الإنطباعات الأولية لـ Galaxy Z Fold 4 و Galaxy Z Flip 4 – فين الجديد ؟!

سلسلة الـZ الجديدة بقت سلسلة رئيسية عند سامسونج خلاص .. بتقدم فيها موبايلن وهما Z Fold و Z Flip .. ودي موبايلات قابلة للطي بطريقتين مُختلفتين .. وخلاص السلسلة دي بقت أساسية ومؤخرًا بقت إعتمادية وبتحقق مبيعات وإنتشار ومفيش مشاكل زي الأول من فكرة موبايل قابل للطي.

سامسونج أطلقت الجيل الرابع من سلسلة الـZ النهارده، بموبايلات Galaxy Z Fold 4 و Galaxy Z Flip 4 .. والسلسلة كالمتوقع بتيجي بأعلى مواصفات مُمكنة .. لكن مش ده إهتمام سامسونج، لإنها اهتمت في الجيل الرابع بتحسين تجربة الإستخدام العامة وجعلها مُرضية أكثر، وده اللي هنوضحه لكم النهارده.


Galaxy Z Fold 4

موبايل Galaxy Z Fold 4 :-

ده الموبايل الأغلى والأفخم في السلسلة .. مش هتلاحظ أي إختلاف لو بصيت على الموبايل بنظرة سريعة كده .. لكن لو ركزت هتلاقي ان المفصلة بتاعت الشاشة حجمها بقى أصغر شوية .. كمان طول الموبايل قل حاجه بسيطة وبقى أسهل في الإستخدام وأبعاد العرض بقت أفضل.

الموبايل محمي بطبقة حماية Gorilla Glass Victus Plus وكمان مقاوم للماء IPX8 .. والوزن بقى 263 جرام وده أقل وزن لموبايل Fold من سامسونج لحد دلوقتي .. كمان الكاميرا الأمامية المخفية تحت الشاشة الكبيرة كانت في Galaxy Z Fold 3 اللي فات واضحة شوية وشكلها سخيف .. دلوقتي هي مخفية تمامًا ومن الصعب انك تلاحظها.

Z Fold 4 Display

التعديل الواضح هنا واللي هيفرق فعلا في الإستخدام هو أبعاد عرض الشاشة الخارجية .. بتيجي زي الجيل اللي فات بحجم 6.2 بوصة لكن بأبعاد عرض 23:9 بدلًا من 25:9 في الجيل القديم .. وده بيزود من إعتمادك على الشاشة الخارجية ومش بيجبرك دائمًا انك تفتح الشاشة الكبيرة علشان تستخدم الموبايل.

الموبايل بيجي بمعالج كوالكوم سناب دراجون 8+ جين 1 .. اللي بيقدم أداء أفضل حاجه بسيطة من ناحية الأداء الرسومي والسخونية عن 8 جين 1 العادي .. وكمان بيجي بواجهة One UI 4.1 المُطورة واللي فيها مميزات أكثر حصرية للـFold زي Taskbar جديد شبه الموجود في الـWindows لتحسين تجربة الـMulti-Tasking.

Z Fold 4 Camera

الكاميرات كانت نقطة ضعف الى حد ما في موبايل Z Fold 3 اللي فات .. دلوقتي سامسونج بتستخدم نفس الكاميرات الموجودة في Galaxy S22 Plus .. هتلاقي 3 كاميرات منهم الأساسية 50 ميجا بيكسل F/1.8 فيها مثبت بصري .. كاميرا للزوم بتوصل لـ3X حقيقي ولـ30X عن طريق السوفت وير .. عدسة Ultra Wide بدقة 12 ميجا بيكسل.

الكاميرات الأمامية زي ما هي .. كاميرا 10 ميجا بيكسل في الشاشة الخارجية وكاميرا 4 ميجا بيكسل في الشاشة الكبيرة .. البطارية 4400 مللي امبير للأسف زي ما هي .. مش أفضل حاجه، وسرعة الشحن 25 وات زي ما هي عن طريق USB Type C مع دعم الشحن اللاسلكي بقدرة 15 وات.


Galaxy Z Flip 4

موبايل Galaxy Z Flip 4 :-

برده هنلاقي نفس الإختلافات في التصميم .. زي ان المُفصلة بتاعت طي الموبايل صغرت شوية .. وكمان أبعاد عرض الشاشة بقت أفضل من الجيل اللي فات .. وبالتالي بقى أسهل في الإستخدام .. والموبايل مقاوم للماء بشهادة IPX8 ومحمي بطبقة حماية Corning Gorilla Glass Victus Plus.

نفس الشاشة الـDynamic AMOLED الجيل الثاني بدقة 6.7 بوصة بتردد بيوصل لـ120 هيرتز .. ومفيش دعم للـsPen .. والشاشة الخارجية كبرت شوية .. كانت 1.9 بوصة في الجيل اللي فات ودلوقتي بقت 2.1 بوصة .. وفيها شوية تطورات منها وانت بتتصور سيلفي بالكاميرا الخلفية هتلاقي أوضاع تصوير جديدة.

Z Flip 4 Display

معالج كوالكوم سناب دراجون 8+ جين 1 .. اما عن البطارية فهي كبرت شوية، لو تفتكر بطارية Galaxy Z Flip 3 اللي فات كانت كارثية، كانت بسعة 3300 مللي امبير .. دلوقتي سامسونج خلت البطارية 3700 مللي امبير .. سرعة الشحن كمان رفعت شوية بقت 25 وات بدلًا من 15 وات في الجيل اللي فات.

الكاميرات زي ما هي .. عدسة 12 ميجا بيكسل أساسية مع عدسة 12 ميجا بيكسل للتصوير الواسع .. وعدسة الكاميرا الأماميية 10 ميجا بيكسل زي ما هي بدون إختلاف عن الجيل اللي فات.

قد يعجبك أيضا...

Comments

جاري التحميل...