مراجعة Galaxy A13 الإقتصادي من سامسونج – فين الأداء ؟!

موبايل Samsung Galaxy A13 هو موبايل إقتصادي جديد من سامسونج في مصر .. اتظلم بسبب سعره الغريب اللي اتقدم بيه .. بعد تجربتنا ليه إكتشفنا انه أسوأ موبايل جربناه من ناحية الأداء في 2022 .. النهارده هنقدملكم مراجعة Galaxy A13 الجديد وهنعرف ايه هي مميزاته وعيوبه بعد الإستخدام !


التصميم :-

تصميم Galaxy A13 لطيف جدًا ومقبول جدًا .. أحسن ما فيه شكل الكاميرات الطايرة اللي كل عدسة لوحدها .. بتفكرني بتصميم Galaxy S22 Ultra وكمان Galaxy A32 القديم.

الموبايل بيجي من البلاستيك اللامع .. ووزنه معقول في الفئة الإقتصادية، حوالي 195 جرام مع تخانه 8.8 مللي .. وده طبعًا بيرجع للشاشة الضخمة والبطارية الكبيرة.

الموبايل مسكته في الإيد كويسة .. لكن مش الأفضل بسبب البلاستيك بتاعه الناعم بزيادة .. وبروز الكاميرات مش كبير لكن مفيش جراب في العلبة .. العربية فيها شاحن ووصلة شحن فقط.


الشاشة :-

شاشة 6.6 بوصة من نوع PLS LCD بدقة FHD+ بتردد 60 هيرتز مع نوتش قديم للسيلفي .. شاشة متواضعه مش أفضل حاجه .. سطوع إقتصادي مقبول، ألوان معقولة .. حواف كبيرة بزيادة.

بسعر الموبايل ده حاليًا تقدر تشتري Galaxy A22 اللي هيقدملك شاشة AMOLED وبتردد 90 هيرتز وهيوفرلك تجربة أفضل بكتير .. او ممكن تجيب Infinix Note 11 بشاشة AMOLED بدقة FHD+.

قارنت شاشة الموبايل بشاشة Redmi 10C .. ولاقيت تفوق واضح عليه .. لكن سعر Galaxy A13 بيخليه أقرب لـRedmi Note 11 اللي بيتفوق عليه بفرق كبير.

الشاشة عليها طبقة حماية Corning Gorilla Glass الجيل الخامس لكن مش عليها سكرينه.


الأداء :-

الموبايل بيجي بمعالج اكسينوس 850 تكنولوجيا 8 نانو ميتر .. ده تقريبًا أسوأ أداء جربته في موبايل إقتصادي في 2022 .. لا يتوافق مع سنة 2022 ولا يتوافق مع سعر الموبايل اللي دخل في 4500 جنية.

الموبايل بيقطع من أقل مجهود .. بيقطع وانا بـScroll في التطبيقات .. وأنا بـScroll في الـSettings .. وانا بمسح الإشعارات .. كان ممكن أتقبل الأداء ده تحت الـ3 الاف جنية، لكن بالسعر ده مستحيل.

بسعر الموبايل ده تجيب Galaxy A22 أفضل .. او Galaxy A23 او Infinix Note 11 او Redmi 10C .. كل دي موبايلات هتقدملك تجربة مقبولة أكثر.

بالنسبة للسخونية فا الموبايل مش بيسخن أوي لما بضغط عليه بسبب أن جسمه من البلاستيك .. بس المعالج بيقلل تردداته جامد بشكل واضح .. والموبايل ده مش للألعاب نهائيًا.


عوامل الأمان وعناصر اخرى :-

البصمة موجودة على زِر الباور .. إستغربت ان أداءها معقول مش وحش .. والـFace Unlock سرعته مش حلوه خالص لإن الكاميرا السيلفي هنا متواضعه جدًا.

الموبايل بيجي بنظام تشغيل Android 12 مع واجهة سامسونج One UI 4.1 Core المُخففة.

الموبايل فيه ميكروفون اضافي لعزل الضوضاء .. مفيهوش NFC .. الصوت عادي مش Stereo لكنه معقول على إنه Mono .. مستشعر المكالمات سوفت وير ومش أفضل حاجه.

مفيش مستشعر إضاءه حقيقي للشاشة .. ومفيش جيروسكوب .. والشبكة متواضعه الى حد كبير .. الموبايل مش لطيف خالص في جزئية الشبكات.


البطارية :-

بطارية كويسة 5000 مللي امبير أداءها معقول .. هتكفي يوم كويس ومش هتخلص .. لإن كده كده الموبايل مش بيقدملك أداء .. الشاحن اللي بيجي مع الموبايل في العلبة 15 وات وبيشحن البطارية في ساعتين.


الكاميرات :-

الكاميرا الخلفية 50 ميجا بيكسل بفتحة عدسة F/1.8 .. الثانية Ultra Wide بدقة 5 ميجا بيكسل بفتحة عدسة F/2.2 .. الثالثة 2 ميجا بيكسل Marco والأخيرة 2 ميجا بيكسل للعزل .. السيلفي 8 ميجا بيكسل بفتحة عدسة F/2.2.

أداء الكاميرا الخلفية كويسة فعلًا .. دائمًا بلاقي أداء كويس من الكاميرات من سامسونج حتى في الفئة الإقتصادية .. أداء الموبايل معقول جدًا بالنسبة للفئة الإقتصادية في الإضاءات العالية .. كم تفاصيل كويس ومعالجة ألوان مظبوطة.

وكمان معالجة الصور في إضاءات داخلية معقولة جدًا .. بالرغم من ان مفيش Night Mode للأسف في الكاميرات .. وخلفي بالك ان الـAutoFocus بيتأخر شوية ومبيرداش يصور إلا لما الـFocus يظبط.

قارنت الموبايل مع Galaxy A22 لاقيت تقارب جامد في الأداء بينهم وبين بعض .. الاتنين كويسين ومعقولين جدًا .. الـA13 كمان كسب Infinix Note 11 وكسب Redmi 10C .. ودي حاجه تحسب له.

بالنسبة للسيلفي فا هو مش أفضل حاجه .. بس معالجة الصور بتحاول تظبط الدنيا .. بس عمومًا مفيش سيلفي كويس في الفئة الإقتصادية .. قارنته بـA22 لاقيت تفوق للـA22 .. قارنته مع ريدمي 10C وانفينكس نوت 11 لاقيت Galaxy A13 أحسن شوية في مختلف وضعيات التصوير.

بالنسبة لتصوير الفيديوهات بالموبايل فا هو بيصور بجودة 1080p مع 30 فريم في الثانية .. والموبايل مش بيدعم المثبت الإلكتروني .. لكن فيه ميكروفون اضافي لعزل الضوضاء.


Galaxy A13 Price

سعر Samsung Galaxy A13 :-

  • نسخة 64 جيجا مع 4 جيجا رام بسعر 4300 جنية
  • نسخة 128 جيجا مع 4 جيجا رام بسعر 4800 جنية

وتقدر تركب شريحتين إتصال من الجيل الرابع مع كارت ميموري بحجم 1 تيرا في نفس الوقت.


الرأي النهائي :-

الموبايل مظلوم جدًا بسبب تسعيره المُبالغ فيه في مصر .. الموبايل كان لازم ينزل تحت الـ4000 جنية علشان يكون في مكانه الطبيعي .. معنديش فكرة ده هيحصل ازاي في ظل وجود Galaxy A12 القديم بسعر فوق الـ4 الاف .. مُجملًا Galaxy A13 بسعره الحالي لا يستحق انك تفكر تشتريه بسبب أداءه اللي هيخليك مش طايقه في المهام البسيطه.

لكن لو سعر الموبايل قل عن 4000 جنية فا ممكن يكون اختيار معقول للي محتاج موبايل إقتصادي من سامسونج بكاميرات معقولة وعدسة Ultra Wide وتصميم إقتصادي شيك وبطارية كبيرة 5000 مللي امبير وميكروفون اضافي لعزل الضوضاء.

من عيوب الموبايل المعالج اللي يعتبر الأضعف في الفئة دي مع الشاشة اللي نوعها ومعدل تحديثها مش الأفضل .. ومفيش مستشعرات مهمه زي الجيروسكوب والتقارب .. وأداء الشبكة ضعيف.

لو هتفكر تشتري Galaxy A13 بسعر أكثر من 4000 جنية أنصحك تفكر في Galaxy A22 هيقدملك تجربة شاشة ومعالج وكاميرات أفضل .. او فكر في Infinix Note 11 اللي هيقدملك تجربة شاشة ومعالج وسرعة شحن وصوت أحسن .. بس كاميرات أقل.

قد يعجبك أيضا...

Comments

جاري التحميل...