سامسونج لسه مكمله في ضجة كبيرة في سوق الموبايلات اليومين دول .. والمرة دي معانا موبايل جديد من عيلة النوت .. وهو Samsung Galaxy Note 10 Lite .. الموبايل ده نازل علشان يقدملك موبايل باسم سامسونج نوت ومعاه قلم .. وبسعر كويس يقدر عليه ناس كتير .. بس الفكرة كلها .. هل انت محتاج القلم ده ؟ .. طيب امتى تشتري النوت 10 لايت ؟ .. طيب الكاميرا الـ 12 ميجا بيكسل بتاعته تقدر تسد قصاد الـ 108 ميجا بيكسل بتاعت الـ Mi Note 10 من شاومي ؟
كل التساؤلات والمخاوف الي انت بتفكر فيها هوضحهالك بكل تفصيل في المراجعة دي النهارده.
التصميم :-
للأسف .. النوت 10 لايت ملوش علاقة بعيلة النوت في جزئية التصميم .. لان ظهر الـ Note 10 Lite للأسف من البلاستيك ( سامسونج بتقول عليه جلاستيك بس هو من الأخر من البلاستيك ) .. بس يعني لحقوا نفسهم وحطوا فريم معدن متين علشان الموبايل يمسك نفسه كدا في ايدك .. وحقيقي اما تمسك الموبايل ده وتمسك الـ Galaxy A71 هتفهم فعلا ان النوت 10 لايت ماسك نفسه وامتن بكتير من الـ A71.
بس طبعا مقدرش اقلك ان الظهر البلاستيك بالسعر ده مش عيب .. لأ هو عيب وكبير كمان .. بس دوري افهمك ان الظهر البلاستيك ده تضحية من التضحيات الي بتقدمها علشان تاخد جالاكسي نوت بسعر رخيص.
طبعا الموبايل وزنه تقيل شوية علشان الفريم المعدن والقلم .. وزنه داخل في الـ 200 جرام .. بس مسكته في الايد مش وحشة اوي علشان في كيرفات بسيطة في الظهر وكمان مفيش بروز كاميرات نهائي.
بس ده ميمنعكش تركب الجراب الشفاف الي جاي مع الموبايل ده علشان تحافظ على الظهر البلاستيكي من الخربشة .. لإن زي ما بنقول دايمًا البلاستيك بيتخربش وبيتبهدل بسهولة وبسرعة جدا !
الشاشة :-
وهنا سامسونج شغلت دماغها .. واخدت شاشة الـ A71 هيا هي وحطتها في الـNote 10 Lite .. نفس الشاشة الـ6.7 بوصة السوبر اموليد الي بدقة FHD+ .. وطبعا الشاشة بالتريند الجديد ثقب السيلفي الي في نص الشاشة .. وهنا الثقب اصغر من الموجود في الـA71.
طبعا لا خلاف ان الشاشة جامدة جدا من ناحية الالوان والسطوع وزوايا الرؤية .. مفيش اي نقطة سلبية في جزئية الشاشة.
وطبعا الشاشة هنا مش بتقدم دقة عالية زي الـ QHD+ مثلًا والكلام بتاع عيله النوت الكبيرة ولا كمان الشاشة Dynamic Amoled زي الـ Note 10 .. علشان برده سامسونج تقدر تعملك نوت بسعر مقبول.
واخيرا الشاشة مفيش اعلان رسمي عن نوع طبقة الحماية اللي موجوده عليها .. بس الشاشة بتيجي متركب عليها سكرينة اول ما تطلع الموبايل من العلبة بتاعته.
الاداء :-
وهنا سامسونج برده شغلت دماغها .. واخدت المعالج الفلاج شيب بتاعها بتاع سنة 2018 الي كان موجود في الـ Galaxy Note 9 وحطته في الموبايل ده .. وهو معالج اكسينوس 9810 .. تكنولوجيا 10 نانو .. بس طبعا حطت الواجهة الجديدة بتاعتها الـOne UI 2.0 مع اندرويد 10 .. علشان تواكب السوق في 2020، اكيد مش هتسيب الواجهة قديمة عشان تشغل دماغها.
رأيي في المعالج ده .. هو حاجة كدا في النص .. يعني اقل شوية من المعالجات الرائدة القديمة الي هي كيرن 970 وسناب دراجون 845 .. وفي نفس الوقت اعلى شوية من معالجات الفئة المتوسطة الموجودة حاليًا زي الكوالكوم سناب دراجون 730G.
ويعني مفيش مشاكل من استخدام المعالج ده علشان بردو نوفر شوية في الفلوس .. ونقدر نعمل نوت بسعر مقبول .. وحقيقي المعالج فعلا مش وحش خالص .. يعني مفيش اي تقصير خالص من ناحية الاداء في الموبايل ده.
بالنسبة للاداء الرسومي .. ببجي اتشتغلت على Ultra HDR واللعبة شغالة بكفاءة مش بتهنج زي النوت 9 .. كول اوف ديوتي مش معمولها اوبتميزشن مع المعالج ده وشغالة على اعدادات جرافيك High بس وبردة شغالة كويس.
بس اللي صدمني في الموبايل ده ان فورت نايت مش مظبطة امورها مع المعالج ده واللعبة كتبتلي اني مقدرش اشغل اللعبة عليه .. طبعا في طرق بتشغل اللعبة بشكل غير رسمي .. اتمنى فورت نايت تاخد بالها وتظبط امورها مع المعالج ده .. خصوصا ان الـNote 10 Lite هيبيع كتير .
القلم ومميزاته :-
القلم هنا بلاستيكي وزنه خفيف .. بيشحن جوا جسم الموبايل .. مفيش ولا مرة فصل شحن معايا فيها اثناء استخدامي ليه.
القلم فيه مميزات كتير اهمها طبعا الكتابة على شاشة الموبايل المطفية علشان وانت في الشارع وعاوز تكتب حاجة بسرعه تعملها حفظ وتبقا تبص عليها بعدين.
القلم بردة تقدر تفعل وضع الترجمة الفورية فيه .. انك تقف على كلمة يترجمهالك فورا .. حلوة اوي ديه من غير ما تعمل كوبي وتخرج من التطبيق وتروح لـ جوجل ترانسليشن مثلًا عشان تترجم.
وكمان تقدر من خلال الزرار الموجود في القلم انك اما تدوس عليه جامد يفتح تطبيق معين .. وتقدر تتحكم في ابلكيشن الكاميرا وانت بتتصور وتصور من خلال القلم .. او تقدر تقلب مثل في الاغاني الي انت بسمعها او توقف وتشغل من خلال القلم.
تقدر تشغل البوينتر بتاع القلم او تقفله انا عن نفسي مخليه .. مديني احساس نفسي حلو كدا .. وكمان ميزة انك تقص حته من الشاشة وتكتب عليها وتبعتها لحد .. جامدة جدا ومهمة جدا.
مش محتاج اوضحلك ان الكتابة على الشاشة بالقلم حلوة جدا مفيش اي تنازل فيها عن الـ Note 10 Plus .. نفس حساسية اللمس .. لما تقل ايديك في الكتابة خطك بيتقل ولما تخفف خطك بيخف .. ده غير انك بتتحكم في حجم ولون الخط زي ما انت عاوز.
حقيقي تجربة القلم كويسة جدا في الموبايل ده .. بس السؤال هنا بقى .. بعد ما عرفت كل حاجة تقريبا عن القلم .. هل انت محتاجه ؟ هل بعد ما تجيب موبايل بقلم .. هتفضل تستخدم القلم علطول .. ولا كام يوم حلاوة روح وبعد كدا هتنسى انك عندك قلم جوا جسم الموبايل ؟ اقعد مع نفسك واحسم الموضوع ده لانه هيفرق جدا في قرار شرا الـNote 10 Lite خصوصًا ان الموبايل مش احسن اختيار وقيمة في السعر ده.
عوامل الامان :-
بصمة الـ Note 10 Lite مدمجة بالشاشة زيها زي الـ A71 .. بصمة ضوئية مش سريعة وممكن تغلط .. وبصمة الوش كمان مقبولة ولكنها بردة مش اسرع حاجة.
الموبايل مفيهوش لمبة اشعارات كالعادة .. خاصية الـAlways On Display ممتازة وبتعرضلك كل ايقونات الاشعارات الي جاتلك على الشاشة المطفية.
صوت الموبايل جاي من سماعة واحدة تحت على اليمين .. صوتها متوسط .. والتجسيم بتاعه مقبول .. بس كان يفضل صوت ستريو .. بس بردة لازم تنازلات.
صوت سماعات المكالمات عالي وممتاز .. واخيرا صوت سماعات الاذن بمدخل الـ3.5 مللم الي الحمد لله موجود ومتشلش .. صوته حلو جدا.
واخيرا بالنسبة لقوة الشبكة .. فالشبكة هنا متوسطة .. مش افضل حاجة للأسف .. واسأل اي حد معاه نوت 9 .. بتشتكي من الشبكة اد ايه .. وكون فكرة حيادية عن موضوع الشبكة.
البطارية :-
نفس بطارية الـ A71 .. بطارية ضخمة على الورق 4500 مللي أمبير .. بس للأسف ولا السوفت وير موفر ولا المعالج الرائد القديم موفر .. وبالتالي استحملت معايا 5 ساعات و شوية شاشة مفتوحة .. باستخدام متوسط مش قاسي اوي يعني .. بس يعني مش ازمة كبيرة.
وده لإن الشاحن المرفق الـ25 واط بيشحن البطارية بالكامل في ساعة وربع بس !
الكاميرات :-
وهنا نرجع تاني نشوف العدسات الـ12 ميجا بيكسل المميزة اوي بتاعت سامسونج .. 3 عدسات موجودين ف المربع ده.
الاساسية 12 ميجا بيكسل فتحة عدسة F/1.8 فيها مثبت بصري .. والتانية 12 ميجا بيكسل للزوم 2 اكس بفتحة عدسة F/2.4 وفيها بردة مثبت بصري .. والتالتة 12 ميجا بيكسل فتحة عدسة F/2.2 للتصوير الواسع.
والسيلفي المعهود الموجود ف الـA71 اللي بدقة 32 ميجا بيكسل فتحة عدسة F/2.2.
بشكل عام اداء الـ 3 كاميرات الخلفية عجبوني جدا .. الوايد انجل ممتازة والعدسة الزوم تفاصيلها محترمة بس لحد 2X فقط .
انما العدسة الرئيسية .. الاداء ممتاز فعلا في كل الاضاءات تقريبا .. وفعلا اداء الكاميرات يليق بأسم سامسونج ويليق بموبايل بالسعر ده .
لما جربت افضل موبايل من ناحية الكاميرات بنفس سعر وهو الشاومي مي نوت 10 جمب السامسونج نوت 10 لايت .. وضح جدا تفوق سامسونج في معالجة الوان الصور .. الصور من بعيد فعلا شكلها احلى بفرق ملحوظ .. انما طبعا لما تعمل زوم كتير في الشاومي هتلاقي تفاصيل اكتر بسبب الكاميرا الـ 108 ميجا بيكسل .
بالنسبة للسيلفي نفس اداء A71 بالظبط .. لازم اضاءة كويسة جدا علشان تاخد صور سيلفي كويسة .. لو اضاءة مش مناسبة هتلاقي الصورة بهتانه ومفيهاش تفاصيل كتير .
بالنسبة لتصوير الفيديوهات .. فموبايل Samsung Note 10 Lite بيصور 4K لحد 60 فريم في الثانية بس طبعا ثبات التصوير مش بيتشغل على الـ 60 فريم وبيشتغل على الـ 30 فريم .. وبشكل عام راضي جدا عن اداء تصوير الفيديوهات بالموبايل ده خصوصا ان السيلفي كمان بتصور فيديوهات 4K زي الـ A71 .
لو عاوز تشوف الصور والفيديوهات المتصورة بالموبايل شوف الفيديو الموجود في أخر المقالة .
سعر الموبايل :-
سعر الموبايل الرسمي 9000 جنية للنسخة الوحيدة الموجودة 128 جيجا مع 8 جيجا رام وينفع تركب شريحتين اتصال او شريحة وكارت .
الرأي النهائي :-
رأيي النهائي في النوت 10 لايت .. هو تركيبة جديد اننا نشوفها من سامسونج .. ولولا اسم النوت والقلم الي مع الموبايل ده كان هيعاني جامد ف المبيعات.
فملخص الكلام .. تشتري النوت 10 لايت .. لو انت مستخدم قديم للنوت و كنت عاوز تعمل ابجريد بس حقيقي مش هينفع معاك تدفع 17 الف في نوت 10 بلس .. ساعتها تشتري النوت 10 لايت ب 9 الاف جنية وانت باشا.
تشتري النوت 10 لايت لو نفسك تجرب القلم .. وحقيقي شايف انك هتسخدمه فعلا كل يوم .. واخيرا تشتري النوت 10 لايت لو عاوز موبايل واجهة او موبايل شيك .. حتى لو خامته بلاستيك .. بس يظل نوت وعليه اسم سامسونج وهيديلك واجهة كويسة في المجتمع.
بشكل شخصي .. عجبني القلم .. عجبتني الشاشة .. الاداء كويس مش وحش والكاميرا كمان مقبولة جدا .. بس معجبتنيش البطارية .. معجبنتيش البصمة .. ومعجبنيش ان الموبايل ده 128 جيجا بس .. في ظل ان كل المنافسين بيقدموا مساحة 256 جيجا وكمان خاماتهم من الزجاج !
Comments