فاجئتنا شركة سامسونج بتسعيرها لهاتف Samsung Galaxy A80 الجديد بحوالى 10900 جنية يعنى تقريبا ضعف ثمن ال Galaxy A70 .
موبايل Samsung A80 بيقدم تقنية جديدة تعتبر خلطة ما بين هاتف OPPO Find X و هاتف Oppo N1 حيث يأتي A80 بكاميرا خلفية ثلاثية بتتقلب 180 درجة علشان تبقي سيلفي مع شاشة 6.7 بوصة و بطارية 3700 مللي أمبير و معالج سناب دراجون 730.
فى مراجعة النهاردة هنعرف هل فعلا الموبايل يستاهل انك تشتريه بالمبلغ ده و لا انت كده تبقى بتدفع حق تكنولوجيا انت فى غنى عنها دلوقتى؟؟
النهاردة هنعمل مراجعة كاملة لهاتف Samsung Galaxy A80 و هنقارن بينه و بين أخوه الأصغر Samsung A70 .
مواصفات Samsung A80 :-
- أبعاد الهاتف 165.2*76.5*9.3 ملم مع اطار من الألمونيوم و حماية للظهر من جوريلا الجيل السادس.
- وزن الهاتف 220 جرام.
- تأتي شاشة الهاتف سوبر أمولد بقياس 6.7 بوصة مع دقة Full HD+ بجودة 1080*2400 بيكسل مع 393 كثافة بيكسلات مع حماية من جوريلا جلاس الجيل الثالث و خاصية Always on display.
- معالج الهاتف هو Qualcomm Snapdragon 730مع معالج رسوميات Adreno 618.
- الهاتف متوفر بنسخة 128 جيجا بايت مع 8 جيجا بايت رام.
- يأتي الهاتف بنظام تشغيل اندرويد 9.0 Pie مع واجهة تشغيل One UI.
- كاميرا الهاتف الخلفية تأتي ثلاثية بجودة 48+8+ TOF 3D ميجا بيكسل مع فتحة عدسة f/2.0 وf/2.2 وf/2.2 و فلاش أحادى LED و تصوير فيديو بجودة 4K و جودة 1080 بيكسل مع 30 أو 60 لقطة فى الثانية.
- كاميرا السيلفي هى نفسها الكاميرا الخلفية و التى تنقلب 180 درجة للتصوير الأمامي.
- بطارية الهاتف تأتي بسعة 3700 مللي أمبير تدعم تقنية الشحن السريع.
- يدعم الهاتف مستشعر بصمة الاصبع مدمج بالشاشة.
- متوفر بالهاتف ميكروفون اضافي لإزالة الضوضاء.
- يدعم الهاتف مستشعر الجيروسكوب و خاصية ال OTG.
- يدعم الهاتف مستشعر NFC.
- متوفر بالهاتف دعم شبكات الجيل الثاني والثالث والرابع GSM/HSPA/LTE عن طريق شريحتين اتصال من نوع Nano.
- يدعم الهاتف USB Type C.
- الهاتف متاح في الأسواق بألوان الأسود و الأبيض و الذهبي.
مميزات Galaxy A80 :-
- شاشة كبيرة و ممتازة تحتل الواجهة الأمامية للهاتف بحواف قليلة جدا.
- تصميم جميل جديد و جذاب.
- خامات تصنيع جيدة جدا.
- ابتكار فى فكرة الكاميرا الخلفية التى تنقلب لتصبح هي نفسها الكاميرا السيلفي.
- يقدم المعالج أداء رائع و لكن يمكنك الحصول علي نفس المعالج بسعر أقل.
عيوب سامسونج A80 :-
- غياب منفذ 3.5 ملم لسماعات الرأس Headphones.
- لا يوجد منفذ لكارت الذاكرة الخارجي حيث لا يمكنك زيادة المساحة الداخلية للهاتف.
- الهاتف لا يدعم الشحن اللاسلكي.
- الهاتف وزنه كبير بعض الشئ 220 جرام و يعتبر سميك قليلا 9.3 ملم.
- سعر الهاتف عالى مقارنة بالمواصفات خصوصا المعالج.
- كان من الأفضل لو كانت سعة البطارية أكبر من ذلك.
التصميم :-
على عكس كل سلسلة Galaxy A اللى شوفناها قبل كده التصميم هنا مختلف اختلاف جذرى امسك بس الهاتف فى ايدك و هتحس بفخامة محستهاش قبل كده , الموبايل ظهره من الزجاج و كمان عليه حمايه جوريلا الجيل السادس و الفريم محترم جدا من الألمونيوم اللامع بيكمل اللمسه الجمالية للهاتف و علشان نحافظ على التصميم الشيك ده مكنش ينفع نحطه فى جراب بلاستيك شفاف او سيلكون شفاف, سامسونج زودت فى علبة الهاتف جراب اول مرة نشوفه من حيث الخامات المحترمة حاجة Premium جدا تحس ملمسه جلد شوية هيحافظلك على الموبايل و فى نفس الوقت مش هيقلل فخامته فى ايدك .
في ملحوظة مهمة ان أبعاد الهاتف 165.2*76.5*9.3 ملم مع وزن الهاتف 220 جرام و حجمه كبير شوية فى الايد يعنى ده مش هاتف ينفع تستخدمه بايد واحدة بس يمكن ثقل وزن الهاتف مع الخامات المحترمة دى هيديلك احساس انك ماسك حاجة قيمة جدا بس استخدامه لفترة بايد واحدة هيتعب ايديك شوية و لازم تستخدمه بايدك الاتنين.
و بكده دى اول نقطة تفوق واضحة جدا لهاتف A80 على الA70 فى الخامات الاحسن بمراحل ( لأن الـ A70 خاماته بلاستيك ) بس ال A70 احسن فى الوزن الاخف 183 جرام مش اكتر.
هندخل معانا جزء جديد هنا فى التصميم و هو موتور الكاميرات دلوقتى سامسونج عشان تخلى الشاشة كاملة و تلغى النوتش كان لازم تحط الكاميرا السيلفى فى مكان مختلف زى ال Oppo F11 Pro عملته POP UP بس سامسونج اختارت الطريق الصعب و قالت انا هخلى الكاميرا الخلفية هى اللى تلف و تشتغل كاميرا امامية و كده انا ضربت عصفورين بحجر واحد خليت الشاشة كاملة و حطيتلك كاميرا سيلفى بجودة كاميرا خلفية .
بس لازم تاخد بالك التكنولوجيا دى جديدة و الموتور ده و فكرته برضه حاجة جديدة و فى 2 موتور فى الجهاز واحد بيرفع الجزء العلوى وواحد بيلف الكاميرا عشان تبصلك قدام يعنى قابلية التلف اكتر و كمان لما جربنا نوقع الموبايل وقعة خفيفة لاقينا الكاميرا مش بتقفل بسرعة أو مش بتلحق تقفل بتفضل مفتوحة و دى حاجة تعتبر خطر لان لو الموبايل ده وقع وقعة قوية على الموتور ممكن يتبهدل و كمان الكاميرا و هى فى وضعها العادى فيها هزة خفيفة كده يعنى مش ماسكه نفسها اوى.
من الاخر الموتور اختراع شيك تحب تمشى توريه للناس بس هو ابعد ما يكون عن الاعتمادية خصوصا ان مفيش اى كلام رسمى عن العمر الافتراضى للموتور ده من سامسونج.
تحتوي الواجهة الأمامية للهاتف علي شاشة بقياس 6.7 بوصة و بصمة مدمجة بالشاشة.
أسفل الشاشة لا يوجد شئ.
علي الجانب الأيمن للهاتف نجد زر التشغيل Power button لفتح وغلق الهاتف.
علي الجانب الأيسر للهاتف نجد و أزرار التحكم في الصوت منفذ لدخول شريحتين الاتصال.
أعلي الهاتف نجد ميكروفون اضافي لإزالة الضوضاء.
أسفل الهاتف نجد ميكروفون المكالمات و السماعة الخارجية و منفذ كابل الشحن USB Type C.
فى أعلى يسار ظهر الهاتف نجد الكاميرا الخلفية الثلاثية بشكل أفقي و بجانبهم فلاش أحادى LED و شعار الشركة فى منتصف ظهر الهاتف Samsung.
الهاتف متوفر في الأسواق بألوان الأسود و الأبيض و الذهبي.
الشاشة و الصوت :-
شاشة هاتف Samsung Galaxy A80 تأتي من نوع Super Amoled كما هو معتاد من سامسونج بقياس 6.7 بوصة تعرض 16 مليون لون بدقة Full HD+ بجودة 1080*2400 بيكسل مع كثافة بيكسلات 393 بيكسل لكل بوصة بأبعاد 20:9 يوجد اسكرينة حماية تم تركيبها على الشاشة مسبقا خامتها جيدة جدا و مش هتحتاج تغيرها بعد كده و تمثل الشاشة 85.8% من حجم الهاتف مع دعم اللمس المتعدد.
بفضل الموتور بتاع الكاميرا الشاشة تعتبر تقريبا من احسن الشاشات اللى موجودة فى الفترة الاخيرة كان من الأفضل لو كانت الدقة أعلى من كده بس فعلا الشاشة أدائها فوق الممتاز مفيش نوتش و لا حواف تقريبا و الحواف اقل من هواتف الفلاج شيب الآخري , حواف الشاشة دائرية .
الشاشة الوانها ممتازة و لو حابب تعدل فيها و تخلى الالوان بارده اكتر الاوبشن ده متاح من الاعدادات و بصراحه مفيش أى كلام او عيب نقدر نقوله على الشاشة الموبيل ده فعلا مثالى لمشاهدة الفيديوهات .
من الآخر الخامات هنا رائعة و دى تانى نقطة تفوق لل A80 فى إن مفيش نوتش فى الشاشة و الحواف بتاعته اقل من حواف الشاشة ال A70 اللى بتيجى بنفس الحجم و نفس الجودة و فيها نوتش.
أما بالنسبة لصوت الهاتف :-
صوت الهاتف من سماعة واحده تحت على اليمين صوت عالى و مجسم و جيد جدا.
اكتر حاجة تضايق فى الهاتف عدم وجود مدخل سماعات 3.5 ملم, الفكرة ان الهاتف حجمه كبير و وزنه كبير تشيل المدخل ليه ؟ موجود فى صندوق الهاتف سماعات بمدخل Type C .
من الحاجات الجديدة كمان تكنولوجيا جديدة وهي سماعة المكالمات الفكرة هنا ان السماعة مش موجودة لكن هتسمع عن طريق موجات من تحت الشاشة و التجربة الفعلية ليها مكانتش سيئة الصوت جاى من جوا الشاشة احساس غريب شوية بس الصوت مش عالى للدرجة الكافية يعنى لو انت بتحتاج تعلى صوت سماعة المكالمات فى موبايلك القديم على الاخر هنا الوضع مش هيعجبك صوته اوى.
كما يدعم ميكروفون اضافي لإزالة الضوضاء مما يُحسن من جودة الصوت في التسجيل و الفيديو.
الأداء :-
معالج الهاتف هو Qualcomm Snapdragon 730 و هو جديد من سامسونج ثماني النواة يعمل بقوة تردد 2*2.2 جيجا هرتز Kyro 470 gold و 6*1.8 جيجا هرتز Kyro 470 silver بمعمارية 8 nm مع معالج رسوميات و جرافيك Adreno 618.
يتوافر الهاتف بذاكرة داخلية 128 جيجا بايت مع 8 جيجا بايت رام ذاكرة عشوائية اللى تقريبا مش هيكون فى برامج تتقفل فى الخلفية.
لأسف الهاتف لا يدعم منفذ لكارت الذاكرة الخارجي يعني مش هتقدر تزود المساحة الداخلية.
سجل الهاتف 204301 نقطة فى اختبار Antutu ,سناب دراجون 730 من الاخر معالج فئة متوسطة مش اكتر من كده و سامسونج استخدمته فى هاتف بسعر فلاج شيب لو هنتكلم فى الاداء الفعلى الهاتف احسن بفرق ملحوظ فى الاداء الفعلى عن ال A70 الاداء مفيش فيه أى تهنيج و احنا كده كده بنقفل الAnimations كلها علشان بنحس انها بتقلل حركة الواجهة الجديدة بتاعه سامسونج ف تجربتنا مع أداء الموبيل تعتبر ممتازة على أنه بمعالج سناب دراجون 730 .
بالنسبة ل PUBG ممتازة على جرافيك High HD مفيش اوبشن الHDR مع انه كان موجود مع ال A70 بس ممكن يكون هيوصل بتحديث للهاتف .
بالنسبة لتجربة ال لعبة فورت نايت , كانت ممتازة على ال A80 اشتغلت على جرافيك Medium زى الفل و بكل سلاسة و بدون أى تقطيع .
يعنى من الاخر الهاتف مفيش فيه أى مشاكل فى الأداء بتاعه كل المشكلة ان الأداء ده ممكن تاخده بسعر اقل ممكن يوصل للنص زى Xiaomi MI 9T اللى هيجى بنفس المعالج بس مش هتاخد نفس التصميم و لا الشاشة و لا فكرة الكاميرا الجديدة و دى تالت نقطة تفوق لل A80 على ال A70 فى المعالج الاحسن بحوالى 30% تقريبا.
الكاميرات :-
كاميرا هاتف Samsung Galaxy A80 الخلفية تأتي ثلاثية بجودة 48 ميجا بيكسل مع فتحة عدسة f/2.0 بمستشعر سوني IMX586 مع دعم الضبط التلقائي المزدوج PDAF و الثانية 8 ميجا بيكسل مع فتحة عدسة f/2.2 بزاوية واسعة Ultra wide و الثالثة TOF 3D لقياس العمق و فلاش أحادى LED .
تدعم الكاميرا تصوير فيديو بجودة Ultra HD 2160 مع 30 لقطة فى الثانية و هى أقل من 4K و بجودة 1080 بيكسل مع 30 أو 60 لقطة فى الثانية و لكن فى ال 60 لقطة لا يعمل المثبت الاليكترونى Gyro -EIS مع تصوير بجودة 720 بيكسل مع 30 لقطة فى الثانية كما يمكن تصوير Super Slow motion كما يمكنك تصوير الفيديو بالزاوية الواسعة بجودة 1080 بيكسل مع امكانية تصوير Live Focus يعني تحدد شئ او شخص و تصوره فيديو مع التركيز Focus عليه و يعمل عزل للى حواليه و كمان فيه ميزة Super steady اللى موجوة فى Samsung S10 و بتعمل تثبيت أكثر للفيديو لكن مينفعش أثناء تصوير الفيديو تنتقل من العدسة العادية للعدسة الواسعة لازم توقف الفيديو و تصور بالعدسة الواسعة و بعدين ترجع للفيديو تكمل بالعدسة الواسعة كما تدعم التصوير بوضع بانوراما و HDR.
بالنسبة لأداء الكاميرا صور ممتازة ألوان رائعة و واقعية فى الاضاءة العالية أما فى اضاءة الغرفة ألوان رائع و مضبوطة مع عزل و قص ممتاز حتى فى الاضاءة الخافتة تعطى صور ممتازة بفضل ال Night mode الذي يقوم باضاءة الصورة و بدون استخدام فلاش.
ونفس الكاميرات بتلف تشتغل كاميرا سيلفي بنفس الخصائص كلها فيما عدا النايت مود , بس الفكرة ان الجودة بتقل حوالي 10% تقريبا , شرحنا الفرق ده بالتفصيل و وضحنا صور مقارنة في فيديو المراجعة الي موجود في أخر المقالة وهتلاقي في الفيديو مقارنة كاميرات بين A80 و A70 علشان تعرف الفرق في جودة الكاميرات الفعلية .
البطارية :-
بسعة 3700 مللي أمبير تأتى بطارية هاتف Samsung Galaxy A80 بالرغم من حجم و وزن الهاتف الكبير و بكده هى أقل من بطارية هاتف Samsung Galaxy A70 اللى كانت 4500 مللي أمبير و هنا البطارية تدعم تقنية الشحن السريع .
البطارية بتصمد لحوالى خمس ساعات SCREEN ON وقت متوسط و لا هو ممتاز و لا هو وسيئ كان من الأفضل لو كانت سعة البطارية أكبر من كده شوية.
منفذ الشحن USB TYPE C و الشاحن اللى جاى معاه نفس شاحن ال A70 بقوة 25 وات اللى بيشحن الهاتف من 10% الى 85% فى ساعة واحدة بس للاسف بعد ال 90% الهاتف بيفصل الشحن السريع و اخر 10% فى شحن الهاتف ممكن ياخدوا وقت حوالى نص ساعة.
بصراحة بطارية ال A70 احسن و هتستحمل معاك ازيد ساعة أو حوالى ساعة الا ربع SCREEN ON عن ال A80.
الدعم و الاتصال :-
يدعم الهاتف شبكات اتصال الجيل الثاني والثالث والرابع GSM/HSPA/LTE عن طريق شريحتين اتصال من نوع نانو بالنسبة بقى لشبكة الهاتف كويسة مفيش فيها مشاكل زى شبكة ال A70 .
يدعم الهاتف Wi-Fi 802.11 a/b/g/n/ac dual band مع دعم خاصية Wi-Fi direct و امكانية انشاء Hotspot.
يدعم الهاتف بلوتوث الاصدار الخامس 5 AA2DP,LE.
يدعم الهاتف GPS مع خواص ,A-GPS GLONASS BDS ,GALILEO .
متوفر بالهاتف مستشعرات السرعة و القرب و البوصلة و مستشعر الضوء الذي يتحكم فى اضاءة الهاتف فى الاضاءات المختلفة و المستشعرات كلها موجودة تحت الشاشة.
يدعم الهاتف تشغيل الراديو FM.
متوفر بالهاتف دعم خاصية النقل السريع NFC.
يدعم الهاتف مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.
يدعم الهاتف تشغيل خاصية ال OTG و التى تمكنك من توصيل أى USB Driver و نقل البيانات من و الى الهاتف.
نظام التشغيل و واجهة المستخدم :-
يتم اصدار هاتف بنظام تشغيل اندرويد 9.0 PIE و واجهة مستخدم One UI و هو سوفت وير جديد من سامسونج يملك العديد من المميزات و التجديدات.
تدعم واجهة الهاتف الـ Knox protection مع إمكانية عمل Secure Folder لعمل ملف أخر محمي تماماً لزيادة فى حماية الأمان و الخصوصية.
تدعم واجهة الهاتف خاصية Night mode و التى تتيح لك فرصة تحويل خلفية التطبيقات الى اللون الأسود مما يوفر فى استهلاك البطارية أكثر من اللون الأبيض فى التطبيقات.
تدعم الوجهة ميزة النقر مرتين على الشاشة لتضئ Double tap to wake و ايضا ميزة اضاءة الشاشة فى حالة رفع الهاتف من على سطح
تدعم واجهة الهاتف خاصية Dual Apps و التى تمكنك من عمل نسختين من أى تطبيق من تطبيقات التواصل الاجتماعى كما تدعم خاصية Split screen لقسم الشاشة الى نصفين و استخدام تطبيقين فى نفس الوقت.
تدعم الواجهة ميزة جميلة و هى Pop up view و التى تتيح لك أن تظهر بعض برامج التواصل على شكل كرة مثل تطبيق Messenger و يمكنك أن تقوم بالرد بدون الخروج من التطبيق يعنى لو مثلا انت فاتح You Tube و جالك اشعار من تطبيق What’s app تقدر ترد على الرسالة من غير ما تخرج من ال You Tube.
الهاتف لا يتوافر به لمبة للاشعارات للأسف و لكن تم التعويض عنها بأكثر من طريقة عن طريق امكانية أن تقوم الشاشة بوميض أو اضاءة Flash فى حالة وصول اشعارات و اذا كان الهاتف موجود على سطح و الظهر لأعلى سوف يقوم فلاش الكاميرا الخلفية بهذه المهمة و ايضا عن طريق خاصية Always on display التى تعرض الاشعارات فور وصولها أو عن طريق ميزة تدعمها واجهة الهاتف و هى امكانية عمل تذكير أو Reminder فى حالة وصول اشعار من تطبيقات تحددها انت عن طريق اهتزاز وصوت رنين لذلك أما عن ظهور الاشعارات فهى تظهر جميعها فوق الشاشة و يمكنك تحديد عدد محدد من الاشعارات لتظهر كما يمكنك اختيار اذا نسبة البطارية تظهر أم لا.
عوامل حماية الأمان و خصوصية الهاتف :-
أكيد مفيش فى الهاتف بصمة الوجه Face unlock علشان نحافظ على العمر الافتراضى للموتور الاعتماد هنا على مستشعر بصمة الاصبع المدمج بالشاشة هتحتاج انك تعرف بصمتك للموبايل أكثر من مرة علشان تقدر توصل لأحسن أداء ليها و بتجربتنا ليها هي كويسة لكن مش سريعة اوى بس هى أسرع من ال A70 .
محتويات صندوق الهاتف :-
هاتف Samsung Galaxy A80 تم تركيب اسكرينة للحماية عليه مسبقا
كُتيب التعليمات والتشغيل والضمان
الشاحن بقوة 25 وات
كابل الشحن USB Type C
دبوس معدني لفتح درج الشريحة
سماعات الأُذن Earphones
جراب رائع بخامات ممتازة لحماية الهاتف
تقييم موبايل A80 النهائي :-
الهاتف منقدرش نعتبره من فئة ال A لأنه بيقدم خامات و مواصفات أعلى من السلسلة دى بيقدم شاشة ممتازة مع كاميرا بتكنولوجيا جديدة و اللى بتوفر تجربة سيلفي بنفس جودة الكاميرا الخلفية كمان سماعة المكالمات اللي مش موجودة ومدمجه بالشاشة , دا اللى خلي سعر الموبايل غالي و بقي ضعف ثمن ال A70 .
تشتري ال A80 امتى؟ طبعا لو معاك فلوسه و لو حابب تجرب الكاميرا الجديدة و هاتف مميز و خامات رائعة.
لو انت مش حابب التكونولوجيا الجديدة اللى فيه أو خايف من العمر الافتراضي للموتور أو لو محتاج هاتف قيمة مقابل سعر يبقي تشتري ال A70 أفضل .
أو تجيب فلاج شيب السنة اللى فاتت زي Note 9.
سعر موبايل سامسونج A80 :-
بالسوق المصري 10900 جنيه مصري للنسخة 128 جيجا بايت مع 8 جيجا بايت رام.
Comments