ64 جيجا مع 4 جيجا رام بسعر 3000 جنية مصري

اما موبايل Note 9 فا هو بيجي في مصر بنسختين وأنصحك بشدة إنك تجيب النسخة الكبيرة.

  • النسخة الـ64 جيجا مع 3 جيجا رام بسعر 3000 جنية مصري
  • النسخة الـ128 جيجا مع 4 جيجا رام بسعر 3300 جنية مصري

وبينفع تركب شريحتين إتصال من الجيل الرابع مع كارت ميموري بحجم 512 جيجا في منفذ مخصص له.


الرأي النهائي :-

موبايل Note 9 يتفوق على A21s في :

  • شاشة بدقة أعلى
  • معالج أقوى
  • مستشعر الـIR Blaster
  • مستشعر إضاءه حقيقي لظبط سطوع الشاشة
  • عوامل أمان سريعة
  • تصوير فيديوهات أفضل
  • موجود في العلبة جراب

موبايل A21s يتفوق على Note 9 في :

  • بطارية أقوى مع شحن أسرع
  • كاميرا خلفية أفضل
  • دعم لتسجيل المكالمات
  • سماعات أذن في العلبة
  • رامات أكبر بسعر 3000 جنية !

بعد المقارنة .. شوف نقاط التفوق الي تعجبك في كل موبايل وحدد اختيارك بناءا على استخدامك .. ونصيحتي ليك في النهاية .. لو هتجيب الـRedmi Note 9 فا خليك في النسخة الكبيرة اللي بـ4 جيجا رام .. لإن الـ3 رام قليلن جدًا على واجهة شاومي.


فيديو المقارنة :-

قد يعجبك أيضا...

Comments

جاري التحميل...