موبايل Galaxy S21 FE نزل مصر من فترة .. ووصلنا في موبيزل للتجربة، وده المفروض موبايل بيقدم تجربة رائدة .. ومن أهم الحاجات في تجربة موبايل رائد هي الكاميرات واللي هنقدملكم تجربة مطولة ليها، وكمان هنوضح المميزات والعيوب الكاملة وتجربة الإستخدام الكاملة للموبايل.
التصميم :-
تصميم الموبايل زي باقي موبايلات سامسونج مفيهوش جديد .. شكله من بعيد رايح ناحية سلسلة Galaxy S21 لكن لما تمسكه في إيدك هتحس بجودة البلاستيك قريبة من Galaxy A52s 5G.
الموبايل ظهره من البلاستيك لكن الفريم معدن .. والموبايل مسكته كويسة في الإيد، وزنه 177 جرام وتخانته 7.9 مللي ومقاوم للماء بشهادة IP68 لعمق .15 متر لمدة 30 دقيقة.
بإختصار تصميم الموبايل رايح ناحية الموبايلات الرائدة لكن خاماته خامات فئة متوسطة، مع فريم محترم ومقاومة للماء والغبار.
الشاشة :-
شاشة الموبايل 6.4 بوصة Dinamic AMOLED من الجيل الثاني بدقة FHD+ مع تردد بيوصل لـ120 هيرتز .. شاشة رائدة تقرب لشاشاة S21 و S21 Plus .. ألوانها ممتازة ومشبعة وسطوعها ممتاز.
ومع ذلك فالشاشة فيها عيوب أكيد .. الأول هو ان ثقب الكاميرا السيلفي كبير شوية وأكبر من الموجودة في الموبايلات الرائدة .. الثاني الحافة السفلية للشاشة كبيرة شوية.
أخر حاجه ان الموبايل بيجي من غير سكرينه، لازم تشتري سكرينه اول ما تشتريه، لكن عليه طبقة حماية Corning Gorilla Glass Victus ودي طبقة حماية محترمة.
الأداء :-
نسخة السوق المصري من S21 FE نزلت بمعالج اكسينوس 2100 بتكنولوجيا 5 نانو ميتر .. نفس المعالج اللي نزل قبل كده وجربناه في سلسلة Galaxy S21 الرائدة.
المعالج اتحسن كتير عن الجيل اللي فات 990 ولكن لسه المعالج أقل بفرق مش قليل عن معالجات سناب دراجون من ناحية الأداء الفعلي، بس الفرق 5% مثلًا بينهم.
معالج اكسينوس 2100 أداءه في S21 FE كويس .. بيحافظ على نفسه من السخونيه، ممكن يكون بيقلل ترددات المعالج لما بيوصل لمرحلة معينه علشان ميسخنش أوي.
الموبايل أداءه مش مختلف عن سلسلة S21 كلها، لكن تأخيره هو المشكلة، لإن اكسينوس 2200 الجديد نزل خلاص والكلام انه أفضل 40% عن اكسينوس 2100 ودخ فرق مش قليل.
ببجي بتشتغل على Ultra HDR بأداء كويس .. لكن في الفئة دي سناب دراجون 888 أقوى في تشغيل الألعاب من اكسينوس 2100 .. لكن الاكسينوس مش هيرخم عليك التجربة.
عوامل الأمان وعناصر اخرى :-
بصمة الإصبع مُدمجة في الشاشة .. هي Optical مش Ultra Sonic .. أداءها كويس ومش فارق كتير عن سلسلة Galaxy S21 بس لازم صباعك كله يكون موجود في المكان علشان الموبايل يفتح .. الـFace Unlock بسرعته كويسة.
الموبايل بيجي بواجهة سامسونج الجديدة One UI 4.0 المبنية على Android 12 اللي اتحدث فيها حاجات كتير زي Always On Display والـWidgets والـPhoto Editor والـLock Screen.
الموبايل فيه NFC .. الصوت Stereo ممتاز عالي والـBass محترم .. لكن مفيش طبعًا مدخل السماعات الـ3.5 مللي .. ماهو موبايل رائد بقى!
مستشعر التقارب شغال كويس والموبايل بيقفل الشاشة في الوقت المطلوب بدون أي مشاكل .. وكمان الموبايل بيدعم تسجيل المكالمات.
شبكات الـWi Fi أداءها حلو جدًا .. بس لازم تلقط الأول على الشبكة وبعدين أبعد براحتك هتلاقي الشبكة قوية مفيش مشاكل.
فيديو واجهة One UI 4.0 الجديدة :-
البطارية :-
بطارية بسعة 4500 مللي امبير .. رقمها كويس بس أداءها محبط شوية .. سامسونج مازالت بتعاني في نقطة البطارية، لو استخدامك متوسط البطارية هتكمل معاك يوم بالعافيه.
المحبط أكثر ان الموبايل أقصى سرعة شحن بيدعمها 25 وات .. وللأسف الشديد مفيش شاحن في علبة الموبايل .. بس النقطة الجميله انه بيدعم الشحن اللاسلكي بقدرة 15 وات.
منتظر من سامسونج ترفع سرعات الشحن علشان الموضوع رخم فعلًا .. يا تقدم بطارية قوية يا تقدم شاحن سريع يا تقدم الاتنين .. لكن ان الاتنين يكونوا ضعاف شيء مش لطيف.
الكاميرات :-
موبايل Galaxy S21 FE بيجي بـ3 كاميرا خلفية، الأساسية 12 ميجا بيكسل بفتحة عدسة F/1.8 بمثبت بصري، الثانية 8 ميجا بيكسل بفتحة عدسة F/2.4 فيها مثبت بصري بتعمل زوم حقيقي 3X او عن طريق السوفت وير 30X .. الثالثة 12 ميجا بيكسل بفتحة عدسة F/2.2 وهي Ultra Wide، والسيلفي 32 ميجا بيكسل F/2.2.
بعيدًا عن الأرقام، مفيش شك ان دائمًا كاميرات سامسونج بتكون ممتازة .. وفي S21 FE الصور واخدة الـLook بتاع عيلة S21 كلها، صور حلوة جدًا في الإضاءات العالية، معالجة ممتازة للصوت، كمية تفاصيل معقولة، وفي الإضاءه الداخلية الصور بتكون معقولة بس المعالجة بتاعتها مش أفضل حاجه.
الـPortrait جامد جدًا كالعادة، وكمان العدسة الـ3X بتاعت الزوم ممكن تاخد بيها صور Portrait لطيفة بنفس المعالجة .. لكنها كعدسة للزوم فا هي متواضعة شوية، في الزوم الـ3X الحقيقي بتطلع ممتازة جدًا، بس لما تعمل زوم عن طريق السوفت وير 30X هتلاقي التفاصيل ضعيفة.
اما عن الإضاءات الليلية في الوضع العادي وفي الـNight Mode فا لازم تثبت إيدك كويس في الـNight Mode علشان تاخد صورة مظبوطة، وفعلًا بيكون في تفاصيل أكثر في صوت الوضع الليلي.
العدسة الـUltra Wide كويسة نسبيًا، لكن بالليل هتلاقيها أقل من العدسة الرئيسية بشكل واضح .. انما العدسة الـZoom بتكون كويسة في الإضاءه الليلية عادي، والـNight Mode شغال في الـ3 عدسات.
بالنسبة للسيلفي فا هو محترم جدًا، بعيدًا عن أنه رايح شوية ناحية الفئة المتوسطة مش ناحية الموبايلات الرائدة ولكن أداءه معقول .. أقل حاجه بسيطة أوي عن S21، وفي النهاية الفرق مش محسوس أوي والأداء في S21 FE كويس بس بالليل لازم تستخدم الـNight Mode علشان تاخد تفاصيل في الصور.
بالنسبة لتصوير الفيديوهات بالموبايل فا هو بيصور على 4K مع 60 فريم في الثانية .. ومفيش جودة الـ8K زي باقي سلسلة الـS21 .. الموبايل فيه مثبت بصري على العدسة الأساسية والعدسة الـZoom وفيه مثبت إلكتروني في كل العدسات .. وطبعًا في Dual Recording وهو انك تقدر تصور بالعدسة الأمامية والخلفية في نفس الوقت.
سعر Galaxy S21 FE :-
- نسخة 128 جيجا مع 8 جيجا رام بسعر 13500 جنية مصري
تقدر تركب شريحتين إتصال من الجيل الخامس لكن مش بيدعم تركيب كارت ميموري
الرأي النهائي :-
الموبايل بيقدم تجربة شبه رائدة .. موبايل بين الفئة المتوسطة العُليا وبين الموبايلات الرائدة .. من ناحية الكاميرات والشاشة والأداء فا هو ممتاز .. بس اللي معجبنيش فيه أداء الـZoom في الكاميرا وأداء البطارية وسرعة الشحن الضعيفة .. وكمان انه 128 جيجا بس مش 256 جيجا .. بالإضافة الى سعره اللي مش لطيف أوي.
الموبايل اتظلم بسبب حاجتين .. الأول انه اتاخر لإنه من سلسلة S21 القديمة وخلاص سلسلة الـGalaxy S22 هتنزل قريب .. والتاني انه سعره مش منافس، لكن بسبب الضريبة والجمارك الجديدة اللي اتطبقت على أسعار الموبايلات فا كل الموبايلات عمومًا هتنزل غالية .. وعليك أنك تختار صح في الوقت المناسب.
Comments