مراجعة Samsung Galaxy A73 الجديد – هو فين الجديد ؟!

موبايل Galaxy A73 5G نزل السوق المصري مؤخرًا علشان ينافس في الفئة المتوسطة العُليا لكن بالأسعار الجديدة .. واللي ممكن تكون قريبة من موبايلات Flagship قديمة .. النهارده هنقدملكم مراجعة Galaxy A73 الجديد من سامسونج وهنوضح الفروقات بينه وبين Galaxy A52s 5G اللي يعتبر الجيل القديم منه!


التصميم :-

موبايل Galaxy A73 واخد نفس شكل وتصميم سلسلة الـGalaxy A الجديدة .. مش هتعرف تميزهم عن بعض .. لكن هو أكبر واحد فيهم لإن شاشته ضخمه .. وطبعًا الخامات الخارجية بالكامل من البلاستيك.

الكاميرا الخلفية مش بارزة أوي عن ظهر الموبايل مع ان المستشعر 108 ميجا بيكسل فا دي حاجه كويسة جدًا .. وكمان جزء الكاميرا الخلفية مش منفصل عن ظهر الموبايل .. وده بياكد على جودة التقفيل.

بمناسبة جودة التقفيل فا A73 بيجي مقاوم للماء بشهادة IP67 زي أخواته الأصغر .. وزن الموبايل 181 جرام وتخانته 7.6 مللي .. ودي تخانه ووزن أقل من Galaxy A52s 5G.


الشاشة :-

الموبايل بيجي بشاشة 6.7 بوصة Super AMOLED Plus بدقة FHD+ مع تردد بيوصل لـ120 هيرتز وثُقب كبير للسيلفي.

انت مش هتحتاج شاشة أفضل من كده في الفئة السعرية دي .. شاشة بتقدملك كل حاجه، يمكن ألوانها أفتح شوية من Galaxy A52s 5G، لكن المشكلة الوحيدة في ثُقب السيلفي لإنه كبير جدًا.

حواف الشاشة كبيرة .. كنت اتمنى انها تكون أصغر من كده، والشاشة عليها طبقة حماية Corning Gorilla Glass الجيل الخامس لكن مش بتيجي متركب عليها سكرينه.


الأداء :-

مفيش جديد .. معالج كوالكوم سناب دراجون 778G تكنولوجيا 6 نانو ميتر مع دعم لشبكات الجيل الخامس وتردد شاشة بيوصل لـ120 هيرتز وذاكرة تخزين UFS 2.1 وواجهة سامسونج One UI 4.1 بـAndroid 12.

الموبايل نفس أداء A52s 5G بالظبط بدون أي إختلاف .. أداء كويس جدًا والمعالج من أفضل المعالجات الموجودة في الفئة المتوسطة العُليا .. بيقدملك أداء كويس جدًا ونشيط نوعًا ما، وفي نفس الوقت بيقدر يحافظ على إستهلاك الطاقة ومش بيسخن .. معالج “ماسك العصاية من النص”!

وبالمقارنة مع Exynos 1280 الموجود في Galaxy A53 فا أنا هفضل الـSD778G .. لكن لو عايز أداء أفضل بنفس السعر فا ممكن تشوف iPhone 12 او Xiaomi 11T .. او Galaxy S20 FE نسخة سناب دراجون .. كل دي موبايلات هتقدملك أداء أفضل.

وبالنسبة لتجربة الألعاب فا ببجي بتشتغل على Ultra HDR واللعبة بتشتغل كويس جدًا.


عوامل الأمان وعناصر اخرى :-

البصمة موجودة تحت الشاشة .. مش أسرع حاجه، نفس أداء الـA52s 5G .. لازم تضغط جامد وضغطه مُطولة على البصمة علشان تفتح .. والـFace Unlock برده مش أسرع حاجه.

الموبايل بيدعم الـNFC .. وبالنسبة للصوت فا هو Stereo وعالي ومجسم، ده كمان أعلى من صوت A52s 5G بفرق واضح وملحوظ ودي ميزة قوية جدًا.

المستشعرات كلها موجودة وشغاله كويس .. ومستشعر التقارب بتاع المكالمات شغال ممتاز مفيهوش غلطه، والموبايل فيه ميكروفون اضافي لعزل الضوضاء.

بالنسبة للشبكات فا الـWi Fi مش أقوى حاجه .. الموبايل بيعمل Filter للشبكات الضعيفة البعيدة عنك .. وشبكات الإتصال كويسة مفيهاش مشاكل .. بس أضعف من موبايلات اوبو وهواوي.


البطارية :-

بطارية 5000 مللي امبير .. أكبر من بطارية A52s 5G .. توقعت ان هلاقي أداء أقوى بفرق محترم عن A52s 5G ولكن لأ الفرق مش كبير في الأداء علشان شاشة A73 كبيرة .. تقدر تقول ان بطارية A73 أداءها الفعلي أفضل بنسبة لا تتعدى 10% من أداء بطارية A52s 5G.

بس ده مش معناه ان بطارية A73 وحشه .. البطارية ممتازة جدًا وهتكمل معاك اليوم مستريح .. بس العيب ان مفيش شاحن في العلبة، وأقصى سرعة شحن بيدعمها الموبايل 25 وات.

جربت شاحن 25 وات شحن الموبايل في حوالي ساعة و11 دقيقة .. مش وحش ومش حلو، في موبايلات تانية في الفئة دي بتشحن في أقل من نص ساعة.


الكاميرات :-

الموبايل بيجي بعدسة خلفية 108 ميجا بيكسل بفتحة عدسة F/1.8 فيها مثبت بصري .. مع عدسة Ultra Wide وعدسة Macro وعدسة للعزل .. اما السيلفي فا هي بدقة 32 ميجا بيكسل بفتحة عدسة F/2.2.

موبايل A52s 5G كان ممتاز جدًا .. الـA73 جه يظبط بعض النواقص .. ممكن نلخص الفرق بينهم في ان الألوان بقت أفضل ولون البشرة أفضل وتفاصيل الصورة بقت أكثر حاجه بسيطة .. A73 يكسب معظم موبايلات الفئة المتوسطة العُليا في التصوير من باقي شركات الموبايلات.

وبالنسبة للملحوظات فا Galaxy A73 ساعات الـHDR بيعلق .. وكمان الـZoom بتاع الـA52s 5G أفضل شوية .. في الإضاءة الداخلية مفيش تطوير واضح عن A52s 5G .. الأداء متقارب جدًا والفروقات بين الموبايلين محدودة جدًا.

مُجملًا وزي ما وضحتلك مقارنة بباقي موبايلات الفئة المتوسطة العُليا فا الموبايل هو أفضلهم .. لكن لو هتقارن بموبايل Flagship قديم زي Galaxy S20 FE فا هتلاقي في فرق بسيط بينهم لصالح الـS20 FE.

بالنسبة للسيلفي فا هو هو نفس اللي كان موجود في A52s 5G .. لكن الأداء اتحسن بنسبة 10% ~ 15% عن A52s 5G .. وبرده الفرق مش واضح ومش هتلاحظة بسهولة.

بالنسبة لتصوير الفيديوهات فا الموبايل بيدعم تصوير بجودة 4K مع 30 فريم في الثانية .. والموبايل فيه مثبت بصري حقيقي .. والموبايل فيه ميكروفون اضافي لعزل الضوضاء.


سعر Galaxy A73

سعر Galaxy A73 :-

  • نسخة 128 جيجا مع 8 جيجا رام بسعر 11000 جنية
  • نسخة 256 جيجا مع 8 جيجا رام بسعر 12000 جنية

والموبايل بيدعم تركيب شريحتين إتصال 5G او شريحة واحدة مع كارت ميموري 1 تيرا.


الرأي النهائي :-

بما ان Galaxy A52s 5G النسخة الـ128 جيجا مع 8 جيجا رام بحوالي 8 الاف جنية فا انت بتتكلم في فرق 3 الاف جنية بين الموبايلين .. هل يستاهل فرق الكاميرا الخلفية البسيط وفرق الشاشة الأكبر والبطارية الأكبر والصوت الأعلى؟ .. لا ميستاهلش بصراحة، وكمان A52s 5G معاه شاحن في العلبة وجراب وسكرينة، وكمان بيدعم منفذ 3.5 مللي.

فكدا بوجود A52s هيكون اختيار منطقي وموفر وادائه متقارب من A73.

اما لو انت هتدفع ثمن الـGalaxy A73 5G فا لازم تكون عارف ان المبلغ ده يجيبلك iPhone 11 او Galaxy S20 FE SD او موبايل Xiaomi 11T Pro وكل دي موبايلات هتقدملك تجربة أحسن منه.

قد يعجبك أيضا...

Comments

جاري التحميل...