مراجعة Samsung Galaxy A52s 5G – الموبايل المِثاليّ من سامسونج ؟

سامسونج أطلقت موبايل Samsung Galaxy A52s 5G في مصر مؤخرًا .. وبيجي الموبايل بسعر بيخليه ينافس في الفئة المتوسطة العُليا، الفئة اللي أغلب الموبايلات فيها مش بتيجي بـ منفذ 3.5 مللي او مكان لتركيب كارت ميموري .. لكن A52s 5G يعتبر موبايل مُختلف في الفئة دي .. والنهارده هنقدم مراجعة شامله ليه!


التصميم :-

خامات الموبايل من البلاستيك بالكامل .. بلاستيك شيك وواخد تصميم موبايلات سامسونج الرائدة .. لكن لازم تحط في حساباتك الموبايلات الباقية في الفئة دي زي Poco F3 و Reno 6 5G اللي بيجو بخامات زجاجيه.

وزن الموبايل حوالي 189 جرام، مش أخف حاجه لكن كويس .. والسُمك بتاعه 8.4 مم .. وأهم ميزة فيه هي مقاومة الماء العذب، الموبايل فيه شهادة مقاوم IP67 نفس الموجودة في Galaxy A52.


الشاشة :-

الشاشة 6.5 بوصة من نوع Super AMOLED بدقة FHD+ بتردد بيوصل لـ120 هيرتز .. مواصفات قوية جدًا، لكن الحواف حوالين الشاشة كبيرة ومش أفضل حاجه.

الشاشة مُبهرة جدًا من ناحية الألوان .. والسطوع بتاعها معقول جدًا لكن أكيد مش لدرجة الموبايلات الرائدة .. هو على الفئة المتوسطة فا هو كويس جدًا.

الشاشة هي هي شاشة Galaxy A52 لكن بيزيد عليها ان التردد بتاعها 120 هيرتز بدلًا من 90 هيرتز .. المعالج اللي هنا بيدعم تشغيل الـ120 هيرتز.


الأداء :-

سامسونج استخدمت معالج كوالكوم سناب دراجون 778 5G بتكنولوجيا 6 نانو ميتر .. المعالج ده قوي جدًا، أقوى من سناب دراجون 720G بفرق واضح جدًا سواء في الأرقام او الأداء الفعلي .. الذاكرة هنا من نوع UFS 2.1 .. كان نفسي تكون UFS 3.1 كان الأداء هيكون أفضل بفرق كبير لكن مازال الأداء كويس.

لو يهمك الأداء السريع من غير أي تقطيعات مُمكن تقابلك مع إستمرار وحفاظ على السرعة والأداء لـ3 او 4 سنين قدام يبقى الموبايل ده مناسب ليك جدًا .. وسيبك من A52 العادي.

متفتكرش ان علشان المعالج من فئة الـ700 يبقى معالج فئة متوسطة، هو فعلًا معالج فئة متوسطة بس هو أفضل معالج متوسط بأداءه ونشاطه وسرعته .. وفي نفس الوقت محافظ على إستهلاك البطارية والسخونية .. ودي حاجه صعب تلاقيها بسهولة في الفئة دي، والمعالج بصراحة ممتاز على الفئة المتوسطة العُليا.

لعبة ببجي بتشتغل على Ultra HDR وأداءها ممتاز ومفيش أي مشاكل، خاصًة مع الصوت الـStereo والشاشة المُمتازة هتاخد تجربة محترمة جدًا في الألعاب.


عوامل الأمان وعناصر اخرى :-

بصمة الموبايل موجودة تحت الشاشة .. هي أسرع من A52 العادي لكن مازالت مش أسرع بصمة وسط المُنافسين .. والـFace Unlock معقول بس برده مش أسرع حاجه.

مستشعر التقارب في الموبايل موجود سوفت وير مش حقيقي، لما جربته كتير أداءه كويس مش هيزعلك ومش هيعملك أي أزمة، شغال كويس زي Galaxy A52 بالظبط.

الموبايل بيدعم الـNFC ومدخل الـ3.5 مللي، وينفع تركب كارت ميموري مكان الشريحة الثانية، والصوت هنا Stereo وأداءه ممتاز جدًا في الفئة دي.

شبكات الـWi Fi هنا متوسطة .. سامسونج بتستخدم معايير أوروبية بتخلي الموبايل ميطلعش أشعة ضارة كبيرة وده السبب في انها بتفلتر دائمًا شبكات الـWiFi وبتظهرلك القريب بس .. اما بالنسبة لشبكات الإتصال فا هي معقولة جدًا .. دائمًا بقول شبكة سامسونج أداءها بين شاومي واوبو.


البطارية :-

البطارية حجمها 4500 مللي امبير .. أداءها معقول ويمكن أحسن من A52 حاجه بسيطة بسبب المعالج اللي هنا .. لما بتستخدم الموبايل إستخدام شاق الأداء بيفضل مُستقر وثابت على درجة سريعة تريحك في الإستخدام وفي نفس الوقت البطارية إستهلاكها بيكون كويس.

الموبايل بيدعم سرعة شحن 25 وات فقط .. سرعة بطيئة جدًا في الفئة دي بالمقارنة مع Poco F3 اللي بيشحن في أقل من ساعة وبالمقارنة مع Reno6 5G اللي بيشحن في نص ساعه .. وأصلًا الشاحن اللي في العلبة 15 وات بس.


الكاميرات :-

الكاميرات هنا مفيهاش جديد عن A52 اللي بالمناسبة تعتبر قوية جدًا .. كاميرا خلفية رئيسية 64 ميجا بيكسل F/1.8 فيها مثبت بصري حقيقي، والثانية 12 ميجا بيكسل Ultra Wide بفتحة عدسة F/2.2 والثالثة 5 ميجا بيكسل ماكرو والأخيرة 2 ميجا بيكسل للعزل .. والسيلفي بدقة 32 ميجا بيكسل بفتحة عدسة F/2.2.

أداء الكاميرات كويس جدًا وتقدر تعتمد عليه .. ومعالجة سامسونج للصور بتخلي الصور ممتازة جدًا مش محتاجه أي تعديل .. وكمية التفاصيل معقولة جدًا والـHDR مظبوط جدًا.

وبالمقارنة مع Oppo Reno 6 5G و Poco F3 فا الكاميرات بتاعت Galaxy A52s 5G تكسبهم مستريح جدًا وتتفوق عليهم بكل سهولة .. لكن لو قارنت بموبايل زي Galaxy S20 FE مثلًا هتلاقي A52s أداءه أقل.

بالنسبة لتصوير الفيديوهات فالموبايل بيصور لحد جودة 4K مع 30 فريم في الثانية .. والعدسة الـUltra Wide كمان بتصور بنفس الأرقام وتقدر تحول بين العدسة الأساسية والعدسة الواسعة وانت بتصور الفيديو .. الثبات كويس وفي وضع الـSuper Steady Mode اللي بيزود الثبات لكن الجودة هتقل .. والموبايل فيه ميكروفون عزل الضوضاء.


سعر Galaxy A52s 5G

سعر Galaxy A52s 5G :-

  • نسخة 128 جيجا مع 8 جيجا رام بسعر 7300 جنية
  • نسخة 256 جيجا مع 8 جيجا رام بسعر 8100 جنية

الموبايل بيدعم تركيب شريحتين إتصال 5G او شريحة واحدة مع كارت ميموري بحجم 1 تيرا.


الرأي النهائي :-

الـGalaxy A52s 5G بالنسبة لـA52 بيقدم معالج أقوى بفرق ضخم وإستهلاك بطارية أحسن مع شاشة 120 هيرتز وبصمة تحت الشاشة أسرع، لكن هل النقط دي تخليك تزود على الـA52 وتجيب A52s ؟ لو فارق معاك موضوع الأداء وعايز موبايل يعيش فترة أطول باداء مستقر هات A52s لكن لو مش فارق معاك هات A52 هيكون مُرضي.

قد يعجبك أيضا...

Comments

جاري التحميل...