مراجعة موبايل Samsung Galaxy M30s – قنبلة سامسونج في الفئة المتوسطة !

جربنا الباور بنك المتخفي في شكل موبايل ببطارية 6000 مللي أمبير وهو هاتف Samsung M30s … اللي فعلا مليان مواصفات زي الشاشة السوبر أموليد بحجم 6.4 بوصة و الكاميرا الخلفية الثلاثية بجودة 48+8+5 و السيلفي 16 ميجا بيكسل مع معالج Exynos 9611.

و لأول مرة أحس أن سامسونج بقت بتديلك قيمة مقابل سعر و في شوية عيوب مخفية هنشوفها مع بعض في مراجعتنا لهاتف Samsung M30S.


مواصفات Samsung Galaxy M30s :-

  • أبعاد الهاتف 159x 75.1×8.9 ملم.
  • وزن الهاتف 188 جرام مع تصميم بلاستيك.
  • تأتي شاشة الهاتف سوبر أموليد بقياس 6.4 بوصة و دقة Full HD+ بجودة 1080*2340 بيكسل مع كثافة بيكسلات 403 بيكسل لكل بوصة.
  • معالج الهاتف هو Exynos 9611 مع معالج رسوميات Mali-G72 MP3.
  • يأتي الهاتف بنظام تشغيل اندرويد Pie 9.0 مع واجهة مستخدم One UI.
  • الهاتف متوفر باصدار ذاكرة داخلية 64 جيجا بايت مع 4 جيجا بايت رام ذاكرة عشوائية.
  • كاميرا الهاتف الخلفية تأتي ثلاثية بجودة 48 ميجا بيكسل مع فتحة عدسة f/2.0 و الثانية للتصوير الواسع بجودة 8 ميجا بيكسل مع فتحة عدسة f/2.2 و الاخيرة بجودة 5 ميجا بيكسل للعزل.
  • كاميرا السيلفي تأتي بجودة 16 مع فتحة عدسة F/2.0.
  • بطارية الهاتف تأتي بسعة 6000 مللي أمبير.
  • متوفر بالهاتف ميكروفون اضافي لإزالة الضوضاء.
  • يدعم الهاتف تشغيل الراديو FM.
  • يتوافر بالهاتف بصمة خلفية و Face Unlock.
  • متوفر بالهاتف دعم شبكات الجيل الثاني والثالث والرابع عن طريق شريحتين اتصال من نوع nano.
  • الهاتف متاح في الأسواق بألوان الأسود و الأزرق و الأبيض.

 

مميزات سامسونج M30s :-

  • يمكنك استخدام كارت ذاكرة خارجي فى نفس الوقت مع شريحتين الاتصال.
  • بطارية ضخمة 6000 مللي أمبير تقدم أداء جيد ولم تؤثر على وزن الهاتف.
  • أداء المعالج جيد مقارنة بالفئة السعرية التى ينتمي اليها الهاتف.
  • لا يوجد بروز فى الكاميرا الخلفية.
  • شاشة أموليد ممتازة من سامسونج بدقة فوق الممتازة وسطوع ممتاز.

 

عيوب Samsung M30s :-

  • غياب لمبة الاشعارات ولكن يتواجد Always on Display لعرض ايقونات الاشعارات على الشاشة المقفولة.
  • لا يوجد طبقة حماية على الشاشة.
  • لا يوجد جراب فى عبة الهاتف.
  • الهاتف لا يدعم مستشعر ضوء حقيقي.
  • الهاتف مصنوع من البلاستيك علشان كده سهل يتجرح و يتخربش.
  • قوة الشبكة ليست الأفضل فى هذه الفئة السعرية.

لو عاوز تشتري موبايل .. ممكن تشتريه من موقع نون وتشوف كود خصم نون علشان تاخد تخفيض محترم .


التصميم :-

هاتف Samsung M30s مصنوع من البولي كاربونيت يعني من البلاستيك و سامسونج وفرت جدا في تصميم الموبايل هو تصميم تقليدي جدا مع تدرج بسيط جدا في اللون بتاع الظهر من اليمين للشمال مع انحناءات في الظهر هتخلي مسكة الموبايل في الإيد مقبولة طبعا علشان البطارية العملاقة اللي ف الموبايل هتلاقيه سميك حبتين في ايديك بس نيجي عند الوزن هتلاقي حاجة جميلة جدا يا سامسونج بالرغم من البطارية الكبيرة إلا أن الموبايل وزنه مقبول جدا جدا مش هتحس أنك ماسك موبايل تقيل في ايديك.

وأحب اشكر سامسونج علي​ أن مفيش بروز نهائي في الكاميرات هنا بس أحب أقولها إن التصميم بتاع الكاميرات معجبنيش.

اخر نقطة سلبية في التصميم هي البلاستيك مشكلته أنه هيتخدش من الهوا و سامسونج وفرت و مفيش جراب في صندوق الهاتف فاعمل حسابك تشتري جراب وبسرعة.

تحتوي الواجهة الأمامية للهاتف علي شاشة بدقة 6.4 بوصة أعلاها نجد نوتش Drop water هنلاقي فيه الكاميرا الأمامية بجودة 16 ميجا بيكسل مع سماعة المكالمات.

علي الجانب الأيمن للهاتف نجد زر التشغيل لفتح وغلق الهاتف و أزرار التحكم في الصوت.

علي الجانب الأيسر للهاتف نجد منفذ دخول شريحتين الاتصال و كارت ذاكرة خارجي.

أعلي الهاتف نجد ميكروفون اضافي لإزالة الضوضاء.

أسفل الهاتف نجد ميكروفون المكالمات و السماعة الخارجية و منفذ كابل الشحن و منفذ 3.5 ملم لسماعات الرأس.

ظهر الهاتف يحتوي على الكاميرا الخلفية الثلاثة 48+8+5 فى أعلى يسار الهاتف و بجانبهم فلاش LED و فى منتصف ظهر الهاتف نجد مستشعر بصمة الاصبع.

الهاتف متوفر في الأسواق بألوان الأبيض و الأسود و الأزرق.


الشاشة :-

سامسونج فعلا بتعرف تعمل شاشات هنا الشاشة حجمها 6.4 بوصة من نوع سوبر أموليد بدقة Full HD+ بجودة 1080*2340 بيكسل بكثافة بيكسلات فوق الـ 400 بيكسل ف البوصة و بالتالي هتاخد من الشاشة دقة محترمة و ألوان مشبعة وسطوع تحت الشمس عالي ومفيهوش أي مشاكل.

شخصيا حسيت و أنا بستخدم الشاشة هنا إني بقالي فترة مشوفتش شاشة حلوة كدا في الفئة السعرية دي أحسن من شاشة موبايل Samsung A30s اللي لسه نازل علشان الدقة بتاعت M30s أعلى.

وكمان مفيش اسكرينة على الشاشة فالتجربة كانت حلوة أوي و انت شايف الشاشة النظيفة دي من غير حتى اسكرينة و خلي بالك إن سامسونج بايعة قصة الحماية في الموبايل ده و لازم بردوا تشتري اسكرينة لأنه مش متركب عليه اسكرينة.

فمن الاخر سامسونج حطتلك أحسن شاشة في الفئة السعرية ديه.


الأداء :-

فاكر المعالج بتاع Samsung A50 , سامسونج خدته طورته وبقا اسمه Exynos 9611 وحطته في الموبايل ده يعني حطتلك معالج هي كانت بتحطه ف فئة سعرية أعلى في موبايل أرخص ايه الجمال ده.

بس خلي بالك المعالج ده يدوب مكافئ لأداء سناب دراجون 660 ميقدرش ينافس 710 و لا 712.

و بالتالي أداء الموبايل مقبول جدا محستش بمشاكل معاه وخصوصا أني بحب اقفل انيميشن واجهة سامسونج علشان احس أن الموبايل سريع وخفيف.

الأداء الرسومي ممتاز جدا مع معالج Mali-G72 MP3 لعبة PUBG لاقيتها بتشتغل على Ultra HD اي نعم ممكن تسقط فريم و لا اتنين بعد فترة من اللعب مفيش مشكلة ممكن تنزلها لـ HD و العب بدون أي تسقيط فريمات.

و Call of duty شغالة على جرافيك High بدون أي مشاكل أو تهنيج و مفيش أي سخونية كبيرة في جسم الموبايل فعلا بيفضل دافي حتى بعد اللعب فترة عليه.

و أحب افكرك أن المعالج ده أعلى من المعالج الموجود في سامسونج A30S.


عوامل الامان و حماية الخصوصية :-

مستشعر البصمة موجود في ظهر الهاتف و البصمة عملية جميلة اللي المستخدم المصري الاصيل بيعشقها أداءها سريع مش الأسرع بس مقبول.

واللي عجبني ف الموبايل ده ال Face unlock أول مرة اجرب حاجة زيه سريع من سامسونج ويعتمد عليه بالطريقة ديه.


نظام التشغيل و واجهة المستخدم :-

يتم اصدار هاتف بنظام تشغيل اندرويد pie 9.0 و واجهة مستخدم One UI مليان انبهارات و مفاجات لو أول مرة تستخدمه.

تمكنك الواجهة من تحميل نستختين من برامج التواصل الاجتماعى Dual apps و وجود وضع Night mode الذي يمكنك من تحويل خلفية الهاتف الى قوائم سوداء.

الموبايل مفيش فيه لمبة اشعارات و الموضوع ده تم التعويض عنه بخاصية Always on display اللي بيعرض ايقونات الاشعارات علي الشاشة المقفولة و كمان ايقونات الاشعارات بتظهر جمب النوتش.

للأسف الموبايل مفيش فيه مستشعر ضوء حقيقي الموبايل بيعتمد ع الكاميرا السيلفي علشان يقدر يغير ضبط سطوع الشاشة و الموضوع ده بيتأخر وبيلغط كتير و معظم الوقت اعتمدت ع نفسي في تحديد درجة السطوع.


الدعم و الاتصال :-

يدعم الهاتف شبكات اتصال الجيل الثاني والثالث والرابع عن طريق شريحتين اتصال من نوع نانو.

بالنسبة لقوة الشبكة أداء الـ M30s مش وحش مش أحسن حاجة في الفئة السعرية دي و لكنه مش هيمنعك من أنك تشتريه بس لازم تبقى فاهم أنه مش الأحسن و أنك لو بتتواجد في أماكن شبكتها ضعيفة جدا في بدايل أحسن.

يدعم الهاتف Wi-Fi 802.11 b/g/n مع دعم خاصية Wi-Fi direct و امكانية انشاء Hotspot.

يدعم الهاتف بلوتوث 5.0, A2DP, LE

يدعم الهاتف GPS مع خواص ,A-GPS GLONASS BDS ,GALILEO

يدعم الهاتف تشغيل الراديو FM.
يدعم الهاتف مستشعر الجيروسكوب حيث استخدام نظارات الواقع الافتراضي و مشاهدة فيديوهات درجة.


الصوت :-

صوت السماعة الخارجية مفاجأة .. عالي ومجسم ويعتمد عليه و أحسن بمراحل من الـ A30s وصوت سماعات المكالمات و سماعات الأذن كويسين ومفيش فيهم مشاكل.


البطارية :-

أكبر بطارية جربتها الفترة ديه في الـ M30s وهي 6000 مللي امبير قدمت أداء فعلي 9 ساعات شاشة مفتوحة باستخدام متوسط .. كنت متوقع 10 ساعات و أكتر بس طبعا علشان الشاشة Full HD و موضوع مستشعر الاضاءة اللي مش مظبوط وسوفت وير سامسونج اللي بياخد راحته شوية في الاستهلاك النتيجة كانت 9 ساعات وهي مش وحشة .. ده أحسن موبايل من سامسونج جربته من ناحية البطارية.

الموبايل بيجي بمنفذ USB Type C وشاحن 15 واط للأسف كان المفروض شاحن أسرع بس زي ما قلتلك علشان الخلطة تبقي اقتصادية وعموما الشاحن ده بيشحن البطارية في ساعتين ونص تقريبا.


الكاميرات :-

هاتف Samsung Galaxy M30s بـ 3 كاميرات في الظهر الاساسية 48 ميجا بيكسل مع فتحة عدسة 2.0 و التانية 8 ميجا بيكسل مع فتحة عدسة 2.2 للتصوير الواسع و التالتة 5 ميجا بيكسل للعزل مع تصوير فيديوهات بجودة 4K 2160 بيسكل مع 30 لقطة فى الثانية و بجودة 1080 بيسكل مع 30 لقطة فى الثانية مع مثبت اليكترونى gyro EIS.

والسيلفي 16 ميجا بيكسل مع فتحة عدسة 2.0 .

سوفت وير الكاميرا سهل ومفيش فيه فزلكة و كمان فيه Night mode و اللي يعتبر اضافة جديدة من سامسونج في الفئة السعرية دي و اللي بتقدر من خلاله تطلع صور أحسن شوية في الاضاءات الضعيفة بس لازم تكون الاضاءة ضعيفة.

أداء الكاميرا الخلفية يعتمد عليه جدا، التصوير العادي ممتاز في اضاءة الشمس و الألوان مظبوطة و واقعية كالعادة.

في البورتريه الصورة ألوانها و تفاصيلها أقل بس مازالت مقبولة.

تجربة تصوير الورد و السما و الطبيعة عموما، الصور ألوانها مظبوطة جدا و واقعية جدا جدا.

بالنسبة لتجربة ال wide angel العدسة اللي ممكن تستخدمها لو هتصور كادر اوسع بكتير من العدسة العادية و أداءها مش وحش.

التصوير في اضاءة داخلية، الصورة مظبوطة جدا وتفاصيلها كتير جدا و البورتريه كويس بردوا بس غلط في كام مكان في العزل بس ما زالت مقبولة.

في التصوير بالليل مفاجأة، بالرغم من أن العدسة ضيقة إلا أن الصور في الاضاءة المقبولة بالليل كويسة جدا جدا.

ال Night mode بيدي لمسة بسيطة علي​ الصورة و بيخليها أحسن بفرق بسيط.

وبالنسبة للسيلفي فهو مقبول جدا في الفئة السعرية ديه ومطلع صور كويسة في الاضاءات القوية يمكن ساعات كنت بحس أن العزل مش كويس أوي في صور البورتريه بس ما زال مقبول جدا.

في الاضاءة الداخلية الصور العادية مقبولة بس البورتريه هيبدي يغلط أكتر و أكتر.

في الاضاءة الليلة ببرنامج الكاميرا وبرنامج جوجل كاميرا مفيش فرق جوهري.

لما الاضاءة بتقل أوي مش هتلاقي تفاصيل والصور بتفقد حدتها و الألوان بتبقي بهتانة شوية.

ممكن تشوف الصور المتصورة بالموبايل في فيديو المراجعة في أخر المقالة.


محتويات صندوق الهاتف :-

هاتف Samsung M30S
كُتيب التعليمات والتشغيل والضمان
الشاحن
كابل الشحن
دبوس معدني لفتح درج الشريحة
سماعات الرأس headphones


سعر الهاتف :-

3666 جنيه مصري للنسخة الوحيدة 64 جيجا مع 4 جيجا رام.

الموبايل موجود على موقع جوميا حصري وبعد كده هيبقي موجود في المحلات وتقدر تشتريه من أي حته وممكن تلاقي في أي وقت سامسونج نزلت النسخة الأكبر ال 128 جيجا من الموبايل ده.


رأي موبيزل النهائي :-

Samsung M30s برنس جدا في الشاشة الأموليد اللي دقتها ممتازة و ألوانها مفيش أحسن منها ملوش منافس تقريبا .. بطارية ضخمة جدا أدائها تقريبا زي البطارية الـ 5000 بتاعة الريلمي 5 واللي هي ممتازة .. صوت الموبايل ممتاز و الأداء مقبول خصوصا في الأداء الرسومي و كمان مفيش أي بروز نهائي في الكاميرات حاجة بتعجبني جدا جدا في الموبايلات.

اللي مش حلو هنا بقي أن مستشعر الضوء ومستشعر المكالمات بيعلق احيانا و التصميم رخيص شوية و الشاحن اللي جاي مع الموبايل مش سريع أوي ومفيش أي نوع من أنواع الحماية جاية مع الموبايل ولا جراب ولا سكرينة و لازم تعمل حسابك تشتريهم و كان من الأفضل لو الشبكة تبقي أقوى من كدا شوية.

الموبايل ده حرفيا يقدر يقف ويسد قدام كل المنافسين ويتفوق عليهم في بعض النقط اللي قلتها من شوية و أتوقع نجاح باهر جدا جدا له.


فيديو المراجعة على اليوتيوب :-

قد يعجبك أيضا...

Comments

جاري التحميل...