مراجعة Samsung Galaxy S20 FE – هل هو موبايل الاحلام من سامسونج ؟!

أكتر حاجتين بحبهم في موبايلات سامسونج هما الشاشة والكاميرات .. بيكونوا في حته تانيه لوحدهم .. النهاردة هنراجع موبايل Galaxy S20 FE .. النسخة اللي براجعها دلوقتي هي الـExynos الـ4G اللي نزلت مصر .. هنعرف النهارده كل حاجه عن الموبايل .. ايه اللي عجبني فيه وايه اللي معجبنيش !


الكاميرات :-

من أكتر الحاجات المبهرة في الموبايل هي الكاميرات .. الموبايل جاي بـ3 كاميرات في الظهر .. الأساسية 12 ميجا بيكسل فتحة عدسة F/1.8 مع مثبت بصري .. التانية 8 ميجا بيكسل فتحة عدسة F/2.4 للزوم 3X حقيقي وبيوصل 30X بالسوفت وير مع مثبت بصري .. الأخيرة 12 ميجا بيكسل فتحة عدسة F/2.2 للتصوير الواسع ودي مش بتيجي مع مثبت بصري.

السيلفي بيجي بدقة 32 ميجا بيكسل مع فتحة عدسة F/2.2 موجود في ثقب الشاشة الصغير أوي ده.

سوفت وير الكاميرات ميقلش أي حاجة عن الـFlagships التانية .. ميزة الـSingle Take موجودة .. الـLive Focus Video موجودة .. الـPro Video Mode موجود .. بس الموبايل للأسف اخره في تصوير الفيديوهات 4K بس.

بصراحة الصور مبهره .. حقيقي مبهره مش هزار .. الموبايل ده واخد نفس Look معالجة الوان الـNote 20 Ultra .. معتقدش أن في حد مش هيعجبه الكاميرات اللي هنا .. وأنا بصراحة شايفها أهم ميزة في الموبايل ده.

الألوان حلوة جدًا .. مُشبعة بدرجة مظبوطة جدًا .. اللي هي مش Over وفي نفس الوقت عينك ترتحلها وتحس أنك مش عايز تعمل Edit للصور .. هترفعها على الـSocial Media زي ما هي كده.

العدسة الـWide Angle متقلش أي حاجة عن جمال العدسة الرئيسية في التفاصيل ومعالجة الألوان .. العدسة الـTelephoto كويسة جدًا برده .. هي اه مش بنفس قوة الـNote 20 أكيد .. تحسها مصغره عنه.

الـDinamic Range فوق المُمتاز بصراحة في العدسة الرئيسية وكمان في الـUltra Wide .. ولما صورت في الإضاءات الداخلية .. لاقيت لسه كل حاجة كويسة جدًا .. التفاصيل، ألوان الصورة، لون البشرة .. كلو مظبوط.

هتحتاج الـNight Mode لما الإضاءة تقل شوية وتحتاج تصور شخص .. هتلاقي صورة الـNight Mode بتدمج أكتر من صورة مع بعض علشان تطلعلك تفاصيل أكتر وصورة Sharp أكتر ومُجملًا بتبقى أحسن.

بالنسبة للسيلفي فا كالعادة كويس جدًا في الشمس .. لون بشرة مُمتاز .. بس الـPortrait معجبنيش أوي كنت حاسس أن في أحسن من كده .. ومُجملًا الصور السيلفي اللي الموبايل ده بيطلعها كويسة جدًا ومش أقل في حاجة عن الـFlagships التانية ولا حتى الـNote 20 Ultra .. أدائها معقول وألوانها وتفاصيلها معقولة جدًا.

يعني مقدرش أقول أن السيلفي اللي هنا في الموبايل عيب .. هو بس ساعات بيتأخر في الـLive Focus على ما يقدر يحدد الوجه بالظبط في الـPortrait .. وأكيد في الظلمة هتحتاج تشغل الـNight Mode علشان تقدر تاخد صور أحسن بفرق ملحوظ عن الصور العادية.

بالنسبة بقى لتصوير الفيديوهات بالموبايل فالموبايل ده يعتبر معاه كاميرات Flagship حقيقية .. الموبايل بيصور 4K مع 60 فريم و30 فريم وبيصور على 1080p مع 60 فريم برده وبيقدر يصور Super Slow-Motion .. وطبعًا مفيش جودة التصوير الـ8K اللي شوفناها في موبايلات سامسونج الـFlagships التانية.

العدسة الرئيسية فيها مُثبت بصري حقيقي، والعدسة الـTelephoto بتاعت الـZoom برده فيها مثبت بصري .. العدسة الـUltra Wide هي الوحيدة اللي بتعتمد على المثبت الإلكتروني .. وتقدر تتنقل بين العدسات وانت بتصور عادي .. والزوم في الفيديوهات بيوصل لحد 12X ده أخره.

شوف صور وفيديوهات متصورة بالموبايل في فيديو المراجعة !


التصميم :-

فاكر تصميم Note 20 العادي مش Ultra ؟ .. هو بالظبط اللي هنا .. فريم معدني مع ظهر من البلاستيك المطفي علشان متحسش بمشكلة مع الخامات ولا تتجرح ولا تتخربش .. وأصلًا في إختبار المتانة اللي إتعمل للـNote 20 العادي البلاستيك إستحمل أكتر من الـNote 20 Ultra الزجاج.

التصميم شكله حلو واللون حلو وجديد والمسكة حلوة في الإيد .. لكن مفيش إحساس فخامة الزجاج الخلفي بتاع سامسونج .. ده لو إنت من مستخدمين Flagships سامسونج وكنت بتمشي من غير جراب.

شكل الكاميرا الخلفية متاخد برده من Note 20 العادي ولكن على حجم أصغر شوية، مش واخد نص الظهر زي نوت 20 .. وشكلها عاجبني جدًا .. وكنت كل شوية بجيب الضوء على عدسات الكاميرا الخلفية علشان أشوف الـReflections اللي بتحصل على الدوائر المحاوطة بعدسات الكاميرا الخلفية.

الموبايل وزنه كويس .. حوالي 190 جرام والتخانه معقوله 8.4 ملم .. البروز بتاع الكاميرات مش صغير برده .. فا خلي بالك وابقى ركب الجراب .. والموبايل مقاوم للماء والأتربة بشهادة IP68.

الـCurves في الموبايل حلوة .. هتعجبك وتحس بدورانات مظبوطة أوي في كل حواف الموبايل .. الموبايل في ايدك هيكون كويس جدًا والمسكة في الإيد لطيفة جدًا.


الشاشة :-

شاشة بتيجي بقياس 6.5 بوصة من نوع Super AMOLED بدقة FHD+ مع تردد 120 هيرتز والشاشة هنا مفيهاش أي Edges .. مع ثقب صغير أوي للسيلفي .. أصغر من اللي موجود في Note 20 Ultra.

مبدئيًا عندي تعليق على حواف الشاشة .. كبيرة حاجة بسيطة .. مُختلفة خالص عن حواف موبايلات سامسونج الرائدة .. بصراحة كنت شايف إنها لو قلت عن كده هتبقى ممتازة.

الموبايل مش بيدعم الـQHD+ .. كلنا عارفين إنها بتاكل البطارية .. الميزة الأهم عندي هي الـ120 هيرتز .. واللي أصلًا سامسونج مش بتشغلها غير مع الـFHD+ .. فأنا معنديش مشاكل هنا بدون ما ندخل في نقاشات كتيرة.

بس في حاجة بقى .. ألوان الشاشة هنا مُختلفة عن شاشات الـDinamic AMOLED اللي في موبايلات سامسونج الرائدة .. مش هقدر أشرحلك الفرق بس هتحسه أول ما تمسك الموبايل .. هتحس إن شاشته رايحه أكتر لكون إنها شاشة فئة متوسطة مش شاشة فلاج شيب .. وده مش معناه إن الشاشة وحشة .. لا هي كويسة جدًا جدًا .. أنا بس بحاول اوصلك الفرق.

وكالعادة هتحس الشاشة مصفره شوية أول ما تشتري وتستخدم الموبايل .. إدخل إعدادات الشاشة وخليها Cold أكتر او أظبطها على الدرجة اللي تريح عينك.

السطوع كمان حسيته مش عالي اوي .. هو مُمتاز ومش هيضايقك بس هو مش بيوصل لأقصى درجات السطوع اللي كان بيوصل ليها موبايلات سامسونج الرائدة.


الأداء :-

ديه النسخة الـ4G بمعالج Exynos 990 .. الـSD865+ منزلش مصر كالعادة .. وحقيقي أنا زعلان شوية .. الـS10 Lite كان نازل بمعالج كوالكوم وكان بيقدم تركيبة أداء محترمة جدًا واستهلاك بطارية محترم جدا وسخونية قليلة جدا .. يمكن علشان الـS20 FE المعالج بتاعه SD865 بيدعم الجيل الخامس وده كان هيزود من سعره.

ندخل في المفيد .. أداء S20 FE كويس جدًا .. مش هتحس معاه بأي مشاكل .. كنت مشغل الـ120 هيرتز علطول وإتبسطت من الأداء .. ولكن في حاجة غريبة .. انا حاسس أن الأداء أقل حاجة بسيطة أوي من Note 20 Ultra اللي جربته .. ومش فاهم أزاي .. المفروض الإتنين نفس المعالج ونفس نوع ذاكرة التخزين ونفس التردد الـ120 هيرتز .. ولكن النتيجة النهائية إن الـS20 FE أقل حاجة بسيطة في سرعة الواجهة والأداء من الـNote 20 Ultra.

مازال موضوع السخونية موجود بسبب المعالج الـExynos 990 اللي أشتكيت منها في مراجعة Note 20 Ultra موجود في الـS20 FE .. ولكن الموضوع هنا أهدى شوية بسبب بلاستيك الظهر اللي بيشتت الحرارة أسرع.

ومازال إستهلاك البطارية مُبالغ فيها جدًا .. البطارية بتطير حرفيًا .. وهتكلم عنها في فقرة البطارية كمان شوية.

الأداء الرسومي كويس جدًا .. لعبة ببجي بتشتغل على Ultra HDR بدون أي مشاكل .. لعبة كول اوف ديوتي بتشتغل على اعدادات جرافيك Very High .. والأداء الرسومي عمومًا مُمتاز على الموبايل.


البطارية :-

بطارية بحجم 4500 مللي أمبير .. من رقمها تقول معقولة .. ولكن للأسف مع المعالج اللي هنا وتشغيل الـ120 هيرتز صعب تكمل يوم معاك .. بتعمل حوالي 4 ~ 5 ساعات شاشة مفتوحة بالعافية ومن غير إستخدام تقيل .. حاجة تزعل.

واللي يزعل أكتر أن الموبايل بيدعم شحن سريع بس مش اوي .. 25 واط بس .. وقولنا ماشي زيه زي أخوه نوت 20 عادي .. ولكن الشاحن المُرفق في العلبة 15 واط بس .. أعتقد هيشحنها في ساعة ونص ويمكن أكتر .. أنا مجربتش الشاحن للأسف .. بس ليه حركة الشاحن دي .. ده حتى الـGalaxy M51 معاه شاحن 25 واط .. ليه كدا !

ولكن الحمد لله .. الموبايل بيدعم الشحن اللاسلكي بقوة 15 واط كمان بيدعم الشحن اللاسلكي العكسي بقوة 4.5 واط.


عوامل الأمان وعناصر اخرى :-

بصمة مُدمجة بالشاشة Optical مش Ultra Sonic .. ومش أسرع حاجة .. أداءها مقبول .. الـFace Unlock سرعته مقبولة برده .. مش طيارة ومش بطيء.

الموبايل جاي بواجهة سامسونج One UI 2.1 المليانة مميزات .. ميزة الـAlways On Display .. الـDark Mode .. دعم خاصية الـNFC .. الموبايل بيدعم ميزة الـDeX اللي شرحتها في مراجعة نوت 20 الترا لتوصيل الموبايل بشاشة لاسلكيًا.

الموبايل ده جاي بسماعات Stereo .. يعني سماعة المكالمات بتشتغل معاك علشان تطلع صوت Stereo عالي .. والحقيقة الصوت هنا ستريو ولكنه مش بدرجة العلو اللي متعود عليها من Flagships سامسونج .. تحسه صوت طالع من سماعة واحدة بس متوزع صح وخلاص.

الموبايل بيدعم ميزة تسجيل المكالمات واللي بتهم ناس كتير .. وللأسف شالوا منه مدخل الـ3.5 ملم علشان يبقى أقرب لكونه Flagship مش فئة متوسطة.

بالنسبة لقوة شبكات الإتصال والـWiFi .. فهي فوق المتوسطة .. ولكنها لسة مش ممتازة .. وده من واقع تجربتي وتجربة المستخدمين لـ نوت 20 الترا اللي بيجي بنفس المعالج.


سعر الموبايل :-

  • نسخة 128 جيجا مع 8 جيجا رام بسعر رسمي 12 الف جنية

وطبعًا بينفع تركب كارت ميموري بحجم 1 تيرا مع شريحتين إتصال من الجيل الرابع في نفس الوقت.

الموبايل عليه هدايا محترمة في فترة الحجز المُسبق .. شاشة 32 بوصة من سامسونج بدقة HD .. مع كارت ضمان لإستبدال الشاشة مجانًا لأول مرة لو الشاشة اتكسرت خلال 12 شهر.


الرأي النهائي :-

في فترة الحجز المُسبق فالموبايل معاه هدايا بقيمة 3 الاف جنية .. وديه حاجة كويسة جدًا والموبايل كدا هيبقى واقف عليك بسعر مقبول جدًا .. سواء هتستخدم الهدايا او هتبيعها.

أما بعد فترة الحجز المُسبق فأنا شايف الموبايل ده مينفعش يفضل بـ12 الف جنية من غير هدايا لإن S20 Plus اللي انا شايف إنه أحسن من S20 FE موجود بسعر 13 الف جنية .. فأكيد هزود الف جنية وأخد الـPlus.

وأنا شايف ان الـS20 FE يعتبر في وجه نظري ما بين الـS20 العادي والـS20 Plus .. إنما لو سعر S20 FE نزل مثلا لـ10 الاف جنية بعد فترة هيكون مُنافس أكتر .. ولو حصل والسعر نزل بعد ما الحجز يخلص بفترة فكدا سعره هيكون قرب جدا للـS10 Lite.

نقاط تفوق S20 FE على S10 Lite :-

  • كاميرات أقوى بفرق ملحوظ
  • شاشة أفضل 120 هيرتز
  • شكل تصميم خارجي أشيك

نقاط تفوق S10 Lite على S20 FE :-

  • معالج أقوى من كوالكوم
  • إستهلاك بطارية أفضل

مميزات Galaxy S20 FE :-

  • كاميرات قوية جدًا
  • الشاشة ممتازة وSmooth جدًا
  • أداء معقول الى حدٍ ما
  • شكل تصميم شيك ومسكة في الإيد حلوة
  • شهادة الحماية ضد الماء
  • دعم الشحن الـWireless

عيوب Galaxy S20 FE :-

  • حواف الشاشة كبيرة جدًا
  • سطوع الشاشة مش الأفضل
  • إستهلاك البطارية سيء جدًا
  • سرعة الشحن مش الأفضل
  • سخونية ملحوظة في جسم الهاتف
  • الصوت الـStereo مش الأعلى
  • البصمة مش الأسرع
  • مدخل الـ3.5 مللي غير موجود

فيديو المراجعة :-

قد يعجبك أيضا...

Comments

جاري التحميل...