مراجعة موبايل Samsung Galaxy A30s – أرخص بصمة في الشاشة من سامسونج !

النص الاول من سنة 2019 سامسونج نزلت كمية موبايلات مش طبيعية ورا بعض في كل الفئات من الاقتصادية لحد الفئة فوق المتوسطة .

و طبعا من السربعة ديه وعدم تجربة الموبايلات بشكل عملي من فريق سامسونج في البلد الي الموبايل نازل فيها … خلى في شوية مشاكل في معظم الموبايلات والي سامسونج حاولت تلحق نفسها كدا وتبعت كام تحديث يحل شوية من المشاكل ديه .

لا و مش بس كدا ديه دلوقتي بتنزل نفس الموبايلات مرة تانية وبنفس الاسم بس اخره حرف اس .. مع تحسينات بسيطة علشان تكمل سيطرة واستحواذ على المبيعات بسبب ثقة المستخدم في اسم سامسونج .

في هذه المقالة سنقوم بمراجعة موبايل Samsung Galaxy A30s الجديد وهنوضح ليكم مميزاته وعيوبه بعد فترة من الاستخدام .


مواصفات Samsung A30s :-

  • شاشة 6.4 بوصة سوبر أموليد بدقة HD+ مع نوتش دروب وتر في الشاشة .
  • بصمة مدمجة بالشاشة مع دعم Face Unlock .
  • معالج سامسونج اكسينوس 7904 ثماني النواة تكنولوجيا 14 نانو .
  • مساحة تخزين 64 جيجا مع 4 جيجا رام مع امكانية تركيب كارت ميموري وشريحتين اتصال بشبكات جيل رابع .
  • بطارية 4000 مللي أمبير مع شحن سريع 15 واط ومنفذ Type C .
  • تصميم بلاستيكي مع وزن 166 جرام وتخانة أقل من 8 ملم .
  • كاميرا سيلفي 16 ميجا بيكسل فتحة عدسة 2.0 .
  • كاميرا خلفية ثلاثية .. الاساسية 25 ميجا بيكسل فتحة عدسة 1.7 والثانية 8 ميجا بيكسل للتصوير بزاوية واسعة فتحة عدسة 2.2 والأخيرة 5 ميجا بيكسل للعزل فتحة عدسة 2.2 مع دعم تصوير فيديوهات 1080p .
  • يدعم كافة المستشعرات ويدعم خاصية NFC ويدعم تشغيل الراديو FM .

التصميم :-

حاجة من الحاجات الي اتغيرت في Samsung A30s عن النسخة القديمة A30  .. هي اتغيرت كشكل بس مش اكتر .. الظهر بقا فيه تلت مثلثات مع بعض كدا بدرجات الوان مختلفة .. بتدي انعكاسات لذيذة .. النقشة ديه عجباني جدا .

طبعا كان نفسي الخامات تبقا احسن شوية بس للاسف الخامات زي ما هيا بلاستيك تحسه ضعيف كدا سهل اوي يتخربش معاك لازم تحسس ع الموبايل ده علشان ظهره ميتبهدلش منك بسهولة يعني مينفعش تمشي بالموبايل ده من غير كافر .

ظهر موبايل Samsung A30s تقدر تعرفه بسهولة وتميزه عن اخوه القديم A30  … في ان مفيش مستشعر بصمة خلفي … وكمان A30s بيجي ب بصمة مدمجة في الشاةش هنتكلم عنها كمان شوية .


الشاشة :-

وهنا سامسونج خدت بعضها ورجعت مارشدير .. علشان تحط بصمة في الشاشة خلت الشاشة بدقة HD+ بعد ما كانت FHD+ في النسخة القديمة Samsung A30 .

عموما الشاشة حجمها 6.4 بوصة فيها نوتش دروب وتر ونوعها سوبر اموليد .. طبعا شاشات سامسونج السوبر اموليد مش محتاج اتكلم عنها هي سمعتها سبقاها شاشات ممتازة الوان كويسة وسطوع تحت الشمس كويس جدا والحواف حوالين الشاشة مقبولة جدا متغيرتش عن النسخة القديمة .

بس عاوز افهمك حاجة .. سامسونج بتستهدف العميل الي واثق فيها وفي خاماتها الداخلية وفي صيانتها .. وهي عاوزه تشدة بموضوع البصمة تحت الشاشة وعلشان التكلفة متعلاش منها خلت الشاشة HD+ .. وبكدا شدته بالبصمة الي تحت الشاشة وقللت جودة الشاشة الي اصلا في ناس كتير متعرفهاش ولا تفرق معاها في اي حاجة .. بس انت لو وصلت للمقالة ده لازم تعرف ان الشاشة فيها بعض البكسلة البسيطة لان كثافة البيكسلات اقل من 300 يعني لما تركز معاها اوي اوي وانت بتبدأ جيم ببجي مثلا هتشوف بعينك البيكسلات في الشاشة .. زيها زي شاشة Xiaomi Mi A3 الي جاي بردة بشاشة اموليد بدقة HD+ وبصمة في الشاشة .


الاداء :-

وهنا مفيش اي حاجة اتغيرت .. معالج النسخة القديمة موجود هنا بردة اكسينوس 7904 معالج ثماني النواة بتكنولوجيا 14 نانو في وجه نظري زي ما قلت قبل كدا هو يكافىء سناب دراجون 636 او اعلى منه حاجة بسيطة وبالتالي فهو اقل من سناب دراجون 660 و 665 و710 الموجودين في نفس الفئة السعرية ديه من اكتر من ماركة تانية .

كالعادة اول ما تمسك موبايل من سامسونج فئة ايه اول حاجة تعملها تقفل الانيميشن Remove Animation .. علشان تحس ان السوفت وير بقا سلس كدا معاك .. وبصراحة الاداء هنا مش سلس بحس ساعات بتقطيعات بسيطة كدا او تهنيج خفيف مثلا لو الموبايل مقفول وفيه تنبيهات كتير و جيت تفتحه هتحس بتهنيج خفيف .

بس طبعا الكلام ده عمرك ما هتحس بيه الا لو انت استخدمت واجهات تانية ومعالجات اقوى .. انما غالبية الي اشتروا وبيشتروا فئة جالاكسي A من سامسونج بيبقوا جايين من موبايل قديم من سامسونج بردة وبالتالي مش بيحسوا بحاجة اصلا من الي بقوله .

بالنسبة للاداء الرسومي .. جربت ببجي على جرافيك اهي اتش دي اشتغلت بس حسيت انها مش سلسلة كدا .. انما اما نزلتها لميديام جرافيك اشتغلت زي الفل ومفيش اي مشاكل .

من الاخر Samsung A30s مش بيديلك افضل معالج ولا افضل اداء بسعره بس ما زال اداءه مقبول جدا بالنسبة للاستخدام اليومي .


عوامل الامان وعناصر اخرى :-

البصمة المدمجة بالشاشة اتحسنت كتير جدا البصمة شغالة من غير ما تغلط هي اه مش سريعة اوي بس مقبولة جدا وبايد واحدة بقدر امسك الموبايل وافتحه بالبصمة عادي جدا حتى والشاشة مقفولة.

وبالنسبة للفيس ان لوك فهو سرعته مقبول مش اسرع حاجة ولا ابطأ حاجة .

تعالوا بقا نتكلم في نقطة مهمة جدا وهي الشبكة .. جربت الشبكات على الموبايل ده من داتا و واي فاي واتفاجئت ان مفيش فيه اي مشاكل ظهرت معايا لا بالعكس ده شبكته قوية كمان .. عاش اوي يا سامسونج .

بالنسبة للمستشعرات .. فللاسف زي النسخة القديمة مستشعر التقارب ال بيقفل الشاشة وانت ع مكالمة بيعلق واصلا برنامج المستشعرات مش بيقدر يتعرف عليه وبالتالي لازم تخلي بالك وانت بتتكلم في الموبايل ده وتتاكد ان الشاشة قفلت لما اتحط ع ودنك وده عيب رخم جدا بالنسبالي .

انما باقي المستشعرات شغالة زي الفل مفيهاش اي مشاكل وكمان الجي بي اس بقا شغال مظبوط على الموبايل ده .

صوت الموبايل جاي من سماعة واحدة صوت مقبول مش عالي ومش واطي ولو فعلت المونو اوديو من السيتنج كالعادة الصوت هيعلى جدا بس الكوالتي هتقل جدا … اختار الي يريحك .

صوت سماعة المكالمات عالي وممتاز وصوت سماعات الاذن متوسط مش عالي ومش واطي.

واخيرا مفيش لمبة اشعارات ولا لقيت اوبشن الالويز اون ديسبلس مووجود بالرغم من ان الشاشة امولد .. مش عارف ليه !


البطارية :-

زي ما هيا 4000 مللي امبير والشحن السريع ال 15 واط ومدخل التايب سي .. التركيبة ديه بتخلي الموبايل يستحمل معاك متوسط من 5 لـ 7 ساعات شاشة مفتوحة ع حسب استخدامك .

والموبايل بيشحن من 15% لـ 100% في ساعتين وربع تقريبا .. وبردة ده مش اسرع زمن شحن في الفئة السعرية ديه .


الكاميرات :-

الكاميرا الخلفية زادت عدسة وارقامها بقت احسن .. الاساسية 25 ميجا بيكسل فتحة عدسة 1.7 والتانية وايد انجل 8 ميجا بيكسل فتحة عدسة 2.2 والاخيرة 5 ميجا بيكسل فتحة عدسة 2.2 للعزل .. والسيلفي زي ما هو 16 ميجا بيكسل فتحة عدسة 2.0 .

تجربة الكاميرات مرفقة بالصور هتلاقيها في فيديو المراجعة في أسفل المقالة .


محتويات صندوق الموبايل :-

الهاتف – الشاحن 15 واط – وصلة Type C – سماعات أذن – جراب شفاف – الضمان .


سعر الموبايل :-

السعر الرسمي 3950 جنية وهتلاقيه في المحلات ب 3650 جنية للنسخة 64 جيجا مع 4 جيجا رام وينفع تركب كارت ميموري وشريحتين اتصال مع بعض في نفس الوقت .


الرأي النهائي والمميزات والعيوب :-

من الأخر سامسونج A30s بيديلك شاشة الوانها كويسة بس مش بافضل كثافة بيكسلات بيديلك اداء مقبول بس مش افضل اداء .. بيديلك بطارية كويسة بس مش باسرع شاحن .. مع كاميرات كويسة بس تصوير الفيديوهات مش الأفضل .. كل التركيبة ديه مع بصمة مدمجة بالشاشة ادائها مقبول بس مش الأسرع وشبكة موبايل كويسة مفيهاش مشاكل .

يعني من الأخر لو انت محتار بين الموبايل ده و موبايلات تانية زي ريلمي 3 برو و Xiaomi Mi A3 فاحب اقلك بكل تأكيد ان Samsung A30s اقلهم في الاداء العام بفروقات بسيطة في حاجات زي سرعة الشحن و أقل في حاجات كبيرة زي المعالج .. بس اقدر ادخل A30s جوا قايمة الترشيحات الخاصة بموقع موبيزل مؤخرا .. لان دايما المستخدمين بيدوروا على موبايل من سامسونج لانهم واثقين فيها وفي انتشارها القوي في المحلات وفي خدمة ما بعد البيع .

و الموبايل ده فعلا مفيهوش عيوب قاتلة تمنعك انك تشتريه بعيدا عن موضوع مستشعر التقارب بتاع المكالمات الي ممكن تتحل بتحديث سوفت وير .

مميزات

  • بصمة مدمجة بالشاشة ادائها جيد .
  • شاشة سوبر أموليد من سامسونج .
  • ضمان وانتشار سامسونج في الشوارع المصرية .
  • اداء مقبول من المعالج بالرغم منه انه ليس الأفضل في فئته السعرية مع شبكة موبايل ممتازة .
  • بطارية كبيرة باداء جيد .
  • يدعم تشغيل شريحتين اتصال وكارت ميموري مع بعض في نفس الوقت .

عيوب

  • تهنيج مستشعر التقارب الي بيقفل الشاشة اثناء المكالمات والموبايل على ودنك .
  • يوجد منافسين بيقدموا معالجات أفضل في نفس الفئة السعرية .
  • دقة الشاشة منخفضة HD+ فقط .
  • لا يوجد تغيير كبير عن النسخة السابقة من الهاتف A30 .

فيديو المراجعة على اليوتيوب :-

قد يعجبك أيضا...

Comments

جاري التحميل...