شركة شاومي معودانا دائمًا على انها بتقدم موبايلات بقيمة قوية جدًا مقابل السعر .. ومؤخرًا شوفنا منها Redmi Note 10 اللي قدم نقاط قوة كتير جدًا قصاد مُنافسيه واتسعر بتسعير قاتل، لكن بعد ما إنتاج Note 10 اتوقف شركة شاومي اضطرت انها تسد الفجوة في الفئة السعرية دي، وبالتالي قدمت لنا Redmi 10 الجديد.
التصميم :-
تصميم ريدمي 10 معقول جدًا .. خامات خارجية من البلاستيك مقبولة جدًا في الفئة السعرية دي .. مع تصميم كاميرا خلفية مطرقع شوية بيحسسك انك ماسك موبايل غالي.
شاومي دائمًا بتحاول تحسسك بالأهمية وانك شاري موبايل غالي مهما كان الموبايل رخيص .. اللون الـGray بيظهر فيه البصمات والخرابيش فا أنصحك تفكر في اللون الأبيض.
بروز الكاميرا الخلفية كبير نسبيًا على فئة الموبايل وانه اصلًا من البلاستيك .. وفي جراب شفاف في العلبة، وبيغطي البروز بتاع الكاميرات لكن مش بشكل كبير.
الموبايل وزنه 181 جرام، وزن معقول للإستخدام في الإيد .. والتخانه بتاعته 8.9 مللي يعني مش رفيع أوي وفي نفس الوقت مش تقيل.
الشاشة :-
شاشة من نوع IPS LCD بحجم 6.5 بوصة بدقة FHD+ مع معدل تحديث 90 هيرتز .. والسيلفي موجود في ثُقب الشاشة وحجم الثُقب كبير شوية عن الطبيعي.
الشاشة مش حلوة من ناحية الألوان، ألوانها بهتانة الى حد كبير، أبعد ما يكون عن Redmi Note 10 اللي شاشته كانت AMOLED وكان بيقدم تجربة ألوان قوية .. فا خلي بالك من العيب بتاع ألوان الشاشة وحط في حساباتك Galaxy A22 اللي موجود في الفئة دي بشاشة AMOLED بألوان أفضل لكن بدقة أقل.
وبالمقارنة مع الموبايلات الـIPS LCD اللي في الفئة السعرية دي فا Redmi 10 للأسف شاشته بتخسر قدامهم، قارنته مع Realme C25 في الفيديو وبالفعل الموبايل خسر قدام C25 اللي شاشته بنفس النوع.
الأداء :-
ريدمي 10 بيجي بمعالج ميدياتك Helio G88 اللي بيشتغل بتكنولوجيا 12 نانو ميتر .. المفروض ده معالج جديد، ولكن بالتجربة فا هو ميفرقش كتير عن G85 و G80 و G70 .. وذاكرة التخزين هنا من نوع eMMC 5.1.
الأداء في الفئة دي مش قوي، وبسبب الواجهة الغير مُستقرة، شوية هتلاقي الأداء سريع وشوية هتلاقي تقطيع بسيط في الواجهة .. وبالمقارنة بـC25 فا هما زي بعض، وبالتأكيد هما أقل من ريدمي نوت 10 بفرق كبير.
وبالنسبة للـ90 هيرتز فا مش هتحس بيهم معظم الوقت .. هتحس بيهم لو بتـScroll في محتوى متحمل على موبايلك .. لو بتدور على أفضل أداء أنصحك تزود وتفكر في بدائل تانية من شاومي.
الأداء في الألعاب معقول جدًا .. لعبة ببجي بتشتغل على High HD بشكل كويس ومش هتواجه تقطيعات .. والموبايل بيسخن بس سخونية مقبولة وتشتيت الحرارة كويس لإن الجسم من البلاستيك.
عوامل الأمان وعناصر اخرى :-
البصمة موجودة على زِر الباور وأداءها مش سريع أوي، بتتأخر حاجه بسيطة بسبب الواجهة .. والـFace Unlock برده مقبول لكن مش أسرع حاجه.
الموبايل مفيهوش لمبة إشعارات ومفيش بديل ليها .. في مستشعر IR Blaster للتحكم في الأجهزة الكهربائية وفي ميكروفون اضافي لعزل الضوضاء.
الصوت الـStereo في الموبايل محترم جدًا وبيقدم تجربة مُمتعة ومن أكثر الحاجات اللي هتعجبك في الإستخدام .. وطبعًا ده موبايل إقتصادي في منفذ الـ3.5 مللي موجود.
الجيروسكوب هنا سوفت وير مش هاردوير وهيتأخر شوية .. لكن مستشعر التقارب موجود هاردوير وشغال كويس ومفيش فيه أي مشاكل .. نتمنى يكون ده الحال في كل موبايلات شاومي الجاية.
بالنسبة للشبكات فا الـWi Fi تقييم متوسط، مش أقوى حاجه .. اما في شبكات الإتصال ياخد تقييم فوق المتوسط، مفيش فيه أي مشاكل في فترة تجربتنا للموبايل.
البطارية :-
بطارية بحجم 5000 مللي امبير .. أداءها معقول الى حد كبير زي معظم موبايلات شركة شاومي اللي بجربها .. وقت إستخدام حوالي 7 ~ 8 ساعات شاشة مفتوحة.
الشاحن المُرفق مع الموبايل بقوة 22.5 وات لكن الموبايل بيشحن بـ18 وات بس .. ممكن أتقبل سرعة الشحن دي تحت الـ3000 جنية لكن فوق السعر ده لأ لإن شاومي عودتنا على الـ33 وات.
الكاميرات :-
العدسة الأساسية 50 ميجا بيكسل بفتحة عدسة F/1.8 .. الثانية 8 ميجا بيكسل بفتحة عدسة F/2.2 للتصوير الواسع .. الثالثة 2 ميجا بيكسل ماكرو والأخيرة 2 ميجا بيكسل للعزل .. والسيلفي 8 ميجا بيكسل بفتحة عدسة F/2.0.
عملنا مقارنة بين كاميرات Redmi 10 و Realme C25 و Redmi Note 10 في فيديو المراجعة
بعد التجربة والمقارنة بالمنافسين أقدر أقولك ان ريدمي 10 بيقدم كاميرا خلفية عادية مقبولة لكن مش الأفضل .. مش أحسن كاميرا في الفئة الإقتصادية تحت الـ3000 جنية مصري.
بالنسبة للكاميرا السيلفي فا الموبايل بيقدر يطلع صور مقبولة تقدر تعتمد عليها من ناحية الألوان والتفاصيل .. ولكن في الإضاءات الداخلية فا السيلفي مش حلو تمامًا، سيلفي C25 أحسن بفرق واضح.
بالنسبة لتصوير الفيديوهات بالـ ريدمي 10 فالموبايل ده إقتصادي .. أخره في تصوير الفيديوهات على 1080p مع 30 فريم في الثانية .. وطبعًا مفيش مثبت إلكتروني، وفي ميكروفون اضافي لعزل الضوضاء.
سعر Redmi 10 :-
- نسخة 64 جيجا مع 4 جيجا رام بسعر 2800 جنية
- نسخة 128 جيجا مع 4 جيجا رام بسعر 3100 جنية
- نسخة 128 جيجا مع 6 جيجا رام بسعر 3400 جنية
وطبعًا بينفع تركب شريحتين إتصال من الجيل الرابع مع كارت ميموري بحجم 512 جيجا.
الرأي النهائي :-
موبايل ريدمي 10 نازل عالي شوية عن السعر اللي المفروض يتوفر بيه في الأسواق .. مُمكن ده بسبب هدية الحجز المُسبق مثلًا، لكن المنطقي ان النسخة الـ128 جيجا مع 4 جيجا رام تكون تحت الـ3000 جنية .. وبالفعل احنا بنتوقع ان الموبايل خلال أسبوع سعره هيكون تحت الـ3000 جنية في المحلات.
موبايل ريدمي 10 من شاومي مقدمش أي جديد .. معظم مميزات الموبايل ده شوفناها قبل كده من شاومي تحت الـ3 الاف جنية .. سواء الصوت الـStereo او مستشعر الـIR Blaster او الشاحن الـ18 وات او المعالج اللي اداءه مش فارق عن G85 او الكاميرات اللي أداها متواضع مش قوية.
كل المميزات دي شوفناها في Poco M3 و Redmi 9T و Redmi Note 8 2021 .. يمكن ريدمي 10 بيقدم ميكس لطيف بين كل الموبايلات دي زيادة عليهم مستشعر التقارب اللي شغال كويس بدون أي مشاكل وشبكة الإتصال الممتازة .. وكمان الـ90 هيرتز لكن مش هتحس بيهم أوي في إستخدامك.
Comments