شركة سامسونج نزلت Samsung Galaxy A53 5G الجديد بشكل رسمي في السوق المصري .. والموبايل نزل سعره أغلى من Galaxy A52s 5G .. وطبيعي ان سعر الموبايل أول ما بينزل بيكون غالي وبعدين بيبدأ يقل في المحلات .. والنهارده هنقدملكم مراجعة Galaxy A53 5G الجديد ونوضح مميزاته وعيوبه.
التصميم :-
تصميم الموبايل كـ شكل مختلفش عن تصميم الجيل القديم، نفس تصميم Galaxy A52 و A52s 5G .. تصميم كويس ناجح وعاجب ناس كتير .. وطبعًا نفس الخامات البلاستيكية مع فريم عريض شوية عن الأول.
وزن الموبايل حوالي 189 جرام وتخانه 8.1 مللي .. مفيش أي مشكلة في وزن الموبايل ومسكته في الإيد، وبروز الكاميرات كمان كويس جدًا ومفيش منه مشاكل.
الموبايل مقاوم للماء والغبار بشهادة IP67 .. ميزة حصرية في موبايلات سامسونج الموجودة في الفئة المتوسطة، بتضمنلهم نقطة تفوق على كل المنافسين.
الشاشة :-
شاشة Super AMOLED بحجم 6.5 بوصة بدقة FHD+ مع تردد بيوصل لـ120 هيرتز .. شاشة ممتازة جدًا، شاشات سامسونج الـAMOLED لا يُعلى عليها.
هتاخد أفضل تجربة مشاهدة فيديوهات بألوان مُشبعة مظبوطة جدًا، مع سطوع كويس جدًا تحت الشمس، وكمان معدل تحديث ممتاز بيحسن من تجربة الأداء.
الحاجه اللي كانت تنقص الشاشة دي هي الحواف، حواف الشاشة كبيرة جدًا .. كانت محتاجه تقل شوية .. لكنها معمولة كويس وفيها توازن كويس، بس لو كانت أقل شوية كانت هتبقى أفضل.
الموبايل بيجي في العلبة معليهوش سكرينه .. لكن الشاشة عليها طبقة حماية Corning Gorilla Glass الجيل الخامس.
الأداء :-
سامسونج استخدمت معالج من تصنيعها .. وهو Exynos 1280 الجديد بتكنولوجيا 5 نانو ميتر .. هو معالج أقوى من SD720G الموجود في A52 ويعتبر تطوير عنه .. لكنه أقل من SD778G الموجود في A52s 5G .. وكمان سرعة الذاكرة في A52s 5G أسرع من Galaxy A53 بفرق مش قليل.
أداء A53 كويس لو هتقارنه بـGalaxy A52 .. أحسن وأسرع وأسلس مع الـ120 هيرتز .. ولكن كنت منتظر تطوير أكثر من كده .. الموبايل فعلًا أداءه أقل بفرق واضح عن Galaxy A52s 5G .. وده بيبان في الـAnimations والتنقل في الواجهة وفي فتح برامج تقيلة على الموبايل.
الحاجه اللي فعلا كويسة في A53 هي إستهلاك البطارية .. المعالج بتكنولوجيا 5 نانو ميتر موفر جدًا في البطارية ومساعدها على أنها تقدم أداء ممتاز.
لعبة ببجي بتشتغل على High HD فقط .. لسه المطورين مظبطوش إعدادات المعالج الجديد بتاع سامسونج مع اللعبة .. لكن A52s 5G كان بيشغلها على Ultra HD.
بالنسبة للسخونة فالمعالج ممتاز مش بيسخن بسهولة ومش بيحصل له إختناق لما تضغط عليه.
عوامل الأمان وعناصر اخرى :-
بصمة Galaxy A53 موجودة تحت الشاشة .. مازالت بنفس سرعة A52 و A52s 5G .. مش أسرع بصمة، هي مش كارثية لكن كل المنافسين تقريبًا بيقدموا بصمة أسرع، والـFace Unlock برده سرعته متوسطة.
طبعًا A53 بيجي من العلبة عليه Android 12 .. سوفت وير سامسونج الجديد عظيم جدًا، والموبايل بيدعم Always On Display وبيدعم NFC وميكروفون اضافي لعزل الضوضاء.
لكن للأسف مفيش منفذ الـ3.5 مللي .. وده علشان يكبروا البطارية شوية .. لكن الصوت Stereo عالي ومحترم بنفس جودة صوت A52 و A52s 5G.
المستشعرات زي A52 و A52s 5G برده .. مستشعر التقارب أداءه زيهم، مش أسرع حاجه بس مش هيزعلك أوي.
بالنسبة لشبكات الـWi Fi فا هي مش أفضل حاجه، بيعمل Filter للشبكات البعيدة عنك وانت بتعمل Connect .. وبالنسبة لشبكات الإتصال فا هي ممتازة مفيهاش أي مشاكل.
البطارية :-
بطارية 5000 مللي امبير كبيرة مع معالج 5 نانو ميتر .. أداء بطارية ممتازة وأحسن من A52 و A52s 5G بفرق مش قليل .. ممكن الموبايل يقعد ساعه شاشة مفتوحة أزيد عنهم.
أقصى قوة شحن 25 وات .. أقل من كل المنافسين، وكمان مفيش شاحن في العلبة .. حركة تضايق بصراحة.
الكاميرات :-
الموبايل بيجي بنفس الكاميرات الموجودة في A52s 5G .. كاميرا أساسية 64 ميجا بيكسل بفتحة عدسة F/1.8 بمثبت بصري، كاميرا Ultra Wide بدقة 12 ميجا بيكسل بفتحة عدسة F/2.3 .. كاميرتين 5 ميجا بيكسل للكامرو والعزل .. ونفس الكاميرا السيلفي بدقة 32 ميجا بيكسل بفتحة عدسة F/2.2.
سامسونج استخدمت نفس المستشعر الـ64 ميجا بيكسل اللي مثبت بصري واللي بيقدم اداء ممتاز جدًا في الفئة دي .. الفرق بين الجيل الجديد والجيل اللي فات هيكون في طريقة معالجة الصور بالمعالج الجديد والسوفت وير الجديد .. في تحسن في طريقة المعالجة.
لون البشره بقى أفضل .. الصور مُشبعة أكتر .. لون السماء أفضل، الـHDR بيشتغل بطريقة مظبوطة أكثر .. لمسات بسيطة لكن بتحسن من التجربة الإجمالية للتصوير.
لكن اللي اتظبط أوي هو السيلفي .. سيلفي A52 و A52s 5G كان فيه مشاكل في معالجة الصور .. اما الـA53 اتظبط جدًا، ألوان البشرة اتظبطت كتير والـHDR اتحسن كتير .. أقدر أقول فعلًا ان في تطور ملحوظ عن الجيل اللي فات .. برغم انه نفس المستشعر إلا ان الأداء أختلف كتير.
بالنسبة لتصوير الفيديوهات فالموبايل بيدعم تصوير بجودة 4K مع 30 فريم في الثانية بدعم للمثبت البصري الحقيقي .. والموبايل يعتبر من أفضل الموبايلات من حيث تصوير الفيديوهات في الفئة دي بالمثبت البصري.
سعر Galaxy A53 5G :-
- نسخة 128 جيجا مع 8 جيجا رام بسعر رسمي 8000 جنية
- نسخة 256 جيجا مع 8 جيجا رام بسعر رسمي 8800 جنية
والموبايل بيدعم تركيب شريحتين إتصال من الجيل الخامس او شريحة مع كارت ميموري 1 تيرا.
الرأي النهائي :-
نقاط تفوق Galaxy A52s 5G على A53 5G :-
- سعر أرخص
- في شاحن وجراب في العلبة
- المعالج أقوى وبيقدم أداء أفضل خصوصا في الألعاب
- وجود مدخل السماعات الـ3.5 مللي
لو قدامك A52s 5G و A53 فانا برشحلك A52s 5G اللي بيتفوق في النقط اللي وضحتهالك فوق بالإضافة لإن سعره هيكون أرخص.
نقاط تفوق Galaxy A53 5G على A52s 5G :-
- بطارية أفضل
- معالجة الصور أفضل في الكاميرا الأمامية والخلفية
مميزات Galaxy A53 :-
- واحدة من أفضل الكاميرات في الفئة المتوسطة
- مقاومة للماء والغبار
- صوت Stereo ممتاز
- بطارية أداءها قوي
- شاشة ممتازة جدًا بمعدل تحديث عالي
عيوب Galaxy A53 :-
- البصمة الموجودة تحت الشاشة مش الأسرع
- مستشعر التقارب أداءه مش الأفضل
- أداء الموبايل في الألعاب مش الأفضل
- سرعة شحن ضعيفة في الفئة دي
- مفيش شاحن او جراب في العلبة
Comments